Sani te onde chii tiaka ma,

te ni ndakan-taꞌvi Jonás ma nuu Suꞌsi Iya Tatnuni ma.

2 Te jiñaꞌa de:

Nuu ndóꞌo néni sa ma,

te ni ndakuneꞌe ñaꞌa sa,

vi Suꞌsi Iya Tátnuni,

te ni jinisoꞌo ñaꞌa ni.

Onde nuu ñunee sa chii tiaka ma,

nuu nee kuiti ma,

te ni ndakuneꞌe ñaꞌa sa,

te ni jinisoꞌo ni ja ni kaꞌan sa ma.

3 Ni skee ñaꞌa ni onde nuu kunu kunu-ka nuu ñuꞌu ndute mar ma,

Te ni skiꞌin,

ni skii ñaꞌa ndute ma,

nuu kunu xen-xeen ma.

4 Te ni jani ini sa:

“Jâ ni xtandiyo ñaꞌa ya nuu ya ma,

kuiti ja kuni-ka o veñuꞌu ii ya ma”,

káꞌán sa.

5 Te ndute ma,

onde ini anua sa a ni ndakonduu de,

te ni ndakonduu ñaꞌa nuu nee ma,

te onde xkuitnu ñuꞌu kaꞌa ndute ma ni ka kinuu tnaꞌa jiꞌin ixi xini sa a.

6 Te ni ñuꞌu kuaꞌan,

ni ñuꞌu vee ñaꞌa de jaꞌa yuku ma,

Te ñuꞌú ma,

ni kokon ñaꞌa i,

te ni jasi vavaꞌa ñaꞌa i ni-kani ni-jika,

Kovaa maa ni,

Suꞌsi maa sa,

Suꞌsi Iya Tátnuni,

maa ni ni ndatava ñaꞌa onde yavi nuu ñunee sa ma.

7 Te nuu ve kuita ini anua sa ma,

ni ndakaꞌán ñaꞌa sa,

vi Suꞌsi Iya Tátnuni,

te ja ni jikan-taꞌvi sa ma ni kenda onde nuu maa ni onde ini veñuꞌu ii ni a.

8 Ñayii ka ndikin tnaꞌa ja masu Suꞌsi ka kuu ma,

ka xndoo ñaꞌa i ndijin ja kúndaꞌvi ini ñaꞌa ni ma.

9 Kovaa saña chi ndataa sa kiti kaꞌmi sa nuu ni,

Te kata sa ja ndachiñuꞌu ñaꞌa sa ja ndakuan-taꞌvi sa nuu ni,

Te ndataa sa ja ni skuiso sa ma.

Vaa maa ni,

Suꞌsi,

saꞌa ni ja jin kaku sa nuu ja uꞌvi ma.

Sukan ni jiñaꞌa de nuu Iya Tátnuni ma.

10 Sani te ni tetniñu Suꞌsi ma tiaka ma nuu iyo ñuꞌú ma,

te ni nana ndoꞌo ti Jonás ma.