Ni ka tnii de Jesús ma
18
Nuu ni jinu ni jikan‑taꞌvi ya sukan,
Jesús ma,
ni kee ya jiꞌin tee ka ndikin ya ma,
sukan‑vaꞌa kiꞌin ya in‑ka yuꞌu yuu nani Cedrón ma ichi nuu iyo in huerta ma,
te ni kivi Jesús ma jiꞌin tee ka ndikin ya ma.
2 Te Judas ma,
tee yikuu keꞌen‑suꞌva ya ma,
jini de yukan,
vaa kuaꞌa jichi ni ka yo ndatnaꞌa de jiꞌin ya yukan ma.
Jesús traicionado y arrestado (Juan 18.1-14)
3 Sani te ni kenda Judas ma,
jiꞌin in yukun soldado,
jiꞌin jaku tee ka jito veñuꞌu ma.
Ñayii yaꞌa ni ka tetniñu tee ka tatnuni nuu sutu ma,
jiꞌin tee ka kuu fariseo ma.
Te jaku de ka yindaꞌa ja ndúꞌva ñuꞌu ja jin kundijin nuu de ma,
te jaku de ka yindaꞌa iti suja ka nduꞌva ñuꞌu,
te ka ndiso xeen de.
4 Kovaa Jesús ma,
jâ jini ya ndaka nde a ko kuu ja ndoꞌo ya ma,
te ni kee ya,
te ni jikan‑tnuꞌu ya:
―¿Na in ka ndanduku ni?
―kúu ya jiñaꞌa ya.
5 Te ni ka ndakoneꞌe de:
―Tee kúu Jesús ñuu Nazaret ma ―ka kuu de ka jiñaꞌa de.
Jesús ma,
jiñaꞌa ya:
―Saña kúu ―kúu ya jiñaꞌa ya.
Te Judas tee yikuu keꞌen‑suꞌva ñaꞌa ma,
suni ni iyo de yukan neꞌun ñayii ma.
6 Nuu ni jiñaꞌa Jesús ma:
“Saña kúu”,
kuaꞌa ni ka ndakaka yata de,
te ni ka kotuu de nuu ñuꞌú ma.
7 Jesús ma,
ni ndakan‑tnuꞌu tuku ñaꞌa ya:
―¿Na in ka ndanduku ni?
―kúu ya jiñaꞌa ya.
Te ni ka ndakoneꞌe tuku de:
―Tee kúu Jesús ñuu Nazaret ma ―ka kuu de ka jiñaꞌa de.
8 Jesús ma,
jiñaꞌa tuku ya:
―Jâ ni kaꞌan sa ja saña kúu.
Nú ka ndanduku ni saña,
jin kuaꞌa ni tnuꞌu jin koo maa tee yaꞌa ―kúu ya jiñaꞌa ya.
9 Saꞌa ni kuu,
sukan‑vaꞌa ko kuu sukan ni jiñaꞌa maa Jesús ma:
“Yuva sa,
ñayii ni taa ni a,
ñatuu ni skenaa sa ni‑in i.”
10 Te Simón Pedro ma,
nevaꞌa de in yuchi kúu espada.
Sani te ni keneꞌe de,
te ni jan kaꞌnde‑ni de soꞌo kuaꞌa in tee nani Malco tee jinukuechi nuu tee tatnuni nuu sutu ma.
11 Jesús ma,
jiñaꞌa ya Pedro ma:
―Ndachunee vaꞌa ni yuchi kúu espada ni a nuu ñunee i ma.
Nú Yuva sa ma,
kúni ya ja ndoꞌo neni sa a,
¿naku xi ma ndoꞌo sa?
―kúu ya jiñaꞌa ya.
Ni ka jan xsiaꞌa i Jesús ma nuu tee kúu Anás ma
12 Te tee ka kuu soldado ma,
jiꞌin tee tatnuni nuu de ma,
jiꞌin tee ka jito veñuꞌu ma,
ni ka tnii de Jesús ma,
te ni ka juꞌni de ya.
13 Te ni jan koo de jiꞌin ya xinañuꞌu veꞌe tee kúu Anás ma,
vaa yuva xiso tee kúu Caifás ma kúu de,
te Caifás ma kúu tee tátnuni nuu sutu ma kuiya yukan.
14 Maa tee kúu Caifás ma kúu tee jiñaꞌa nuu ñayii judío ma ja vaꞌa‑ka maa ñayii ma jin ko kuu,
nuna kûu in tee nuu tniñu ndaka ñayii ñuu ma.
Ni kaꞌan Pedro ma ja masu jini de Jesús ma
15 Simón Pedro ma jiꞌin in‑ka tee ni ka yo ndikin Jesús ma,
kuan koo de.
In‑ka tee ni yo ndikin Jesús ma,
jini tnaꞌa de jiꞌin tee tátnuni nuu sutu ma,
te chukan kúu ja ni kivi de jiꞌin Jesús ma ini veꞌe ma.
Pedro niega conocer a Jesús y Anás pregunta a Jesús (Juan 18.15-27)
16 Kovaa Pedro ma,
ni kendoo de yeꞌe keꞌe ma.
Te chukan kúu ja ni kee tee ndikin Jesús ma,
tee jini tnaꞌa jiꞌin tee tatnuni nuu sutu ma,
te ni jiñaꞌa de nuu ñaꞌa jito yeꞌe ma,
te saa ni kuu ni kivi Pedro ma.
17 Ñaꞌa jito yeꞌe ma,
ni jikan‑tnuꞌu ña Pedro ma:
―¿Masu ndijin tna kúu tee ka ndikin tnaꞌa jiꞌin tee kúu Jesús ya?
―kúu ña jiñaꞌa ña.
Pedro ma,
ni ndakoneꞌe de:
―Ñaꞌa,
masu saña kúu ―kúu de jiñaꞌa de.
18 Kovaa vijin xeen ma,
te tee ka jinukuechi ma,
jiꞌin tee ka jito veñuꞌu ma,
ni ka xnduꞌva de ñuꞌu,
te ka yikuu de ka nduvixi de.
Suni Pedro ma,
yituu tna de yukan neꞌun tee ma,
ndúvixi de yuꞌu ñuꞌu ma.
Tee kúu Anás ma, ni xndichi de Jesús ma
19 Tee tátnuni nuu sutu ma,
ni kejaꞌa de jikan‑tnuꞌu de Jesús ma siki tee ka ndikin ya ma jiꞌin siki tnuꞌu káxtnuꞌu ya ma.
20 Jesús ma,
jiñaꞌa ya:
―Saña chi ni yo kaꞌan ndijin sa nuu ndaka ñayii ñuu ñayivi a.
Ndimaa ni yo kaxtnuꞌu sa ini veñuꞌu lilikin ma jiꞌin ini veñuꞌu kaꞌnu ma nuu ka ndututu ndaka ñayii judío a.
Te masu nawa ni yo kaꞌan yuꞌu sa.
21 ¿Navaꞌa ka jikan‑tnuꞌu ñaꞌa ni?
Jin kakan‑tnuꞌu ni nuu ñayii ni ka jinisoꞌo ja ni kaꞌan sa ma,
te ñayii yukan,
jin kaꞌan i nde a ni yo kaxtnuꞌu sa nuu i ma.
Vaa ñayii ma chi ka jini i nawa ni yo kaꞌan sa ma ―kúu ya jiñaꞌa ya.
22 Nuu ni kaꞌan Jesús ma sukan,
in tee jito veñuꞌu ma,
ni waꞌa de in yikinuu ya ma,
te jiñaꞌa de:
―¿Sukan ndákoneꞌe ni nuu tee tátnuni nuu sutu a?
―kúu de jiñaꞌa de.
23 Jesús ma,
ni ndakoneꞌe ya:
―Nú ni kaꞌan sa in ja uꞌvi,
kaꞌan ni nde a kúu.
Te nú ni kaꞌan sa ja vaꞌa,
¿navaꞌa káni ñaꞌa ni?
―kúu ya jiñaꞌa ya.
24 Sani te Anás ma,
ni tetniñu de ya nuu tee kúu Caifás tee tátnuni nuu sutu ma.
Pedro ma, ni kaꞌan de in‑ka jichi ja masu jini de Jesús ma
25 Te Pedro ma,
yikuu‑ka de ndúvixi de yuꞌu ñuꞌu ma.
Te ni ka jikan‑tnuꞌu i de:
―¿Masu ndijin kúu in tee ni ka yo ndikin tee kúu Jesús ma?
―ka kuu i ka jiñaꞌa i.
Pedro ma,
ni ndakoneꞌe de:
―Ñaꞌa,
masu saña kúu ―kúu de jiñaꞌa de.
26 Sani te in tee jinukuechi nuu sutu ma,
tnaꞌa tee ni jaꞌnde Pedro ma soꞌo de ma,
ni jikan‑tnuꞌu de:
―¿Te masu ni jini ñaꞌa sa huerta ma jiꞌin de ma?
―kúu de jiñaꞌa de.
27 Pedro ma,
jiñaꞌa de in‑ka jichi ja masu jini de Jesús ma.
Te maa ora yukan‑ni ni kana liꞌli ma.
Ni ka jan ndaxsiaꞌa i Jesús ma nuu ndaꞌa Pilato ma
28 Ni ka nde koo tee judío ma jiꞌin Jesús ma veꞌe tee kúu Caifás ma,
te kuan koo de jiꞌin ya palaciu nuu yinee tee ñuu Roma ma ja tátnuni de ma.
Vaa jâ ve ndii ma,
te tee judío ma,
masu kuu‑ka jin kivi koo de ini palaciu ma,
vaa nú ñaꞌa te masu jin koo vii de nuu Suꞌsi ma,
te masu kuu jin kuxini de kivi Viko Pascua ma.
Pilato le pregunta a Jesús (Juan 18.28-40)
29 Chukan kúu ja Pilato ma,
ni kee de ja kaꞌan de,
te jiñaꞌa de:
―¿Na nde a ka xtekuechi ni tee yaꞌa?
―kúu de jiñaꞌa de.
30 Ni ka ndakoneꞌe de:
―Nute masu in tee saꞌa ja uꞌvi kúu de,
masu ki koo sa ki xsiaꞌa sa de nuu ndaꞌa ni a ―ka kuu de ka jiñaꞌa de.
31 Pilato ma,
jiñaꞌa de:
―Jin ndakueka maa ni de,
te jin kaꞌnde ni tniñu de sukan ka saꞌa maa ni a ―kúu de jiñaꞌa de.
Te tee ka kuu judío ma,
ni ka ndakoneꞌe de:
―Kovaa saña ja ka kuu sa ñayii judío a,
masu kuu jin kaꞌni sa ni‑in ñayii ―ka kuu de ka jiñaꞌa de.
32 Chukan kúu ja ni kuu sukan ni kaꞌan Jesús ma siki ja naxe kûu ya ma.
33 Pilato ma,
ni ndivi tuku de ini palaciu ma,
te ni kana de Jesús ma,
te jikan‑tnuꞌu de ya:
―¿Ndijin kúu rey ñayii judío ma?
―kúu de jiñaꞌa de.
34 Jesús ma,
jiñaꞌa ya:
―¿Maa ni jani ini ja káꞌan ni a,
xi nde in ni skaꞌan ñaꞌa?
―kúu ya jiñaꞌa ya.
35 Te ni ndakoneꞌe Pilato ma:
―¿Xi ñayii judío ma kúu saña?
Maa ñayii ñuu ni a,
jiꞌin tee ka tatnuni nuu sutu ma ka kuu tee ni ka ki ndi xsiaꞌa ñaꞌa nuu saña.
¿Nawa ni saꞌa ni?
―kúu de jiñaꞌa de.
36 Jesús ma,
ni ndakoneꞌe ya:
―Nuu tátnuni sa ma masu ñuu ñayivi a kúu.
Nute yaꞌa kúu,
konevaꞌa sa ñayii jin kunukuechi nuu sa,
te jin kanaa i,
sukan‑vaꞌa saña,
ma jin tnii ñaꞌa ñayii judío ma.
Kovaa nuu tatnuni sa ma masu ñuu ñayivi a kúu ―kúu ya jiñaꞌa ya.
37 Sani te ni jikan‑tnuꞌu tuku ñaꞌa Pilato ma:
―¿Nú sukan,
te rey kúu ni?
―kúu de jiñaꞌa de.
Jesús ma,
ni ndakoneꞌe ya:
―Maa ni ni kaꞌan ja rey kúu sa.
Vee sa,
te ni kâku sa ñuu ñayivi a,
sukan‑vaꞌa kaꞌan sa nde a kúu ja ndaa.
Te ndaka ñayii ka saꞌa ja ndaa ma,
ka ninisoꞌo i ja káꞌan sa ma ―kúu ya jiñaꞌa ya.
38 Te Pilato ma,
jiñaꞌa de:
―¿Nde a kúu ja ndaa ma?
Ni ka kundee maa ñayii ma, te ni tatnuni Pilato ma ja jin kaꞌni i Jesús ma
Ja ni jinu ni jikan‑tnuꞌu de ya saꞌa,
ni kee de in‑ka jichi,
te ni kaꞌan de jiꞌin tee judío ma,
te jiñaꞌa de:
―Saña,
ñatuu ni ndaniꞌi sa ni‑in kuechi tee yaꞌa.
39 Kovaa ka nevaꞌa maa ni costumbre ja saña ndaxsiaa in tee yinee vekaa ma neꞌun kivi Viko Pascua a.
¿Ka kuni ni ja ndaxsiaa sa tee kúu rey nuu ñayii judío a?
―kúu de jiñaꞌa de.
40 Ndaka ñayii ma,
ûni ka kayuꞌu i ka jiñaꞌa i:
―¡Tee jiña chi ñaꞌa!
¡Ndaxsiaa ni tee kúu Barrabás ma!
―ka kuu i ka jiñaꞌa i.
Te tee kúu Barrabás ma chi in kuiꞌna kúu de.