Nuu ni ndateku Jesús ma
16
Ni yaꞌa kivi ni tatnuni Suꞌsi ma ja ma jin satniñu ñayii ma.
Te ñaꞌa kúu María Magdalena ma,
jiꞌin Salomé ma,
jiꞌin María siꞌi Santiago ma,
ni ka jaan ña in ndute jáxiko asi,
ja jin koo ña jin chiꞌi ña ñundeꞌyu Jesús ma.
Marcos 16:1-20
2 Sani te neꞌe xtnee kivi kejaꞌa smana ma,
te nuu ve kana kandii ma,
te kuan koo ña nuu yinee ñundeꞌyu Jesús ma.
3 Te ka ndatnuꞌu tnaꞌa ña:
―¿Na in xtandiyo yuu ndesi yeꞌe yavi nuu yinee Jesús ma,
ja jin kivi koo o ma?
―ka kuu ña ka ndatnuꞌu ña.
4 Sani te ni ka ndonenuu ña,
te ni ka jini ña ja yuu kaꞌnu ndesi yeꞌe yavi ma chi jâ ni kokoo i,
te jâ nune yeꞌe yavi ma.
5 Te ni ka kivi koo ña yavi ma,
te ni ka jini ña ja núkoo kuenda tnuꞌu ja in suchi jaa lado kuaꞌa ma,
neꞌnu i in saꞌma kuijin kani kani,
te ñaꞌa yukan chi ni ka yuꞌu xeen ña.
6 Kovaa suchi yukan chi jiñaꞌa i:
―Máko jin koyuꞌu ni chi jini sa ja ka ndanduku ni Jesús ni yo iyo ñuu Nazaret ma,
iya ni ndakaa nuu krusi ma.
Te jâ ni ndateku ya.
Ñatuu na iya iyo yaꞌa.
Jin kondeꞌya ni nuu ni yinee ya a,
ja ñatuu ya.
7 Kuán koo ni,
te jin kuñaꞌa ni tee ni ka yo ndikin ya ma,
te suni jin kuñaꞌa ni Pedro ma ja maa ya chi jâ koxtnuu ya kiꞌin ya ñuu Galilea ma,
sana jin koo ni.
Te jin koo ni te yukan te jin kuni ni ya,
vaa sukan ni kaꞌan ya ma ―kúu i jiñaꞌa i.
8 Sani te ni ka nde koo kunu ña,
te ka jinu ña kuan nu koo ña,
te ka niꞌi ka niꞌi‑nka ña ja ka yuꞌu ña.
Te ñatuu ni ka kaꞌan ña nuu ni‑in ñayii ma,
kuechi ja ka yuꞌu ña ma.
Jesús ma, ni kenda ya xinañuꞌu nuu María Magdalena ma
9 Te Jesús ma,
ni ndateku ya nuu ve ndii kivi kejaꞌa smana ma,
te ni kenda ya xinañuꞌu nuu María Magdalena ma,
ñaꞌa ni ndeneꞌe ya uja tachi ma.
10 Ni jaꞌan ña,
te ni kaxtnuꞌu ña nuu tee ni ka yo ndikin ya ma,
vaa ka kuxii xeen ini de,
te ka ndaꞌyu de.
11 Te ja ni ka jinisoꞌo de ja téku Jesús ma,
vaa ni jini María Magdalena ma ya ma,
kovaa masu nde ka kandija de.
Jesús ma, ni kenda ya nuu uu ñayii ni ka yo ndikin ya ma
12 Te nuu ni kuu sukan ma,
sani te Jesús ma,
tuku‑ka ni kenda ya nuu uu ñayii kuan koo ichi yuku ma.
13 Ñayii yaꞌa,
ni jan koo i ni ka kaxtnuꞌu i nuu ndaka‑ka ñayii ni ka yo ndikin ya ma,
kovaa ni ñatuu ni ka kandija tna i.
Ni tatnuni Jesús ma sukan jin saꞌa tee ka ndikin ya ma
14 Te kuee‑ka ma,
Jesús ma,
ni kenda ya nuu ndi‑uxi in tee ka ndikin ya ma,
nani ka nukoo de nuu mesa ma.
Te ni ndonda ya nuu de:
―¿Navaꞌa ñatuu ka kandija ni te ñatuu ka jakuꞌni ini ni?
―kúu ya jiñaꞌa ya.
Chi vaa ñatuu ni ka kandija de ja ka kaꞌan ñayii ma ja ni ka jini i ya ma,
vaa jâ ni ndateku ya ma.
15 Te ni tatnuni ya nuu tee ka ndikin ya ma:
―Jin koo ni ni‑kaꞌnu ñuu ñayivi a,
te jin kaxtnuꞌu ni tnuꞌu vii tnuꞌu vaꞌa Suꞌsi ma nuu ndaka ñayii ma.
16 Te ñayii kandija tnuꞌu vii tnuꞌu vaꞌa káꞌan sa a te kuandute i ma,
ñayii yukan chi ndaniꞌi taꞌvi i.
Kovaa ñayii masu kandija ma chi masu ndaniꞌi taꞌvi i.
17 Te milagru yaꞌa jin kuni ñayii ka kukanu ini ñaꞌa i maa sa ma.
Te jin ndakuneꞌe ñaꞌa i maa sa,
te kuu jin ndeneꞌe i tachi ka yinee ñayii ma.
Te kuu jin kaꞌan i saꞌan ja ñatuu ka kaꞌan i ma.
18 Te visi na jin tnii i koo ma,
kovaa masu nawa saꞌa ñaꞌa ti.
Te visi na jin koꞌo i ja yiꞌi venenu ma,
kovaa masu nawa jin ndoꞌo i.
Te jin sonee i ndaꞌa i siki ñayii ka kuꞌu ma,
te jin nduvaꞌa ñayii ma,
vaa iyo sa jiꞌin i ma ―kúu ya jiñaꞌa ya.
Sukan ni ndaa Jesús ma kuan noꞌo ya andivi ma
19 Te ni jinu ja ni kaꞌan ya nuu de ma,
te ni ndaa ya kuan noꞌo ya andivi ma,
te ni nukoo ya xiñi kuaꞌa Suꞌsi ma.
20 Te ndaka tee ka ndikin ya ma ni ka ke koo kuan koo de,
te ka kaxtnuꞌu de tnuꞌu ni jiñaꞌa ya ma ni‑kaꞌnu ñuu ñayivi a.
Te maa Iya Tátnuni ma,
chíndee ya de ja jin saꞌa kuaꞌa de milagru,
sukan‑vaꞌa jin kandija ñayii ma tnuꞌu vii tnuꞌu vaꞌa Jesucristo ma ja ka kaxtnuꞌu de ma.
Te sukan kó kuu.