Jesús ma, ni ndatnaꞌa ya jiꞌin Zaqueo ma
19
Jesús ma,
ni kivi ya ñuu Jericó ma,
te ni chuꞌun ya kuaꞌan ya ini ñuu ma.
2 Te yukan iyo in tee xiku nani de Zaqueo.
Tee tátnuni nuu tee ka ndakeꞌen yaꞌvi xuꞌun noꞌo ñuu Roma ma kúu de.
3 Tee yaꞌa,
kúu ini de ja kuni de Jesús ma.
Kovaa ñatuu kúu kuni de ya,
vaa ka iyo kuaꞌa ñayii,
te Zaqueo ma chi in tee ndiꞌi ndiꞌi‑ni kúu de.
4 Chukan kúu ja jinu de ni jakoxtnuu de,
te ni jan kaa de in tnu sicómoro yatni nuu yaꞌa Jesús ma,
sukan‑vaꞌa kuu kuni de ya.
5 Nuu ni yaꞌa Jesús ma ichi yukan,
ndeꞌya ya ichi sukun ma,
te ni jini ya Zaqueo ma,
te jiñaꞌa ya:
―Zaqueo,
ki nuu kunu ni kii ni,
chi vaa kanuu ja kiꞌin sa veꞌe ni ma ―kúu ya jiñaꞌa ya.
6 Zaqueo ma,
ni nuu kunu de,
te sii ini ni jan‑taꞌvi de ya veꞌe de ma.
7 Ja ni ka jini ñayii ma sukan,
ndaka i ni ka kejaꞌa ka kaꞌan i tnuꞌu Jesús ma.
Ka kaꞌan i:
―¿Navaꞌa ni kivi de veꞌe in tee ndiso kuechi a?
―ka kuu i ka kaꞌan i.
8 Zaqueo ma,
ni ndokuiñi de,
te jiñaꞌa de nuu Iya Tátnuni ma:
―Jini ni,
Señor,
ndakuaꞌa sa ñayii ndaꞌvi ma sava ja nevaꞌa sa a.
Te nú na in xi‑nuu ni sakuiꞌna sa,
te ndakuaꞌa sa kuun jichi‑ka ―kúu de jiñaꞌa de.
9 Jesús ma,
jiñaꞌa ya:
―Vitna jin ndaniꞌi taꞌvi ñayii veꞌe yaꞌa,
vaa tee yaꞌa tna chi in saꞌya tata Abraham ma kúu de.
10 Vaa saña ja kúu sa iya vee ñayivi ñuu ñayivi a,
vee sa ve ndi nduku sa ñayii jâ ni ka skenaa i maa i ma,
sukan‑vaꞌa jin ndaniꞌi taꞌvi i ―kúu ya jiñaꞌa ya.
Ni kaꞌan Jesús ma in tnuꞌu vijin siki ñayii ni ka kundaꞌa xuꞌun ja jin satniñu jiꞌin i ma
11 Ka ninisoꞌo i tnaꞌa ja káꞌan Jesús ma,
te Jesús ma,
ni kaꞌan ya in tnuꞌu vijin,
vaa yatni iyo ya ñuu Jerusalén ma,
te ni ka jani ini i ja sani te kenda kivi tatnuni Suꞌsi ma ñuu ñayivi ya.
12 Te Jesús ma,
jiñaꞌa ya:
―Iyo in tee kanuu xeen,
te ni kee de kuaꞌan de in ñuu jika,
sukan‑vaꞌa niꞌi de tnuꞌu ndee tnuꞌu ndatnu ja ko kuu de rey ma.
Te sana ndii de ja tatnuni de ñuu de ma.
13 Te ni kana de uxi tee ka jinukuechi nuu de ma,
te ni waꞌa de kuaꞌa xuꞌun nuu ndi‑in ndi‑in de,
te jiñaꞌa de:
“Jin satniñu ni jiꞌin xuꞌun yaꞌa onde kivi ndenda sa ma”,
kúu de jiñaꞌa de.
14 Kovaa ñayii ñuu de ma,
ka kiti ini i nuu de,
te nani kuaꞌan de ma,
te ni ka tetniñu i in jichi ñayii kuan koo i,
te ka jiñaꞌa i:
“Masu ka kuni sa ja tee yaꞌa ko kuu rey tatnuni nuu sa ma”,
ka kuu i ka jiñaꞌa i.
15 ’Kovaa maa de ni kana ja ko kuu de rey ma,
te ni ndenda de ñuu de ma.
Nuu ni ndenda de ma,
te ni ndakana de ndaka tee ni waꞌa de xuꞌun ma,
tee ka jinukuechi nuu de ma,
sukan‑vaꞌa kuni de na saa ni ka niꞌi ndi‑in ndi‑in de ma.
16 Tee xinañuꞌu ma,
ni kenda de,
te jiñaꞌa de:
“Señor,
xuꞌun ni a chi ni niꞌi i uxi‑ka jichi sukan ni taa ni ma”,
kúu de jiñaꞌa de.
17 Te rey ma,
ni ndakoneꞌe de:
“Vaꞌa‑ni,
vaa ñayii jinukuechi vaꞌa kúu ni.
Ja ni jito vaꞌa ni jaku ja ni taa sa ma,
te vitna,
te tatnuni ni nuu uxi ñuu a”,
kúu de jiñaꞌa de.
18 Sani te ni kenda in‑ka de,
te jiñaꞌa de:
“Señor,
xuꞌun ni a ni nduu uꞌun‑ka jichi ja ni taa ni ma”,
kúu de jiñaꞌa de.
19 Te jiñaꞌa tna rey ma:
“Ndijin ko kuu ñayii tatnuni nuu uꞌun ñuu a”,
kúu de jiñaꞌa de.
20 ’Kovaa ni kenda in‑ka de ma,
te jiñaꞌa de:
“Señor,
yaꞌa iyo xuꞌun ni a.
Ni tavaꞌa sa i in nuu pañu,
21 vaa yuꞌu ñaꞌa sa,
vaa ndijin chi in tee ndákan‑ndoo kuenda kúu ni,
vaa ndákeꞌen ni ja masu ni sonee ni ma,
te ndáxtutu ni itu nuu masu ni chiꞌi ni ma”,
kúu de jiñaꞌa de.
22 Sani te jiñaꞌa rey ma:
“Tee masu jinukuechi vaꞌa kúu ni.
Maa tnuꞌu ni kaꞌan ni a,
te ndákaꞌan sa nuu ni.
Nú jini ni ja in tee ndákan‑ndoo kuenda kúu sa ja ndákeꞌen sa ja masu ni sonee sa ma te ndáxtutu sa itu nuu masu ni chiꞌi sa ma,
23 ¿navaꞌa ñatuu ni jan xsiaꞌa ni xuꞌun sa a nuu ñayii jin taa saꞌya xuꞌun ma,
sukan‑vaꞌa ja ndenda sa ma,
ndataa ni xuꞌun sa ma jiꞌin saꞌya xuꞌun sa ma?”,
kúu de jiñaꞌa de.
24 Te jiñaꞌa de ñayii ka iyo yukan:
“Jin ndaxtandee ni xuꞌun sa a,
te jin ndakuaꞌa ni tee ni niꞌi uxi‑ka jichi ma”,
kúu de jiñaꞌa de.
25 Te ka jiñaꞌa i:
“¡Señor,
kovaa jâ nevaꞌa de uxi‑ka jichi ma!”,
ka kuu i ka jiñaꞌa i.
26 Kovaa rey ma,
ni ndakoneꞌe de:
“Káꞌan sa nuu ni ja nú na in nevaꞌa kuaꞌa‑ka,
suꞌva kuaꞌa‑ka skutaꞌvi ñaꞌa Suꞌsi ma.
Kovaa nú na in ñatuu nawa nevaꞌa i ma,
onde ja vala nevaꞌa i ma ndakeꞌen Suꞌsi ma.
27 Te ñayii ñatuu ka kunimani nuu sa ma ja ñatuu ka kuni i ja ko kuu sa rey nuu i ma,
kuán koo ni kuán kueka ni i,
te kondeꞌya sa,
te jin kaꞌni ni i”,
kúu de jiñaꞌa de.
―Saꞌa ni ndakani Jesús ma.
Jesús ma, yoso ya in burru ni kivi ya ñuu Jerusalén ma
28 Ja ni jinu ni kaꞌan Jesús ma sukan,
kuaꞌan ya ñuu Jerusalén ma.
Jesús entra en Jerusalén (Lucas 19.28-44)
29 Nuu sani te kenda ya ñuu Betfagé ma jiꞌin ñuu Betania ma yatni yuku nani Yuku Tnu Olivo ma,
ni tetniñu ya uu tee ka ndikin ya ma,
30 te jiñaꞌa ya:
―Kuán koo ni yuꞌu ñuu iyo jiyo ma,
te nú ni ka kenda koo ni ma,
te jin ndaniꞌi ni in burru nuꞌni ti ja ñatuu na in kakoso‑ka ti.
Te jin ndaji ni ti,
te ki koo ni jiꞌin ti.
31 Te nú na in kakan‑tnuꞌu navaꞌa ka ndaji ni ti,
te jin kuñaꞌa ni:
“Maa Señor ma jiniñuꞌu ti”,
jin kuñaꞌa ni ―kúu ya jiñaꞌa ya.
32 Te tee ka ndikin Jesús ma,
kuan koo de,
te ni ka ndaniꞌi de ndaka sukan jiñaꞌa ya ma.
33 Nani ka ndaji de burru ma,
te ñayii xi‑burru ma,
ni ka jikan‑tnuꞌu i:
―¿Navaꞌa ka ndaji ni burru a?
―ka kuu i ka jiñaꞌa i.
34 Te ni ka ndakoneꞌe de:
―Vaa Señor ma jiniñuꞌu ti ―ka kuu de ka jiñaꞌa de.
35 Te ni ka sonee de saꞌma siki burru ma,
te ni jan koo de jiꞌin ti nuu iyo Jesús ma,
te ni ka chindee de ya ni kakoso ya ti.
36 Sukan‑ni kuaꞌan Jesús ma jiꞌin ti ichi ma,
ñayii ma,
ka skuili i saꞌma ka ndii i ma.
37 Te nuu ni kuyatni ya ja nuu ya Yuku Tnu Olivo ma,
ndaka ñayii ka ndikin ya ma,
ni ka kejaꞌa i ka kusii ini i,
te ka chiñuꞌu i Suꞌsi ma ja ndaka milagru ni ka jini i ma,
38 te ka kaꞌan i:
―¡Jayiñuꞌu kúu rey vee nuu Iya Tátnuni ma!
¡Ka kusii ini i andivi ma,
te jayiñuꞌu kúu onde sukun ma!
―ka kuu i ka kaꞌan i.
39 Sani te jaku tee ka kuu fariseo ma ja ka iyo de neꞌun ñayii ma,
ka jiñaꞌa de:
―Teskuaꞌa,
kaꞌan ni nuu ñayii ka ndikin ñaꞌa a,
te má jin kayuꞌu‑yuꞌu i ―ka kuu de ka jiñaꞌa de.
40 Kovaa Jesús ma,
jiñaꞌa ya:
―Káꞌan sa ja nú ñayii yaꞌa,
jin kasiyuꞌu i,
yuu a jin kayuꞌu ―kúu ya jiñaꞌa ya.
41 Nuu ni kenda yatni ya ñuu Jerusalén ma,
ja ni jini ya ñuu ma,
Jesús ma,
ndaꞌyu ya ja kuu ñuu ma,
42 te káꞌan ya:
―¡Nute ni ka jakuꞌni ini ni,
visi ja vitna,
sukan saꞌa sa ja jin koo vaꞌa ni ma!
Kovaa vitna chi iyo yuꞌu,
te masu kuu jin kuni ni.
43 Vaa ki koo kivi uꞌvi siki ni a,
ja ñayii ñatuu ka kunimani nuu ni a,
jin saꞌa i ja jin ndesi vaꞌa ni,
te ni‑kaꞌnu ñuu a,
jin ndakonduu ñaꞌa i,
te jin kaꞌni ñaꞌa i,
44 te jin xnaa ndiꞌi kuiti i ñuu ni a.
Jin kaꞌni ñaꞌa i,
te ni ma jin xndoo‑ka i ni‑in‑ka yuu siki in‑ka yuu ja jin koxtnaꞌa i,
vaa ñatuu ni ka ndasaꞌa ni kuenda ora nuu ni kii Suꞌsi ma ja saꞌa ya ja jin kaku ni ma ―kúu ya káꞌan ya.
Jesús ma, ni ndasavii ya ini veñuꞌu kaꞌnu ma
45 Ja ni jinu sukan ma,
Jesús ma,
ni kivi ya veñuꞌu kaꞌnu ma,
te ni kejaꞌa ya kéneꞌe ya ñayii ka xiko ma,
46 te jiñaꞌa ya:
―Nuu tutu ndee tnuꞌu Suꞌsi ma káꞌan:
“Veꞌe sa a chi ko kuu i veꞌe kakan‑taꞌvi ñayii ma nuu Suꞌsi ma.”
Sukan ndee nuu tutu Suꞌsi ma.
Kovaa ndijin chi ni ka ndasaꞌa ni in yavi nuu ka ñuꞌu kuiꞌna ―kúu ya jiñaꞌa ya.
47 Ni jinu ni ndasavii ya ma,
te ndaka kivi Jesús ma,
káxtnuꞌu ya tnuꞌu maa ya ma ini veñuꞌu ma,
te tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
jiꞌin tee ka netniñu ñuu yukan,
ka nduku de naxe jin kaꞌni de ya.
48 Kovaa ñatuu ka niꞌi ini de naxe jin saꞌa de,
vaa ndaka ñayii ma,
ka ninisoꞌo ñukuun i ja káꞌan ya ma.