Sukan ni ka yo saꞌa tee ni tetniñu Jesucristo ma
Sukan ni skuiso Suꞌsi ma ja kii Xtumani Ndios ma
1
Teófilo,
libru xinañuꞌu ja ni tee sa nuu ni ma,
ni tee sa ndaka sukan ja ni yo saꞌa Jesús ma,
jiꞌin sukan ni yo kaxtnuꞌu ya ma,
onde nuu ni kejaꞌa ma,
2 nuu sani te ndaa ya andivi ma.
Te ja maa Xtumani Ndios ma,
te ni tatnuni ya nuu tee ni kaji maa ya ja jin ko kuu de tee tetniñu ya ja jin kaxtnuꞌu de tnuꞌu maa ya ma,
te ni kaxtnuꞌu ya ndaka ja jin saꞌa de ma.
3 Vaa nuu ni jiꞌi ya ma te ni ndateku ya ma,
te ni yo kenda ya nuu ka iyo de ma.
Te sukan,
te ni kaxtnuꞌu ndaa,
ni kaxtnuꞌu ndija ya ja téku ya ma,
te ni iyo‑ka ya uu xiko‑ka (40) kivi jiꞌin de,
te ni yo kaxtnuꞌu ya sukan ko kuu kivi tatnuni Suꞌsi ma.
4 Te nuu iyo‑ka ya jiꞌin tee ni tetniñu ya ma,
te ni tatnuni ya ja na jin kendoo de ñuu Jerusalén ma,
ja má jin kanda‑ni de,
te jiñaꞌa ya:
―Jin kondetu ni ja ko kuu sukan ni skuiso Yuva sa Suꞌsi ma ja jin kutaꞌvi ni Xtumani Ndios ma,
sukan ni kaꞌan sa ma.
Jesús sube al cielo (Hechos 1.4-11)
5 Ja ndaa kúu ja Juan ma,
ni skuandute de jiꞌin ndute,
kovaa ndijin chi masu kuaꞌa‑ka‑ni kii,
te jin kuandute ni jiꞌin Xtumani Ndios ma ―kúu ya jiñaꞌa ya.
Ni ndaa Jesús ma kuan noꞌo ya andivi ma
6 Ñayii ka iyo tutu jiꞌin Jesús ma,
ka jikan‑tnuꞌu i:
―Iya Tátnuni,
¿ndasaꞌa ni ja kuu tatnuni ñuu Israel ya ñuu ñayivi a tiempu yaꞌa?
―ka kuu i ka jiñaꞌa i.
7 Te Jesús ma,
ni ndakoneꞌe ya:
―Masu ndijin ka kucargu ja jin kuni ni na kivi jiꞌin na tiempu saꞌa maa Yuva sa Suꞌsi ma,
vaa maa in‑ni ya tátnuni nuu ndaka.
8 Kovaa ja kanuu‑ka kúu ja jin koo tuꞌva ni kivi kenda Xtumani Ndios ma nuu ka iyo ni a,
te jin kutaꞌvi ni ya,
te jin niꞌi ni tnuꞌu ndee tnuꞌu ndatnu ma,
te jin koo ni ñuu Jerusalén ma,
jiꞌin ni‑kaꞌnu ñuu Judea ma,
jiꞌin ñuu Samaria ma,
te onde ni‑kaꞌnu ñuu ñayivi a jin kenda koo ni,
te jin kaxtnuꞌu ni tnuꞌu vii tnuꞌu vaꞌa sa a ―kúu ya jiñaꞌa ya.
9 Ni jinu ni kaꞌan ya ma,
te nani ka ndeꞌya de ma,
te Jesús ma,
ni ndaa ya,
te in nuu viko ni ndasaꞌvi ya,
te ñatuu ni ka jini‑ka de ya.
10 Te nani ka ndeꞌya de andivi ma sukan ni ndaa ya ma,
sani te ni ka kenda koo uu ángel nuu ka iyo tee ni tetniñu ya ma,
te kuenda tnuꞌu ja tee‑ni ka kuu i,
te ka neꞌnu i saꞌma kuijin kuijin,
11 te ka jiñaꞌa i:
―Ndijin tee ñuu Galilea,
¿navaꞌa ka ndeꞌya ni andivi a?
Maa Jesús iya ni yo iyo jiꞌin ndaka ni ma,
iya ni ndaa kuan noꞌo andivi ma,
sukan ni ka jini ni ja kuan noꞌo ya andivi ma,
sukan ndii ya in‑ka tuku jichi ―ka kuu i ka jiñaꞌa i.
Ni ka ndakaji de in tee nukuiñi nuu tniñu Judas ma
12 Onde nuu yuku nani Yuku Tnu Olivo ma ka iyo tee ni tetniñu ya ma.
Sani te kuan nu koo de onde ñuu Jerusalén ma,
te ni ka jika de jaku‑ni,
sukan káꞌan tnuꞌu ni tatnuni Moisés ma ja kuu kaka ñayii ma kivi ni tatnuni Suꞌsi ma ja ma jin satniñu i ma,
te chukan kúu ja yika‑ni ni ka ndenda koo de ñuu Jerusalén ma.
13 Nuu ni ka ndenda koo de ini ñuu ma,
te ni ka nda koo de onde sukun maa veꞌe ku‑uu ma nuu ni ka yo ndatnaꞌa de ma.
Te ndaka tee yaꞌa ka kuu de:
Pedro ma,
Juan ma,
Santiago ma,
Andrés ma,
Felipe ma,
Tomás ma,
Bartolomé ma,
Mateo ma,
Santiago saꞌya Alfeo ma,
Simón tee kúu Celote ma,
jiꞌin Judas saꞌya Santiago ma.
14 Ndimaa ni ka yo ndututu ndaka de jiꞌin ñani Jesús ma,
jiꞌin María siꞌi ya ma,
jiꞌin jaku‑ka ñaꞌa ma,
te ni‑yuꞌu ni‑ini de ni ka yo jikan‑taꞌvi de nuu Suꞌsi ma.
15 Te kivi yukan ni ka ndututu visi cientu oko ñayii.
Te ni ndokuiñi Pedro ma meꞌñu ndaka ñayii ma,
te ni kaꞌan de:
16 ―Ñani,
kuꞌva,
jiniñuꞌu ja ko kuu sukan ni jiñaꞌa Xtumani Ndios ma nuu David ma,
sukan ndee nuu tutu Suꞌsi ma,
sukan ko kuu siki Judas ma tee ni keꞌen‑suꞌva Jesús ma,
te ni ndaxiko de ya,
te ni chindee de tee ni jan koo ni jan tnii de ya ma.
17 Vaa Judas ma chi in tee ni ka iyo jiꞌin o ma kúu de,
te suni ni yo satniñu de jiꞌin o.
18 Kovaa xuꞌun ja ni ka chuyaꞌvi i de ja ni ndaxiko de Jesús ma,
te ni ndakuaan de in ñuꞌú,
te maa yukan ni ndakata kaa de maa de.
Sani te ni jinkava de,
te ni kuun de xini de,
te ni ndata sasava de,
te ni ndiꞌi kuiti jiti de ma ni ka jitenuu.
19 Nuu ni ka jini ñayii ñuu Jerusalén ma,
te ni ka xnani i ñuꞌú yukan Aceldama saꞌan hebreo ma,
te kúni kaꞌan “Ñuꞌú Niñi”.
20 Vaa nuu tutu ndee Salmo ma káꞌan:
Veꞌe de ma chi nduu i in nuu masu na in koo‑ka,
veꞌe nuu masu na ñayii koo‑ka,
káꞌan,
te kaꞌan tna:
in‑ka ñayii nukuiñi nuu tniñu de ma,
káꞌan.
21 ’Te chukan kúu ja vitna ja ka iyo o jiꞌin tnaꞌa tee ni ka yo ndikin ñaꞌa ma,
te ni ka iyo o jiꞌin de jiꞌin Jesús Iya Tátnuni ma
22 onde kivi ni skuandute Juan ma Jesús Iya Tátnuni ma,
te onde kivi ni ndaa ya andivi ma ka ndikin tnaꞌa o.
Te chukan kúu ja jiniñuꞌu ja in maa tee ka ndikin tnaꞌa jiꞌin o a ndivi neꞌun o a,
sukan‑vaꞌa ndaka o jiꞌin de jin kaꞌan nuu ñayii ma ja ndija ja ndaa kúu ja ni ndateku Jesús ma ―kúu de jiñaꞌa de.
23 Sani te ni ka ndakaji de uu tee ma.
In tee nani José Barsabás ma tee ni ka yo xnani i Justo ma,
te in tee nani Matías ma.
24 Te ni ka jikan‑taꞌvi de saꞌa nuu Iya Tátnuni ma:
―Suꞌsi,
ndijin ja jini ni onde ini anua ndaka ñayii ma,
kaxtnuꞌu ni nde tee ja nduu de a ni kaji ni,
25 sukan‑vaꞌa núkuiñi de nuu tniñu ni yo jinukuechi Judas tee ni skenaa maa de ma.
Vaa Judas ma,
ni jiso kuechi de ma,
te jâ kuaꞌan maa de nuu koo de ma.
―Saꞌa ka jiñaꞌa de nuu Suꞌsi ma.
26 Sani te ni ka chuꞌun de suerte siki nduu tee yukan,
te ni kani ja Matías ma ko kuu de.
Te onde ora yukan,
te ni ndivi de nuu ndi‑uxi in tee ni tetniñu ya ma.