In kivi ni tatnuni Suꞌsi ma ja ma jin satniñu ñayii ma, ni ndasavaꞌa Jesús ma in tee ni yichi ndaꞌa de
3
Ni kivi Jesús ma in‑ka jichi ini veñuꞌu luluu ma,
te yinee in tee,
te in ndaꞌa de ma chi ni yichi i.
Marcos 3:1-19
2 Te tee ñatuu ka kunimani nuu Jesús ma,
ka jito yuꞌu de ya nú ndasavaꞌa ya tee yukan ma,
sukan‑vaꞌa jin niꞌi ini de naxe jin xtekuechi de ya,
vaa kivi ni tatnuni Suꞌsi ma ja ma jin satniñu ñayii ma kúu kivi yukan.
3 Te jiñaꞌa Jesús ma nuu tee ni yichi ndaꞌa ma:
―Ndokuiñi ni,
te jinkuiñi ni meꞌñu a ―kúu ya jiñaꞌa ya.
4 Te ni jikan‑tnuꞌu ya nuu tee ka iyo ma:
―¿Nde a iyo ja kuu saꞌa o kivi ni tatnuni Suꞌsi ma ja ma jin satniñu o a?
¿Ja vaꞌa ma xi ja uꞌvi ma?
¿Saꞌa o ja koteku in ñayii,
xi saꞌa o ja na kûu i?
―kúu ya jiñaꞌa ya.
Kovaa tee yukan chi ñatuu ni ka kaꞌan de.
5 Jesús ma chi ndeꞌya ya,
te ni ndakiti ini ya nuu tee ka iyo ma.
Te ni kuxii ini ya,
ja ñatuu ka kuni de ja jin jakuꞌni ini de ma.
Te jiñaꞌa ya tee ni yichi ndaꞌa ma:
―Ndaskuili ni ndaꞌa ni a ―kúu ya jiñaꞌa ya.
Te tee yukan chi ni ndaskuili de ndaꞌa de ma,
te ni nduvaꞌa.
6 Kovaa nuu ni ka nde koo tee ka kuu fariseo ma,
te ni ka kejaꞌa de ka ndatnuꞌu tnaꞌa de jiꞌin tee ka ndikin tee kuu Herodes ma,
naxe jin kaꞌni de Jesús ma.
Ni ka ndikin kuaꞌa ñayii Jesús ma yuꞌu mar ma
7 Jesús ma chi kuaꞌan ya jiꞌin tee ka ndikin ya ma yuꞌu mar ma,
te ka ndikin kuaꞌa ñayii ñuu Galilea ma kuan koo i.
8 Nuu ni ka jinisoꞌo ñayii ma ndaka milagru ni saꞌa ya ma,
te ni jan koo tna kuaꞌa ñayii ñuu Jerusalén ma,
jiꞌin ñayii ni‑kaꞌnu ñuu Judea ma,
ja jin kuni i ya,
suni ñayii ñuu Idumea ma,
jiꞌin ñayii in‑ka yuꞌu yute Jordán ma,
jiꞌin ñayii ñuu Tiro ma,
jiꞌin ñayii ñuu Sidón ma.
9 Kovaa Jesús ma chi ni sacargu ya tee ka ndikin ya ma ja na koo tuꞌva in barcu,
sukan‑vaꞌa máko jin kuexniꞌni xeen ñaꞌa ñayii ma,
10 chi vaa ndaka ñayii ka kuꞌu ma,
ûni ka jakoxtnaꞌa i siki ya ma ja na jin kakiꞌi i ya,
sukan‑vaꞌa jin nduvaꞌa i,
sukan ni ndasavaꞌa ya kuaꞌa xeen ñayii ka kuꞌu ma.
11 Te ni ka jini tachi ma,
te ni ka jinkuiñi jiti i nuu ya,
te ka kayuꞌu i ka jiñaꞌa i:
―Ndijin chi Saꞌya Suꞌsi ma kúu ni ―ka kuu i ka jiñaꞌa i.
12 Kovaa Jesús ma chi ni ndonda xeen ya nuu i,
sukan‑vaꞌa máko jin kaꞌan i na in kúu ya ma.
Ni kaji Jesús ma uxi uu tee tetniñu ya ja jin kaxtnuꞌu de tnuꞌu vii tnuꞌu vaꞌa Suꞌsi ma
13 Te ni kaa Jesús ma in yuku,
te ni kana ya ndaka ñayii kúni maa ya ma,
te ni ka ndututu i.
14 Te ni kaji ya neꞌun ndaka ñayii ma uxi uu tee jin kondikin ya ma.
Te ndaka tee yukan ni xnani ya apóstol,
(ja kúni kaꞌan “tee tetniñu maa ya ja jin kaxtnuꞌu de tnuꞌu maa ya ma”).
Te jin koo de jiꞌin ya,
te kaxtnuꞌu ya tnuꞌu maa ya ma,
te sana jin ndakaxtnuꞌu de nuu ñayii ma.
15 Te jin konevaꞌa de tnuꞌu ndee tnuꞌu ndatnu,
ja sukan jin ndeneꞌe de tachi ka yinee ini anua ñayii ma.
16 Ndaka tee yaꞌa ka kuu uxi uu tee ni ndakaji Jesús ma:
Simón ma kúu in tee ni ndaxsama ya ja nani de,
te ni nukonani de Pedro.
17 Te Santiago ma jiꞌin ñani de Juan ma saꞌya tee kúu Zebedeo ma,
te ni xnani ya de Boanerges,
ja kúni kaꞌan “saꞌya ja kaꞌndi ma”,
vaa kuechi ja inuyachi yuꞌu de ma.
18 Te Andrés ma,
jiꞌin Felipe ma,
jiꞌin Bartolomé ma,
jiꞌin Mateo ma,
jiꞌin Tomás ma,
jiꞌin tee nani Santiago ma saꞌya tee kúu Alfeo ma,
suni tna Tadeo ma,
jiꞌin Simón tnaꞌa tee ka nani cananita tee ni ka yo kanaa jiꞌin tee ñuu Roma ma,
19 jiꞌin Judas Iscariote tee keꞌen‑suꞌva Jesús ma.
Ni kaxtnuꞌu Jesús ma naxe ndoꞌo ñayii káꞌan ndevaꞌa ja kuu Xtumani Ndios ma
20 Sani te ni kivi Jesús ma ini veꞌe ma,
te in‑ka jichi ni ka ndututu kuaꞌa xeen ñayii ma,
te ni ñatuu kúu kaa ñukuun ya xita jiꞌin tee ka ndikin ya ma.
Marcos 3:20-35
21 Te ni ka jini tnaꞌa kuikin ya ma,
te ni ka kenda koo i,
ja jin nu koo i jiꞌin ya,
chi vaa ka kaꞌan i ja jâ ni nduneé ya.
22 Te suni tee ka skuaꞌa tnuꞌu ni kaxtnuꞌu Moisés ma,
ja ka iyo de ñuu Jerusalén ma,
te ni ka kenda koo de nuu iyo Jesús ma,
te saꞌa ka kaꞌan de:
maa Beelzebú suchi tátnuni nuu ndaka‑ka tachi ma,
yinee i ini anua Jesús ya,
te suu i waꞌa tnuꞌu ndee tnuꞌu ndatnu ja kéneꞌe de tachi ma,
ka kuu de ka kaꞌan de.
23 Te Jesús ma chi ni kana ya ndaka tee ka jani ini sukan ma,
te ni kaꞌan ya in tnuꞌu vijin,
te jiñaꞌa ya:
―¿Naxe kuu ndeneꞌe tachi nani Satanás ma tachi jiꞌin i ma?
24 Vaa nú in ñuu,
te ka iyo nanimaa ñayii ka ndakiti ini nuu tnaꞌa i ma,
te ¿naxe kuu jin koo kaꞌnu ndaka i ma?
25 Te suni maa i kúu jiꞌin ñayii ka iyo in‑ni veꞌe ma,
te nú jin ndakiti ini nuu tnaꞌa i ma,
te ¿naxe kuu jin koo kaꞌnu ndaka i?
26 Sukan tna tachi ma,
nuna jin ndakanaa maa i ma,
masu kuu jin koo kaꞌnu i,
te masu jin kundee i nawa jin saꞌa i ñuu ñayivi a,
suꞌva jin xnaa i maa i ma.
27 ’Ñatuu ni‑in ñayii ja kuu kivi i ini veꞌe kaꞌnu nevaꞌa in tee ndatnu xeen te xtandee i nawa ni sakuiꞌna tee ndatnu xeen ma,
nú masu ja xinañuꞌu‑ka kuꞌni i de.
Onde sukan,
sana kuu ndaxtandee i nawa ni sakuiꞌna de ma.
28 ’Ja ndaa káꞌan sa ja Suꞌsi ma chi sakanu ini ya ndaka kuechi ñayii ma,
jiꞌin ndaka ja uꞌvi ka kaꞌan i ma.
29 Kovaa ñayii káꞌan ndevaꞌa ja kuu Xtumani Ndios ma chi masu sakanu ini ya i chi suꞌva ndakuiso kuechi‑ka maa i,
te sukan koo i ni‑kani ni‑jika ―kúu ya jiñaꞌa ya.
30 Sukan jiñaꞌa Jesús ma,
chi vaa ndaka maa tee yukan chi ni ka kaꞌan de ja yinee tachi ma ini anua ya ma.
Ni kaꞌan Jesús ma nde ñayii kúu siꞌi ya jiꞌin ñani ya jiꞌin kuꞌva ya
31 Te ni ka kenda koo siꞌi Jesús ma,
jiꞌin ñani ya ma,
kovaa ni ka kendoo ña ichi keꞌe ma,
te ni ka tetniñu ña in ñayii ja na kana i ya.
32 Te ñayii ka nukoo xiñi Jesús ma ka jiñaꞌa nuu ya ma:
―Siꞌi ni ma,
jiꞌin ñani ni ma,
ka iyo i keꞌe ma,
te ka ndanduku ñaꞌa i ―ka kuu i ka jiñaꞌa i.
33 Te ni ndakoneꞌe ya:
―¿Na in kúu siꞌi sa ma,
jiꞌin ñani sa ma,
ka jani ini ni?
―kúu ya jiñaꞌa ya.
34 Te ndeꞌya ya ndaka ñayii ka nukoo xiñi ya ma,
te jiñaꞌa ya:
―Ndaka maa ñayii yaꞌa ka kuu siꞌi sa a,
jiꞌin ñani sa a,
35 chi vaa ndevaꞌa‑ni ñayii ja saꞌa i sukan játna ini Suꞌsi ma,
ñayii yukan kúu ñani sa ma,
jiꞌin kuꞌva sa ma,
jiꞌin siꞌi sa ma ―kúu ya jiñaꞌa ya.