Ni kaxtnuꞌu Jesús ma sukan jin saꞌa o ora ka chindee o ñayii ndaꞌvi ma
6
Te jiñaꞌa Jesús ma:
―Másu ko jin kuꞌun ini ni ja ora ka saꞌa ni ja vaꞌa ma,
te onde jin kuni ñaꞌa ñayii ma,
sukan‑vaꞌa jin ndachiñuꞌu ñaꞌa i.
Vaa nú sukan na jin saꞌa ni,
te masu nawa jin kutaꞌvi ni nuu Yuva o iya iyo onde andivi ma.
2 Chukan kúu ja nuna jin chindee ni ñayii ndaꞌvi ma,
má jin saꞌa ni ja jin kuni ndaka‑ka ñayii ma,
sukan ka saꞌa ñayii ka kutneñu maa i te masu ka saꞌa i ja ka kaꞌan i ma.
Vaa nú ka iyo i veñuꞌu lilikin ma xi nú ka iyo i ichi ma,
te sukan ka saꞌa i,
sukan‑vaꞌa jin kuni ñayii ma ja sukan ka saꞌa i ma te jin ndachiñuꞌu ñaꞌa i ma.
Ja ndaa káꞌan sa ja jâ ni ka niꞌi i ja jin kutaꞌvi i ma,
te masu nawa jin niꞌi‑ka i.
3 Kovaa ndijin,
nuna jin chindee ni ñayii ndaꞌvi ma,
má kuni ndaꞌa ni satni ma ja saꞌa ndaꞌa ni kuaꞌa ma,
4 sukan‑vaꞌa ñatuu na in kuni ja ni chindee ni ñayii ndaꞌvi ma,
te Yuva o iya iyo onde andivi ma ja ndeꞌya ya ja vaꞌa ni saꞌa ni ma visi ñatuu na ñayii ndeꞌya ñaꞌa ma,
chi maa ya saꞌa ja jin kuni ndaka ñayii ma ja vii ja vaꞌa ndataa ya nuu ni ma.
Ni kaxtnuꞌu Jesús ma sukan jin kakan‑taꞌvi o nuu Suꞌsi ma
5 ’Te ora jikan‑taꞌvi ni ma,
máko kuu ni sukan ka kuu ñayii ka kaꞌan te masu ka saꞌa i ma,
vaa ñayii yaꞌa chi ka jatna ini i ja jin konukuiñi i te jin kakan‑taꞌvi i ini veñuꞌu lilikin ma jiꞌin nuu ka ndatnaꞌa ichi ma,
sukan‑vaꞌa jin kuni ñayii ma sukan ka saꞌa i ma te jin ndachiñuꞌu ñaꞌa i.
Ja ndaa káꞌan sa ja ñayii ka saꞌa sukan ma jâ ni ka niꞌi i ja jin kutaꞌvi i ma,
te masu nawa jin niꞌi‑ka i.
6 Kovaa ndijin,
ora jikan‑taꞌvi ni ma,
ndivi ni ini veꞌe ni ma,
te kasi ni yeꞌe ni ma sukan‑vaꞌa ñatuu na in kuni ñaꞌa,
te kakan‑taꞌvi ni nuu Yuva ni Suꞌsi ma.
Vaa Yuva ni iya ndeꞌya ja vaꞌa saꞌa ni ma visi ñatuu na ñayii ndeꞌya ñaꞌa ma,
chi maa ya saꞌa ja jin kuni ndaka ñayii ma ja vii ja vaꞌa ndataa ya ma.
7 ’Te ora jikan‑taꞌvi ni ma,
máko ndakaꞌan ndakaꞌan‑ni ni tnuꞌu masu ka jiniñuꞌu ma,
sukan ka saꞌa ñayii ñatuu ka kukanu ini Suꞌsi ma,
vaa ka jani ini i ja kuechi ja kuaꞌa tnuꞌu ka kaꞌan ka kaꞌan i ma,
te kunisoꞌo‑ka Suꞌsi ma.
8 Máko jin saꞌa ni sukan ka saꞌa i ma,
vaa visi ñatuu jin kakan‑taꞌvi‑ka ni nawa ka jiniñuꞌu ni ma,
kovaa Yuva o Suꞌsi ma chi jâ jini ya nawa ka jiniñuꞌu ni.
9 Chukan kúu ja,
ndijin chi saꞌa jin kakan‑taꞌvi ni nuu Suꞌsi ma:
Yuva sa ja iyo ni andivi a,
jayiñuꞌu kóo nuu maa ni a.
10 Ka kuni sa ja kenda kivi ja tatnuni ni ñuu ñayivi a,
te sukan ka saꞌa i ja kúu ini maa ni andivi a,
te saꞌa ni ja sukan jín saꞌa tna sa ñuu ñayivi a.
11 Chindee ñaꞌa ni ja na koo ja jin kaa sa vitna,
te sukan saꞌa tna ni ndi‑kivi ndi‑kivi.
12 Te sakanu ini ni na ja uꞌvi ka saꞌa sa nuu ni ma,
vaa saña tna chi ka sakanu ini sa ñayii ka saꞌa ñaꞌa ja uꞌvi ma.
13 Te máko kuaꞌa ni tnuꞌu ja skaꞌan ñaꞌa tachi ma ja jin saꞌa sa ja uꞌvi ma,
suꞌva chindee ñaꞌa ni ja na jin kaku sa nuu ja uꞌvi ma.
Vaa maa ni kúu iya tátnuni,
te maa ni iyo tnuꞌu ndee tnuꞌu ndatnu
jiꞌin jayiñuꞌu ni‑kani ni‑jika.
Te sukan kó kuu.
14 ’Vaa nuna jin sakanu ini ni ñayii ka saꞌa ñaꞌa ja uꞌvi ma,
suni sakanu ini tna ñaꞌa Yuva o iya iyo andivi ma.
15 Kovaa nú ma jin sakanu ini ni ñayii ka saꞌa ñaꞌa ja uꞌvi ma,
suni masu sakanu ini tna ñaꞌa Yuva o ma ndaka ja uꞌvi ni ka saꞌa ni nuu ya ma.
Ni kaxtnuꞌu Jesús ma sukan jin koo ndite o nuu Suꞌsi ma
16 ’Ora ka iyo ndite ni nuu Suꞌsi ma,
má jin saꞌa ni ja ka kuxii,
ka kundaꞌvi ini ni,
sukan ka saꞌa ñayii ka kaꞌan te masu ka saꞌa i sukan ka kaꞌan i ma,
vaa ka saꞌa i tnuꞌu ja ka kuxii,
ka kundaꞌvi ini i,
sukan‑vaꞌa jin kuni ñayii ma ja ka iyo ndite i nuu Suꞌsi ma te jin ndachiñuꞌu ñaꞌa i.
Ja ndaa káꞌan sa ja jâ ni ka niꞌi i ja jin kutaꞌvi i ma,
te masu na jayiñuꞌu‑ka jin niꞌi i nuu Suꞌsi ma.
17 Kovaa ndijin,
ora iyo ndite ni nuu Suꞌsi ma,
te koo sii ini ni,
te ndakate ni nuu ni a,
te vivii ndasaꞌa ni maa ni,
18 sukan‑vaꞌa ñatuu na in kuni ja iyo ndite ni nuu Suꞌsi ma,
te maa Yuva ni Suꞌsi ma,
iya ndeꞌya nawa saꞌa ni ma visi ñatuu na ñayii ndeꞌya nawa ni saꞌa ni ma chi maa ya saꞌa ja jin kuni ndaka ñayii ma ja vii ja vaꞌa skutaꞌvi ñaꞌa ya ma.
Jín saꞌa o ja vaꞌa ja ndaa vaa chukan chi masu ja naa kúu
19 ’Máko kuꞌun xeen ini ni ja konevaꞌa ni kuaꞌa xeen ndatniñu ñuu ñayivi a nuu kána tikixin,
jiꞌin nuu nána xeꞌe ndatniñu ma,
jiꞌin nuu kuu jin kivi koo kuiꞌna ini veꞌe ni ma te jin sakuiꞌna i.
20 Suꞌva jin kuꞌun ini ni ja jin saꞌa ni ja vaꞌa ja ndaa ma,
vaa ndaka chukan chi onde andivi ma jin koo vaꞌa.
Vaa yukan masu kana tikixin ma,
ni a nana xeꞌe ja konevaꞌa ni ma,
te yukan masu na kuiꞌna ka kivi koo ja jin sakuiꞌna i ma.
21 Vaa nuu iyo ndaka ja ñuꞌu ini o ja nevaꞌa o ma,
yukan tna jatanuu‑ka ini anua o ma.
Sukan kúu ñuꞌu ndúꞌva ma kúu nduchinuu o a nuu yikikuñu o a
22 ’Nduchinuu ni a,
sukan kúu in ñuꞌu ndúꞌva ja xtnuu i nuu o ma,
sukan ka kuu i neꞌun yikikuñu ni a.
Chukan kúu ja nú nduchinuu ni a,
ja vaꞌa ka kuu i,
te ni‑kaꞌnu yikikuñu ni a,
kotnuu i,
te niꞌi ini ni ja saꞌa ni ja vaꞌa ma.
23 Kovaa nú nduchinuu ni a,
ja uꞌvi ka kuu i,
te ni‑kaꞌnu yikikuñu ni a,
iyo i nuu nee ma.
Te nú sukan,
ndaꞌvi maa ni vaa ni‑kaꞌnu yikikuñu ni a iyo nuu nee kuiti ma.
Masu kuu kunukuechi o nuu Suꞌsi ma jiꞌin nuu ndaka ja iyo ñuu ñayivi a
(Lc 16:13)
24 ’Ni‑in ñayii,
masu kuu kunukuechi i nuu uu jitoꞌo i ma chi kuni uꞌvi i nuu in jitoꞌo i ma te kutoo‑ka i in‑ka jitoꞌo i ma,
xi katanuu i in de ma te saxiko i in‑ka de ma.
Masu kuu kunukuechi o nuu Suꞌsi ma jiꞌin nuu ndaka ja iyo ñuu ñayivi a.
Máko jin ko ndi ini xeen o naxe jin niꞌi o ja jin koteku o a
25 ’Chukan kúu ja káꞌan sa:
Máko jin ko ndi ini ni nawa jin kaa jin koꞌo ni ja jin koteku ni,
ni a nawa jin kondii jin konama ni.
Ka jini maa ni ja Suꞌsi ma ni saꞌa ja ka teku ni a,
te kuu saꞌa ya ja jin niꞌi ni ja jin kaa ni ma.
Te ka jini maa ni ja Suꞌsi ma,
ni saꞌa ya yikikuñu ni a,
te kuu saꞌa ya ja jin niꞌi ni ja jin kondii jin konama ni.
26 Jin kondeꞌya ni lasaa ka ndava ichi andivi a,
ja masu na itu ka chiꞌi ti,
ni a jin ndaxtutu ti nawa jin kaa ti,
ni a jin ko ndi ini ti ja jin tnaa vaꞌa ti in nuu yaka ja jin kaa ti ma.
Kovaa maa Yuva o iya iyo andivi ma naꞌa nawa jin kaa ti.
¡Te nú sukan saꞌa ya jiꞌin lasaa ma,
nde‑ka tu ndijin chi ko ndi ini Suꞌsi ma ja jin niꞌi ni ja jin kaa ni,
vaa ka ndanuu‑ka ni sana lasaa ma!
27 Te visi na jin ko ndi ini xeen ni,
kovaa masu kuu jin saꞌa maa ni ja jin kuaꞌnu‑ka ni jaku.
28 ’¿Te navaꞌa ka ndi ini xeen ni nawa jin koneꞌnu ni a?
Jin kondeꞌya ni ja ita ma,
vivii ka jaꞌnu i.
Te ni masu ka satniñu i,
ni masu ka keneꞌe i yuꞌva ja jin kuvaꞌa saꞌma i ma.
29 Kovaa káꞌan sa ja ni a rey Salomón ma,
ja ndaka ja vaꞌa ni yo nevaꞌa de ma,
masu ni yo neꞌnu de sukan vii ka ndaa ita a.
30 Vaa Suꞌsi ma saꞌa ja vivii ka ndaa ita ja ka iyo ichi yuku ma in kii ma,
te kivi yutnee ma,
te jin kayu i nuu ñuꞌu ma‑ni.
¡Te nú sukan vivii jito ya ita ma,
naka tu ndijin ja ka kuu ni saꞌya ya ma,
suni vivii skondii skonama ñaꞌa ya!
¿Navaꞌa vala‑ni ka kukanu ini ni ya?
31 Te chukan kúu ja má jin ko ndi ini ni te jin ko kuxii ini ni te jin kaꞌan ni:
“¿Nawa jin kaa o?
xi ¿nawa jin koꞌo o?
xi ¿nawa jin kondii jin konama o a?”
32 Vaa ndaka chaꞌa ka ndi ini ñayii ñuu ñayivi a,
kovaa ndijin,
ka nevaꞌa ni in Yuva o iya iyo ichi andivi ma ja jini ya ja ndaka chaꞌa ka jiniñuꞌu ni a.
33 Ndijin,
jin ndanduku ni xinañuꞌu kuiti‑ka sukan tátnuni Suꞌsi ma,
jiꞌin sukan saꞌa ndaa ya ma,
te ndaka chaꞌa,
te kenda koo kuee‑ka ndi‑tnaꞌa ka jiniñuꞌu ni ma.
34 Chukan kúu ja máko jin ko ndi ini ni nawa ko kuu kivi yutnee ma,
vaa kenda siin maa i jiꞌin tnundoꞌo i ma,
te chukan kúu ja jin katanuu ni nawa iyo ja jin saꞌa ni in kivi in kivi ma‑ni ―kúu ya jiñaꞌa ya.