Ni ka ndaxsiaꞌa i Jesús ma nuu ndaꞌa Pilato ma
15
Nuu jâ ve ndii ma,
te ni ka ndututu tee ka tatnuni nuu sutu ma,
jiꞌin tee ka kuu jaꞌnu ma,
jiꞌin tee ka skuaꞌa tnuꞌu ni kaxtnuꞌu Moisés ma,
jiꞌin ndaka‑ka tee ka jaꞌnde tniñu ñayii ñuu judío ma.
Te ni ka juꞌni de Jesús ma,
te kuan koo de jiꞌin ya,
te ni ka ndaxsiaꞌa de ya nuu ndaꞌa tee kúu Pilato ma.
Marcos 15:1-32
2 Pilato ma,
ni jikan‑tnuꞌu de ya:
―¿Ndijin kúu rey tátnuni nuu ñayii judío a?
―kúu de jiñaꞌa de.
Te ni ndakoneꞌe Jesús ma:
―Maa ni káꞌan ―kúu ya jiñaꞌa ya.
3 Ndaka tee ka tatnuni nuu sutu ma,
kuaꞌa xeen ja ka xtekuechi de ya,
4 te Pilato ma,
ni jikan‑tnuꞌu de ya in‑ka jichi:
―¿Ñatuu nawa káꞌan ni?
Te kuaꞌa xeen ja ka xtekuechi ñaꞌa i a ―kúu de jiñaꞌa de ya.
5 Kovaa Jesús ma,
masu ni ndakoneꞌe ya.
Chukan kúu ja Pilato ma,
ni saꞌvi‑nka ini de.
Ni ka kundee maa ñayii ma, te ni tatnuni Pilato ma ja jin kaꞌni i Jesús ma
6 Neꞌun ndaka Viko Pascua ma,
te Pilato ma chi ni yo kachi de ja keneꞌe de in ñayii vekaa ma,
ndevaꞌa‑ni na in ka kaꞌan maa ñayii judío ma.
7 Te in tee nani Barrabás ma,
jiꞌin jaku‑ka tee ni ka xtutu tnaꞌa jiꞌin de ma,
ka yinee de vekaa ma kuechi ja ni ka jaꞌni de in ñayii neꞌun kivi ni ka kanaa de jiꞌin gobiernu ma.
8 Te ni ka kenda koo ñayii ñuu Israel ma,
te ni ka kejaꞌa i ka jikan i nuu Pilato ma ja saꞌa de sukan saꞌa de ndaka kuiya ma,
te ka jiñaꞌa i ja na keneꞌe de in ñayii yinee vekaa ma.
9 Te jiñaꞌa Pilato ma:
―¿Ka kuni ni ja xsiaa sa rey tátnuni nuu ñayii judío a?
―kúu de jiñaꞌa de.
10 Chi vaa ni jinitnuni de ja tee ka tatnuni nuu sutu ma chi ni ka ndaxsiaꞌa de ya nuu Pilato ma kuechi ja ka kukueñu ini de ma.
11 Kovaa tee ka tatnuni nuu sutu ma chi ni ka jiñaꞌa de ñayii ma ja jin kayuꞌu i ja jin kakan i ja xsiaa Pilato ma Barrabás ma.
12 Te jiñaꞌa Pilato ma nuu ñayii ka kayuꞌu ma:
―¿Kovaa nawa ka kuni ni ja saꞌa sa jiꞌin tee ka xnani ni rey tátnuni nuu ñayii judío a?
―kúu de jiñaꞌa de.
13 Te ni ka kayuꞌu ndaka ñayii yukan ma,
te ka jiñaꞌa i:
―Kata kaa ni de nuu krusi ma ―ka kuu i ka jiñaꞌa i nuu Pilato ma.
14 Te jiñaꞌa Pilato ma:
―¿Navaꞌa?
¿Na kuechi de?
¿Na nde a uꞌvi ni saꞌa de?
―kúu de jiñaꞌa de.
Kovaa ñayii yukan chi ndaka i ni ka kayuꞌu niniꞌi‑ka,
te ka jiñaꞌa i nuu de:
―Kata kaa ni de nuu krusi ma ―ka kuu i ka jiñaꞌa i.
15 Te Pilato ma chi ni kuni de ja kendoo vaꞌa de jiꞌin ñayii ma.
Te ni xsiaa de Barrabás ma,
kuaꞌan maa de.
Te ni jinu,
te ni ndaxsiaꞌa de Jesús ma nuu ndaꞌa soldado ma,
sukan‑vaꞌa jin kani de ya te jin kata kaa de ya nuu krusi ma.
16 Tee ka kuu soldado ma,
ni jan koo de jiꞌin Jesús ma nukeꞌe palaciu ma,
te ni ka ndututu ndaka‑ka soldado ma.
17 Te ni ka skondii de ya in saꞌma kuaꞌa tnuu,
te ni ka saꞌa de in corona iñu,
te ni ka sonee de xini ya ma.
18 Sani te ni ka kejaꞌa de ka kayuꞌu de ka kaꞌan de:
―¡Suchi yaꞌa kúu rey tátnuni nuu ñayii judío ma,
vee!
―ka kuu de ka kaꞌan de.
19 Te ka kuun de yutnu xini ya ma.
Te ka tusii de ya,
te ka jinkuiñi jiti de nuu ya kuenda tnuꞌu ja ka iyo xeen respetu de nuu ya.
20 Nuu ni jinu ni ka kasiki ndee de ya ma,
te ni ka xtandiyo de saꞌma kuaꞌa tnuu ni ka skondii de ya ma,
te ni ka ndaskoneꞌnu de ya saꞌma maa ya ma,
te ni ka keneꞌe de ya ja jin koo de jin kata kaa de ya nuu krusi ma.
Ni ka skuita kaa de Jesús ma nuu krusi ma
21 In tee ñuu Cirene ma,
nani de Simón.
Yuva tee kúu Alejandro ma jiꞌin Rufo ma kúu de.
Ni ndenda de ja ni jaꞌan de yuku ma.
Te ja ni ndayaꞌa de yukan,
te ni ka xtetuu de tee ma ja kuiso de krusi Jesús ma.
22 Ni jan koo de jiꞌin Jesús ma in nuu nani i Gólgota ja kúni kaꞌan “Yiki Xini Ndiyi”.
23 Te ni ka waꞌa de ya vala ndute uva ni ka sakanuu de jiꞌin mirra,
sukan‑vaꞌa ndajijin yikikuñu ya ma,
kovaa Jesús ma chi ñatuu ni kuni ya ja koꞌo ya.
24 Sani te tee ka kuu soldado ma,
ni ka skuita kaa de ya nuu krusi ma.
Te ni ka kejaꞌa de ka chuꞌun de suerte saꞌma Jesús ma,
sukan‑vaꞌa nde saꞌma jin ndaniꞌi in in de ma.
25 Ka iin xtnee kuu nuu ni ka skuita kaa de ya nuu krusi ma.
26 Te ni ka tee de in nuu tabla kuechi ni ka xtekuechi de ya ma,
te saꞌa káꞌan:
“Tee yaꞌa kúu rey tátnuni nuu ñayii judío a.”
27 Te suni ni ka skuita kaa de uu kuiꞌna in in nuu krusi ma,
in de xiñi kuaꞌa ya ma,
te in de xiñi satni ya ma.
28 Vaa saꞌa káꞌan nuu tutu ndee tnuꞌu Suꞌsi ma:
“Ni ka jani ini i ja in ñayii saꞌa ja uꞌvi kúu ya.”
29 Te ñayii ka yaꞌa ma,
ka kaꞌan ndevaꞌa i nuu ya,
ka skuiko xini i,
te ka jiñaꞌa i:
―Ndijin ja káꞌan ni ja ndakana ni veñuꞌu kaꞌnu ma te nuu uni kii ma te ndajinu ndasaꞌa ni ma,
30 te saꞌa maa ni ja kaku ni,
te ki nuu ni nuu krusi a ―ka kuu i ka jiñaꞌa i.
31 Te tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
ka jakundee de ya,
te ka kaꞌan de:
―Siin ñayii,
ni saꞌa de ja ni ka kaku i nuu tnundoꞌo ma,
te maa de ma,
ñatuu kuu naxe saꞌa de ja kaku de nuu tnundoꞌo tnuneni a.
32 Te nú tee yaꞌa kúu Cristo tee kúu rey tátnuni nuu ñayii Israel ya,
te kí nuu de nuu krusi a,
sukan‑vaꞌa jín kuni o te jín kandija o ja káꞌan de ma ―ka kuu de ka kaꞌan de.
Onde tee ka ndenee nuu krusi ma jiꞌin ya ma,
ka kaꞌan ndevaꞌa de nuu ya.
Sukan ni jiꞌi Jesús ma
33 Te nuu ve kuu sava nduu ma,
te ni‑kaꞌnu ñuu ñayivi ma ni kunee onde nuu ni kuu ka uni jañini ma.
Marcos 15:33-47
34 Te maa ora yukan kuu ora ni kayuꞌu niniꞌi Jesús ma ni kaꞌan ya:
―Eloi,
Eloi,
¿lama sabactani?
Te tnuꞌu yaꞌa kúni kaꞌan,
“Suꞌsi maa sa,
Suꞌsi maa sa,
¿navaꞌa ni xndoo ñaꞌa ni?”
35 Te sava ñayii ka iyo yukan,
ni ka jinisoꞌo i ja káꞌan Jesús ma,
te ka kaꞌan i ja Elías ma kána ya.
36 Sani te in tee yukan,
jinu de ni jan nu nduku de vala kachi,
te ni chunee de nuu vinagre ma.
Te ni chitnii de in nuu tnu yoo,
te ni tenee de yuꞌu Jesús ma.
Te ni kaꞌan de:
―Ni kuu na.
Máko jin xtnaꞌa‑ka o de,
te jín ko koto o nú kii Elías ma ki nuneꞌe de tee yaꞌa nuu krusi a ―kúu de káꞌan de.
37 Kovaa Jesús ma chi ni kayuꞌu niniꞌi ya.
Sani te ni jiꞌi ya.
38 Sani te saꞌma ndakaa nuu ii ini veñuꞌu kaꞌnu ma chi ni teꞌnde sasava i,
te ni kejaꞌa onde sukun ma,
te ni kenda i onde jaꞌa saꞌma ma.
39 Te tee tátnuni nuu soldado ma,
ni iyo de nuu Jesús ma,
te ni jini de ja sukan ni kayuꞌu Jesús ma te ni jiꞌi ya ma,
te ni kaꞌan de:
―Iya yaꞌa chi ja ndaa ndija ja Saꞌya Suꞌsi ma kúu ya ―kúu de káꞌan de.
40 Suni ka iyo kuaꞌa ñaꞌa ka ndeꞌya jika ma.
Neꞌun ndaka ña ma iyo María Magdalena ma,
jiꞌin Salomé ma,
jiꞌin María ma ja kúu ña siꞌi tee kúu José ma jiꞌin Santiago tee lule‑ka ma.
41 Ñaꞌa yaꞌa chi ni ka yo ndikin ña Jesús ma,
te ni ka yo jinukuechi ña nuu ya nuu ni yo iyo ya ñuu Galilea ma.
Suni ka iyo kuaꞌa‑ka tna ñaꞌa ni ka yo ndikin ya ja ni jaꞌan ya ñuu Jerusalén ma.
Sukan ni ka chuꞌu i Jesús ma
42 Nuu ve kunee ma,
te vaa kivi ka satuꞌva ñayii ma ja kivi yutnee ma ko kuu kivi ni tatnuni Suꞌsi ma ja ma jin satniñu ñayii ma kúu,
43 te iyo in tee ñuu Arimatea ma nani de José,
te in tee kanuu kúu de neꞌun tee ka tatnuni nuu ñayii Israel ma.
Te tee yukan chi ndetu de ja kenda kivi tatnuni Suꞌsi ma.
Te ni jani ini de naxe saꞌa de ma,
te ni jaꞌan de nuu Pilato ma,
te ni ndakan de ñundeꞌyu Jesús ma.
44 Pilato ma chi ni kandava de ja ni jinisoꞌo de ja jâ ni jiꞌi ya ma,
te ni kana de tee tátnuni nuu soldado ma,
ja kakan‑tnuꞌu de na nkuu saa tiempu ja ni jiꞌi ya ma.
45 Te nuu ni jiñaꞌa tee tátnuni nuu soldado ma sukan ni iyo ma,
te tee nani Pilato ma,
ni waꞌa de tnuꞌu ja nuneꞌe tee kúu José ma ñundeꞌyu Jesús ma.
46 Sani te ni jan kuaan de in saꞌma vaꞌa nani i lino,
te ni nuneꞌe de ñundeꞌyu Jesús ma,
te ni chutuu de ya saꞌma ma.
Te ni jinu,
te ni jan chinee de ya in yavi ndenee yika toto ma,
te ni jasi de jiꞌin in yuu kaꞌnu kaꞌnu.
47 Te María Magdalena ma,
jiꞌin María siꞌi José ma,
ka ndeꞌya ña ndenu ni ka chinee de ñundeꞌyu ya ma.