Máko jin ndanduku o naxe saꞌa naxe kúu in‑ka ñayii ma
(Lc 6:37-38, 41-42)
7
Te jiñaꞌa Jesús ma:
―Máko jin ndanduku ni naxe ka saꞌa ka kuu in‑ka ñayii ma,
sukan‑vaꞌa máko ndanduku Suꞌsi ma naxe ka saꞌa ka kuu maa ni a.
2 Vaa sukan ka kaꞌan ni ja jin kuu tnaꞌa ni ma,
te sukan ndakaꞌan tna Suꞌsi ma ja jin kuu maa ni,
te tnuꞌu ja ka jiñaꞌa ni nuu in‑ka tnaꞌa ni ma ndakaꞌan tna Suꞌsi ma nuu ni.
3 ¿Te navaꞌa ndeꞌya ni in miꞌi ñunee nuu tnaꞌa ni ma,
te ñatuu núkondeꞌya ni vitu kaꞌnu ñunee nuu maa ni a?
4 ¿Te navaꞌa jiñaꞌa ni nuu tnaꞌa ni ma:
“Taa ni tnuꞌu,
te tava sa in miꞌi ñunee nuu ni a”,
te vitna ja nuu maa ni a ñunee in vitu kaꞌnu ma?
5 Masu ndasaꞌa ni kuenda tnuꞌu káꞌan ni a,
vaa káꞌan ni te masu saꞌa ni sukan káꞌan ni ma.
Xinañuꞌu‑ka tava ni vitu kaꞌnu ñunee nuu maa ni a,
te sukan saa kuu kondeꞌya vaꞌa ni,
sukan‑vaꞌa kuu ndatava ni miꞌi ñunee nuu tnaꞌa ni ma.
Má jin kaxtnuꞌu‑ka o tnuꞌu vii tnuꞌu vaꞌa Suꞌsi a nuu ñayii ñatuu kúu ini i ja kandija i ma
6 ’Má jin kuaꞌa ni ja ii ma nuu la‑ina ma,
nasa jin ndakokuiñi ti te jin saꞌa kuechi jin saꞌa likin ñaꞌa ti.
Te má jin tnaa ni perla vivii ma nuu chikini ma,
nasa jin kuiñu ti.
Kúu ini Suꞌsi ma ja jin kakan o nawa ka jiniñuꞌu o ma
7 ’Jin kakan‑taꞌvi ni nuu Suꞌsi ma,
te taa ya.
Jin nduku ni,
te jin niꞌi ni.
Jin skajan ni yeꞌe ma,
te ndanune,
te kuu jin kivi koo ni.
8 Vaa nú na in jikan ma chi niꞌi i.
Te ñayii ndúku ma chi niꞌi i.
Te ñayii skajan ma,
te ndanune yeꞌe ma,
te niꞌi i ja kúni i ma.
9 ’¿Nde ndijin ja kúu ni ñayii a,
te nuna kakan saꞌya ni ma in xtatila,
te chiꞌi ni in yuu ndaꞌa i?
10 ¿Xi kakan i in tiaka,
te kuaꞌa ni i in koo?
11 Vaa nú ndijin ja masu inuvaꞌa ini ni ma,
te ka jini ni jin kuaꞌa ni ja vaꞌa saꞌya ni ma,
¡nde‑ka tu ja Yuva o iya iyo onde andivi ma,
ûni skutaꞌvi ya ja vaꞌa ndaka ñayii kakan nuu ya ma!
Jín saꞌa o nuu ñayii ma sukan kúni o ja jin saꞌa ñaꞌa i maa o ma
(Lc 6:31)
12 ’Chukan kúu ja ndaka ja vaꞌa ka kuni ni ja jin saꞌa ñaꞌa ñayii ma,
te sukan jin saꞌa ni ja vaꞌa ja jin kuu i,
vaa nú saꞌa o saꞌa chi yikuu o saꞌa o ndaka sukan ni ka yo kaxtnuꞌu Moisés ma jiꞌin tee ni ka yo ndakaxtnuꞌu tnuꞌu ni yo waꞌa Suꞌsi ma.
Jín kivi koo o yeꞌe tuu ma
(Lc 13:24)
13 ’Jin kuꞌun ini ni ja jin kivi koo ni ichi yeꞌe tuu ma,
vaa yeꞌe jite ma jiꞌin ichi kaꞌnu ma,
ichi kiꞌin o nuu skenaa o maa o ma kúu,
te kuaꞌa xeen ñayii ka kivi koo yeꞌe yukan.
14 Kovaa yeꞌe tuu ma jiꞌin ichi kuiñi ma ichi kiꞌin o ja koteku o ni‑kani ni‑jika kúu,
te jaku‑ni ñayii ka kuu ñayii ka ndaniꞌi yeꞌe yukan.
Ja sukan ka saꞌa ka kuu ñayii ma, te ndakuni o i na in ka kuu i
15 ’Jin konee ni cuidado,
vaa ka iyo ñayii ka saꞌa tnuꞌu ja ñayii ka ndakaxtnuꞌu tnuꞌu ni waꞌa Suꞌsi ma ka kuu i,
te ka saꞌa i tnuꞌu ja sukan ka kuu ndikachi ma ka kuu i,
kovaa ini anua i ma chi sukan ka kuu ndivaꞌu ka kokon xen‑xeen ma,
sukan ka kuu i.
16 Te ja sukan ka saꞌa ka kuu i ma,
te jin ndakuni o na in ka kuu i.
¿Xi ndáxtutu o uva nuu tnu iñu ma,
xi ndáxtutu o higo nuu iñu xkuindivi ma?
17 Vaa ka jini ni ja ndaka yutnu kuiꞌi vaꞌa ma chi ka waꞌa tnu ndeꞌya vaꞌa,
kovaa ndaka yutnu kuiꞌi masu vaꞌa ma,
masu ka waꞌa tnu ndeꞌya vaꞌa.
18 Nú in yutnu kuiꞌi ja ndimaa ndeꞌya iya kúun,
te masu kuu kaꞌan o ja in yutnu kuiꞌi vavaꞌa kúu tnu.
Vaa ni a in yutnu kuiꞌi ja kúun ndeꞌya vavaꞌa,
te kúun tna ndeꞌya iya ma.
Te saꞌa,
te ka jini o nú yutnu vaꞌa xi masu yutnu vaꞌa kúu tnu.
19 Te chukan kúu ja yutnu kuiꞌi masu kúun ndeꞌya vaꞌa ma chi teꞌnde tnu,
te kiꞌin tnu kayu tnu nuu ñuꞌu ndúꞌva ma.
20 Te suni sukan ka kuu tna ñayii ma.
Vaa ja ka saꞌa ka kuu i ma,
te ndakuni o na in ka kuu i,
nú ñayii vaꞌa xi ñayii uꞌvi ka kuu i.
Nde ñayii jin kivi koo nuu tatnuni Suꞌsi ma
21 ’Masu ndaka ñayii ka kaꞌan nuu sa a:
“Señor,
Señor” ma,
jin kivi koo nuu tatnuni Suꞌsi ma,
nú masu ja yika‑ni ja ñayii ka saꞌa sukan kúni Yuva sa Suꞌsi ma iya iyo onde andivi ma.
22 Kivi yukan kuaꞌa xeen i jin ndakaꞌan nuu sa a:
“Señor,
Señor,
¿masu ja maa ni,
te ni ka ndakaxtnuꞌu sa tnuꞌu maa ni a nuu ñayii ma?
¿Te masu ja maa ni,
te ni ka keneꞌe sa tachi ka yinee ini anua ñayii ma?
¿Te masu ja maa ni,
te ni ka saꞌa kuaꞌa sa milagru ma?”
23 Kovaa sani te ndakuñaꞌa sa nuu ñayii yukan:
“Masu nama uun ni jini ñaꞌa sa.
¡Kuán koo ni kuán jin ndiyo ni nuu iyo sa a!
¡Vaa ndijin chi ñayii ka saꞌa ja uꞌvi ma ka kuu ni!”,
kuñaꞌa sa i.
Ñayii ninisoꞌo te saꞌa i sukan káꞌan Jesús ma chi koo vaꞌa i
24 ’Ndevaꞌa‑ni na in na koninisoꞌo tnuꞌu yaꞌa te saꞌa i sukan káꞌan sa a,
te káꞌan sa ja ñayii jani vaꞌa ini kúu i,
sukan kúu in tee saꞌa veꞌe de siki nuu toto ma,
sukan kúu i.
25 Visi ni kuun savi ma te ni kee ndeñuꞌu yute ma,
te ni yiꞌi xeen tachi ma,
te ni jan kani ndee niꞌi ndute ma yika veꞌe ma,
kovaa masu ni kotuu veꞌe ma,
vaa siki toto ma yoxtnee i.
26 Kovaa nú na in koninisoꞌo tnuꞌu yaꞌa te ma saꞌa i sukan káꞌan sa a,
te ndakaꞌan sa ja in ñayii masu jani vaꞌa ini kúu i,
sukan kúu in tee ni saꞌa veꞌe de ma siki nuu ñuti ma,
sukan kúu i.
27 Vaa ni kuun savi ma,
te ni kee ndeñuꞌu,
te ni yiꞌi xeen tachi ma,
te ni jan kani ndee niꞌi ndute ma yika veꞌe ma,
te veꞌe kátuu nuu ñuti ma,
ni kotuu i,
te kuaꞌa xeen ja ni skenaa ñayii xi‑veꞌe ma ―kúu ya jiñaꞌa ya.
28 Te nuu ni jinu ni kaꞌan Jesús ma tnuꞌu yaꞌa,
te ñayii ma,
ni ka saꞌvi‑nka ini i sukan káxtnuꞌu ya ma.
29 Vaa maa ya chi ûni jini ya ja káxtnuꞌu ya ma,
te masu ni yo jani uu ni yo jani uni ini ya ja ni yo kaꞌan ya ma,
sukan ni ka yo jani uu ni ka yo jani uni ini tee ka skuaꞌa tnuꞌu Moisés ma.