Jesús ma, yoso ya in burru ni kivi ya ñuu Jerusalén ma
11
Nuu ni ka iyo de jiꞌin ya ñuu Betfagé ma jiꞌin Betania ma,
yatni ñuu Jerusalén ma jiꞌin yuku nani Yuku Tnu Olivo ma,
Jesús ma,
ni kana ya uu tee ka ndikin ya ma,
Marcos 11:1-14
2 te jiñaꞌa ya:
―Kuán koo ni yuꞌu ñuu ichi jiyo a,
te ja jin kivi koo ni ñuu yukan,
te jin ndaniꞌi ni in burru nuꞌni ti,
te ni‑in‑ka ñayii ñatuu koso‑ka ti.
Te jin ndaji ni ti,
te ki koo ni jiꞌin ti.
3 Te nú na in kakan‑tnuꞌu naku ka saꞌa ni sukan,
te jin kuñaꞌa ni:
“Maa Señor ma jiniñuꞌu ti,
te sana ndataa ya ti”,
jin kuñaꞌa ni ―kúu ya jiñaꞌa ya.
4 Sani te kuan koo de,
te ni ka ndaniꞌi de burru ma nuꞌni ti in yeꞌe yuꞌu ichi kuan koo de ma,
te ni ka ndaji de ti.
5 Te ñayii ka iyo ma,
ka jikan‑tnuꞌu i:
―¿Nawa ka saꞌa ni?
¿Navaꞌa ka ndaji ni burru a?
―ka kuu i ka jiñaꞌa i.
6 Te ni ka ndakoneꞌe de sukan jiñaꞌa Jesús ma.
Te ni ka waꞌa i tnuꞌu kuan koo de jiꞌin ti.
7 Te ni ka jan xsiaꞌa de ti nuu iyo Jesús ma,
te ni ka sonee de saꞌma de ma siki burru ma,
te Jesús ma,
ni kaa ya siki ti ma,
te yoso ya ti kuaꞌan ya.
8 Te kuaꞌa ñayii,
ka skuili i saꞌma ka ndii i ma,
jiꞌin jaku‑ka i,
ka skuili i ndaꞌa ñuu ni ka jaꞌnde i ichi yuku ma.
9 Te ñayii ka yoxtnuu kuan koo i ma,
jiꞌin ñayii ka ndandikin ma,
ka kayuꞌu i:
―¡Hosanna!
¡Jayiñuꞌu kúu rey vee nuu Iya Tátnuni ma!
10 ¡Jayiñuꞌu kúu ja sani te tatnuni tnaꞌa yuva o David ma!
¡Hosanna!
¡Jayiñuꞌu kó kuu nuu tátnuni Suꞌsi ma onde sukun ma!
―ka kuu i ka kayuꞌu i.
11 Ni kivi Jesús ma ini ñuu Jerusalén ma,
te kuaꞌan ndita ya veñuꞌu kaꞌnu ma,
te ndeꞌya ya ni‑kaꞌnu.
Sani te kuaꞌan ya ñuu Betania ma jiꞌin uxi uu tee ka ndikin ya ma,
chi vaa ve kukuee ma.
Jesús ma, ni kaꞌan uꞌvi ya ja kuu in tnu higo
12 Kivi yutnee ma,
nuu ve ndee ya ñuu Betania ma,
Jesús ma,
ni kejaꞌa kókon ya.
13 Jika‑ka ni jini ya in tnu higo,
te iyo kuaꞌa ndaꞌa tnu,
te ni jan tuꞌva ya tnu,
ja koto ya nú iñi higo.
Kovaa ñatuu chi nanimaa ndaꞌa tnu ma kúu,
chi vaa masu tiempu higo ma kúu.
14 Sani te jiñaꞌa ya tnu higo ma:
―¡Ñatuu na in ko kaa‑ka higo ro a!
―kúu ya jiñaꞌa ya.
Te ni ka jinisoꞌo tee ka ndikin ya ma.
Jesús ma, ni ndasavii ya ini veñuꞌu kaꞌnu ma
15 Nuu ni ka ndenda koo de jiꞌin ya ñuu Jerusalén ma,
te Jesús ma,
ni kivi ya veñuꞌu kaꞌnu ma,
te ni kejaꞌa ya kéneꞌe ya ndaka ñayii ka xiko ma jiꞌin ñayii ka jaan ma.
Te ni chindeyi ya mesa ñayii ka sama xuꞌun ma,
jiꞌin nuu ka xiko i sata ma.
Marcos 11:15-33
16 Te ñatuu ni waꞌa ya tnuꞌu ja jin yaꞌa ñayii ka ndiso ndatniñu i ma ichi ini veñuꞌu ma.
17 Te ni kejaꞌa ya káxtnuꞌu ya,
te jiñaꞌa ya:
―Jâ ka jini ni ja nuu tutu ndee tnuꞌu Suꞌsi ma káꞌan:
“Ini veꞌe sa a chi ko kuu i ini veꞌe nuu ki koo ñayii ndaka ñuu ma ja jin kakan‑taꞌvi i nuu Suꞌsi ma.”
Vaa sukan ni jani ini ya.
Kovaa ndaka ndijin chi ni ka ndasaꞌa ni in yavi nuu ka ñuꞌu kuiꞌna ―kúu ya jiñaꞌa ya.
18 Ja ni ka jinisoꞌo tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
te ni ka kejaꞌa de ka nduku de naxe jin kaꞌni de Jesús ma,
chi vaa ka yuꞌu de nú ñaꞌa te ndaka ñayii ma jin kandija ja káꞌan ya ma,
vaa ndaka ñayii ma,
ni ka saꞌvi‑nka ini i ja káxtnuꞌu ya ma.
19 Kovaa ja ni kunee ma,
te ni ndee Jesús ma jiꞌin tee ka ndikin ya ma ini ñuu ma.
Ni yichi tnu higo ni kaꞌan uꞌvi Jesús ma ja kuu tnu ma
20 Nuu neꞌe in‑ka kii ma,
ni ka yaꞌa de jiꞌin ya yatni nuu núkoo tnu higo ma,
te ni ka jini de ja ni yichi onde yoꞌo tnu ma.
21 Sani te Pedro ma,
ni ndakaꞌán de sukan ni jiñaꞌa Jesús ma tnu higo ma,
te jiñaꞌa de ya:
―Teskuaꞌa,
jini ni ja tnu higo ni kaꞌan uꞌvi ni ma,
jâ ni yichi tnu ―kúu de jiñaꞌa de.
22 Te Jesús ma,
ni ndakoneꞌe ya:
―Jin kukanu ini ni Suꞌsi ma.
23 Te ja ndaa káꞌan sa,
nú na in na kuñaꞌa i yuku yukan:
“Kuán ndiyo jiña,
te skee maa ro nuu mar ma”,
te nú in‑ni ja ni jani ini i ma,
te ñatuu jani uu jani uni ini i,
suꞌva kukanu ini i ja saꞌa Suꞌsi ma ja ko kuu ja káꞌan i ma,
sani te ko kuu.
24 Chukan kúu ja káꞌan sa,
ndaka ja jin kakan‑taꞌvi ni nuu Suꞌsi ma,
te nú ka kukanu ini ni ya ja taa ya ma chi jin niꞌi ni.
25 Te ora ka jikan‑taꞌvi ni ma,
te nú ni ka ndakaꞌán ni ja nawa ni ka saꞌa ndevaꞌa ñaꞌa ñayii ma,
te jin sakanu ini ni i,
sukan‑vaꞌa sakanu ini tna ñaꞌa Yuva o Suꞌsi iyo andivi ma,
te ndaxnaa ya kuechi ni ma.
26 Kovaa nú ma jin sakanu ini ni,
suni Yuva o iyo andivi ma,
masu sakanu ini ya kuechi ni ma ―kúu ya jiñaꞌa ya.
Ni ka jikan‑tnuꞌu de na in ni tatnuni ja saꞌa Jesús ma sukan
27 Sani te ni ka ndenda koo de ñuu Jerusalén ma.
Nuu kuaꞌan ya ichi veñuꞌu kaꞌnu ma,
te ni ka jan tuꞌva ñaꞌa tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
jiꞌin tee ka kuu jaꞌnu ma.
28 Te ka jikan‑tnuꞌu de ya:
―¿Na in ni tatnuni ja saꞌa ni sukan?
¿Xi na in ni kaꞌan ja kuu saꞌa ni sukan?
―ka kuu de ka jiñaꞌa de.
29 Jesús ma,
ni ndakoneꞌe ya,
te jiñaꞌa ya:
―Xinañuꞌu maa sa kakan‑tnuꞌu ñaꞌa,
te jin ndakoneꞌe ni.
Sana kaꞌan sa na in ni tatnuni ja saꞌa sa sukan.
30 Ja ni yo skuandute Juan ma,
¿Suꞌsi ma ni tetniñu Juan ma ja saꞌa de sukan,
xi ñayii ma ni tetniñu ñaꞌa ja saꞌa de sukan?
Jin ndakoneꞌe ni ―kúu ya jiñaꞌa ya.
31 Te ka ndatnuꞌu tnaꞌa de:
―Nuna jin kuñaꞌa o ja maa Suꞌsi ma ni tetniñu Juan ma,
kovaa kaꞌan de:
“¿Navaꞌa ñatuu ni ka kandija ni ja ni kaꞌan de ma?”
32 Te ni masu kuu jin kuñaꞌa o ja ñayii ma ni tetniñu Juan ma,
vaa jin ndakiti ini ñayii ma nuu o a ―ka kuu de ka kaꞌan de.
Chi vaa ka yuꞌu de ñayii ma,
chi vaa ndaka ñayii ma ka jani ini ja Juan ma,
ja ndaa ja in tee ni yo ndakaxtnuꞌu tnuꞌu ni yo waꞌa Suꞌsi ma kúu de.
33 Chukan kúu ja saꞌa ni ka ndakoneꞌe de nuu Jesús ma:
―Ñatuu ka jini sa ―ka kuu de ka jiñaꞌa de.
Sani te Jesús ma,
ni ndakoneꞌe ya:
―Suni ni ma kaꞌan tna sa na in ni tatnuni ja saꞌa sa a ―kúu ya jiñaꞌa ya.