Sukan ni ndateku Jesús ma
20
Te kivi ni kejaꞌa smana ma,
te María Magdalena ma,
neꞌe xeen kuaꞌan ña yavi nuu yinee ñundeꞌyu Jesús ma.
Ûni ndatinee‑ka.
Te ni jini ña ja ni jan ndiyo yuu ndesi yeꞌe yavi ma.
2 Sani te jinu ña ni jaꞌan ña nuu ka iyo Simón Pedro ma,
jiꞌin in‑ka tee ni yo ndikin ya ma,
tee ni yo kutoo xeen Jesús ma,
te jiñaꞌa ña:
―Masu chi kuan koo i jiꞌin ñundeꞌyu Señor ma,
te ñatuu ka jini sa ndenu ni ka jan xsiaꞌa i ñundeꞌyu ma ―kúu ña jiñaꞌa ña.
3 Pedro ma jiꞌin in‑ka tee ni yo ndikin ya ma,
kuan koo de nuu yinee ñundeꞌyu ma.
4 Te nduu de ka jinu kuan koo de,
kovaa in‑ka de ma chi ni kuñama‑ka de sana Pedro ma,
te xinañuꞌu‑ka de ni kenda yavi ma.
5 Te ni jakindeyi de,
te ndeꞌya de,
te ni jini de saꞌma ni ñutuu ya ma,
kovaa ñatuu ni kivi de.
6 Sani te ni kenda Simón Pedro ma,
te ni kivi de ini yavi ma.
Te ni jini de saꞌma ni ñutuu Jesús ma.
7 Suni ni jini de saꞌma ni ñutuu xini ya ma.
Te ñatuu iyo i yatni nuu kátuu saꞌma ni ñutuu ya ma,
suꞌva ni nukitnaꞌnu i,
te kátuu siin i.
8 Sani te ni kivi tna in‑ka tee ni yo ndikin ya ma,
tee ni kenda xinañuꞌu‑ka yavi ya ma,
te ni jini de sukan ni kuu ma,
te ni kandija de.
9 Vaa ñatuu jin jakuꞌni‑ka ini de sukan káꞌan tnuꞌu ndee tnuꞌu Suꞌsi ma ja sukan ndateku ya ma.
10 Sani te ni ka ndakokuiñi de veꞌe de ma.
Jesús ma, ni kenda ya nuu María Magdalena ma
11 María ma,
ni kendoo ña ichi keꞌe ma yeꞌe yavi nuu ni yinee Jesús ma,
te ndaꞌyu ña,
te ni jakindeyi ña ja kondeꞌya ña ini yavi ma.
12 Te ni jini ña uu ángel ka neꞌnu saꞌma kuijin,
ka nukoo i nuu ni iyo ñundeꞌyu Jesús ma,
in i ichi nuu ni iyo xini ya ma,
te in‑ka i ma ichi nuu ni ka iyo jaꞌa ya ma.
13 Te ángel ma,
ni ka jikan‑tnuꞌu i ña:
―Ndijin,
¿navaꞌa ndaꞌyu ni?
―ka kuu i ka jiñaꞌa i.
Te ni ndakoneꞌe ña:
―Vaa kuan koo i jiꞌin ñundeꞌyu Señor sa ma,
te ñatuu jini sa ndenu ni ka jan xsiaꞌa i ―kúu ña jiñaꞌa ña.
14 Yika ni kaꞌan ña sukan,
te ni ndonenuu ña,
te ni jini ña Jesús ma,
kovaa ñatuu ni ndakuni maa ña ya.
15 Jesús ma,
ni jikan‑tnuꞌu ya:
―Ndijin,
¿navaꞌa ndaꞌyu ni?
¿Nde in ndanduku ni?
―kúu ya jiñaꞌa ya.
Maa ña chi jani ini ña ja tee jito huerta ma kúu de,
te jiñaꞌa ña:
―Señor,
nú ndijin ni ndakeꞌen ñundeꞌyu teskuaꞌa sa ma,
kaꞌan ni ndenu ni jan xsiaꞌa ni,
sukan‑vaꞌa kiꞌin sa jin nu keꞌen sa ―kúu ña jiñaꞌa ña.
16 Sani te Jesús ma,
jiñaꞌa ya:
―¡María!
―kúu ya jiñaꞌa ya.
Sani te ni ndonenuu ña,
te ndeꞌya vavaꞌa ña ya,
te jiñaꞌa ña saꞌan hebreo:
―¡Raboni!
―kúu ña jiñaꞌa ña.
Te tnuꞌu raboni ma kúni kaꞌan “teskuaꞌa”.
17 Jesús ma,
jiñaꞌa ya:
―Máko tnii ñaꞌa ni,
vaa ñatuu ndaa‑ka sa nuu iyo Yuva sa ma.
Kovaa kuáꞌan ni,
te kuñaꞌa ni ñani sa tee ka ndikin ñaꞌa ma,
ja ndaa sa nuu iya kúu Yuva sa ma,
iya kúu Yuva ndaka ni ma,
iya kúu Suꞌsi sa ma,
iya kúu Suꞌsi ndaka tna ni ma ―kúu ya jiñaꞌa ya.
18 Sani te María Magdalena ma,
kuaꞌan ña nuu ka iyo de ma,
te ni ndakani ña nuu ndaka tee ka ndikin ya ma ja ni jini ña Iya Tátnuni ma,
te suni ndakani ña sukan jiñaꞌa ya ma.
Jesús ma, ni kenda ya nuu ñayii ka ndikin ya ma
19 Te nuu ni kunee ma kivi yukan kivi kejaꞌa smana ma,
te ñayii ka ndikin ya ma,
ni ka ndututu i ini veꞌe ma,
te ndesi yeꞌe ma,
vaa ka yuꞌu i tee judío ma.
Te Jesús ma,
ni kivi ya,
te ni jinkuiñi ya meꞌñu ndaka ñayii ka ndikin ya ma,
te jiñaꞌa ya:
―¡Jin koo mani ni!
―kúu ya jiñaꞌa ya.
Jesús se aparece a los discípulos (Juan 20.19-31)
20 Ja ni kaꞌan ya sukan,
sani te ni kaxtnuꞌu ya ndaꞌa ya ma jiꞌin yika ya ma,
te ni ka kutachi ndaka ñayii ka ndikin ya ma,
ja ni ka ndakuni i Iya Tátnuni ma.
21 Sani te Jesús ma,
jiñaꞌa ya in‑ka jichi:
―¡Jin koo mani ni!
Sukan ni tetniñu ñaꞌa Yuva sa ma,
sukan tétniñu tna ñaꞌa sa ndijin ―kúu ya jiñaꞌa ya.
22 Te ni tutachi ya siki ñayii ma,
te jiñaꞌa ya:
―Jin kutaꞌvi ni Xtumani Ndios a.
23 Te ja maa ya ma,
te nú na in jin kuñaꞌa ni ja ni ka naa kuechi i ma,
te jin naa kuechi i ma nuu Suꞌsi ma.
Te nú na in masu jin kuñaꞌa ni ja jin naa kuechi i ma,
te masu jin naa kuechi i ma ―kúu ya jiñaꞌa ya.
Tomás ma, ni jini de jiꞌin nuu de Jesús ma, ja jâ ni ndateku ya ma
24 Tomás ma kúu in tee ndi‑uxi uu tee ni ka yo ndikin ya ma,
te tee ni ka yo xnani i Kuati ma kúu de.
Ñatuu de iyo nuu ni kenda Jesús ma.
25 Sani te ñayii ka ndikin ya ma,
ka jiñaꞌa i:
―Ni ka jini sa Iya Tátnuni ma ―ka kuu i ka jiñaꞌa i.
Kovaa Tomás ma chi ni ndakoneꞌe de:
―Nú ma kuni sa nuu ni kaan ndaꞌa de ma jiꞌin nduyu kaa ma,
te nú ma chinee sa xnindaꞌa sa a nuu ni tnakueꞌe ma,
te nú ma chinee sa ndaꞌa sa a yika de ma,
te masu kandija sa ―kúu de jiñaꞌa de.
26 Nuu una kii ma,
te ñayii ka ndikin ya ma,
ni ka ndututu tuku i in‑ka jichi ini veꞌe ma.
Tomás ma,
iyo tna de.
Te ndesi vaꞌa yeꞌe ma.
Kovaa Jesús ma chi ni kuu ni kivi ya,
te ni jinkuiñi ya meꞌñu ndaka ñayii ma,
te jiñaꞌa ya:
―¡Jin koo mani ni!
―kúu ya jiñaꞌa ya.
27 Sani te jiñaꞌa ya Tomás ma:
―Chinee ni xnindaꞌa ni a yaꞌa,
te kondeꞌya ni ndaꞌa sa ya.
Te chinee ni ndaꞌa ni a yika sa a,
te máko kuꞌun ini ni ja onde kuni ni sana kandija ni ―kúu ya jiñaꞌa ya.
28 Sani te Tomás ma,
ni ndakoneꞌe de,
te jiñaꞌa de:
―¡Iya tátnuni nuu maa sa kúu ni!
¡Suꞌsi maa sa kúu ni!
―kúu de jiñaꞌa de.
29 Jesús ma,
jiñaꞌa ya:
―¿Ni kandija ni vaa ni jini ñaꞌa ni a?
¡Vaꞌa xeen‑ka ka kuu ñayii ni ka kandija ñaꞌa ma,
visi ñatuu ni ka jini ñaꞌa i!
―kúu ya jiñaꞌa ya.
Navaꞌa ni tee Juan ma libru yaꞌa
30 Jesús ma,
ni saꞌa ya kuaꞌa xeen milagru nuu ñayii ka ndikin ya ma,
tnaꞌa ja masu ka kaꞌan nuu tutu yaꞌa.
31 Kovaa tnuꞌu yaꞌa chi ka ndenee i nuu tutu yaꞌa,
sukan‑vaꞌa jin kandija ni ja Jesús ma kúu Cristo ma,
te Saꞌya Suꞌsi ma kúu ya,
te ja maa ya,
te jin koteku ni ni‑kani ni‑jika.