Nuu ni ndateku Jesús ma
24
Sani te kivi xinañuꞌu kivi kéjaꞌa smana ma,
suni maa ñaꞌa ni ka yo ndikin ya ma,
neꞌe xeen ni jan koo ña yavi nuu yinee Jesús ma,
te ka yindaꞌa ña ndute jáxiko asi ja ni ka satuꞌva ña ma.
2 Nuu ni ka kenda koo ña ma,
te ni ka jini ña ja masu iyo‑ka yuu ndesi yeꞌe yavi ma nuu iyo i ma.
3 Te ni ka kivi koo ña yavi ma,
kovaa ñatuu ni ka ndaniꞌi ña ñundeꞌyu Jesús Iya Tátnuni ma.
4 Te ni ka yuꞌu xeen ña,
te ñatuu ka niꞌi ini ña nawa jin saꞌa ña.
Sani te ni ka jini ña kuenda tnuꞌu ja uu tee ka nukuiñi te ka neꞌnu de saꞌma kuijin kuijin te jándute xeen.
5 Te ka yuꞌu xeen ña,
te ni ka jakindeyi ña onde nuu ñuꞌú ma,
kovaa tee yukan,
ka jiñaꞌa de:
―¿Navaꞌa ka ndanduku ni iya téku ma neꞌun ñayii ni ka jiꞌi ma?
6 Ñatuu na iya iyo yaꞌa chi ja ni ndateku ya.
Jin ndakaꞌán ni ja saꞌa ni kaꞌan ya nuu iyo‑ka ya jiꞌin ni ñuu Galilea ma:
7 “Saña ja kúu sa iya vee ñayivi ñuu ñayivi a,
jin ndaxsiaꞌa ñaꞌa i nuu ndaꞌa tee ka ndiso kuechi ma,
te jin skuita kaa ñaꞌa de nuu krusi ma,
te nuu uni kivi ma,
te ndateku sa.”
Saꞌa ni kaꞌan ya ma ―ka kuu de ka jiñaꞌa de ña.
8 Sani te ni ka ndakaꞌán ña sukan ni kaꞌan ya ma.
9 Ja ni ka ndakokuiñi ña ma,
ni ka ndakani ndiꞌi ña nuu ndi‑uxi in tee ni ka yo ndikin ya ma,
jiꞌin nuu ndaka‑ka ñayii ma.
10 Ñaꞌa ni jan koo ni ka ndakani nuu tee ni ka yo ndikin ya ma ka kuu María Magdalena ma,
jiꞌin Juana ma,
jiꞌin María siꞌi Santiago ma,
jiꞌin jaku‑ka ñaꞌa ma.
11 Kovaa tee ni ka yo ndikin ya ma,
ka jani ini de ja ka kuꞌu ña,
te ñatuu ni ka kandija de ja ka kaꞌan ña ma.
12 Kovaa Pedro ma,
jinu de kuaꞌan de yavi nuu ni yinee ya ma,
te ni jito niꞌni de,
te ni jini de yika‑nka‑ni ja saꞌma ni ñutuu ya ma.
Sani te kuan noꞌo de veꞌe de ma,
te kuaꞌan‑nka ini de ja ni jini de sukan ni kuu ma.
Ni kenda Jesús ma nuu uu ñayii ichi kuan koo i ñuu Emaús ma
13 Maa kivi yukan uu ñayii ni ka yo ndikin ya ma,
kuan nu koo i in ñuu nani Emaús visi uxi in mil metro jika ja onde ñuu Jerusalén ma.
14 Kuan koo i ka ndatnuꞌu i ndaka sukan ni kuu ma.
15 Nani ka ndatnuꞌu ka ndatnuꞌu i kuan koo i ma,
Jesús ma,
ni jan tuꞌva ya i,
te kuaꞌan ya jiꞌin i.
16 Kovaa visi ka ndeꞌya i ya ma,
iyo in ja jasi nuu i ma,
te ñatuu ka ndakuni i ya.
17 Jesús ma,
ni jikan‑tnuꞌu ya:
―¿Nawa ka ndatnuꞌu ni ichi ve koo ni a?
―kúu ya jiñaꞌa ya.
Te ni ka kuxii ini i.
18 Te tee nani Cleofas ma,
ni ndakoneꞌe de:
―¿Maa in‑ni ndijin kúu ñayii ni yaꞌa ñuu Jerusalén ya ja ñatuu jini ni ja ni kuu neꞌun kivi yaꞌa?
―kúu de jiñaꞌa de.
19 Te ni jikan‑tnuꞌu ya:
―¿Nawa ni kuu?
―kúu ya jiñaꞌa ya.
Te ka jiñaꞌa i:
―Ja ni ndoꞌo Jesús tee ñuu Nazaret ma,
vaa in tee ndákaxtnuꞌu tnuꞌu ni waꞌa Suꞌsi ma kúu de,
te ja ni yo saꞌa de ma jiꞌin tnuꞌu káꞌan de ma ja vaꞌa kúu nuu Suꞌsi ma jiꞌin nuu ndaka ñayii ma.
20 Te tee ka tatnuni nuu sutu ma,
jiꞌin tee ka netniñu ñuu o ma,
ni ka ndakuaꞌa de tee ma nuu Pilato ma,
sukan‑vaꞌa tatnuni de ja jin kaꞌni i de.
Te ni ka skuita kaa i de nuu krusi ma.
21 Saña chi ni ka jani ini sa ja suu de ko kuu tee saꞌa ja kaku ñuu Israel ya,
te ka ndetu sa,
te vitna kúu kii ku‑uni ja ni kuu ndaka saꞌa.
22 Kovaa jaku ñaꞌa ka ndikin tnaꞌa jiꞌin sa ma,
ni ka xsiuꞌu ñaꞌa ña,
vaa neꞌe xeen ni jan koo ña yavi nuu ni ka chuꞌu i de ma,
23 kovaa ñatuu ni ka ndaniꞌi ña ñundeꞌyu de ma.
Te ni ka ndakokuiñi ña veꞌe ma,
te ka ndakani ña ja ni ka jini ña uu ángel,
te ka jiñaꞌa i ja téku de,
ka kaꞌan ña.
24 Ni jan koo jaku tnaꞌa sa ma sukan ni ka yo ndikin sa de ma,
te ni ka ndaniꞌi de sukan ni ka jiñaꞌa ña ma,
kovaa ñatuu ni ka ndaniꞌi de Jesús ma ―ka kuu i ka jiñaꞌa i.
25 Sani te Jesús ma,
jiñaꞌa ya:
―¡Ndijin ja ñatuu ka jakuꞌni ini ni te kuee ka kandija ni ndaka ja ni ka kaꞌan tee ni ka yo ndakaxtnuꞌu tnuꞌu ni yo waꞌa Suꞌsi ma!
26 ¿Xi masu onde saꞌa ndoꞌo neni Cristo ma xiꞌna‑ka,
te sana ndaniꞌi ya jayiñuꞌu ya ma?
―kúu ya jiñaꞌa ya.
27 Te ni kejaꞌa ya onde tnuꞌu ni tee Moisés ma jiꞌin tnuꞌu ni ka tee ndaka tee ni ka yo ndakaxtnuꞌu tnuꞌu ni yo waꞌa Suꞌsi ma,
ndákaꞌan ya ndaka sukan káꞌan ja kuu maa ya ma.
28 Nuu ni ka kenda koo i yuꞌu ñuu i ma,
Jesús ma,
ni saꞌa ya tnuꞌu ja jika‑ka nuu kiꞌin ya.
29 Kovaa ka xtetuu i ya ja kendoo ya,
te ka jiñaꞌa i:
―Kendoo ni,
vaa jâ ni kukuee,
sani te kunee ―ka kuu i ka jiñaꞌa i.
Jesús ma,
ni kivi ya,
sukan‑vaꞌa kendoo ya jiꞌin i.
30 Nuu ka nukoo i jiꞌin ya nuu mesa ma,
ni keꞌen ya xtatila ma,
te ni jikan‑taꞌvi ya nuu Suꞌsi ma,
te ni taꞌvi ya,
te ni waꞌa ya i.
31 Sani te ni ka ndanune nuu i ma,
te ni ka ndakuni i ya,
kovaa sani te ñatuu ni ka jini‑ka i ya.
32 Te ka jikan‑tnuꞌu tnaꞌa i:
―¿Masu ja ndaa kúu ja ñatuu ka niꞌi ini o naxe jin kani ini o ma,
nani yikuu ya káꞌan ya ichi nuu ve koo o ma te káxtnuꞌu ya sukan káꞌan tnuꞌu ndee tutu Suꞌsi ma?
―ka kuu i ka kaꞌan i.
33 Te maa ora yukan‑ni sani te ni ka ndakokuiñi i ñuu Jerusalén ma,
te ni ka ndaniꞌi i ndi‑uxi in tee ni ka yo ndikin ya ma,
ka iyo tutu de jiꞌin ndaka‑ka ñayii ka iyo jiꞌin de ma.
34 Te ka kaꞌan de:
―Ja ndaa kúu ja ni ndateku Iya Tátnuni ma,
te ni jini ñaꞌa Simón a ―ka kuu de ka kaꞌan de.
35 Sani te ni ka ndakani nduu i sukan ni ka ndoꞌo i ichi kuan nu koo i ñuu Emaús ma te onde nuu ni taꞌvi ya xtatila ma saa ni ka ndakuni i ya ma.
Jesús ma, ni kenda ya nuu tee ni ka yo ndikin ya ma
36 Nani ka yikuu‑ka de ka ndatnuꞌu de sukan ni kuu ma,
te ni kenda‑ni Jesús ma,
ni jakun‑nee ya meꞌñu ndaka de ma,
te jiñaꞌa ya:
―Jin koo sii ini ndaka ni,
te má jin ko ndi ini‑ka ni ―kúu ya jiñaꞌa ya.
37 Sani te ni ka yuꞌu xeen de,
te ka jani ini de:
“Kuiti ja suu ya,
¿xi anua ya kúu ja ka ndeꞌya o ya?”
38 Kovaa Jesús ma,
jiñaꞌa ya:
―¿Navaꞌa ka yuꞌu ni?
¿Navaꞌa ka jani uu ka jani uni ini ni?
39 Jin kondeꞌya ni ndaꞌa sa a jiꞌin jaꞌa sa a.
Te jin keꞌe ñaꞌa ni,
te jin kuni ni ja maa sa kúu.
Vaa nute anua sa ma kúu chi masu na yikikuñu sa ya koo,
sukan ka ndeꞌya ñaꞌa ni a ―kúu ya jiñaꞌa ya.
40 Sukan jiñaꞌa ya ma,
te ni kaxtnuꞌu ya ndaꞌa ya ma jiꞌin jaꞌa ya ma.
41 Kovaa maa de ma,
ja ka iyo sii ini xeen de te ni ka saꞌvi‑nka ini de,
te kuenda ñatuu ka kandija de ja suu ya kúu.
Te chukan kúu ja jiñaꞌa ya:
―¿Ka nevaꞌa ni jaku ja jin kaa o?
―kúu ya jiñaꞌa ya.
42 Sani te ni ka waꞌa de in taꞌvi tiaka ni tavi jiꞌin vala ñaꞌma nduxi ñuñu.
43 Te ni tnii ya,
te ni jaa ya nuu ndaka de ma.
44 Sani te jiñaꞌa ya:
―Chaꞌa ka kuu tnuꞌu ni kaxtnuꞌu sa nuu ni ma,
nuu ni ka yo iyo o ma,
ja jiniñuꞌu ja ko kuu ndaka sukan káꞌan tnuꞌu ni tatnuni Suꞌsi ma ja ni kaxtnuꞌu Moisés ma ja kuu sa ma,
jiꞌin sukan ndee nuu tutu tee ni ka yo ndakaxtnuꞌu tnuꞌu ni yo waꞌa Suꞌsi ma,
jiꞌin sukan ndee nuu tutu salmo ma ―kúu ya jiñaꞌa ya.
45 Sani te ni saꞌa ya ja ni ka jakuꞌni ini de sukan ndee tnuꞌu Suꞌsi ma.
46 Te jiñaꞌa ya:
―Sukan ndee nuu tutu Suꞌsi ma ja Cristo a,
jiniñuꞌu ja kûu ya,
te nuu uni kivi ma te ndateku ya,
47 te ja maa sa,
te jin kaxtnuꞌu ni nuu ndaka ñayii ñuu ñayivi a,
te jin kuñaꞌa ni ja nuna jin ndakani jin ndakaꞌvi ini i te jin xndoo i ja uꞌvi ni ka yo saꞌa i ma,
te jin ndakokuiñi i,
te jin ndandikin i Suꞌsi ma,
te jin naa kuechi i ma.
Te jin kejaꞌa ni onde ñuu Jerusalén ya.
48 Te ndijin jin ko kuu ñayii jin ndakani sukan ni ka jini ni ja ni yo kuu ma.
49 Te maa sa tetniñu Xtumani Ndios ma siki ndaka ni sukan ni skuiso Yuva sa Suꞌsi ma,
kovaa jin kendoo ndaka ni ini ñuu Jerusalén ya onde nú ni ka niꞌi ni tnuꞌu ndee tnuꞌu ndatnu kuun onde sukun ma ―kúu ya jiñaꞌa ya.
Sukan ni ndaa Jesús ma kuan noꞌo ya andivi ma
50 Te ni keneꞌe ya de onde ñuu Betania ma,
te ni ndoneꞌe ya ndaꞌa ya ma,
te ni jikan‑taꞌvi ya ja jin niꞌi de ja vii ja vaꞌa.
51 Sani te ni jinu ja ni kaꞌan ya ma,
te ni ndaa ya kuan noꞌo ya onde sukun ma.
52 Te ni jinu ja ni ka ndachiñuꞌu de ya ma,
te ni ka ndakokuiñi sii ini xeen de ñuu Jerusalén ma.
53 Te ndi‑kivi ndi‑ñuu ni ka yo yinee de veñuꞌu kaꞌnu ma,
ni ka yo jita de ka ndachiñuꞌu de Suꞌsi ma.
Te sukan kó kuu.