Ni kaꞌan Jesús ma in tnuꞌu vijin in tee jito veꞌe jitoꞌo de ma te jini vaꞌa de naxe saꞌa de
16
Jesús ma,
ni ndakani tna ya saꞌa nuu tee ka ndikin ya ma:
―Iyo in tee xiku,
te nevaꞌa de in tee jito ndaka ja nevaꞌa de ma.
Te ni jan koo i ni jan kuñaꞌa i nuu tee kúu jitoꞌo ma ja yikuu tee jinukuechi ma saꞌa ndevaꞌa de ja ni kucargu de ma.
2 Te jitoꞌo de ma,
ni kana de tee jinukuechi nuu de ma,
te jiñaꞌa de:
“¿Nawa kúu ja ka kaꞌan i ja saꞌa ni a?
Ndataa ni kuenda siki tniñu ni a,
vaa masu ko kuu‑ka ni tee jito veꞌe sa a.”
3 Te tee jito veꞌe ma,
ni kejaꞌa de jani ini de:
“¿Nawa saꞌa o vitna?
Vaa jitoꞌo o ya,
keneꞌe ñaꞌa de,
te masu na tniñu‑ka o koo.
Te vitna ja masu kúndee‑ka o ja satniñu o nuu ñuꞌú ma.
Te kúkan‑nuu o ja kakan o karidaa.
4 Aan,
jâ jini o ja saꞌa o,
sukan‑vaꞌa jin kuan‑taꞌvi ñaꞌa ñayii ma veꞌe i ma,
nuna kendoo o ja ñatuu na tniñu‑ka saꞌa o”,
jani ini de.
5 Sani te,
ni kana de ndi‑in ndi‑in ñayii ka tavi nuu jitoꞌo de ma.
Te ni jikan‑tnuꞌu de tee xinañuꞌu ma:
“¿Na saa tavi ni nuu jitoꞌo sa ma?”,
kúu de jiñaꞌa de.
6 Te ni ndakoneꞌe tee ma:
“Tavi sa cientu kisi naꞌnu aceite.”
Te jiñaꞌa tee jito veꞌe jitoꞌo de ma:
“Yaꞌa ni tutu ndee ja tavi ni a.
Jinkoo yachi ni,
te ndasaꞌa ni nuu tutu a ja uu xiko uxi‑ni (50) kúu.”
7 Sani te ni jikan‑tnuꞌu de in‑ka de ma:
“Te ndijin,
¿na saa tavi ni?”,
kúu de jiñaꞌa de.
Te tee yaꞌa,
jiñaꞌa de:
“Cientu jichi triu”,
kúu de jiñaꞌa de.
Te jiñaꞌa de tee ma:
“Yaꞌa ni tutu yoxtnee ja tavi ni ma.
Te ndatee ni ja kuun xiko‑ni (80) tavi ni”,
kúu de jiñaꞌa de.
8 Te tee kúu jitoꞌo de ma,
ni ndakunitnuni de ja tee ñatuu ni jito vaꞌa veꞌe de ma,
ni jini vaꞌa de naxe ni saꞌa de jiꞌin ja nevaꞌa jitoꞌo de ma.
Ñayii ñuu ñayivi a,
ka jini vaꞌa‑ka i naxe jin kuatniñu i ja ka niꞌi ka tnaꞌa i ñuu ñayivi a,
sukan‑vaꞌa masu nawa jin skenaa kuiti i,
kovaa ñayii ka iyo nuu tnuu ñuꞌu Suꞌsi ma,
ñatuu.
Vaa ñatuu ka jini i naxe jin kuatniñu i ja ka niꞌi ka tnaꞌa i ma ja waꞌa Suꞌsi ma.
9 ’Káꞌan sa ja ndaka ja ka niꞌi ka tnaꞌa ñayii ma ñuu ñayivi a masu ja vaꞌa ka kuu,
suꞌva saꞌa i ja jin skenaa o maa o.
Chukan kúu ja jin kuatniñu vaꞌa ni ja ka niꞌi ka tnaꞌa ni ñuu ñayivi a,
sukan‑vaꞌa jin koo ñayii jin ketnaꞌa ini jiꞌin ni.
Te kivi ndiꞌi ja iyo ñuu ñayivi a,
te jin ndakuan‑taꞌvi ñaꞌa ñayii ma nuu jin koo ni ni‑kani ni‑jika ma,
nuu masu naa ma.
10 ’Ñayii saꞌa ja vaꞌa jiꞌin jaku‑ni ja nevaꞌa i ma,
suni sukan saꞌa tna i jiꞌin ja kuaꞌa‑ka ja konevaꞌa i ma.
Te ñayii ñatuu saꞌa ja vaꞌa ma jiꞌin jaku‑ni ja nevaꞌa i ma,
suni sukan tna saꞌa i jiꞌin ja kuaꞌa‑ka ja konevaꞌa i ma.
11 Te chukan kúu ja nú ñatuu jito vaꞌa ni tnaꞌa ja niꞌi ja tnaꞌa ni ñuu ñayivi a tnaꞌa ja saꞌa ja skenaa ñayii ma maa i ma,
¿na in kusaa ini ja taa i nuu iyo nanimaa ja vaꞌa ja vii ndija ma?
12 Te nú ñatuu ni jatniñu vaꞌa ni tnaꞌa ja masu koo jiꞌin ni ni‑kani ni‑jika ma,
¿na in ndataa ja ko kuu kuenda maa ni ni‑kani ni‑jika ma?
13 ’Ni a in ñayii,
masu kuu kunukuechi i nuu uu jitoꞌo i ma chi kuni uꞌvi i nuu in jitoꞌo i ma te kutoo‑ka i in‑ka jitoꞌo i ma,
xi katanuu i ja káꞌan in jitoꞌo i ma te saxiko i ja káꞌan in‑ka de ma.
Te chukan kúu ja masu kuu kunukuechi o nuu Suꞌsi ma te ko kunukuechi o nuu ndaka ja iyo ñuu ñayivi ya ―kúu ya jiñaꞌa ya.
14 Tee ka kuu fariseo ma,
ka jatna ini de xuꞌun ma,
te ni ka jinisoꞌo de sukan ni kaꞌan Jesús ma,
te ka jakundee de ya.
15 Jesús ma,
jiñaꞌa ya:
―Ndijin,
ka saꞌa ni tnuꞌu ja ñayii vaꞌa‑ka ka kuu ni sana in‑ka ñayii ma,
kovaa Suꞌsi ma,
jini ya naxe ka iyo ini anua ni a.
Vaa iyo ja ka jani ini ñayii ma ja ja vaꞌa‑ka kúu,
kovaa Suꞌsi ma,
saxiko ya ndaka chukan.
Tnuꞌu ni yo kaxtnuꞌu Moisés ma jiꞌin tnuꞌu vii tnuꞌu vaꞌa sukan tatnuni Suꞌsi ma
16 ’Tnuꞌu tátnuni Suꞌsi ma,
jiꞌin ja ni ka kaꞌan tee ni ka yo ndakaxtnuꞌu tnuꞌu ni yo waꞌa Suꞌsi ma,
ni ka yo kaxtnuꞌu de onde ni kenda tee kúu Juan ma tee ni skuandute ñayii ma.
Te onde kivi yukan,
sani te ka kaxtnuꞌu i naxe tatnuni maa Suꞌsi ma ini anua ñayii ma.
Te ndaka i ka tnuñu,
sukan‑vaꞌa kuu jin jakuꞌni ini i sukan tatnuni Suꞌsi ma ini anua i ma.
17 Yachi‑ka jin naa andivi ma jiꞌin ñuu ñayivi a sana naa in tnuꞌu ni tatnuni Suꞌsi ma,
vaa ndaka tnuꞌu ni tatnuni Suꞌsi ma onde ko kuu sukan ni kaꞌan ya ma.
Jesús ma, ni tatnuni ya ja ñayii ni ka tnandaꞌa ma, máko jin xndoo tnaꞌa i
18 ’Nú in tee,
xndoo de ñasiꞌi de ma te ndakueka de in‑ka ñaꞌa ma,
kuiso kuechi de,
vaa ni kivi nduu de jiꞌin in‑ka ñaꞌa ma.
Te tee ndakueka ñaꞌa ni xndoo tee yukan,
suni kuiso kuechi de,
vaa ni kivi nduu de jiꞌin ñasiꞌi in‑ka tee ma.
Tee kúu Lázaro ma jiꞌin tee kúu xiku ma
19 ’Iyo in tee xiku,
te ni yo neꞌnu de saꞌma vii saꞌma vaꞌa,
te ndaka kivi ni yo saꞌa de viko,
te ni yo saꞌa kaꞌnu xeen de.
20 Ni iyo tna in tee ndaꞌvi xeen ni yo nani de Lázaro,
te ni ka yo ndee kuaꞌa ndiꞌyi teꞌyu ñií de ma,
te ni yo nukoo de yeꞌe tee kúu xiku ma.
21 Tee ndaꞌvi yaꞌa,
ni yo kuni de ja ndutu chii de jiꞌin ja ni ka yo jinkava chii mesa xiku ma.
Te onde la‑ina ma,
ni yo jan koo ni ka yo yundee ti ndiꞌyi teꞌyu ndee de ma.
22 ’In kivi,
te ni jiꞌi tee ndaꞌvi nani Lázaro ma,
te ángel Suꞌsi ma,
ni ka ndakueka i de,
te kuan nu koo i jiꞌin de onde nuu iyo Abraham ma.
Sani te ni jiꞌi tna tee kúu xiku ma,
te ni jan koo ñayii ma ni ka chuꞌu i de.
23 Tee xiku ma,
ndóꞌo néni de iyo de nuu ka iyo ñayii ñatuu ni ka kandija Suꞌsi ma te ni ka jiꞌi i ma.
Te ni ndonenuu de,
te ni jini de in nuu vivii onde jika xeen‑ka nuu iyo Abraham ma,
ñundee de Lázaro ma.
24 Sani te káyuꞌu de jiñaꞌa de:
“¡Yuva sa Abraham,
kundaꞌvi ini ñaꞌa ni!
Tetniñu ni Lázaro a,
xndoyo de xini ndaꞌa de a,
te kii de ndaxndoyo de yaa sa a.
Vaa ndóꞌo néni sa nuu ñuꞌu iꞌni a”,
kúu de jiñaꞌa de.
25 Kovaa Abraham ma,
ni ndakoneꞌe de:
“Saꞌya sa,
ndakaꞌán ni sukan vaꞌa sukan vii ni iyo ni ñuu ñayivi ma,
te Lázaro a,
ndaꞌvi xeen ni yo kuu de ma.
Te vitna chi ni ndusii ini de yaꞌa,
te ndijin ndóꞌo néni.
26 Te in‑ka kúu ja iyo in kava kaꞌnu xen‑xeen meꞌñu nduu o a.
Te chukan kúu ja nú na in kúni ja yaꞌa i ichi yaꞌa,
masu kuu kii i,
ni a ñayii ka iyo yaꞌa,
suni masu kuu yaꞌa i onde jiña”,
kúu de jiñaꞌa de.
27 ’Te tee kúu xiku ma,
jiñaꞌa de:
“Jikan‑taꞌvi sa nuu ni,
yuva sa Abraham,
ja tetniñu ni Lázaro a veꞌe yuva sa ma
28 nuu ka iyo uꞌun‑ka ñani sa ma,
te xtuꞌva de i,
sukan‑vaꞌa má ki koo tna i yaꞌa nuu ndóꞌo néni sa a”,
kúu de jiñaꞌa de.
29 Abraham ma,
jiñaꞌa de:
“Jâ ka nevaꞌa i tnuꞌu Suꞌsi ma ja ni tatnuni Moisés ma,
jiꞌin ja ni ka kaꞌan tee ni ka yo ndakaxtnuꞌu tnuꞌu ni yo waꞌa Suꞌsi ma.
Te na jin kandija maa i tnuꞌu yukan”,
kúu de jiñaꞌa de.
30 Te tee ni yo kuu xiku ma,
ni ndakoneꞌe de:
“Saa vi,
yuva sa Abraham,
kovaa nuna ndateku in ñayii ni jiꞌi ma te ndenda i chi jin kandija‑ka ñaꞌa i”,
kúu de jiñaꞌa de.
31 Kovaa Abraham ma,
jiñaꞌa de:
“Nú ma jin kandija i tnuꞌu Suꞌsi ma ja ni kaxtnuꞌu Moisés ma,
jiꞌin ja ka kaꞌan tee ni ka yo ndakaxtnuꞌu tnuꞌu ni yo waꞌa Suꞌsi ma,
suni masu jin kandija i,
visi in ñayii ni jiꞌi ma,
te ndateku i te ndenda i ja kaxtnuꞌu i nuu ñayii ma sukan kúni Suꞌsi ma ja jin saꞌa i ma”,
kúu de jiñaꞌa de.
Saꞌa ni ndakani Jesús ma.