Ni kaꞌan Jesús ma in tnuꞌu vijin tee ni saka triu ma
4
In‑ka jichi ni kejaꞌa Jesús ma káxtnuꞌu ya tnuꞌu ya ma nuu ñayii ma yuꞌu mar ma.
Te ni ka ndututu kuaꞌa xeen ñayii,
te chukan kúu ja ni kaa Jesús ma in nuu barcu iyo nuu ndute ma,
te ni jinkoo ya,
te ka iyo ñayii ma yuꞌu ndute ma.
Marcos 4:1-20
2 Te ni kejaꞌa ya káꞌan ya kuaꞌa tnuꞌu vijin,
te in tnuꞌu vijin yaꞌa ni kaꞌan ya,
te jiñaꞌa ya:
3 ―Jin koninisoꞌo ni ja káꞌan sa a.
In tee,
ni kee de kuan saka de triu.
4 Te ja ni saka de ma,
jaku ni ka jinkava ichi jika de ma,
te ni ka kenda koo lasaa ma,
te ni ka jaa ti.
5 Te jaku‑ka ni ka jinkava neꞌun yuu ma,
nuu masu iyo kokon ñuꞌú ma.
Triu yukan chi ni ka jite yachi i,
chi vaa masu ñuꞌú kokon ni ka niꞌi i ma,
6 kovaa nuu ni jinu kandii ma,
te ni ka kayu i,
te ni ka yichi i,
chi vaa masu ni ka niꞌi yoꞌo vaꞌa i.
7 Te jaku‑ka triu ma ni ka jinkava neꞌun iñu ma,
te ni ka jaꞌnu iñu ma,
te ni ka skueꞌne i triu ma.
Te chukan kúu ja ñatuu ni ka kuu triu ma.
8 Kovaa jaku tnaꞌa ja ni ka jinkava nuu ñuꞌú vaꞌa ñuꞌú kokon ma,
te triu yukan chi ni ka jaꞌnu i,
te naꞌnu naꞌnu yoko ni ka kana koo i,
te ni ka chitu vaꞌa i.
Sava yoko i ma ni ka chitu oko uxi (30) triu,
jiꞌin uni xiko (60) triu,
te sava‑ka yoko i ma chi cientu triu ni ka chitu i ―kúu ya jiñaꞌa ya.
9 Sani te jiñaꞌa tna Jesús ma:
―Nde ni iyo soꞌo ja jin koninisoꞌo ni,
te jin koninisoꞌo vaꞌa ni ―kúu ya jiñaꞌa ya.
Ni kaxtnuꞌu Jesús ma navaꞌa ni kaꞌan ya tnuꞌu vijin ma
10 Nuu ni kukuee‑ka ma,
te nuu ni kendoo maa‑nka Jesús ma jiꞌin ñayii ka iyo yatni‑ka ya ma jiꞌin ndi‑uxi uu tee ka ndikin ya ma,
te ni ka jikan‑tnuꞌu i nawa kúni kaꞌan tnuꞌu vijin ni kaꞌan ya ma.
11 Te ni ndakoneꞌe ya:
―Suꞌsi ma,
jâ ni kaxtnuꞌu ya nuu ndijin naxe tatnuni ya ma.
Kovaa nuu ñayii ñatuu ka kandija ma chi kuñaꞌa o ndaka kuenda tnuꞌu vijin,
12 sukan‑vaꞌa visi na jin kondeꞌya‑ka i,
kovaa ma jin kuni i,
te visi na jin koninisoꞌo‑ka i,
kovaa ma jin jakuꞌni ini i,
chi vaa ñatuu ka kuni i ja jin ndakokuiñi i te jin ndakani jin ndakaꞌvi ini i te jin ndandikin i Suꞌsi ma te sakanu ini ya kuechi i ma ―kúu ya jiñaꞌa ya.
Ni kaxtnuꞌu Jesús ma nawa kúni kaꞌan tnuꞌu vijin tee ni saka triu ja ni kaꞌan ya ma
13 Te jiñaꞌa ya:
―¿Ñatuu ka jakuꞌni ini ni tnuꞌu vijin yaꞌa?
¿Naxe jin jakuꞌni ini ni ndaka‑ka tnuꞌu vijin ja káꞌan sa a?
14 Te tee sáka triu ma chi sukan kúu in tee káxtnuꞌu tnuꞌu vii tnuꞌu vaꞌa Suꞌsi ma kúu de.
15 Ka iyo ñayii ka kuu sukan ka kuu triu ni ka jinkava ichi ma,
chi vaa ka jinisoꞌo i tnuꞌu vii tnuꞌu vaꞌa Suꞌsi ma,
kovaa jínu ka jinisoꞌo i ma,
te kénda tachi nani Satanás ma,
te xtandiyo i tnuꞌu ni ka jakun‑nee ini anua ñayii ma,
te ñatuu ka kandija‑ka i tnuꞌu Suꞌsi ma.
16 Te jaku ñayii ma chi sukan ka kuu triu ni ka jinkava neꞌun yuu ma ka kuu i.
Ka jinisoꞌo i tnuꞌu vii tnuꞌu vaꞌa Suꞌsi ma,
te sii ini ka jan‑taꞌvi i,
17 kovaa ñatuu ka niꞌi yoꞌo vaꞌa i,
te ñatuu kúu jin konukuiñi vaꞌa i.
Te nú ka ndoꞌo ka neni i,
xi ka sondikin ñaꞌa i ja kuechi tnuꞌu vii tnuꞌu vaꞌa Suꞌsi ma,
sani te ñatuu ka kandija‑ka i tnuꞌu Suꞌsi ma.
18 Jaku‑ka ñayii ma chi sukan ka kuu triu ni ka jinkava neꞌun iñu ma ka kuu i.
Ka jinisoꞌo i tnuꞌu vii tnuꞌu vaꞌa Suꞌsi ma,
19 kovaa ndaka tniñu iyo ñuu ñayivi yaꞌa,
ka xndi ini xeen i,
te ka ndi ini xeen i ja jin koo xuꞌun i,
te ka ndiyo ini i ja jin konevaꞌa i ndaka ndatniñu ma,
te ndaka chaꞌa,
kívi ñaꞌa i te xndaꞌvi ñaꞌa i,
te ka ndunaa i tnuꞌu vii tnuꞌu vaꞌa Suꞌsi ma,
te chukan kúu ja ñatuu kúu ja jin saꞌa i sukan kúni Suꞌsi ma.
20 Kovaa in jichi‑ka ñayii ma chi ka jinisoꞌo i tnuꞌu vii tnuꞌu vaꞌa Suꞌsi ma,
te ka kandija i,
te vivii ka saꞌa i sukan kúni Suꞌsi ma.
Ñayii yaꞌa chi sukan ka kuu triu ni ka jinkava nuu ñuꞌú vaꞌa ma,
sukan ka kuu i.
Jaku i ma ka kuu sukan ka kuu yoko triu ja ni ka waꞌa i oko uxi (30) triu ma,
te jaku‑ka i ma ka kuu sukan ka kuu yoko triu ja ni ka waꞌa i uni xiko (60) triu ma,
te jaku‑ka i ma ka kuu sukan ka kuu yoko triu ja ni ka waꞌa i cientu triu ma ―kúu ya jiñaꞌa ya.
Ni kaꞌan Jesús ma in tnuꞌu vijin siki in ja ndúꞌva ja xtnuu i nuu o
21 Suni jiñaꞌa ya:
―¿Na in ñayii,
ja xnduꞌva i in ñuꞌu,
te keꞌen i,
te chinee i chii kajoo ma xi ichi chii jito i ma?
Ñaꞌa chi in ja ndúꞌva ñuꞌu ma chi koxtnee i in nuu sukun,
sukan‑vaꞌa xtnuu vaꞌa i.
Marcos 4:21-41
22 Suni maa i kúu ja ndaka ja iyo yuꞌu ma chi ndatuu i,
te ndaka ja iyo yuꞌu ja ñatuu ka jini o ma chi kenda kivi ja jin kuni ndaka o sukan kaa sukan iyo ma.
23 Nde ni iyo soꞌo ja koninisoꞌo ni,
te koninisoꞌo vaꞌa ni ―kúu ya jiñaꞌa ya.
24 Suni jiñaꞌa ya:
―Jin koninisoꞌo vaꞌa ni,
te jin ndasaꞌa ni kuenda nawa káꞌan sa a,
vaa ndaka ja vaꞌa ka saꞌa ka kuu nuu tnaꞌa o ma,
te sukan ndataa Suꞌsi ma,
te suꞌva kuaꞌa‑ka ndataa ya nuu o.
25 Vaa ñayii nevaꞌa kuaꞌa‑ka ja vii ja luu ni skutaꞌvi ñaꞌa Suꞌsi ma chi suꞌva niꞌi kuaꞌa‑ka i.
Kovaa ñayii ñatuu nawa nevaꞌa i ma chi suꞌva xtandiyo ya onde jaku ja nevaꞌa i ma ―kúu ya jiñaꞌa ya.
Ni kaꞌan Jesús ma in tnuꞌu vijin sukan jaꞌnu triu ma
26 Jesús ma chi ni kaꞌan tna ya:
―Suni nuu tatnuni Suꞌsi ma chi sukan kúu in tee sáka triu nuu ñuꞌú ma kúu.
27 Visi kixi de jakuaa ma te ndito de nduu ma,
kovaa triu ma chi jite i,
te jaꞌnu i,
te ni masu jini maa de naxe kúu i,
28 chi vaa kúu maa i nuu ñuꞌú ma,
vaa xinañuꞌu jite i kuenda tnuꞌu ja yiꞌi kúu i,
te jaꞌnu i,
te saa kána yoko i.
Sani te kuee‑ka ma,
te saa ka chitu yoko i ma jiꞌin triu ma.
29 Te saa nú ni jija i te ve kuaan i,
sani te jaꞌnde de,
vaa jâ ni kenda kivi ndututu i ma ―kúu ya jiñaꞌa ya.
Ni kaꞌan Jesús ma in tnuꞌu vijin in ndikin tnu mostaza
30 Suni jiñaꞌa Jesús ma:
―¿Na nde a kúu jin sketnaꞌa o ja inuu kúu i jiꞌin sukan tatnuni Suꞌsi ma,
ka jani ini ni?
31 Sukan kúu in ndikin tnu mostaza ja skee o nuu ñuꞌú ma kúu ja tatnuni Suꞌsi ma,
vaa in ja luluu tiꞌi‑ni kúu i neꞌun ndaka‑ka ndikin ja iyo ñuu ñayivi a,
32 kovaa nuna skee o i,
te jite i,
te ve kuaꞌnu i,
te kuu i in yutnu kuiꞌi,
te jaꞌnu xeen‑ka tnu sana ndaka‑ka ja ka saka ñayii ma nuu huerta i ma,
te naꞌnu xeen ka kuu ndaꞌa tnu ma,
ja onde lasaa ma chi kuu jin saꞌa ti taka ti neꞌun ndaꞌa tnu ma ―kúu ya jiñaꞌa ya.
Ni yo kaꞌan Jesús ma tnuꞌu vijin ma nuu ñayii ñatuu ka jan‑taꞌvi sii ini tnuꞌu ya ma
33 Te sukan kuaꞌa tnuꞌu vijin ni yo kaꞌan Jesús ma,
ja káxtnuꞌu ya tnuꞌu maa ya ma,
vaa ñatuu ni ka yo jan‑taꞌvi sii ini ñayii ma tnuꞌu ya ma.
34 Chukan kúu ja ñatuu nawa ni yo kaxtnuꞌu ndijin ya ma,
suꞌva ndimaa tnuꞌu vijin ni yo kaꞌan ya.
Te saa ni yo ndakaxtnuꞌu ya nuu maa in‑ni tee ka ndikin ya ma nawa kúni kaꞌan ja ni yo kaꞌan ya ma.
Jesús ma, ni ndasaꞌa nañii ya kajin yiꞌi ma jiꞌin ndute ma
35 Te nuu ve kunee kivi yukan,
te jiñaꞌa Jesús ma tee ka ndikin ya ma:
―Jín koo o in‑ka yuꞌu ndute ma ―kúu ya jiñaꞌa ya.
36 Te ni ka xndoo de ñayii ma,
te kuan koo de jiꞌin Jesús ma nuu barcu nuu ñunee ya ma.
Te suni ka ndikin‑ka ñaꞌa sava‑ka barcu ma.
37 Te ni jakondee yiꞌi xeen kajin,
te ni jakuꞌun kuaꞌa xeen ndute ini barcu ma,
ûni ve chitu de,
te ve saꞌvi tnu.
38 Kovaa Jesús ma chi ni chiꞌi ya in saꞌma xini ya te ni kixi ya ichi yata barcu ma.
Te ni ka xndoto de ya,
te ka jiñaꞌa de ya:
―Teskuaꞌa,
¿ñatuu ndí ini ni ja ve jin saꞌvi o nuu ndute a?
―ka kuu de ka jiñaꞌa de.
39 Te Jesús ma,
ni ndakoo ya,
te ni tatnuni ya nuu kajin yiꞌi ma jiꞌin nuu ndute ma,
te jiñaꞌa ya:
―Ndukuee.
Koo nañii ―kúu ya jiñaꞌa ya.
Te ni ndukuee kajin yiꞌi ma,
te nañii kuiti ni kuu.
40 Sani te jiñaꞌa Jesús ma nuu tee ka ndikin ya ma:
―¿Navaꞌa ka yuꞌu xeen ni?
¿Ni ñatuu jin kukanu ini‑ka ñaꞌa ni?
―kúu ya jiñaꞌa ya.
41 Kovaa ndaka tee ka ndikin ya ma chi ni ka yuꞌu xeen de,
te ni ka jakondee de ka jikan‑tnuꞌu tnaꞌa ndi‑in ndi‑in de:
―¿Na in kúu tee yaꞌa,
ja onde kajin yiꞌi a jiꞌin ndute ya,
ni ka kandija i ja káꞌan de a?
―ka kuu de ka kaꞌan de.