Nuu ni ndateku Jesús ma
28
Te nuu jâ ni yaꞌa kivi ni tatnuni Suꞌsi ma ja ma jin satniñu ñayii ma,
te nuu ve ndii kivi kéjaꞌa smana ma,
ni jan koo María Magdalena ma,
jiꞌin in‑ka ñaꞌa nani María ma,
kuan koto ña yavi yinee Jesús ma.
2 Te ni tnaa xeen,
vaa in ángel ni tetniñu Iya Tátnuni ma,
ni nuu i andivi ma,
te ni kenda i nuu yinee Jesús ma,
te ni xtandiyo i yuu kaꞌnu kaꞌnu ndesi ma,
te ni jinkoo i siki yuu ma.
3 Te ûni yeꞌe niꞌni i sukan kúu ora jándute ma.
Te saꞌma neꞌnu i ma,
ûni yayaa.
4 Te soldado ma,
ni ka yuꞌu xen‑xeen de ja ni kenda ángel ma,
te ni ka jakondee de ka niꞌi ka niꞌi‑nka de,
te ni ka kuita de,
kuenda tnuꞌu ja ni ka jiꞌi de.
5 Sani te ángel ma,
jiñaꞌa i nuu ñaꞌa ka iyo ma:
―Máko jin koyuꞌu ndijin,
vaa jini sa ja ka ndanduku ni Jesús iya ni ka jata kaa i nuu krusi ma.
6 Masu na iya yinee‑ka yaꞌa,
chi vaa jâ ni ndateku ya,
sukan ni kaꞌan ya ma.
Neꞌe koo ni,
te jin kondeꞌya ni nuu ni ka tavaꞌa i ya ma,
ja ñatuu na iya yinee‑ka.
7 Ni kuu na,
te kuán koo ni,
te jin kuñaꞌa ni tee ni ka yo ndikin ya ma,
ja jâ ni ndateku ya neꞌun ñayii ni ka jiꞌi ma,
te yoxtnuu ya kuaꞌan ya ñuu Galilea ma.
Te yukan jin kuni ni ya.
Te vitna,
te jâ ni kaxtnuꞌu sa nuu ni a ―kúu i jiñaꞌa i.
8 Sani te ni ka nde koo kunu ña yeꞌe yavi ma,
te kuenda ni ka yuꞌu ña,
kovaa ka iyo sii ini xeen ña ja ni ka jini ña ja jâ ni ndateku Jesús ma.
Te ka jinu ña kuan koo ña kuan nu kaxtnuꞌu ña nuu ndaka ñayii ni ka yo ndikin ya ma sukan ni jiñaꞌa ángel ma.
Te nani kuan koo ña kuan nu kaxtnuꞌu ña nuu ñayii ni ka yo ndikin ya ma,
9 te ni jan tnaꞌa ñaꞌa Jesús ma,
te jiñaꞌa ya:
―¡Vavaꞌa ka kuu ni!
―kúu ya jiñaꞌa ya.
Te maa ña,
ni jan koo ña ni ka jan tuꞌva ña ya,
te ni ka kanuniꞌni ña jaꞌa ya ma,
te ni ka chiñuꞌu ña ya.
10 Te maa Jesús ma,
jiñaꞌa ya ña:
―Máko jin koyuꞌu ni,
suꞌva kuán koo ni,
te jin kaxtnuꞌu ni nuu ñani sa ma ja jâ ni ndateku sa,
te jín koo de ñuu Galilea ma,
te yukan jin ndakuni tnaꞌa sa jiꞌin de ―kúu ya jiñaꞌa ya.
Sukan ni ka saꞌa soldado tee ni ka yo jito nuu ni ka chuꞌu i Jesús ma
11 Te kuan nu koo ña,
te in jichi tee ni ka yo jito nuu ni ka chuꞌu i ya ma,
ni jan nu koo de ini ñuu ma ja jin ndakaxtnuꞌu de nuu tee ka tatnuni nuu sutu ma ndaka sukan ni yo kuu ma.
12 Te ni ka ndututu tna tee ka tatnuni nuu sutu ma,
jiꞌin tee ka kuu jaꞌnu ma,
te ni ka chutnaꞌa tnuꞌu de ja jin kuaꞌa de kuaꞌa xuꞌun nuu soldado ma,
13 te ka jiñaꞌa de nuu soldado ma:
―Kuán koo ni,
te jin kaꞌan ni ja maa tnaꞌa tee ni ka yo ndikin de ma,
ja in jakuaa ni ki koo de ni ka sakuiꞌna de ñundeꞌyu ma ora ka kixi ni ma.
14 Te nú tnuꞌu kaꞌan o ja chaꞌa na kunisoꞌo tee kúu gobiernu ma,
te máko jin koyuꞌu ni,
chi vaa maa sa jin kaꞌan jiꞌin de,
sukan‑vaꞌa jin kaku ni nuu de ―ka kuu de ka jiñaꞌa de.
15 Te ni ka tnii soldado ma xuꞌun ma,
te ni ka saꞌa de ndaka sukan ka jiñaꞌa tee ma.
Te tnuꞌu yaꞌa,
ni jitenuu i neꞌun ñayii judío ma,
te sukan ka jani ini i onde kivi vitna.
Ni tatnuni Jesús ma sukan jin saꞌa tee ka ndikin ya ma
16 Kovaa ndi‑uxi in tee ni ka yo ndikin ya ma,
ni jan koo de ñuu Galilea ma,
nuu yuku ni tatnuni maa Jesús ma.
17 Te nuu ni ka jini de ya ma,
ni ka ndachiñuꞌu de ya,
kovaa sava de ma,
ka jani uu ka jani uni ini de ma.
18 Te Jesús ma,
ni jan tuꞌva ya de,
te jiñaꞌa ya:
―Jâ ni taa Suꞌsi ma ndaka tnuꞌu ndee tnuꞌu ndatnu ja tátnuni sa andivi ma jiꞌin nuu ñuꞌú ya.
19 Chukan kúu ja jin koo ni ni‑kaꞌnu ni‑tuꞌu ñuu ñayivi a,
te jin kaxtnuꞌu ni nuu ñayii ma ja na jin kandija i tnuꞌu maa sa a te jín kondikin vii jín kondikin vaꞌa ñaꞌa i maa sa,
te jin ndakuneꞌe ni Yuva sa Iya Tátnuni ma,
jiꞌin maa sa ja kúu sa Saꞌya ya ma,
jiꞌin Xtumani Ndios ma,
te sukan jin skuandute ni i.
20 Te jin kaxtnuꞌu tna ni ja jin saꞌa i ndaka sukan ni tatnuni sa nuu ni a,
te maa sa koo jiꞌin ndaka ni ndi‑kivi ndi‑ñuu onde kii naa ñuu ñayivi a,
te jin konaꞌa ni ja masu xndoo ñaꞌa sa ―kúu ya jiñaꞌa ya.
Sukan kó kuu.