Ni ka ndatnuꞌu Jesús ma jiꞌin tee nani Nicodemo ma
3
Iyo in tee fariseo ma ja nani de Nicodemo,
te in tee kanuu xeen neꞌun ñayii judío ma kúu de.
2 Tee yaꞌa,
ni kii de nuu iyo Jesús ma in jakuaa,
te jiñaꞌa de:
―Teskuaꞌa,
ka jini sa ja nuu Suꞌsi ma vee ni ja kaxtnuꞌu ni nuu ñayii a,
vaa masu na in kúu saꞌa milagru saꞌa ni a,
nú masu iyo i jiꞌin Suꞌsi ma ―kúu de jiñaꞌa de.
Jesus habla con Nicodemo (Juan 3.1-21)
3 Te ni ndakoneꞌe Jesús ma,
te jiñaꞌa ya:
―Ja ndaa ja ndaa káꞌan sa,
nú na in ma ndakâku jaa i,
masu kuu kuni i nuu tatnuni Suꞌsi ma ―kúu ya jiñaꞌa ya.
4 Te jiñaꞌa Nicodemo ma:
―¿Xi kuu ja in ñayii nijaꞌnu ma,
te ndakâku jaa i in‑ka jichi?
¿Kuu ndivi i chii siꞌi i ma te ndakâku jaa i in‑ka jichi?
―kúu de jiñaꞌa de.
5 Te ni ndakoneꞌe Jesús ma:
―Ja ndaa ja ndaa káꞌan sa,
nú na in ma kâku jiꞌin ndute jiꞌin Xtumani Ndios ma,
masu kuu kuni i nuu tatnuni Suꞌsi ma.
6 Ñayii ni kâku nuu siꞌi i ma chi yikikuñu‑ni kúu i.
Kovaa ñayii ni ndakâku jaa ja saꞌa Xtumani Ndios ma,
ni ndujaa anua i ma nuu Suꞌsi ma.
7 Máko kun‑nenu ini ni ja káꞌan sa ja jiniñuꞌu ja jin ndakâku jaa ni.
8 Vaa jini ni ja yiꞌi kajin ma nuu kúni maa i ma,
te jinisoꞌo o ja kúu yuꞌu i ma,
kovaa masu jini o nde ichi vee i nde ichi kuaꞌan i.
Sukan kúu ñayii ndákâku jaa ja saꞌa Xtumani Ndios ma ―kúu ya jiñaꞌa ya.
9 Nicodemo ma,
ni ndakakan‑tnuꞌu de in‑ka jichi:
―¿Naxe kúu ja káꞌan ni a?
―kúu de jiñaꞌa de.
10 Te Jesús ma,
ni ndakoneꞌe ya:
―Ndijin ja in teskuaꞌa ñuu Israel ya kúu ni,
te ¿ñatuu jini ni ja káꞌan sa a?
11 Ja ndaa ja ndaa káꞌan sa,
ja ja ka jini sa a ka kaꞌan sa,
jiꞌin ja ka ndeꞌya sa a,
te ka ndakaꞌan sa a,
kovaa masu ka kandija ni ja ka ndakaꞌan sa a.
12 Nú ma jin kandija ni tnaꞌa ja káꞌan sa a sukan kúu ñuu ñayivi a,
¿naxe jin kandija ni nuna kaꞌan sa sukan kúu andivi ma?
13 Masu na in ni kaa andivi ma,
nú masu ja maa iya ni kenda ñayivi ñuu ñayivi a,
ja iyo ya andivi ma.
14 Sukan ni saꞌa Moisés ma,
ja ni ndoneꞌe sukun de in koo nani‑maa kaa kúu ti nuu masu nawa kuiti iyo ma,
sukan jiniñuꞌu ja iya ni kenda ñayivi ñuu ñayivi a,
jin ndoneꞌe sukun i ya,
15 sukan‑vaꞌa nú na in na kandija i ya ma,
masu skenaa i maa i,
suꞌva koteku i ni‑kani ni‑jika ―kúu ya jiñaꞌa ya.
Ûni kútoo xeen Suꞌsi ma ndaka ñayii ñuu ñayivi a
16 Suꞌsi ma,
ni kutoo xeen ya ñayii ka iyo ñuu ñayivi a,
te ni tetniñu ya Saꞌya maa in maa tnuꞌu‑ni ya ma,
sukan‑vaꞌa nú na in na kandija ya ma,
te masu skenaa i maa i,
suꞌva ndaniꞌi taꞌvi i te koteku i ni‑kani ni‑jika.
17 Vaa Suꞌsi ma,
masu ni tetniñu ya Saꞌya ya ma ñuu ñayivi yaꞌa ja xndoꞌo xneni ya ñayii ma.
18 Suꞌva ñayii kandija ya ma,
masu kiꞌin i andeya ma ja chunaa i.
Kovaa ñayii ñatuu kándija ya ma,
jâ iyo i ja chunaa maa i,
vaa masu kándija i Saꞌya maa in maa tnuꞌu‑ni Suꞌsi ma.
19 Chukan kúu ja jin chunaa maa ñayii ma,
vaa ni kii Jesús ma,
te sukan tnuu ñuꞌu ma sukan kúu ya,
káxtnuꞌu ya ichi vaꞌa nuu o a.
Kovaa maa ñayii ma chi ni ka jatna ini‑ka i ichi nuu nee ma sana ichi nuu xtnuu ya ñuꞌu maa ya ma,
vaa ja ka saꞌa i ma chi ja uꞌvi kúu.
20 Vaa ndaka ñayii ka saꞌa ja uꞌvi ma,
ñatuu ka jatna ini i nuu xtnuu ya ñuꞌu maa ya ma,
te ñatuu kí koo i nuu xtnuu ya ñuꞌu maa ya ma,
sukan‑vaꞌa ñatuu na in ko ndakuñaꞌa ja ja uꞌvi kúu ja ka saꞌa i ma.
21 Kovaa ñayii ka saꞌa ja ndaa ma chi kí koo i kí tuꞌva i nuu tnuu ñuꞌu ya ma,
sukan‑vaꞌa jin kuni ñayii ma ja ka saꞌa i sukan tátnuni Suꞌsi ma.
Ni kaꞌan Juan ma sukan kanuu‑ka tniñu saꞌa Jesús ma sana tniñu saꞌa maa de ma
22 Ni jinu,
sani te Jesús ma,
kuaꞌan ya jiꞌin tee ka ndikin ya ma ñuu Judea ma.
Nuu ni iyo ya jiꞌin de ma,
te ni yo skuandute ya ñayii ma.
Juan testifica acerca de Jesús (Juan 3.22-36)
23 Suni Juan ma,
iyo de ichi ñuu Enón ma yatni ñuu Salim ma,
te ni yo jan koo ñayii ma,
te ni yo skuandute de i,
vaa iyo kuaꞌa ndute yukan.
24 Saꞌa ni yo kuu,
nuu ñatuu kivi‑ka Juan ma vekaa ma.
25 Kovaa jaku ñayii ka ndikin Juan ma,
ni ka kejaꞌa i ka tetnaꞌa i jiꞌin in tee judío ma siki ja sukan nduvii ndundoo ñayii ma nuu Suꞌsi ma,
26 te ni jan koo i ka jiñaꞌa i Juan ma:
―Teskuaꞌa,
jini ni ja tee ni iyo jiꞌin ni ichi in‑ka yuꞌu yute Jordán ma,
tee ni kaꞌan ni na in kúu de ma,
te vitna chi yikuu de skuandute de ñayii ma,
te ndaka i ka ndikin de ―ka kuu i ka jiñaꞌa i.
27 Te Juan ma,
jiñaꞌa de:
―Masu nawa kuu konevaꞌa o,
nú masu taa maa Suꞌsi ma.
28 Ndaka maa ni ni ka jinisoꞌo ja káꞌan ndaa sa ja masu Cristo iya tetniñu Suꞌsi ma kúu sa chi yika‑ni ja in ñayivi‑ni kúu sa,
te ni tetniñu ñaꞌa Suꞌsi ma ja satuꞌva sa ichi vee Cristo ma.
29 Vaa in viko tnándaꞌa ma chi suchi tnándaꞌa ma,
kúsii ini xeen i ja iyo i jiꞌin suchi siꞌi ma,
te suni sukan kúu tna suchi kétnaꞌa ini jiꞌin suchi tnándaꞌa ma,
ja iyo tna i yukan,
te jinisoꞌo i ja káꞌan suchi tnándaꞌa ma,
te kútachi xeen i.
Te vitna sukan kúsii ini tna sa.
30 Chukan kúu ja saña chi nduu luluu‑ka tniñu saꞌa sa a,
te maa ya chi suꞌva kukaꞌnu‑ka tniñu saꞌa ya ma,
vaa iya kanuu‑ka kúu ya sana saña ―kúu de jiñaꞌa de.
Jiniñuꞌu ja jin kandija o ja káꞌan Jesús ma
31 Iya vee onde sukun ma iyo siki ndaka o.
Ñayii iyo nuu ñuꞌú yaꞌa,
ñayii nuu ñuꞌú yaꞌa kúu i,
te káꞌan i sukan kúu nuu ñuꞌú ya.
Kovaa iya vee onde andivi ma,
iyo ya siki ndaka ja iyo ñuu ñayivi a,
32 te káꞌan ya ja jinisoꞌo ya ma jiꞌin ja jini ya ma.
Kovaa ñatuu na in kándija ja káꞌan ya ma.
33 Kovaa nú na in na kandija ya ma,
ñayii yukan,
káꞌan ndaa i ja Suꞌsi ndija kúu Suꞌsi ma,
34 vaa maa Suꞌsi ma ni tetniñu Saꞌya ya ma.
Vaa iya ni tetniñu Suꞌsi ma,
káꞌan ya ndaka ja tátnuni Suꞌsi ma,
vaa Suꞌsi ma chi masu jaku‑ni Xtumani maa ya ma ni waꞌa ya Saꞌya ya ma chi ni waꞌa ndiꞌi ni waꞌa tuꞌu ya.
35 Vaa Yuva ya ma chi kútoo ya Saꞌya ya ma,
te waꞌa ya tnuꞌu ja tátnuni Saꞌya ya ma siki ndaka ja iyo ñuu ñayivi a.
36 Nú na in kandija Saꞌya ya ma,
te koteku i ni‑kani ni‑jika,
kovaa nú na in ñatuu kúni kandija i Saꞌya ya ma,
masu koteku i,
suꞌva ndetu ñaꞌa nuu ndoꞌo neni i ma.