Jesús ma, ni xnaa ya kuechi in tee ñatuu kúu kanda de, te ni nduvaꞌa de
2
Te ni yaꞌa kivi ma,
te ni ndivi tuku Jesús ma ñuu Capernaum ma.
Te ni ka jinisoꞌo ñayii ma ja ni ndajaa ya ma.
Marcos 2:1-12
2 Te ni ka ndatnaꞌa kuaꞌa xeen ñayii ma,
te ûni ñatuu nde kánda‑ka yeꞌe ma ja jin koo ñayii ma.
Te ni jakondee ya káxtnuꞌu ya tnuꞌu maa ya ma.
3 Te ni ka kenda koo ñayii ma jiꞌin in tee ñatuu kúu kanda de.
Te kuun tee ka ndiso tee kuꞌu ma.
4 Kovaa ka iyo kuaꞌa xeen ñayii ma,
te ñatuu kúu jin kenda koo de jiꞌin tee kuꞌu ma onde nuu iyo Jesús ma.
Te ni ka ka koo de onde xini veꞌe ma,
te ni ka ndakana de vala xini veꞌe ma,
sukan‑vaꞌa ndanune,
te kuu jin skee de nuu yoxtnee tee kuꞌu ma onde nuu iyo Jesús ma.
5 Te nuu ni jini Jesús ma ja ka kukanu ini xeen de ya ma,
te jiñaꞌa ya nuu tee kuꞌu ma:
―Saꞌya sa,
ndaka kuechi ni ma jâ ni ka naa ―kúu ya jiñaꞌa ya.
6 Te tee ka skuaꞌa tnuꞌu ni kaxtnuꞌu Moisés ma,
ka iyo de yukan,
ka nukoo de,
te ka jani ini de:
7 “¿Navaꞌa káꞌan tee yaꞌa saꞌa?
Te tnuꞌu káꞌan de ya chi ñatuu játna ini Suꞌsi ma.
Vaa maa in‑ni Suꞌsi ma kuu xnaa kuechi o ma”,
ka kuu de ka kaꞌan de.
8 Kovaa Jesús ma chi jâ ni jinitnuni ya ndaka ja ka jani ini de ma,
te ni jikan‑tnuꞌu ya de:
―¿Navaꞌa ka jani ini ni sukan?
9 ¿Nde a kúu ja yii‑ka kuñaꞌa o tee kuꞌu a?
¿Yii‑ka ja kuñaꞌa o ja:
“Kuechi ni ma jâ ni ka naa”,
o xi yii‑ka ja kuñaꞌa o:
“Ndakoo ni,
te ndakeꞌen ni nuu ni katuu ni a,
te kuán noꞌo ni”?
10 Vitna te jin kuni ni ja saña ja kúu sa iya vee ñayivi ñuu ñayivi a,
iyo sa ja tatnuni sa ñuu ñayivi a,
sukan‑vaꞌa jin naa kuechi ñayii ma ―kúu ya jiñaꞌa ya.
Sani te jiñaꞌa ya tee kuꞌu ma:
11 ―Nuu ndijin káꞌan sa,
ndakoo ni,
te ndakeꞌen ni nuu ni katuu ni a,
te kuán noꞌo ni veꞌe ni ma ―kúu ya jiñaꞌa ya.
12 Sani te ni ndakoo de,
te ni ndakeꞌen de nuu ni katuu de ma,
te ni ndee de veꞌe Pedro ma meꞌñu ndaka ñayii ka iyo ma.
Sani te ndaka ñayii ka iyo ma,
ni ka saꞌvi‑nka ini i ja sukan ni kuu ma,
te ni ka jakondee i ka ndachiñuꞌu i Suꞌsi ma,
te ka kaꞌan i:
―Ñatuu nama uun ni ka jini o saꞌa ―ka kuu i ka kaꞌan i.
Jesús ma, ni ndatnuꞌu ya jiꞌin ñayii ka saꞌa ja uꞌvi ma
13 Sani te kuaꞌan Jesús ma in‑ka jichi yuꞌu mar ma.
Te ñayii ma chi ni jan koo i ni ka jan tuꞌva ñaꞌa i,
te maa ya chi ni kaxtnuꞌu ya tnuꞌu Suꞌsi ma.
Marcos 2:13-28
14 Te ichi nuu kuaꞌan ya ma,
te ni jini ya tee kúu Leví ma saꞌya tee kúu Alfeo ma,
vaa núkoo de ndákeꞌen yaꞌvi de xuꞌun noꞌo ñuu Roma ma nuu ndaka ñayii ka kivi koo ini ñuu ma,
ja jin xiko i ndatniñu i nuyaꞌvi ma.
Te jiñaꞌa ya:
―Kondikin ñaꞌa ni ―kúu ya jiñaꞌa ya.
Te ni ndokuiñi tee kúu Leví ma,
te ni ndikin de ya.
15 Sani te ni kana Leví ma Jesús ma veꞌe de ma ja jin kaa de jiꞌin ya xita,
te kuaꞌa tee ka ndakeꞌen yaꞌvi xuꞌun noꞌo ñuu Roma ma,
jiꞌin kuaꞌa tna ñayii ñatuu ka saꞌa ja vaꞌa ma ka nukoo tna nuu mesa nuu núkoo Jesús ma jiꞌin tee ni kaji ya ja ka ndikin de ya ma.
Vaa kuaꞌa xeen ñayii ma ka ndikin ya.
16 Te jaku tee ka skuaꞌa tnuꞌu ni kaxtnuꞌu Moisés ma,
tee ni ka yo kuu fariseo ma,
ni ka jini de Jesús ma,
ja núkoo ya neꞌun ndaka ñayii yukan ma,
te ka jiñaꞌa de nuu tee ka ndikin ya ma:
―¿Navaꞌa teskuaꞌa ni a,
jaa de ndeyu jiꞌin kuiꞌna ka ndakeꞌen yaꞌvi xuꞌun a,
jiꞌin ndaka‑ka ñayii ñatuu ka saꞌa ja vaꞌa a?
―ka kuu de ka jiñaꞌa de.
17 Te ni jinisoꞌo Jesús ma,
te jiñaꞌa ya:
―Ñayii ka iyo vaꞌa ma chi ñatuu ka jiniñuꞌu i tee tatna ma,
chi yika‑ni ja ñayii ka kuꞌu ma.
Saña chi masu vee sa ja ndakana sa ñayii ka jani ini i ja ñayii vaꞌa‑ka ka kuu i ma chi vee sa ja ndakana sa ñayii ka ndakunitnuni i ja ka ndiso kuechi i ma ―kúu ya jiñaꞌa ya.
Ni kaxtnuꞌu Jesús ma navaꞌa ñatuu ka iyo ndite tee ka ndikin ya ma
18 In jichi,
te tee ka ndikin Juan ma,
jiꞌin tee ka kuu fariseo ma,
ka iyo ndite de,
sukan‑vaꞌa jin chiñuꞌu de Suꞌsi ma.
Te jaku ñayii ni jan koo nuu Jesús ma,
ka jiñaꞌa i:
―¿Navaꞌa tee ka ndikin Juan ma,
jiꞌin tee ka kuu fariseo ma,
ka iyo ndite de ka jikan‑taꞌvi de nuu Suꞌsi ma,
te tee ka ndikin ñaꞌa ndijin a chi ñatuu ka saꞌa de sukan?
―ka kuu i ka jiñaꞌa i.
19 Te Jesús ma chi ni ndakoneꞌe ya:
―¿Xi jin koo ndite ñayii ka iyo viko tnándaꞌa ma,
te vitna ja ka iyo‑ka i jiꞌin suchi yii tnándaꞌa ma?
Nú iyo‑ka suchi yii tnándaꞌa ma chi masu kuu ja jin koo ndite ñayii ma.
20 Kovaa kenda in kivi ja jin xtandiyo i suchi tnándaꞌa ma.
Nuna kenda kivi yukan,
sana jin koo ndite ñayii ma.
Ni kaxtnuꞌu Jesús ma ja in ja jaa ma chi masu ndaketnaꞌa i jiꞌin in ja tuꞌu ma
21 ’Ñatuu ni‑in ñayii ndásaꞌa in saꞌma tuꞌu te ndachuꞌun i in saꞌma jaa,
chi vaa saꞌma jaa ma chi ndatiyi i,
te kachi i ja tuꞌu ma,
te kaꞌvi‑ka teꞌnde i.
22 Ni masu tnaa o ndute uva yika ni juꞌni o ma in nuu ñií kiti jâ ni kuu kii iyo i ma,
vaa ndute uva ma chi saꞌa de ja teꞌnde ñií ma,
te skenaa o ndute uva ma jiꞌin ñií ma.
Chukan kúu ja tnaa o ndute uva yika ni juꞌni o ma in nuu ñií jaa ma ―kúu ya jiñaꞌa ya.
Jesús ma, ni kaxtnuꞌu ya nde a kanuu‑ka ja saꞌa o kivi ni tatnuni Suꞌsi ma ja ma jin satniñu ñayii ma
23 In kivi ni tatnuni Suꞌsi ma ja ma jin satniñu ñayii ma,
te kuaꞌan Jesús ma in neꞌun itu triu,
te tee ka ndikin ya ma,
ka tnuꞌu de yoko triu ma te ka jaa de kuan koo de.
24 Te tee ka kuu fariseo ma,
saꞌa ka jiñaꞌa de Jesús ma:
―¡Kondeꞌya ni!
¿Navaꞌa ka saꞌa tee ka ndikin ñaꞌa a sukan?
¿Xi ñatuu jini ni ja masu kuu saꞌa o sukan kivi ni tatnuni Suꞌsi ma ja ma jin satniñu o ma?
―ka kuu de ka jiñaꞌa de.
25 Kovaa maa ya chi jiñaꞌa ya:
―¿Ñatuu nama ni ka kaꞌvi ni sukan ni ka saꞌa David ma,
jiꞌin tee ka ndikin tnaꞌa jiꞌin de ma,
in jichi ma?
Vaa ñatuu ndenu jin niꞌi de ja jin kaa de ma,
te ka kokon de ma.
26 Te kivi ni yo kuu Abiatar ma tee tátnuni nuu sutu ma,
te ni kenda David ma veꞌe Suꞌsi ma,
te ni jaa de xtatila iyo nuu Suꞌsi ma,
te suni ni waꞌa tna de ni ka jaa ndaka tee kuan koo jiꞌin de ma,
te vitna ja maa‑ni tee ka kuu sutu ma kuu jin kaa ma ―kúu ya jiñaꞌa ya.
27 Te suni jiñaꞌa tna ya:
―Ni saꞌa Suꞌsi ma in kivi ni tatnuni ya ja ma jin satniñu ñayii ma.
Kovaa masu ni kuni Suꞌsi ma ja jin ndoꞌo jin neni ñayii ma,
ja kuechi kivi ma.
28 Chukan kúu ja saña ja kúu sa iya vee ñayivi ñuu ñayivi a,
iyo sa ja tatnuni tna sa siki ja kivi ni tatnuni Suꞌsi ma ja ma jin satniñu ñayii ma ―kúu ya jiñaꞌa ya.