Jesús ma, ni saꞌa ya ja ndute ma, te ni nduu de ndute uva
2
Nuu uni kii ma ni iyo in viko tnándaꞌa ñuu nani Caná ñuu Galilea ma.
Te yukan iyo tna siꞌi Jesús ma.
2 Te ni ka kana tna ñayii ma Jesús ma jiꞌin tee ka ndikin ya ma.
Ni jan koo de jiꞌin ya viko tnándaꞌa ma.
3 Te ni ndiꞌi ndute uva ma,
te siꞌi Jesús ma,
jiñaꞌa ña ya:
―Ñatuu‑ka na ndute uva ka nevaꞌa i ―kúu ña jiñaꞌa ña.
4 Jesús ma,
ni ndakoneꞌe ya:
―¿Nawa kúni ni ja saꞌa sa?
¿Navaꞌa káꞌan ni saꞌa?
Ñatuu kenda‑ka ora ja satniñu sa ―kúu ya jiñaꞌa ya.
El milagro en Caná (Juan 2.1-12)
5 Te jiñaꞌa ña tee ka skanduu ndute uva ma:
―Jin saꞌa ni ndaka ja káꞌan i ma ―kúu ña jiñaꞌa ña.
6 Ka nukuiñi iñu yuu ka kuu tinaja ja jin kuꞌun ndute ka jatniñu ñayii judío ma sukan ka saꞌa i kivi ka kuni i ja jin nduvii i nuu Suꞌsi ma.
Te in tinaja ma chi kanda uu xi uni kiyi ndute.
7 Jesús ma,
jiñaꞌa ya tee ka skanduu ndute uva ma:
―Jin xchitu ni ndute nuu tinaja a ―kúu ya jiñaꞌa ya.
Te ni ka xchitu de.
8 Te Jesús ma,
jiñaꞌa ya:
―Vitna te jin tava ni jaku ndute a,
te jin xsiaꞌa ni de nuu tee kúcargu viko a ―kúu ya jiñaꞌa ya.
Sukan ni ka saꞌa de.
9 Te tee kúcargu viko ma,
ni jitotnuni de ndute ni nduu ndute uva ma.
Ni masu jini de ndenu ni kee ndute uva ma chi maa in‑ni tee ka skanduu ma ka jini,
chi vaa maa de ni ka tava ndute ma.
Chukan kúu ja tee kúcargu viko ma,
ni kana de suchi tnándaꞌa ma,
10 te jiñaꞌa de:
―Ndaka ñayii ma,
xinañuꞌu ndute uva vaꞌa‑ka ma ka skanduu i,
te nuu jâ ni kukuaꞌa ka jiꞌi ñayii ka iyo viko ma,
sani te ka keneꞌe i ja ndaꞌvi‑ka ma.
Kovaa roꞌo chi ni tavaꞌa ro ndute uva vaꞌa‑ka a,
te onde vitnañuꞌni,
sana ni keneꞌe ro de ―kúu de jiñaꞌa de.
11 Chaꞌa kúu ja ni saꞌa Jesús ma ñuu nani Caná ñuu Galilea ma,
te chaꞌa kúu xinañuꞌu milagru ni saꞌa ya ma,
ja ni kaxtnuꞌu ya jayiñuꞌu maa ya ma.
Te tee ka ndikin ya ma,
ni ka kukanu ini‑ka de ya.
12 Te ni jinu sukan,
te kuaꞌan ya ñuu Capernaum ma.
Te ndikin siꞌi ya ma,
jiꞌin ñani ya ma,
jiꞌin tee ka ndikin ya ma,
kuan koo de jiꞌin ya.
Te yukan ni iyo ya jiꞌin de jaku kii.
Jesús ma, ni ndasavii ya ini veñuꞌu kaꞌnu ma
13 Jesús ma,
kuaꞌan ya ñuu Jerusalén ma,
vaa jâ ve kuyatni Viko Pascua ja ka saꞌa ñayii judío ma.
Jesús en el patio del templo (Juan 2.13-25)
14 Te ini veñuꞌu ma chi ni ndaniꞌi ya tee ka xiko xndiki,
jiꞌin tee ka xiko ndikachi,
jiꞌin tee ka xiko sata,
jiꞌin tee ka nukoo ka sama de xuꞌun ñayii ma.
15 Ja ni jini Jesús ma sukan,
ni keꞌen ya in yoꞌo,
te ni saꞌa ya in yutnu xii,
te ni keneꞌe ya ndaka kiti ka ñuꞌu ma,
jiꞌin ndaka ñayii ma.
Te ñayii ka sama xuꞌun ma,
ni jatenuu ya xuꞌun i ma,
te ni kondakin ya mesa i ma.
16 Suni tee ka xiko sata ma jiñaꞌa ya:
―¡Jin xtandiyo ni kiti yaꞌa!
¡Má jin saꞌa ni nuyaꞌvi veꞌe Yuva sa ya!
―kúu ya jiñaꞌa ya.
17 Sani te ni ka ndakaꞌán tee ka ndikin ya ma sukan káꞌan tutu ndee tnuꞌu Suꞌsi ma:
“Kúkueñu sa veꞌe Yuva sa a,
te chukan kúu ja saꞌa sa ndaka chaꞌa.”
18 Te ni ka jikan‑tnuꞌu tee judío ma nuu Jesús ma:
―¿Nde a kúu ja kaxtnuꞌu ni,
ja saꞌa ni saꞌa?
―ka kuu de ka jiñaꞌa de.
19 Jesús ma,
ni ndakoneꞌe ya:
―Jin ndakana ni veñuꞌu yaꞌa,
te nuu uni kii te ndasaꞌa sa ―kúu ya jiñaꞌa ya.
20 Te tee judío ma,
ka jiñaꞌa de:
―Uu xiko iñu (46) kuiya ni ka satniñu i ja ni kuvaꞌa veñuꞌu a,
te ¿ndijin,
nuu uni‑ni kii te ndasaꞌa ni,
káꞌan ni a?
―ka kuu de ka jiñaꞌa de.
21 Kovaa veñuꞌu káꞌan Jesús ma chi maa yikikuñu ya ma kúu ja káꞌan ya ma.
22 Chukan kúu ja nuu ni ndateku ya ma,
te tee ka ndikin ya ma,
ni ka ndakaꞌán de sukan ni kaꞌan ya ma,
te ni ka kandija de sukan káꞌan tutu ndee tnuꞌu Suꞌsi ma jiꞌin ja káꞌan Jesús ma.
Jesús ma, jini ya nawa ñunee ini anua ñayii ma
23 Nani iyo Jesús ma Viko Pascua ñuu Jerusalén ma,
kuaꞌa ñayii ma,
ni ka kandija i ja káꞌan ya ma,
ja ni ka jini i milagru ni saꞌa ya ma.
24 Kovaa Jesús ma,
masu ni yo kukanu ini ya ñayii yukan,
vaa jini ya sukan inu‑ini ndaka i ma.
25 Ñatuu ni yo jiniñuꞌu ya ja na in kuñaꞌa ja naxe ka kuu ñayii ma,
vaa maa ya chi jâ jini ya onde ini anua ñayii ma nawa ñuꞌu ini i.