Ñayii ma ndandikin ichi Suꞌsi ma chi skenaa i maa i
13
Maa tiempu yukan‑ni ni jan koo jaku ñayii ni ka jan koto i Jesús ma.
Te ni ka ndakani i ja tee kúu Pilato ma,
ni jaꞌni de jaku tee ñuu Galilea ma,
te ni sakanuu de niñi tee ma jiꞌin niñi kiti ni ka jaꞌmi de nuu Suꞌsi ma.
2 Jesús ma,
jiñaꞌa ya:
―¿Ka jani ini ndijin ja sukan ni ka kuu tee ñuu Galilea ma kuechi ja ka ndiso kuechi‑ka de sana ndaka‑ka ñayii ñuu de ma?
3 Káꞌan sa ja ñaꞌa.
Te nuu ndijin káꞌan sa a,
nú ma jin ndakani jin ndakaꞌvi ini ni te jin ndakokuiñi ni te jin ndandikin ni Suꞌsi a chi jin skenaa ni maa ni ni‑kani ni‑jika.
4 ¿Xi ka jani ini ni ja jaꞌun uni (18) tee ni ka jiꞌi nuu ni jinkava veꞌe sukun ichi Siloé ma siki de ma,
ka ndiso kuechi‑ka de sana ndaka‑ka ñayii ka iyo ñuu Jerusalén ma?
5 Káꞌan sa ja ñaꞌa.
Kovaa nuu ndijin káꞌan sa a,
nú ma jin ndakani jin ndakaꞌvi ini ni te jin ndakokuiñi ni te jin ndandikin ni Suꞌsi a chi jin skenaa tna ni maa ni ni‑kani ni‑jika ―kúu ya jiñaꞌa ya.
Ni kaꞌan Jesús ma in tnuꞌu vijin ja kuu in tnu higo ñatuu ni kuun higo
6 Jesús ma,
ni kaꞌan ya in tnuꞌu vijin:
―In tee,
nevaꞌa de in tnu higo,
núkoo tnu neꞌun itu tnu uva de ma.
Te ni jaꞌan de ni jan koto de nú ni kuun higo ma,
kovaa ni‑in ñatuu ni ndaniꞌi de.
7 Chukan kúu ja ni jiñaꞌa de tee jito itu tnu uva de ma:
“Jini ni ja jâ ni kuu uni kuiya kíi sa kí koto sa tnu higo a nú ni kuun higo.
Kovaa ni a in ñatuu ni ndaniꞌi sa.
Kaꞌnde ni tnu,
vaa ¿navaꞌa ko satneñu tnu itu a,
te masu nawa kúun?”,
kúu de jiñaꞌa de.
8 Kovaa tee jito itu ma,
ni ndakoneꞌe de:
“Señor,
xndoo ni tnu kuiya yaꞌa‑ka.
Te ndaxtaya sa ñuꞌú xuu tnu a,
te ndatnaa sa jaꞌan xuu tnu a.
9 Xi saa sukan,
te kuun higo,
te nú ñaꞌa,
te kaꞌnde ni tnu”,
kúu de jiñaꞌa de.
―Saꞌa ni ndakani ya.
In kivi ni tatnuni Suꞌsi ma ja ma jin satniñu ñayii ma, Jesús ma, ni ndasavaꞌa ya in ñaꞌa ni iyo titoso
10 In kivi ni tatnuni Suꞌsi ma ja ma jin satniñu ñayii ma,
ni kenda Jesús ma ini veñuꞌu luluu ma,
te káxtnuꞌu ya sukan kúni Suꞌsi ma ja jin ko kuu ñayii ma.
11 Te iyo in ñaꞌa kuꞌu,
te jâ iyo jaꞌun uni (18) kuiya ja kuꞌu ña.
Te in tachi,
ni ndasaꞌa titoso i ña,
te ñatuu kúu ndundaa‑ka yata ña ma.
12 Nuu ni jini Jesús ma ña,
ni kana ya ña,
te jiñaꞌa ya:
―Ndijin,
jâ ni nduvaꞌa ni kueꞌe ndóꞌo ni a ―kúu ya jiñaꞌa ya.
13 Sani te ni sonee ya ndaꞌa ya yata ña ma,
te ora yukan,
te ni ndundaa yata ña ma,
te ni kejaꞌa ña ndáchiñuꞌu ña Suꞌsi ma.
14 Kovaa tee tátnuni veñuꞌu yukan,
ni ndakiti ini de,
vaa Jesús ma,
ni ndasavaꞌa ya ñaꞌa yukan in kivi ni tatnuni Suꞌsi ma ja ma jin satniñu ñayii ma,
te jiñaꞌa de ñayii ma:
―Iyo iñu kivi ja satniñu o a.
Ki koo ni kivi yukan ja jin nduvaꞌa ni,
te kivi ni tatnuni Suꞌsi ma ja ma jin satniñu o ma,
má ki koo ni ―kúu de jiñaꞌa de.
15 Te Iya Tátnuni ma,
ni ndakoneꞌe ya:
―Masu ka saꞌa ni ja ka kaꞌan ni a.
¿Ñatuu ka ndaji ndijin xndiki ni ma xi burru ni ma kivi ni tatnuni Suꞌsi ma ja ma jin satniñu o a,
ja jin koꞌo ti ndute?
16 Vaa ñaꞌa yaꞌa,
tnaꞌa Abraham ma kúu ña,
te tachi ma,
ni juꞌni i ña,
te jâ iyo jaꞌun uni (18) kuiya ja kuꞌu ña.
¿Xi ma kuu jin ndaxsiaa o ña nuu ndaꞌa tachi ma kivi ni tatnuni Suꞌsi ma ja ma jin satniñu o a?
―kúu ya jiñaꞌa ya.
17 Nuu ni kaꞌan Jesús ma sukan,
ndaka tee ñatuu ka kunimani nuu ya ma,
ni ka kukan‑nuu de.
Kovaa ndaka ñayii ma,
ka kutachi i ja ni ka jini i ja vaꞌa ja vii saꞌa ya ma.
Ni kaꞌan Jesús ma in tnuꞌu vijin in ndikin tnu mostaza
18 Jesús ma,
jiñaꞌa tna ya:
―¿Na nde a kuu jin sketnaꞌa o ja inuu kúu i jiꞌin sukan tatnuni Suꞌsi ma,
ka jani ini ni?
19 Sukan kúu in ndikin tnu mostaza ma ja luluu tiꞌi‑ni i ma te skee ñayii ma ini itu i ma,
te jite i,
te jaꞌnu in yutnu kuiꞌi,
te sukun sukun kúu tnu,
te onde lasaa ma,
ka saꞌa ti taka ti nuu ndaꞌa tnu ma,
sukan ko kuu ja tatnuni Suꞌsi ma ―kúu ya jiñaꞌa ya.
Ni kaꞌan Jesús ma in tnuꞌu vijin levadura ma
(Mt 13:33)
20 Sani te Jesús ma,
jiñaꞌa ya:
―¿Na nde a kuu sketnaꞌa jiꞌin sa sukan tatnuni Suꞌsi ma,
ka jani ini ni?
21 Káꞌan sa saꞌa,
ja sukan kúu levadura ma,
sukan ko kuu ja tatnuni Suꞌsi ma.
Vaa nú in ñaꞌa,
ni sakanuu ña levadura ma jiꞌin uni jichi ñujan triu ma,
te levadura ma ni‑kaꞌnu kivi i,
onde kundee i xsjaa i ni‑kaꞌnu ñujan ña ma.
Sukan ko kuu ja tatnuni Suꞌsi ma ―kúu ya jiñaꞌa ya.
Jín tnuñu o ja jin kivi koo o yeꞌe tuu ma
(Mt 7:13-14, 21-23)
22 Ichi kuaꞌan Jesús ma ñuu Jerusalén ma,
te káxtnuꞌu ya ndaka ñuu ichi kuaꞌan ya ma.
23 Te in tee,
ni jikan‑tnuꞌu de ya:
―Señor,
¿jaku‑ni ñayii jin ndaniꞌi taꞌvi?
―kúu de jiñaꞌa de.
Te ni ndakoneꞌe ya:
24 ―Jin tnuñu ni ja jin kivi koo ni yeꞌe tuu ma,
vaa káꞌan sa ja kuaꞌa ñayii jin kuni i ja jin kivi koo i,
te ma kuu jin kivi koo i.
25 Vaa nuna ndokuiñi iya xi‑veꞌe ma,
ja ndakasi ya yeꞌe ma,
nde ni ja ni ka kendoo ichi keꞌe ma,
jin skajan jin skajan ni,
te jin kuñaꞌa ni:
“Señor,
ndakune ni yeꞌe a.”
Kovaa ndakoneꞌe ya:
“Masu jini sa ndenu ve koo ni.”
26 Sani te jin kejaꞌa ni jin kuñaꞌa ni:
“¿Te masu kaa ni ka yo jaa,
ni ka yo jiꞌi o ma,
te ni yo kaxtnuꞌu ni tnuꞌu vii tnuꞌu vaꞌa nuu sa ichi nuu ka ndatnaꞌa sa ñuu sa ma?”
27 Kovaa ndakoneꞌe ya:
“Masu jini sa ndenu ve koo ni.
¡Kuán koo ni kuán koto ni nde ichi jin koo ni!
¡Ñayii ka saꞌa ja uꞌvi ma ka kuu ni!”
28 Sani te keneꞌe ñaꞌa ya ichi keꞌe ma,
te yukan jin ndandaꞌyu jin ndandaꞌyu ni,
te jin ndakandiꞌi jin ndakandiꞌi ni nuꞌu ni,
ja jin ndakani ini ni ja ñatuu ni ka kandija ni ya ma,
te jin kuni ni in‑ka nuu iyo Abraham ma jiꞌin Isaac ma jiꞌin Jacob ma jiꞌin ndaka tee ni ka yo ndakaxtnuꞌu tnuꞌu ni yo waꞌa Suꞌsi ma,
ja ka iyo de jiꞌin Suꞌsi ma nuu tátnuni ya ma.
29 Vaa ki koo ñayii ichi ninu ma,
ichi nuu vee ma,
ichi nuu kána kandii ma,
ichi nuu kée kandii ma,
sukan‑vaꞌa jin kunukoo i nuu mesa ja jin kaa jin koꞌo i jiꞌin ya nuu tatnuni ya ma.
30 Sani te jaku ñayii ka jani ini i ja masu ka ndanuu i vitna ma,
te suu i jin ko kuu ñayii ka ndanuu‑ka yukan,
te jaku ñayii ja ka kuni i ja xinañuꞌu‑ka jin ko kuu i vitna ma,
te sandiꞌi‑nka jin ko kuu i kivi yukan ―kúu ya jiñaꞌa ya.
Ni kuxii ini Jesús ma ja kuu ñuu Jerusalén ma
31 Sani te suni ni ka kenda koo tee ka kuu fariseo ma,
te ka jiñaꞌa de Jesús ma:
―Kuáꞌan ni in‑ka ñuu,
vaa tee kúu Herodes ma chi kúni de ja kaꞌni ñaꞌa de ―ka kuu de ka jiñaꞌa de.
32 Te ni ndakoneꞌe ya:
―Kuán koo ni,
te jin kuñaꞌa ni nuu ñukuii yukan ja:
“Vitna jiꞌin yutnee ma keneꞌe sa ini anua ñayii ma tachi ma te ndasavaꞌa sa ñayii ka kuꞌu ma,
te isa,
te jinu ja satniñu sa a.”
33 Kovaa vitna,
yutnee ma,
isa ma chi iyo‑ka ja saꞌa sa sukan saꞌa sa ma,
vaa masu kuu ja in tee ndakaxtnuꞌu tnuꞌu ni waꞌa Suꞌsi ma,
te masu kûu de ñuu Jerusalén ma.
34 ’¡Ñayii ñuu Jerusalén,
ja ka waꞌa‑yuu ni tee ka ndakaxtnuꞌu tnuꞌu ni waꞌa Suꞌsi ma onde ka jaꞌni ni de ma!
¡Te suni sukan ka saꞌa ni jiꞌin ñayii ni tetniñu ya nuu ni ma!
¡Na saa‑ka jichi ni kuni sa ja ndaxtutu ñaꞌa sa,
sukan ndaxtutu tila ma chili ti ma chii ndijin ti ma!
Kovaa ñatuu ni ka kuni ni.
35 Jin kuni ni ja veꞌe ni ma chi jin kendoo ndaꞌvi jin kendoo kee i.
Te káꞌan sa ja masu nde jin kuni‑ka ñaꞌa ni onde kenda kivi ja jin kaꞌan maa ni:
“¡Ja vaꞌa kúu iya vee nuu Iya Tátnuni ma!”
―kúu ya jiñaꞌa ya.