Jesús ma, ni tatnuni ya ja ñayii ni ka tnandaꞌa ma, máko jin xndoo tnaꞌa i
10
Jesús ma,
ni ndee ya ñuu Capernaum ma,
te kuaꞌan ya ichi ñuu Judea ma,
in‑ka yuꞌu yute Jordán ma.
Yukan ni ka ndututu tuku ñayii ma,
te ni kejaꞌa ya káxtnuꞌu ya,
sukan játna ini ya saꞌa ya nuu ka ndatnaꞌa ñayii ma.
Marcos 10:1-31
2 Jaku tee ka kuu fariseo ma,
ni ka jan tuꞌva de ya,
sukan‑vaꞌa jin kototnuni de ya,
te ka jikan‑tnuꞌu de ya nú vaꞌa‑ni ja in tee,
te xndoo de ñasiꞌi de ma.
3 Te Jesús ma,
ni ndakoneꞌe ya:
―¿Naxe ni tatnuni Moisés ma nuu ni?
―kúu ya jiñaꞌa ya.
4 Te ka jiñaꞌa de:
―Moisés ma,
ni yo kachi de ja xndoo tee ma ñasiꞌi de ma,
te kuaꞌa de in tutu káꞌan ja jâ ni xndoo de ña ―ka kuu de ka jiñaꞌa de.
5 Sani te Jesús ma,
jiñaꞌa ya:
―Kuechi ja inusoꞌo ka ndaa ni a,
te Moisés ma,
ni tatnuni de sukan ka kaꞌan ni a.
6 Kovaa xinañuꞌu ma,
nuu yika ni kuvaꞌa ñuu ñayivi a:
“Suꞌsi ma,
ni saꞌa ya in tee jiꞌin in ñaꞌa.
7 Chukan kúu ja tee ma,
xndoo de yuva de ma jiꞌin siꞌi de ma,
te kueka tnaꞌa de jiꞌin ñasiꞌi de ma,
8 te nduu de ma jin ko kuu in‑nka‑ni ñayii.”
Chukan kúu ja masu uu‑ka ñayii ka kuu i chi in‑nka‑ni i kúu.
9 Te chukan kúu ja ñayii ma,
másu ko ndasasiin i ja ni sketnaꞌa Suꞌsi ma ―kúu ya jiñaꞌa ya.
10 Sani te tee ka ndikin ya ma,
nuu ni ka ndenda koo de jiꞌin ya veꞌe ma,
ni ka ndakan‑tnuꞌu tuku de siki ja ni kaxtnuꞌu ya ma.
11 Te Jesús ma,
jiñaꞌa ya:
―Te tee xndoo ñasiꞌi de ma,
te ndiyo ini de in‑ka ñaꞌa ma,
xi ndatnandaꞌa de jiꞌin in‑ka ñaꞌa ma,
jâ ni jiso kuechi de,
vaa sukan ka saꞌa tee ka kivi nduu jiꞌin in‑ka ñaꞌa ma,
sukan saꞌa de ma.
12 Te nú ñaꞌa ma,
xndoo ña yii ña ma,
te ndiyo ini ña in‑ka tee,
xi ndatnandaꞌa ña jiꞌin in‑ka tee ma,
te suni jâ ni jiso kuechi ña,
vaa sukan ka saꞌa ñaꞌa ka kivi nduu jiꞌin in‑ka tee ma,
sukan saꞌa ña ma ―kúu ya jiñaꞌa ya.
Jesús ma, ni kaxtnuꞌu ya naxe ko kuu in ñayii sana kivi i nuu tatnuni Suꞌsi ma
13 Ni jan koo i jiꞌin suchi kuechi ma nuu Jesús ma,
sukan‑vaꞌa sonee ya ndaꞌa ya siki suchi kuechi ma.
Te tee ka ndikin ya ma,
ni ka kejaꞌa de ka ndonda de nuu ñayii ni jan koo jiꞌin suchi kuechi ma.
14 Te ni jini Jesús ma sukan ka saꞌa de ma,
te ni ndakiti ini ya,
te jiñaꞌa ya:
―Jin kuaꞌa ni tnuꞌu,
te kí koo maa suchi kuechi a,
te máko jin kaꞌnu ndee ni,
chi vaa sukan ka jani vii ka jani vaꞌa ini suchi kuechi a,
sukan jiniñuꞌu ja jin ko kuu ñayii jin kivi koo nuu tatnuni Suꞌsi ma.
15 Ja ndaa káꞌan sa,
nú in ñayii ma,
ma kuan‑taꞌvi i ja tatnuni Suꞌsi ma nuu i ma sukan jan‑taꞌvi in suchi luluu a nawa tátnuni o nuu i ma,
te masu kuu kivi i nuu tatnuni ya ma ―kúu ya jiñaꞌa ya.
16 Te ni kanundee ya suchi kuechi ma,
te ni sonee ya ndaꞌa ya siki i ma,
te ni kaꞌan ya ja vaꞌa ja vii ja jin ko kuu i.
Sukan yii ja ndaniꞌi taꞌvi ñayii ndí ini xeen‑ka xuꞌun i ma
17 Nuu ni kee ya ja kiꞌin tuku ya ma,
te jinu in tee ni kenda de,
te ni jinkuiñi jiti de nuu ya ma,
te jikan‑tnuꞌu de:
―Teskuaꞌa vaꞌa ini,
¿nawa saꞌa sa,
sukan‑vaꞌa ndaniꞌi taꞌvi sa,
te koteku sa ni‑kani ni‑jika?
―kúu de jiñaꞌa de.
18 Te Jesús ma,
ni ndakoneꞌe ya:
―¿Navaꞌa xnani ñaꞌa ni teskuaꞌa vaꞌa ini?
Masu na in‑ka vaꞌa ini chi maa in‑ni Suꞌsi ma.
19 Jâ jini ni ndaka ja ni tatnuni ya ma:
“Másu ko kaꞌni ni ni‑in ñayii.
Másu ko kivi nduu ni jiꞌin in‑ka ñaꞌa.
Másu ko sakuiꞌna ni.
Másu ko kaꞌan tnuꞌu ni siki in‑ka ñayii ma.
Másu ko xndaꞌvi tnaꞌa ni ma.
Kava respetu ni nuu yuva ni ma jiꞌin nuu siꞌi ni ma” ―kúu ya jiñaꞌa ya.
20 Te tee yukan,
jiñaꞌa de:
―Teskuaꞌa,
ndaka chaꞌa chi jâ saꞌa ndiꞌi sa onde nuu jaa sa ma ―kúu de jiñaꞌa de.
21 Te Jesús ma,
ndeꞌya ya tee yukan,
te ni kutoo ya de,
te jiñaꞌa ya:
―Kúni‑ka in‑ka ja saꞌa ni a.
Kuáꞌan ni,
te xiko ni ndaka ja nevaꞌa ni ma,
te kuaꞌa ni ñayii ka kundaꞌvi ma.
Te sukan,
te xiku ko kuu ni andivi ma.
Sani te kii ni,
te kondikin ñaꞌa ni ―kúu ya jiñaꞌa ya.
22 Te ni tna uꞌvi ini tee yukan,
ja ni jinisoꞌo de sukan jiñaꞌa ya ma.
Te kuan noꞌo xixii‑nka ini de,
vaa xiku xeen kúu de.
23 Te Jesús ma,
ndeꞌya ya ni‑kaꞌnu xiñi ya ma nuu ka iyo tee ka ndikin ya ma,
te jiñaꞌa ya:
―¡Naka yii kúu ja tee ka kuu xiku ma,
te jin kivi koo de nuu tátnuni Suꞌsi ma!
―kúu ya jiñaꞌa ya.
24 Te ni ka saꞌvi‑nka ini tee ka ndikin ya ma ja ni kaꞌan ya sukan ma,
kovaa ni ndakaꞌan ya in‑ka jichi:
―Saꞌya sa,
¡naka yii kúu ja in ñayii xiku ma,
te kuu kivi i nuu tátnuni Suꞌsi ma,
kuechi ja kukanu ini i ndaka ja nevaꞌa i ma!
25 Suꞌva yachi‑ka kuu kivi in kiti kúu camellu ma in yavi xuu yiki tiku ma,
sana in ñayii xiku ma,
kivi i nuu tátnuni Suꞌsi ma ―kúu ya jiñaꞌa ya.
26 Nuu ni ka jinisoꞌo de sukan ma,
te ni ka saꞌvi xeen‑nka ini de,
te ka jikan‑tnuꞌu tnaꞌa de:
―¿Na in kuu ndaniꞌi taꞌvi,
ja sukan?
―ka kuu de ka kaꞌan de.
27 Te ndeꞌya Jesús ma de,
te jiñaꞌa ya:
―Yii kúu jani ini ñayii ma.
Kovaa nuu Suꞌsi ma chi ñatuu nawa iyo ja yii kúu ―kúu ya jiñaꞌa ya.
28 Pedro ma,
ni kejaꞌa de jiñaꞌa de:
―Saña chi ndaka ja ka nevaꞌa sa ma ni ka xndoo sa,
te ka ndikin ñaꞌa sa ―kúu de jiñaꞌa de.
29 Jesús ma,
ni ndakoneꞌe ya:
―Ja ndaa káꞌan sa ja ndevaꞌa‑ni na in ni xndoo veꞌe i ma,
ñani i ma,
kuꞌva i ma,
kuꞌu i ma,
jiꞌin siꞌi i ma,
jiꞌin yuva i ma,
saꞌya i ma,
jiꞌin ñuꞌú i ma,
ja kuechi ja ndikin ñaꞌa i a,
jiꞌin kuechi ja káxtnuꞌu i tnuꞌu vii tnuꞌu vaꞌa káꞌan sa a nuu ñayii ma,
30 te vitna chi nuu ñuu ñayivi a ndaniꞌi i viꞌi‑ka cientu veꞌe i ma,
jiꞌin ñani i ma,
kuꞌva i ma,
kuꞌu i ma,
siꞌi i ma,
jiꞌin ñuꞌú i ma,
visi ka sondikin ñaꞌa ñayii a.
Te maa i chi kivi kiꞌin o ma,
ndaniꞌi taꞌvi i,
te koteku i ni‑kani ni‑jika.
31 Te ñayii ka ndanuu‑ka ma te ka jani ini i ja xinañuꞌu‑ka ka kuu i vitna ma,
chi nuu Suꞌsi ma chi sandiꞌi‑nka jin ko kuu i,
te ñayii ka jani ini ja masu ñayii ka ndanuu ka kuu i te sandiꞌi‑nka ka kuu i vitna ma chi suu i jin ko kuu ñayii xinañuꞌu‑ka nuu Suꞌsi ma ―kúu ya jiñaꞌa ya.
Chaꞌa kúu ja ku‑uni jichi ja ni kaxtnuꞌu Jesús ma ja jin kaꞌni i ya kovaa ndateku ya
32 Kuan koo de jiꞌin ya ichi ñuu Jerusalén ma.
Te yoxtnuu‑ka Jesús ma nuu tee ka ndikin ya ma.
Te ni ka saꞌvi‑nka ini de.
Te tee kuan koo kuee‑ka ma,
ka yuꞌu de ka ndikin de ya.
Sani te Jesús ma,
ni ndaxtutu siin ya ndi‑uxi uu tee ka ndikin ya ma,
te ni kejaꞌa ya jiñaꞌa ya sukan ko kuu ma:
Marcos 10:32-52
33 ―Ka jini maa ni ja jin koo o ñuu Jerusalén ma.
Te yukan kúu nuu saña ja kúu sa iya vee ñayivi ñuu ñayivi a,
jin koo ñayii ma jin xsiaꞌa ñaꞌa i nuu ndaꞌa tee ka tatnuni nuu sutu ma,
jiꞌin nuu ndaꞌa tee ka skuaꞌa tnuꞌu ni kaxtnuꞌu Moisés ma,
te jin kaꞌan i ja kûu sa,
te jin ndaxsiaꞌa ñaꞌa i nuu ndaꞌa ñayii masu ñuu yaꞌa.
34 Te jin kosiki ndee ñaꞌa i,
te jin tusii ñaꞌa i,
te jin kuaꞌa ñaꞌa i,
te jin kaꞌni ñaꞌa i,
kovaa nuu uni kii ma,
te ndateku sa ―kúu ya jiñaꞌa ya.
Santiago ma jiꞌin Juan ma, ni ka jikan de ja jin kunukoo de xiñi Jesús ma
35 Santiago ma jiꞌin Juan saꞌya tee kúu Zebedeo ma,
ni ka jan tuꞌva de Jesús ma,
te ka jiñaꞌa de:
―Teskuaꞌa,
ka kuni sa ja kundaꞌvi ini ñaꞌa ni in ja jin kakan‑taꞌvi sa nuu ni ―ka kuu de ka jiñaꞌa de.
36 Te jiñaꞌa maa Jesús ma:
―¿Nawa kúu ja ka kuni ni ja saꞌa sa?
―kúu ya jiñaꞌa ya.
37 Te ka jiñaꞌa de:
―Taa ni tnuꞌu ja nuu tatnuni vivii ni ma,
jin kunukoo sa,
in sa xiñi kuaꞌa ni ma te in‑ka sa xiñi satni ni ma ―ka kuu de ka jiñaꞌa de.
38 Te Jesús ma,
jiñaꞌa ya:
―Masu ka jini ni ja ka jikan ni a.
¿Xi kuu jin koꞌo ni ja uwa koꞌo sa ma?
¿Xi kuu jin kuandute ni sukan kuandute sa ma?
―kúu ya jiñaꞌa ya.
Te chaꞌa chi ja ndoꞌo neni ya ma kúu ja ni jiñaꞌa ya ma.
39 Te ka jiñaꞌa de:
―Kuu.
Te jiñaꞌa Jesús ma:
―Jin koꞌo ni ja uwa ja koꞌo sa ma,
te jin kuandute ni sukan kuandute sa ma,
40 kovaa ja kunukoo in ni xiñi kuaꞌa sa ma te in‑ka ni xiñi satni sa ma,
chukan chi masu saña iyo ja taa,
nú masu ja maa Suꞌsi o ma kuaꞌa nuu ñayii jâ ka iyo tuꞌva i ja jin niꞌi i ma ―kúu ya jiñaꞌa ya.
41 Nuu ni ka jinisoꞌo uxi‑ka tee ka ndikin ya ma,
te ni ka ndakiti ini de nuu Santiago ma jiꞌin nuu Juan ma.
42 Kovaa Jesús ma chi ni kana ya de,
te jiñaꞌa ya:
―Ka jini ni ja neꞌun ñayii ñuu ñayivi a,
ka iyo ñayii ka jani ini maa i ja kuu jin tatnuni i nuu ndaka ñayii ma,
te ñayii ka ndanuu‑ka ma,
ûni ka tatnuni kuiti i nuu ñayii ma.
43 Kovaa neꞌun ndijin,
masu sukan ko kuu,
suꞌva nú na in kúni ja ko kuu i in ñayii kanuu‑ka neꞌun ndaka ni a,
ja saꞌa i kúu ja kunukuechi‑ka i nuu ndaka ni.
44 Te nú neꞌun ndaka ni a,
te kúni in ni ja ko kuu ni xinañuꞌu‑ka,
te ja ko saꞌa ni ko kuu ja kunukuechi xeen‑ka ni nuu ndaka‑ka ni a,
te ko kuu ni ñayii kanuu‑ka nuu Suꞌsi ma.
45 Chi vaa ni a saña ja kúu sa iya vee ñayivi ñuu ñayivi a,
masu vee sa ja jin kunukuechi ñayii ma nuu sa a chi suꞌva vee sa ja kunukuechi sa nuu ñayii ma,
te kuaꞌa sa tnuꞌu ja jin kaꞌni ñaꞌa i,
te sukan ndachunaa sa kuechi ka saꞌa ñayii ma,
te onde sukan,
te jin ndaniꞌi taꞌvi kuaꞌa xeen ñayii ma ―kúu ya jiñaꞌa ya.
Jesús ma, ni ndasavaꞌa ya tee kuaa nani Bartimeo ma
46 Te ni ka kenda koo de jiꞌin ya ñuu Jericó ma,
te nuu ni ndee ya ini ñuu ma jiꞌin tee ka ndikin ya ma,
te ka ndikin kuaꞌa ñayii.
Te in tee kuaa nani de Bartimeo saꞌya tee kúu Timeo ma kúu de,
te núkoo de yuꞌu ichi ma,
jikan de karidaa.
47 Ja ni jinisoꞌo tee kuaa ma ja Jesús nazareno ma kúu iya yaꞌa kuaꞌan ma,
te ni kejaꞌa de káyuꞌu de jiñaꞌa de ya:
―Jesús,
Saꞌya David,
kundaꞌvi ini ñaꞌa ni ―kúu de jiñaꞌa de.
48 Te kuaꞌa ñayii ma ka jiñaꞌa ja kasiyuꞌu de.
Kovaa suꞌva kayuꞌu niniꞌi‑ka de:
―Saꞌya David,
kundaꞌvi ini ñaꞌa ni ―kúu de jiñaꞌa de.
49 Sani te ni jinkuiñi Jesús ma,
te jiñaꞌa ya:
―Jin kana ni de kíi de ―kúu ya jiñaꞌa ya.
Te ni ka kana i tee kuaa ma,
te ka jiñaꞌa i:
―Koo sii ini ni,
te kukanu ini ni Suꞌsi ma,
te ndokuiñi ni chi kána ñaꞌa de ―ka kuu i ka jiñaꞌa i.
50 Te tee kuaa ma,
ni keꞌen de saꞌma ndii de ma,
ni skana de,
te kandava de ni jan tnaꞌa de Jesús ma.
51 Te Jesús ma,
jikan‑tnuꞌu ya de:
―¿Nawa kúni ni ja saꞌa sa ja kuu ni?
―kúu ya jiñaꞌa ya.
Te tee kuaa ma,
ni ndakoneꞌe de:
―Teskuaꞌa,
kúni sa ja kuu ndakondeꞌya sa ―kúu de jiñaꞌa de.
52 Te Jesús ma,
jiñaꞌa ya:
―Jâ kuu noꞌo ni.
Te kuechi ja ni kukanu ini ñaꞌa ni a,
te chukan kúu ja ni ndundijin nuu ni a ―kúu ya jiñaꞌa ya.
Te ora yukan‑ni,
te ni kuu ni ndakondeꞌya de.
Sani te ni ndikin de Jesús ma.