Jesús ma, yoso ya in burru ni kivi ya ñuu Jerusalén ma
21
Nuu ni ka kuyatni de jiꞌin Jesús ma ñuu Jerusalén ma,
te ni jan koo de jiꞌin ya ñuu Betfagé ma,
ja iyo yatni i jiꞌin yuku nani Yuku Tnu Olivo ma,
te Jesús ma,
ni tetniñu ya uu tee ka ndikin ya ma,
2 te jiñaꞌa ya:
―Kuán koo ni yuꞌu ñuu ichi jiyo a,
te jin ndaniꞌi ni in burra nuꞌni ti,
te iyo tna in burru jaa luluu‑ka.
Te jin ndaji ni ti,
te ki koo ni jiꞌin ti.
3 Te nú na in kakan‑tnuꞌu naku ka saꞌa ni sukan,
te jin kuñaꞌa ni:
“Maa Señor ma jiniñuꞌu ti,
te sani te ndataa ya ti”,
jin kuñaꞌa ni ―kúu ya jiñaꞌa ya.
4 Ndaka saꞌa ni kuu,
sukan‑vaꞌa ko kuu sukan ni kaꞌan tee ni yo ndakaxtnuꞌu tnuꞌu ni yo waꞌa Suꞌsi ma,
nuu ni kaꞌan de ma:
5 Kuñaꞌa ni nuu sasiꞌi ñuu nani Sion ma:
“Kondeꞌya ja vee rey tátnuni nuu ro a,
te iya kuee ini kúu ya,
te yoso ya in burru jaa
saꞌya in burra kiti jâ jiso.”
Saꞌa ni kaꞌan de.
6 Sani te tee ka ndikin Jesús ma,
kuan koo de,
te ni ka saꞌa de sukan ni tatnuni Jesús ma nuu de ma.
7 Te ni ka jan xsiaꞌa de burra ma jiꞌin saꞌya ti ma nuu iyo Jesús ma,
te ni ka sonee de saꞌma de ma siki kiti jaa ma,
te Jesús ma,
ni kaa ya siki ti ma,
te yoso ya ti kuaꞌan ya.
8 Te kuaꞌa ñayii ma,
ka skuili i saꞌma ka ndii i ma,
te jaku‑ka i ma,
ka jaꞌnde i ndaꞌa yutnu ma,
te ka skuili i ichi kuaꞌan ya ma.
9 Te ñayii ka yoxtnuu kuan koo i ma jiꞌin ñayii ka ndandikin ma,
ka kayuꞌu i ka kaꞌan i:
―¡Hosanna kó kuu nuu Saꞌya David ma!
¡Jayiñuꞌu kúu rey vee nuu Iya Tátnuni ma!
¡Hosanna!
¡Jayiñuꞌu kó kuu nuu tátnuni Suꞌsi ma onde sukun ma!
―ka kuu i ka kaꞌan i.
10 Te nuu ni kivi ya ñuu Jerusalén ma,
ndaka ñayii ma,
ni ka ndakanda,
te ka kaꞌan i:
―¿Na in kúu tee yaꞌa?
―ka kuu i ka kaꞌan i.
11 Te ñayii ma,
ka jiñaꞌa i:
―Tee yaꞌa kúu Jesús tee ndákaxtnuꞌu tnuꞌu waꞌa Suꞌsi ma,
te ñuu Nazaret ma ja iyo i ñuu Galilea ma kúu ñuu de ―ka kuu i ka jiñaꞌa i.
Jesús ma, ni ndasavii ya ini veñuꞌu kaꞌnu ma
12 Te Jesús ma,
ni kivi ya veñuꞌu kaꞌnu ma,
te ni keneꞌe ya ndaka ñayii ka xiko ma jiꞌin ñayii ka jaan ma.
Te ni chindeyi ya mesa ñayii ka sama xuꞌun ma,
jiꞌin nuu ka xiko i sata ma.
13 Te jiñaꞌa ya:
―Jâ ka jini ni ja nuu tutu ndee tnuꞌu Suꞌsi ma káꞌan:
“Ini veꞌe sa a chi ko kuu i in veꞌe nuu kenda koo ñayii ndaka ñuu ma ja jin kakan‑taꞌvi i nuu Suꞌsi ma.”
Vaa sukan ni jani ini ya.
Kovaa ndaka ndijin chi ni ka ndasaꞌa ni in yavi nuu ka ñuꞌu kuiꞌna ―kúu ya jiñaꞌa ya.
14 Te ñayii ñatuu ka kundijin nuu ma,
jiꞌin ñayii ñatuu kuu jin kaka ma,
ni ka jan tuꞌva i ya ini veñuꞌu ma,
te ni ndasavaꞌa ya i.
15 Kovaa tee ka tatnuni nuu sutu ma,
jiꞌin tee ka skuaꞌa tnuꞌu ni yo tatnuni Moisés ma,
ni ka jini de milagru ni saꞌa ya ma,
jiꞌin sukan ka kayuꞌu suchi kuechi ma ini veñuꞌu ma ja ka kaꞌan i:
“¡Hosanna!
¡Ja vaꞌa kúu Saꞌya tata David ma!”,
ka kuu i ka kaꞌan i.
Te ni ka ndakiti xeen ini de,
16 te ka jiñaꞌa de:
―¿Jinisoꞌo ni ja ka kaꞌan suchi yaꞌa?
―ka kuu de ka jiñaꞌa de.
Te Jesús ma,
jiñaꞌa ya:
―Jinisoꞌo sa.
¿Ñatuu nama uun jin kaꞌvi‑ka ni nuu tnuꞌu Suꞌsi ma ja káꞌan saꞌa ma?:
Yuꞌu suchi kuechi ma jiꞌin yuꞌu suchi ka jaxi ma
ni satuꞌva ni ja jin ndachiñuꞌu ñaꞌa i
―kúu ya jiñaꞌa ya.
17 Te ni xndoo ya de,
te kuaꞌan ya ichi ñuu Betania ma,
te yukan ni ndoo ya.
Jesús ma, ni kaꞌan uꞌvi ya ja kuu in tnu higo
(Mr 11:12-14, 20-26)
18 Kivi yutnee ma,
nuu ve ndii Jesús ma ñuu Jerusalén ma,
te kókon ya.
19 Te ni jini ya in tnu higo yuꞌu ichi ma.
Kovaa ñatuu na ndeꞌya tnu ma ni niꞌi ya chi nanimaa ndaꞌa tnu ma kúu.
Sani te jiñaꞌa ya nuu tnu higo ma:
―¡Masu kuun‑ka higo ro!
―kúu ya jiñaꞌa ya.
Te ora yukan‑ni,
te ni yichi tnu.
20 Te tee ka ndikin ya ma,
ni ka jini de sukan ni ndoꞌo tnu higo ma,
te ni ka saꞌvi‑nka ini de,
te ka kaꞌan de:
―¿Navaꞌa tnu higo a,
yachi‑ni ni yichi tnu?
―ka kuu de ka kaꞌan de.
21 Jesús ma,
ni ndakoneꞌe ya:
―Ja ndaa káꞌan sa,
nú jin kukanu ini ni Suꞌsi ma,
te ñatuu ka jani uu ka jani uni ini ni ma,
te masu yika‑ni ja jin saꞌa ni sukan ni saꞌa sa jiꞌin tnu higo a chi suꞌva nuna jin kuñaꞌa ni yuku yukan:
“Kuán ndiyo jiña,
te skee maa ro nuu mar ma”,
sani te ko kuu sukan.
22 Te ndaka ja jin kakan‑taꞌvi ni nuu Suꞌsi ma,
te nú ka kukanu ini ndija ni ya ja taa ya ma chi jin niꞌi ni ―kúu ya jiñaꞌa ya.
Ni ka jikan‑tnuꞌu de na in ni tatnuni ja saꞌa Jesús ma sukan
23 Te nuu ni ndenda Jesús ma ini veñuꞌu kaꞌnu ma,
te nuu káxtnuꞌu ya nuu ñayii ma,
te ni ka jan tuꞌva ñaꞌa tee ka tatnuni nuu sutu ma,
jiꞌin tee ka kuu jaꞌnu ma.
Te ka jikan‑tnuꞌu de:
―¿Na in ni tatnuni ja saꞌa ni sukan a?
¿Xi na in ni kaꞌan ja kuu saꞌa ni sukan a?
―ka kuu de ka jiñaꞌa de.
24 Jesús ma,
ni ndakoneꞌe ya,
te jiñaꞌa ya:
―Xinañuꞌu maa sa kakan‑tnuꞌu ñaꞌa,
te nuna jin ndakoneꞌe ni,
te sana kaꞌan sa na in ni tatnuni ja saꞌa sa sukan.
25 Ja ni yo skuandute Juan ma,
¿Suꞌsi iya iyo andivi ma ni tetniñu Juan ma ja saꞌa de sukan,
xi ñayii ma ni tetniñu ñaꞌa ja saꞌa de sukan?
―kúu ya jiñaꞌa ya.
Te ka ndakan‑tnuꞌu tnaꞌa de:
―Nuna jin kuñaꞌa o ja maa Suꞌsi iya iyo andivi ma ni tetniñu Juan ma,
kovaa kaꞌan de:
“¿Te navaꞌa ñatuu ni ka kandija ni ja ni kaꞌan de ma?”
26 Kovaa nuna jin kuñaꞌa o ja ñayii ma ni tetniñu de,
masu kuu vaa ka yuꞌu o ñayii a,
chi vaa ndaka i ka jani ini ja Juan ma,
in tee ni yo ndakaxtnuꞌu tnuꞌu ni yo waꞌa Suꞌsi ma kúu de,
te jin ndakiti ini i nuu o ―ka kuu de ka kaꞌan de.
27 Chukan kúu ja saꞌa ni ka ndakoneꞌe de nuu Jesús ma:
―Ñatuu ka jini sa ―ka kuu de ka jiñaꞌa de.
Sani te Jesús ma,
ni ndakoneꞌe ya:
―Suni ni ma kaꞌan tna sa na in ni tatnuni ja saꞌa sa saꞌa ―kúu ya jiñaꞌa ya.
Jesús ma, ni kaꞌan ya in tnuꞌu vijin nduu sayii in tee ma
28 Kovaa sani te jiñaꞌa Jesús ma:
―¿Naxe ka jani ini ni?
In tee,
te iyo uu sayii de,
te ni jan tuꞌva de suchi xinañuꞌu ma,
te jiñaꞌa de:
“Sayii,
kuáꞌan,
te satniñu ro vitna itu tnu uva ma”,
kúu de jiñaꞌa de.
29 Te ni ndakoneꞌe i,
te jiñaꞌa i:
“Masu kiꞌin sa”,
kúu i jiñaꞌa i.
Kovaa kuee‑ka ma,
te ni ndakani,
ni ndakaꞌvi ini i,
te kuaꞌan i itu ma.
30 Te ni jan tuꞌva tuku de in‑ka sayii de ma,
te jiñaꞌa de sukan ni jiñaꞌa de suchi xinañuꞌu ma.
Te suchi yaꞌa chi ni ndakoneꞌe i:
“Kuu tna vi,
taa”,
kúu i jiñaꞌa i,
kovaa masu ni jaꞌan i itu ma.
31 Te jin kaꞌan ni,
¿nde i ja nduu i ma ni saꞌa sukan kúni yuva i ma?
―kúu ya jiñaꞌa ya.
Te ka jiñaꞌa de:
―Suchi xinañuꞌu ma ―ka kuu de ka jiñaꞌa de.
Te Jesús ma,
jiñaꞌa ya:
―Ja ndaa ja ndaa káꞌan sa ja tee ka ndakeꞌen yaꞌvi xuꞌun noꞌo ñuu Roma ma,
jiꞌin ñaꞌa ka kuneé ka ku‑uun ma,
ka yoxtnuu‑ka de jiꞌin ña jin kivi koo de nuu tatnuni Suꞌsi ma sana ndijin.
32 Vaa ni kenda Juan ma nuu ni,
ja ni kaxtnuꞌu de ichi ndaa ma,
te ñatuu ni ka kandija ni.
Kovaa tee ka ndakeꞌen yaꞌvi xuꞌun noꞌo ñuu Roma ma,
jiꞌin ñaꞌa ka kuneé ka ku‑uun ma chi ni ka kandija ña jiꞌin de,
te ni ka jini ni ja ni ka kandija de jiꞌin ña ma,
te ñatuu ni ka ndakani,
ni ka ndakaꞌvi ini ni ja jin kandija tna ni ja káꞌan Juan ma ―kúu ya jiñaꞌa ya.
Jesús ma, ni kaꞌan ya in tnuꞌu vijin ñayii masu inuvaꞌa ini, ja ka jito i itu tnu uva ma
33 Te jiñaꞌa Jesús ma:
―Jin koninisoꞌo ni in‑ka tnuꞌu vijin a:
In tee,
ni sunkoo de ni‑kaꞌnu itu de ma tnu uva,
te ni jasi de yuꞌu itu de ma.
Te ni satuꞌva de in nuu taxi uva ma kivi kuaan i ma,
te ni saꞌa de in veꞌe sukun sukun,
sukan‑vaꞌa kuu ko koto de ni‑kaꞌnu itu de ma.
Sani te ni nduku de jaku ñayii ja jin ko koto i itu de ma,
te kivi kuaan uva de ma,
te sasava jin kuu de jiꞌin i.
Sani te kuaꞌan jika de.
34 Te maa kivi kuáan i ma,
te ni tetniñu de tee ka jinukuechi nuu de ma ja jin koo de jin nu keꞌen de jaku uva ja ni kuaan ma nuu ñayii ka jito itu de ma.
35 Kovaa ñayii ka jito ma,
ni ka tnii i tee ma,
te in de ma ni ka kani i,
te in‑ka de ma ni ka jaꞌni i,
te in‑ka tuku de ma,
ni ka waꞌa yuu i de.
36 Kovaa tee xi‑ñuꞌú ma chi ni ndatetniñu tuku de kuaꞌa‑ka tee ka jinukuechi nuu de ma ja jin koo de sana tee ni jan koo xinañuꞌu ma.
Kovaa tee ni jan koo‑ka ma chi sukan ni ka saꞌa i tee xinañuꞌu ma,
sukan ni ka saꞌa i de.
37 Te sandiꞌi‑nka ma,
te ni tetniñu de saꞌya maa de ma.
Vaa jani ini de:
“Jin kava respetu i nuu saꞌya o a nuna tetniñu o i,
vaa saꞌya maa o kúu i.”
38 Kovaa ñayii ka jito itu de ma,
ni ka jini i ja vee saꞌya tee ma,
te ni ka ndatnuꞌu tnaꞌa i:
“Suchi yaꞌa kúu suchi ndutaꞌvi ñuꞌú yaꞌa.
Jín kaꞌni o i,
te jin ndaniꞌi o ñuꞌú i a”,
ka kuu i ka kaꞌan i.
39 Chukan kúu ja ni ka tnii i saꞌya de ma,
te ni ka keneꞌe i saꞌya de ma yuꞌu itu ma,
te ni ka jaꞌni i saꞌya de ma.
40 ’Te nuna ndenda tee xi‑ñuꞌú ma,
te ¿nawa ka jani ini ndijin ja saꞌa de jiꞌin suchi ka jito itu de ma?
―kúu ya jiñaꞌa ya.
41 Te tee ka tatnuni nuu sutu ma,
jiꞌin tee ka kuu jaꞌnu ma,
ka jiñaꞌa de:
―Xndoꞌo xneni de suchi ka jito itu de ma,
te kaꞌni de i,
te kuaꞌa de ñuꞌú de ma siin‑ka ñayii ja jin satniñu i,
te jin ndakuaꞌa i ja kee itu de ma kivi kuaan i ma ―ka kuu de ka jiñaꞌa de.
42 Te Jesús ma,
jiñaꞌa ya:
―¿Ñatuu jin kaꞌvi‑ka ni tnuꞌu yaꞌa ja ndee nuu tutu Suꞌsi ma nuu saꞌa káꞌan ma?:
Yuu ni ka saxiko ñayii ka saꞌa veꞌe ma,
ni nduu i yuu kanuu‑ka.
Saꞌa ni saꞌa maa Iya Tátnuni ma,
te ñatuu nama uun ni ka jani ini o ja sukan ko saꞌa ya.
Saꞌa káꞌan tnuꞌu Suꞌsi ma.
43 Te chukan kúu ja káꞌan sa nuu ni a ja ja tatnuni Suꞌsi ma nuu ñayii ka kuu ñuu ya ma,
xtandiyo ya nuu ndaꞌa ni a,
te ndakuaꞌa ya nuu jaku‑ka ñayii ja jin saꞌa i sukan játna ini ya ma.
44 Te yuu ma,
ndevaꞌa‑ni ñayii nduva siki i ma,
kukuechi kulikin ñayii ma.
Te nú yuu ma jinu siki in ñayii ma,
ñuyaka‑nka‑ni nduu ñayii ma ―kúu ya jiñaꞌa ya.
45 Te tee ka tatnuni nuu sutu ma,
jiꞌin tee ka kuu fariseo ma,
ni ka jinisoꞌo de tnuꞌu vijin ni kaxtnuꞌu ya ma,
te ni ka jinitnuni de ja tnuꞌu vijin ni kaꞌan ya ma chi ja jin kuu maa de kúu.
46 Te ka kuni de ja jin tnii de Jesús ma.
Kovaa ka yuꞌu de ñayii ma,
vaa ndaka ñayii ma,
ka jani ini i ja in tee ndákaxtnuꞌu tnuꞌu ni waꞌa Suꞌsi ma kúu Jesús ma.