Tnuꞌu vii tnuꞌu vaꞌa Jesucristo ma sukan ni kaxtnuꞌu tee ni yo nani Mateo ma
Tee janaꞌa tnaꞌa Jesucristo ma
1
Chaꞌa kúu tutu ndákaꞌan ja ka nani saꞌya tata ñayii janaꞌa ma,
te neꞌun yukan ni kenda Jesucristo ma.
Te Jesucristo ma chi ni kenda ya neꞌun saꞌya tata David ma,
te David ma chi saꞌya tata Abraham ma kúu de.
2 Te Abraham ma kúu yuva Isaac ma,
te Isaac ma kúu yuva Jacob ma,
te Jacob ma kúu yuva Judá ma jiꞌin ndaka‑ka ñani de ma.
3 Te Judá ma,
ni iyo saꞌya de jiꞌin ñaꞌa kúu Tamar ma,
te Fares ma jiꞌin Zara ma ka kuu de.
Te Fares ma kúu yuva Esrom ma,
te Esrom ma kúu yuva Aram ma.
4 Te Aram ma kúu yuva Aminadab ma,
te Aminadab ma kúu yuva Naasón ma,
te Naasón ma kúu yuva Salmón ma.
5 Te Salmón ma,
ni iyo saꞌya de jiꞌin ñaꞌa kúu Rahab ma,
te Booz ni yo nani de.
Te Booz ma,
ni iyo saꞌya de jiꞌin ñaꞌa kúu Rut ma,
te Obed ni yo nani de.
Te Obed ma kúu yuva Isaí ma.
6 Te Isaí ma kúu yuva rey David ma.
Te rey David ma,
ni iyo saꞌya de jiꞌin ñaꞌa ni yo kuu ñasiꞌi tee kúu Urías ma,
te Salomón ni yo nani de.
7 Te Salomón ma kúu yuva Roboam ma,
te Roboam ma kúu yuva Abías ma,
te Abías ma kúu yuva Asa ma.
8 Te Asa ma kúu yuva Josafat ma,
te Josafat ma kúu yuva Joram ma,
te Joram ma kúu yuva Uzías ma.
9 Te Uzías ma kúu yuva Jotam ma,
te Jotam ma kúu yuva Acaz ma,
te Acaz ma kúu yuva Ezequías ma.
10 Te Ezequías ma kúu yuva Manasés ma,
te Manasés ma kúu yuva Amón ma,
te Amón ma kúu yuva Josías ma.
11 Te Josías ma kúu yuva Jeconías ma;
maa tiempu ni ka jeka ñayii ñuu Babilonia ma ñayii ñuu Israel ma,
ni ka kâku Jeconías ma jiꞌin jaku‑ka ñani de ma.
12 Te nuu ni ka nde koo ñayii Israel ma ñuu Babilonia ma,
te ni iyo saꞌya tee kúu Jeconías ma,
te nani de Salatiel,
te Salatiel ma kúu yuva Zorobabel ma.
13 Te Zorobabel ma kúu yuva Abiud ma,
te Abiud ma kúu yuva Eliaquim ma,
te Eliaquim ma kúu yuva Azor ma.
14 Te Azor ma kúu yuva Sadoc ma,
te Sadoc ma kúu yuva Aquim ma,
te Aquim ma kúu yuva Eliud ma.
15 Te Eliud ma kúu yuva Eleazar ma,
te Eleazar ma kúu yuva Matán ma,
te Matán ma kúu yuva Jacob ma.
16 Te Jacob ma kúu yuva José ma,
yii ñaꞌa kúu María ma,
te siꞌi Jesús ma kúu ña,
te Jesús ma kúu iya nani Cristo ma iya ni tetniñu Suꞌsi ma.
17 Chukan kúu ja uxi kuun jichi ñayii ma kúu onde Abraham ma te onde David ma,
te uxi kuun‑ka jichi i kúu onde David ma te onde kivi kuan koo i ñuu Babilonia ma,
te uxi kuun‑ka jichi i ka kuu onde kivi kuan koo i ñuu Babilonia ma te onde kivi ni kâku Cristo iya ni tetniñu Suꞌsi ma.
Saꞌa ni kuu kivi ni kâku Jesucristo ma
(Lc 2:1-7)
18 Te saꞌa ni kuu kivi ni kâku Jesucristo ma.
Iyo suchi kúu María ma,
ndetu i ja tnandaꞌa i jiꞌin José ma,
te nuu ñatuu jin kueka tnaꞌa‑ka i ma,
te María ma,
ni niꞌi saꞌya i sukan ni kuni maa Xtumani Ndios ma.
Te ni jinitnuni José ma ja ñuꞌu saꞌya i ma.
19 Te José ma,
in suchi vaꞌa ini kúu i,
te ñatuu kúni i ja jin kaꞌan ndevaꞌa ñayii ma ja kuu María ma,
te chukan kúu ja jani ini i ja yuyuꞌu‑ni xndoo i suchi ma.
20 Te sukan jani ini i.
Sani te nuu ni kixi i ma,
te ni jininuu i ja ni kenda in ángel ni tetniñu Iya Tátnuni ma nuu iyo i ma,
te jiñaꞌa ángel ma:
―José saꞌya tata David,
má koyuꞌu ro ja kueka ro María suchi ko kuu ñasiꞌi ro ma,
vaa saꞌya i suchi ñuꞌu ma,
Saꞌya maa Xtumani Ndios ma kúu ya.
21 Te kâku saꞌya i ma,
te xnani ro ya Jesús,
vaa ja maa ya te jin kaku ñayii ñuu ya ma te ma jin kondiso kuechi‑ka i ―kúu ángel ma jiñaꞌa i.
22 Ndaka chaꞌa ni kuu,
sukan‑vaꞌa ko kuu sukan ni kaꞌan Iya Tátnuni ma nuu tee ni yo ndakaxtnuꞌu tnuꞌu ni yo waꞌa ya ma,
nuu ni kaꞌan de ma:
23 Jin kuni ni ja in suchi jaa,
kuꞌun saꞌya i,
te kâku in suchi yii,
te jin xnani i suchi ma Emanuel,
kúu de káꞌan de.
Te Emanuel ma kúni kaꞌan “Suꞌsi ma iyo jiꞌin o”.
24 Te ni ndoto José ma ja ni kixi i ma,
te ni saꞌa i sukan ni tatnuni ángel ni tetniñu Iya Tátnuni ma,
te ni jeka i María ma ja ko kuu ñasiꞌi i suchi ma.
25 Kovaa masu ni yo kixi i jiꞌin María ma,
chi ni yo ndetu i onde nuu ni kâku saꞌya María ma suchi xinañuꞌu ma,
te ni xnani José ma lulu ma Jesús,
sukan ni jiñaꞌa ángel ma.