Jesús ma, ni kenda ya nuu uja tee ka ndikin ya ma
21
Nuu ni jinu sukan ma,
Jesús ma,
ni kenda ya in‑ka jichi nuu ka iyo tee ka ndikin ya ma yuꞌu mar nani Tiberias ma.
Te saꞌa ni kenda ya:
Jesús en el mar de Galilea (Juan 21.1-25)
2 Ka iyo tutu Simón Pedro ma,
Tomás tee ni ka yo xnani i Kuati ma,
Natanael tee ñuu Caná ja iyo i ñuu Galilea ma,
saꞌya tee kúu Zebedeo ma,
jiꞌin uu‑ka tee ka ndikin ya ma.
3 Te Simón Pedro ma,
jiñaꞌa de:
―Kíꞌin sa jin tava sa tiaka ―kúu de jiñaꞌa de.
Te ni ka ndakoneꞌe tee ka iyo jiꞌin de ma:
―Saña tna,
suni jin koo tna o ―ka kuu de ka jiñaꞌa de.
Te kuan koo de,
te ni ka ka koo de nuu barcu de ma,
kovaa jakuaa yukan ñatuu kuiti na tiaka ni ka tava de.
4 Nuu jâ ve ndii ma,
Jesús ma,
ni kenda ya yuꞌu ndute ma,
kovaa tee ka ndikin ya ma,
masu nde ka ndakuni de ya ja maa ya kúu.
5 Jesús ma,
ni jikan‑tnuꞌu ya:
―Ndijin,
¿ñatuu kuiti na tiaka ka tava ni?
―kúu ya jiñaꞌa ya.
Te ni ka ndakoneꞌe de:
―Ñatuu kuiti ―ka kuu de ka jiñaꞌa de.
6 Jesús ma,
jiñaꞌa ya:
―Jin skee ni ñunu ni a xiñi barcu a ichi kuaꞌa a,
te jin tava kuaꞌa ni tiaka ―kúu ya jiñaꞌa ya.
Te sukan ni ka saꞌa de.
Sani te ñatuu ka kundee‑ka de jin ndatava de ñunu de ma,
vaa kuaꞌa xeen tiaka ni jakuꞌun.
7 Sani te in tee ni yo ndikin ya ma,
tee ni yo kutoo xeen Jesús ma,
jiñaꞌa de Pedro ma:
―¡Iya Tátnuni ma kúu ya!
―kúu de jiñaꞌa de.
Yika ni jinisoꞌo Simón Pedro ma ja maa Iya Tátnuni ma kúu ya,
te ni ndinuu kunu de suꞌnu de ma,
vaa iyo vichi de nkuu,
sani te ni kêe de nuu ndute ma.
8 Te jaku‑ka tee ka ndikin ya ma,
ni ka ndenda koo de yuꞌu ndute ma jiꞌin barcu de ma ka ñuꞌu ka ñuꞌu‑nka de ñunu de ma,
vaa ñuꞌu chitu kuiti tiaka,
te visi cientu‑ka metro sana jin nde koo de yuꞌu ndute ma.
9 Te nuu ni ka nde koo de nuu ñuꞌú ma,
te ni ka jini de ja jâ ni tnaꞌa ñuꞌu,
te yoxtnee in tiaka jiꞌin xtatila.
10 Jesús ma,
jiñaꞌa ya:
―Ki xsiaꞌa ni jaku tiaka yika ni ka tava ni a ―kúu ya jiñaꞌa ya.
11 Simón Pedro ma,
ni kaa de nuu barcu de ma,
te ni tnii de ñunu ñuꞌu tiaka naꞌnu ma,
te ni ñuꞌu de onde yuꞌu mar ma.
Te cientu uu xiko uxi uni (153) ti kúu.
Te visi kuaꞌa xeen ti kúu,
kovaa ñatuu ni teꞌnde ñunu ma.
12 Jesús ma,
jiñaꞌa ya:
―Neꞌe koo ni,
te jín kasi ini o ―kúu ya jiñaꞌa ya.
Ni‑in tee ka ndikin ya ma,
ñatuu ka kusaa ini de ja jin kakan‑tnuꞌu de na in kúu ya,
vaa jâ ka jini de ja maa Iya Tátnuni ma kúu ya.
13 Sani te Jesús ma,
ni jan tuꞌva ya,
te ni tnii ya xtatila ma,
te ni waꞌa ya de,
te suni sukan ni tnii ya tiaka ma,
te ni waꞌa ya de.
14 Chaꞌa kúu ja ku‑uni jichi ja ni kenda ya nuu tee ka ndikin ya ma,
ja ni ndateku ya ma.
Jesús ma, ni ndatnuꞌu ya jiꞌin Simón Pedro ma
15 Nuu ni jinu ni ka jasi ini de ma,
Jesús ma,
ni jikan‑tnuꞌu ya Simón Pedro ma:
―Simón saꞌya Juan,
¿kútoo xeen‑ka ñaꞌa ni sana tnaꞌa chaꞌa?
―kúu ya jiñaꞌa ya.
Pedro ma,
ni ndakoneꞌe de:
―Saa vi,
Señor,
maa ni jini ja kútoo xeen ñaꞌa sa ―kúu de jiñaꞌa de.
Jesús ma,
jiñaꞌa ya:
―Ko koto vaꞌa ni ñayii ka kuu lelu sa a ―kúu ya jiñaꞌa ya.
16 Ni ndakan‑tnuꞌu tuku ya de ja ku‑uu jichi:
―Simón saꞌya Juan,
¿kútoo ñaꞌa ni?
―kúu ya jiñaꞌa ya.
Pedro ma,
ni ndakoneꞌe de:
―Saa vi,
Señor,
jâ jini maa ni ja kútoo ñaꞌa sa ―kúu de jiñaꞌa de.
Jesús ma,
jiñaꞌa ya:
―Ko koto vaꞌa ni ñayii ka kuu ndikachi sa a ―kúu ya jiñaꞌa ya.
17 Ja ku‑uni jichi ni jikan‑tnuꞌu ya de:
―Simón saꞌya Juan,
¿kútoo ñaꞌa ni?
―kúu ya jiñaꞌa ya.
Pedro ma,
ni kuxii ini de,
vaa ja ku‑uni jichi kúu ja ni jikan‑tnuꞌu ya de nú kútoo de ya,
te ni ndakoneꞌe de:
―Señor,
maa ni jini ndaka,
te jini ni ja kútoo ñaꞌa sa ―kúu de jiñaꞌa de.
Jesús ma,
jiñaꞌa ya:
―Ko koto vaꞌa ni ñayii ka kuu ndikachi sa a.
18 Ja ndaa ja ndaa káꞌan sa,
nuu ni iyo jaa‑ka ni ma,
ni yo nukoneꞌnu maa ni saꞌma ni ma,
sukan‑vaꞌa kiꞌin ni ndenu kúni ni ma.
Kovaa nuna kuu nijaꞌnu ni,
skuili ni ndaꞌa ni a,
te in‑ka ñayii ndakuꞌni chii ni a,
te jin xsiaꞌa ñaꞌa i nuu ñatuu kúni ni ja kiꞌin ni ma ―kúu ya jiñaꞌa ya.
19 Ja ni kaꞌan ya sukan ma,
Jesús ma,
yikuu ya káxtnuꞌu ya naxe jin saꞌa ñayii ma Pedro ma kivi kûu de ma,
te ja sukan ndoꞌo de ma,
te koo jayiñuꞌu nuu Suꞌsi ma.
Sani te jiñaꞌa ya:
―¡Kondikin ñaꞌa ni!
―kúu ya jiñaꞌa ya.
Ni jiñaꞌa Jesús ma nuu Pedro ma ja má ko ndi ini de sukan ndoꞌo in‑ka ñayii ma
20 Ja ni konenuu Pedro ma,
ni jini de ja ndandikin in‑ka tee ka ndikin ya ma,
tee ni yo kutoo xeen Jesús ma.
Te tee yukan chi maa tee ni iyo xiñi Jesús ma kivi ni ka kuxini ya jiꞌin ndaka de ma kúu de,
te maa de kúu tee ni jikan‑tnuꞌu saꞌa:
“Señor,
¿na in kúu tee keꞌen‑suꞌva ñaꞌa ma?”
21 Nuu ni jini Pedro ma de,
ni jikan‑tnuꞌu de Jesús ma:
―Señor,
te tee yaꞌa,
¿naxe ko kuu de?
―kúu de jiñaꞌa de.
22 Jesús ma,
ni ndakoneꞌe ya:
―Nú kúni sa ja koteku de onde kivi ndii sa ma,
te ndijin,
¿naku ndí ini ni?
Ndijin,
kondikin ñaꞌa ni ―kúu ya jiñaꞌa ya.
23 Chukan kúu ja ni jitenuu tnuꞌu ma neꞌun ndaka ñayii ka ndikin ya ma ja tee yukan tee ni yo ndikin ya ma,
masu kûu de.
Kovaa Jesús ma,
masu ni kaꞌan ya ja masu kûu de.
Ja ni kaꞌan ya ma kúu:
“Nú kúni sa ja koteku de onde kivi ndii sa ma,
má ko ndi ini ni.”
24 Te tee yaꞌa kúu maa tee ni yo ndikin ya ma,
te ndákaꞌan de sukan ni kuu ma,
te ni tee de saꞌa,
te ka jini o ja tnuꞌu ndákaꞌan de ya chi tnuꞌu ndaa tnuꞌu ndija kúu.
25 Kuaꞌa‑ka ja ni saꞌa Jesús ma.
Nute ni ka tee sa ndaka sukan ni saꞌa Jesús ma chi jani ini sa ja masu kanda ni‑kaꞌnu ñuu ñayivi a jin kuꞌun libru jin kuvaꞌa ma.
Te sukan kó kuu.