Ni ka chutnaꞌa tnuꞌu de naxe jin tnii de Jesús ma
26
Te nuu ni jinu ni kaxtnuꞌu Jesús ma ndaka tnuꞌu yaꞌa ma,
te jiñaꞌa ya tee ka ndikin ya ma:
2 ―Jâ ka jini ni ja uu‑nka kivi kúni,
te ko kuu Viko Pascua ma,
te jin ndaxsiaꞌa ñaꞌa i saña ja kúu sa iya vee ñayivi ñuu ñayivi a nuu ndaꞌa tee jin skuita kaa ñaꞌa nuu krusi ma ―kúu ya jiñaꞌa ya.
3 Sani te tee ka tatnuni nuu sutu ma,
jiꞌin tee ka kuu jaꞌnu ma,
ni ka ndatnaꞌa de nukeꞌe veꞌe tee kúu Caifás tee tátnuni nuu sutu ma.
4 Te ka ndatnuꞌu tnaꞌa de naxe jin xndaꞌvi de Jesús ma te jin tnii de ya te jin kaꞌni de ya.
5 Kovaa ka kaꞌan de:
―Masu kuu neꞌun viko ma.
Nú ñaꞌa,
te ñayii ma,
jin ndakiti ini i nuu o,
te jin kana jin kayuꞌu i nuu ka iyo o a ―ka kuu de ka kaꞌan de.
In ñaꞌa, ni chiso ña ndute jáxiko asi xini Jesús ma
6 Jesús ma,
ni jaꞌan ya ñuu Betania ma,
veꞌe tee kúu Simón ma,
tee ni yo ndoꞌo kueꞌe lepra ma.
7 Te ni jan tuꞌva in ñaꞌa nuu núkoo Jesús ma,
te yindaꞌa ña in botella,
te nanimaa vidriu nani alabastru kúu i,
te yukan ñuꞌu ndute jáxiko asi ma.
In ja ndee yaꞌvi xeen kúu i.
Te ni chiso ña ndute jáxiko asi ma xini Jesús ma,
nani núkoo ya nuu mesa ma.
8 Te ni ka jini tee ka ndikin ya ma,
te ni ka ndakiti ini de,
te ka kaꞌan de:
―¿Navaꞌa ni xtivi ña ndute jáxiko asi a?
9 Vaꞌa‑ka nute ni kuyaꞌvi de,
vaa ndee yaꞌvi xeen de,
te kuu jin chindee o ñayii ndaꞌvi ma nkuu ―ka kuu de ka kaꞌan de.
10 Kovaa Jesús ma,
jini ya nawa ka kaꞌan de ma,
te jiñaꞌa ya:
―¿Navaꞌa ka xtnaꞌa ni ñaꞌa a?
Vaa ñaꞌa yaꞌa chi tnaꞌa ja ni saꞌa ñaꞌa ña a chi in ja vaꞌa kúu.
11 Vaa ñayii ndaꞌvi ma chi kuu jin koo i jiꞌin ni ni‑kani ni‑jika,
kovaa saña chi kenda kivi ja masu koo‑ka sa ñuu ñayivi ya jiꞌin ni.
12 Te ja sukan ni chiꞌi ñaꞌa ña ndute jáxiko asi a,
te chaꞌa kúu ja ni satuꞌva ña yikikuñu sa a,
sukan‑vaꞌa koo tuꞌva i kivi jin chuꞌu ñaꞌa ni ma.
13 Te ja ndaa káꞌan sa ja ndevaꞌa‑ni nuu jin kaxtnuꞌu i tnuꞌu vii tnuꞌu vaꞌa káxtnuꞌu sa a,
suni jin ndakaꞌan jin ndakachi i tnaꞌa ja ni saꞌa ñaꞌa ñaꞌa yaꞌa,
te sukan,
te jin ndakaꞌán i ja vii ja vaꞌa ni saꞌa ña ma ―kúu ya jiñaꞌa ya.
Judas ma, ni keꞌen‑suꞌva de Jesús ma
14 Sani te in tee ni yo kuu ndi‑uxi uu tee ni ka yo ndikin ya ma,
ja nani de Judas Iscariote ma,
ni jaꞌan de ni jan kuñaꞌa de nuu tee ka tatnuni nuu sutu ma,
15 te saꞌa jiñaꞌa de:
―¿Nawa jin taa ni,
nuna nduku sa naxe kuu kaxtnuꞌu sa te jin tnii ni Jesús ma?
―kúu de jiñaꞌa de.
Te ni ka waꞌa tee yukan oko uxi (30) xuꞌun plata.
16 Te ora yukan ni kejaꞌa Judas ma nduku de na ora ko kuu ja keꞌen‑suꞌva de Jesús ma.
Kivi ni kuxini Jesús ma jiꞌin tee ka ndikin ya ma
17 Kivi ni kejaꞌa viko ja ka jaa i xtatila ñatuu na levadura yiꞌi ma,
te tee ka ndikin Jesús ma,
ni ka jan tuꞌva de ya,
te ka jikan‑tnuꞌu de ya:
―¿Ndenu kúni ni ja jin satuꞌva sa ja jin kuxini o Viko Pascua a?
―ka kuu de ka jiñaꞌa de.
18 Te jiñaꞌa ya:
―Kuán koo ni ini ñuu ma,
te jin ndatnaꞌa ni jiꞌin in tee,
te jin kuñaꞌa ni:
“Teskuaꞌa o ma,
saꞌa káꞌan ya:
Jâ ni kuyatni ora ndoꞌo neni sa a.
Chukan kúu ja veꞌe ni ma,
jin kuxini sa Viko Pascua ya,
jiꞌin ndaka tee ka ndikin tnaꞌa jiꞌin sa a”,
jin kuñaꞌa ni ―kúu ya jiñaꞌa ya.
19 Te tee ni tetniñu ya ma,
ni ka saꞌa de sukan ni tatnuni ya nuu de ma,
te ni ka satuꞌva de ja jin kuxini de jiꞌin ya Viko Pascua ma.
20 Nuu ve kunee ma,
ni jinkoo Jesús ma jiꞌin ndi‑uxi uu tee ka ndikin ya ma.
21 Nani ka kuxini de jiꞌin ya ma,
te Jesús ma,
jiñaꞌa ya:
―Ja ndaa káꞌan sa ja in ni keꞌen‑suꞌva ñaꞌa ―kúu ya jiñaꞌa ya.
22 Te ni ka kuxii ini de,
te ni ka kejaꞌa ndi‑in ndi‑in de ka jikan‑tnuꞌu de ya:
―Señor,
¿saña kúu?
―ka kuu de ka jiñaꞌa de.
23 Te Jesús ma,
ni ndakoneꞌe ya:
―Nde ni xndoyo xtatila ni a jiꞌin sa nuu koꞌo a ko kuu tee keꞌen‑suꞌva ñaꞌa ma.
24 Ja ndaa kúu ja saña ja kúu sa iya vee ñayivi ñuu ñayivi a chi ndoꞌo sa sukan káꞌan tutu ndee tnuꞌu Suꞌsi ma ja iyo ja ndoꞌo sa ma,
kovaa ¡ndaꞌvi maa na in keꞌen‑suꞌva ñaꞌa ma!
Vaꞌa‑ka ko kuu i,
nute ñatuu ni kenda i ñuu ñayivi ya nkuu ―kúu ya jiñaꞌa ya.
25 Sani te Judas tee keꞌen‑suꞌva ya ma,
ni ndakoneꞌe de:
―Teskuaꞌa,
¿saña kúu?
―kúu de jiñaꞌa de.
Te jiñaꞌa ya:
―Kúu‑nka chi maa ni káꞌan,
masu saña ―kúu ya jiñaꞌa ya.
26 Nani ka kuxini de jiꞌin ya ma,
te Jesús ma,
ni tnii ya xtatila ma,
te ni ndakuan‑taꞌvi ya nuu Suꞌsi ma,
te ni taꞌvi ya,
te ni waꞌa ya tee ka ndikin ya ma,
te jiñaꞌa ya:
―Jin tnii ni,
te jin kaa ni.
Chaꞌa kúu yikikuñu sa a ―kúu ya jiñaꞌa ya.
27 Sani te ni tnii ya in nuu ñuꞌu ndute uva ma,
te ni ndakuan‑taꞌvi ya nuu Suꞌsi ma.
Te ni xsiaꞌa ya nuu tee ka ndikin ya ma,
te jiñaꞌa ya:
―Jin koꞌo ndaka ni vala vala de.
28 Vaa chaꞌa kúu niñi sa ja kati ma,
sana jin ndaniꞌi‑taꞌvi kuaꞌa xeen ñayii ma,
te onde saꞌa,
te sakanu ini Suꞌsi ma kuechi i ma.
Chaꞌa kúu in tnuꞌu jaa tátnuni Suꞌsi ma naxe jin koo vaꞌa ni nuu ya.
29 Kovaa káꞌan sa nuu ni ja vitna‑nka‑ni,
te masu koꞌo‑ka sa ndute uva yaꞌa chi onde kivi jin ndututu o nuu tatnuni Yuva o Suꞌsi ma te jin koꞌo o ndute uva jaa ma ―kúu ya jiñaꞌa ya.
Jesús ma, ni kaꞌan ya ja Pedro ma, uni jichi kaꞌan de ja masu jini de ya
30 Nuu ni jinu ni ka jita de jiꞌin ya in yaa,
te kuan koo de jiꞌin ya Yuku Tnu Olivo ma.
31 Sani te Jesús ma,
jiñaꞌa ya:
―Jakuaa vitna,
te ndaka ndijin chi ma jin kukanu ini‑ka ñaꞌa ni,
te jin xndoo ñaꞌa ni,
vaa sukan káꞌan tutu ndee tnuꞌu Suꞌsi ma:
“Kaꞌni sa tee jito ndikachi ma,
te ndaka ndikachi ma,
jin kuitenuu ti.”
32 Kovaa kivi ndateku sa ma,
te koxtnuu sa kiꞌin sa ñuu Galilea ma,
te sana jan koo maa ni ―kúu ya jiñaꞌa ya.
33 Pedro ma,
ni ndakoneꞌe de,
te jiñaꞌa de:
―Visi ndaka de na jin xndoo ñaꞌa,
kovaa saña chi masu xndoo ñaꞌa sa ―kúu de jiñaꞌa de.
34 Te Jesús ma,
ni ndakoneꞌe ya:
―Ja ndaa káꞌan sa ja jakuaa vitna,
ni ñatuu kana‑ka liꞌli ma,
te jâ ni kuu uni jichi ja kaꞌan ni ja ñatuu jini ñaꞌa ni ―kúu ya jiñaꞌa ya.
35 Kovaa Pedro ma chi jiñaꞌa de:
―Visi na kûu sa jiꞌin ni,
kovaa masu kaꞌan sa ja ñatuu jini ñaꞌa sa ―kúu de jiñaꞌa de,
te ndaka tee ka ndikin ya ma ka jiñaꞌa sukan tna.
Nuu nani Getsemaní ma, ni jaꞌan Jesús ma ni jikan‑taꞌvi ya nuu Suꞌsi ma
36 Sani te ni jan koo de jiꞌin ya in nuu nani Getsemaní ma,
te Jesús ma,
jiñaꞌa ya nuu tee ka ndikin ya ma:
―Jin kunukoo ni yaꞌa,
nani kiꞌin sa jin kakan‑taꞌvi sa nuu Suꞌsi ma ―kúu ya jiñaꞌa ya.
37 Te ni jeka ya Pedro ma jiꞌin nduu saꞌya Zebedeo ma,
te kuan koo de jiꞌin ya,
te ni kejaꞌa ya kúxii kúndaꞌvi ini ya,
38 te jiñaꞌa ya de:
―Jini sa ja onde ini anua sa a,
kúxii xeen ini i,
te ûni kuenda kûu sa kúni sa.
Jin kendoo ni yaꞌa.
Másu ko jin kusu ni ―kúu ya jiñaꞌa ya.
39 Sani te kuaꞌan‑ka Jesús ma,
te ni kujika‑ka ya vala ma,
te ni jinkoo jiti ya,
te ni jakindeyi ya onde nuu ñuꞌú ma,
te jikan‑taꞌvi ya nuu Suꞌsi ma,
te saꞌa jiñaꞌa ya:
―Yuva maa sa,
nú kuu,
te má ndoꞌo neni sa.
Kovaa má ko kuu sukan kúni maa sa chi kó kuu sukan kúni maa ni ―kúu ya jiñaꞌa ya.
40 Sani te ni ndakokuiñi ya nuu ka iyo tee ka ndikin ya ma,
te ni ndaniꞌi ya de ja ka kixi de,
te jiñaꞌa ya Pedro ma:
―¿Ni ñatuu ni kuu jin kondito ni visi ja in ora?
41 Chukan kúu ja jin kondito ni,
te jin kuꞌun vii jin kuꞌun vaꞌa ini ni naxe jin ko kuu ni,
te jin kakan‑taꞌvi ni nuu Suꞌsi ma,
sukan‑vaꞌa má skaꞌan ñaꞌa tachi ma ja jin saꞌa ni ja uꞌvi ma.
Ka jani vaꞌa ini ni,
kovaa yikikuñu ni a chi vita xeen i ―kúu ya jiñaꞌa ya.
42 Te kuaꞌan ya in‑ka jichi kuan kakan‑taꞌvi ya nuu Suꞌsi ma,
te jiñaꞌa ya:
―Yuva maa sa,
nú jiniñuꞌu ja ndoꞌo neni sa,
te kó kuu sukan kúni maa ni a ―kúu ya jiñaꞌa ya.
43 Te ni ndakokuiñi ya nuu ka iyo de ma,
te ni ndaniꞌi tuku ya de ja ka kixi de,
vaa ûni ka ndandesi‑nka nduchinuu de ma,
ja jin kusu de ka kuni de.
44 Te ni xndoo ya de,
te kuaꞌan ya kuan kakan‑taꞌvi ya ja ku‑uni jichi ma,
te suni maa i ni jiñaꞌa ya nuu Suꞌsi ma.
45 Te ni ndakokuiñi ya nuu ka iyo tee ka ndikin ya ma,
te jiñaꞌa ya:
―¿Ka yikuu‑ka ndijin ka kixi ni?
¿Ka ndatatu ni?
Jin kondeꞌya ni ja vitna,
te jâ ni kenda ora ja jin keꞌen‑suꞌva ñaꞌa i saña ja kúu sa iya vee ñayivi ñuu ñayivi a,
te jin kundaꞌa ñaꞌa tee ka ndiso kuechi ma.
46 Jin ndakoo ni,
te jín koo o chi jâ ve kuyatni tee keꞌen‑suꞌva ñaꞌa ma ―kúu ya jiñaꞌa ya.
Ni ka tnii de Jesús ma
47 Yikuu‑ka Jesús ma káꞌan ya,
nuu ni kenda Judas ma,
ja kúu de in tee ni yo kuu ndi‑uxi uu tee ni ka yo ndikin ya ma.
Te ni kenda de,
te ka ndikin tnaꞌa de jiꞌin kuaꞌa ñayii ka ndiso xeen,
te ka yindaꞌa i yuchi ka kuu espada jiꞌin karroti.
Ñayii yaꞌa ka kuu ñayii ni ka tetniñu tee ka tatnuni nuu sutu ma,
jiꞌin tee ka kuu jaꞌnu ma.
48 Judas tee ni keꞌen‑suꞌva ya ma,
ni waꞌa de in seña,
te jiñaꞌa de:
―Tnaꞌa tee chitu sa yikinuu de ma,
tee yukan kúu de,
te jin tnii ni de ―kúu de jiñaꞌa de.
49 Chukan kúu ja ni jan tuꞌva de Jesús ma,
te jiñaꞌa de:
―Iyo vaꞌa ni,
teskuaꞌa ―kúu de jiñaꞌa de.
Te ni chitu de yikinuu ya ma.
50 Te Jesús ma,
jiñaꞌa ya:
―Ndijin,
¿na tniñu ni kijaa ni yaꞌa?
―kúu ya jiñaꞌa ya.
Sani te ni ka taniꞌni ñayii ma,
te ni ka tnii i ya,
te kuan koo i jiꞌin ya.
51 Kovaa in tee ndikin ya ma,
ni tava de yuchi kúu espada ma,
te ni jan kaꞌnde de in soꞌo tee jinukuechi nuu tee tátnuni nuu sutu ma.
52 Sani te Jesús ma,
jiñaꞌa ya:
―Ndachunee vaꞌa ni yuchi kúu espada ni a nuu ñunee i ma,
vaa ñayii yindaꞌa yuchi kúu espada ma chi suni jin kaꞌni ñaꞌa i jiꞌin yuchi kúu espada.
53 ¿Xi ka jani ini ni ja masu kuu kakan‑taꞌvi sa nuu Yuva sa ma,
te tetniñu ya kuaꞌa xeen ángel?
54 ¿Kovaa naxe ko kuu sukan káꞌan tnuꞌu Suꞌsi ma?
Te vitna ja jiniñuꞌu ja ko kuu sukan káꞌan ma ―kúu ya jiñaꞌa ya.
55 Te ora yukan,
Jesús ma,
ni jikan‑tnuꞌu ya ñayii ma:
―¿Navaꞌa ve koo ndijin jiꞌin yuchi kúu espada a jiꞌin karroti ja jin tnii ñaꞌa ni,
kuenda tnuꞌu ja kúu in kuiꞌna kúu sa?
Ndaka kivi ni yo nukoo sa ini veñuꞌu kaꞌnu ma,
ni yo kaxtnuꞌu sa tnuꞌu vii tnuꞌu vaꞌa ma,
¿te navaꞌa ñatuu ni ka tnii ñaꞌa ni?
56 Kovaa ndaka chaꞌa chi saꞌa kúu sukan‑vaꞌa ko kuu sukan káꞌan tutu ndee tnuꞌu ni ka yo ndakaxtnuꞌu tee ni ka yo ndakaxtnuꞌu tnuꞌu ni yo waꞌa Suꞌsi ma ―kúu ya jiñaꞌa ya.
Sani te ndaka tee ka ndikin ya ma,
ni ka jinu de,
te ni ka xndoo de maa in‑nka Jesús ma.
Ni jan koo de jiꞌin Jesús ma nuu tee ka jaꞌnde tniñu ñayii ñuu judío ma
57 Ni jan koo de jiꞌin Jesús ma nuu tee tátnuni nuu sutu ma tee nani Caifás ma,
te ni ka ndututu tee ka skuaꞌa tnuꞌu ni kaxtnuꞌu Moisés ma,
jiꞌin tee ka kuu jaꞌnu ma.
58 Pedro ma,
ndikin jika de ya onde nukeꞌe veꞌe tee tátnuni nuu sutu ma,
te ni kivi de,
te ni jinkoo de nuu ka iyo tee ka jito veñuꞌu kaꞌnu ma,
sukan‑vaꞌa kuni de ndaka sukan jin saꞌa de Jesús ma.
59 Te tee ka tatnuni nuu sutu ma,
jiꞌin tee ka kuu jaꞌnu ma,
jiꞌin ndaka tee ka jaꞌnde tniñu ñayii ñuu judío ma,
ni ka nduku de in ja kuu jin skuiso kuechi de Jesús ma te jin kaꞌni de ya.
60 Visi kuaꞌa de ma ka kaꞌan tnuꞌu ja ni yo saꞌa ya ma,
kovaa ñatuu ni ka ndaniꞌi de in ja kuu jin xtekuechi de ya.
Kovaa nuu ve jinu‑nka ma,
te ni ka ndokuiñi uu tee inutnuꞌu,
61 te ka jiñaꞌa de:
―Tee yaꞌa chi ni kaꞌan de:
“Saña chi kuu ndakana sa veñuꞌu kaꞌnu nuu ka ndachiñuꞌu o Suꞌsi ma,
te nuu uni kii ma,
te ndasaꞌa sa i”,
ni kaꞌan de ―ka kuu de ka jiñaꞌa de.
62 Sani te maa tee tátnuni nuu sutu ma,
ni ndokuiñi de,
te jiñaꞌa de ya:
―¿Ñatuu nawa ndákoneꞌe ni?
¿Nawa kúu ja ka kaꞌan ñayii a ja kuu ni a?
―kúu de jiñaꞌa de.
63 Kovaa Jesús ma chi ni jasiyuꞌu ya.
Te maa tee tátnuni nuu sutu ma,
jiñaꞌa de ya:
―Ja maa Suꞌsi iya téku ma,
tátnuni sa nuu ni ja kaꞌan ni nuu sa nú ndijin kúu Cristo Saꞌya Suꞌsi ma ―kúu de jiñaꞌa de.
64 Te Jesús ma,
jiñaꞌa ya:
―Maa ni káꞌan,
te sukan iyo.
Kovaa káꞌan tna sa nuu ndijin ja onde vitna,
te jin kuni ni ja saña ja kúu sa iya vee ñayivi ñuu ñayivi a,
kunukoo sa xiñi kuaꞌa Suꞌsi iya kúu saꞌa ndaka ma,
te jin kuni tna ni ja kenda kivi ja ndenda sa onde nuu viko ka iyo andivi ma ―kúu ya jiñaꞌa ya.
65 Sani te tee tátnuni nuu sutu ma,
ni kachi de saꞌma de ma,
ja káxtnuꞌu de ja ni ndakiti xeen ini de,
te jiñaꞌa de:
―¡Tnuꞌu masu játna ini Suꞌsi ma ni kaꞌan de!
¿Nawa kúu ja jin nduku‑ka o ñayii jin ndakaꞌan nawa ni yo saꞌa de a?
Jâ ni ka jinisoꞌo ndaka ni ja jâ ni kaꞌan de tnuꞌu ja masu játna ini Suꞌsi ma.
66 ¿Naxe ka kaꞌan ni?
―kúu de jiñaꞌa de nuu ndaka‑ka tee ka iyo ma.
Te ni ka ndakoneꞌe tee ma,
te ka jiñaꞌa de:
―Iyo de ja kuiti kûu de ―ka kuu de ka jiñaꞌa de.
67 Sani te ka tusii de ya,
te ka kani de ya,
te ka waꞌa de tikatu yikinuu ya ma,
68 te ka jiñaꞌa de ya:
―Ndijin ja kúu ni Cristo ma,
¡kaꞌan ni na in ni kani ñaꞌa!
―ka kuu de ka jiñaꞌa de.
Ni kaꞌan Pedro ma ja masu jini de Jesús ma
69 Te Pedro ma,
iyo de ichi keꞌe ma,
nukeꞌe tee tátnuni nuu sutu ma.
Te ni jan tuꞌva ñaꞌa in ñaꞌa jinukuechi nuu tee tátnuni nuu sutu ma,
te jiñaꞌa ña:
―Ndijin tna chi ni yo ndikin ni Jesús tee ñuu Galilea ma ―kúu ña jiñaꞌa ña.
70 Kovaa Pedro ma chi nuu ka iyo ndaka ñayii ma,
te jiñaꞌa de:
―Masu jini sa nawa kúu ja káꞌan ni a ―kúu de jiñaꞌa de.
71 Te ni kee de yeꞌe keꞌe ma.
Sani te in‑ka ñaꞌa jinukuechi nuu tee tátnuni nuu sutu ma,
ni jini tna ña Pedro ma,
te jiñaꞌa ña ndaka‑ka ñayii ka iyo ma:
―Tee yaꞌa chi ni yo ndikin de Jesús tee ñuu Nazaret ma ―kúu ña jiñaꞌa ña.
72 Kovaa Pedro ma chi in‑ka jichi ni jiñaꞌa de:
―Chunaa maa sa,
nú masu ndija ja káꞌan sa ja masu jini sa tee yukan ―kúu de jiñaꞌa de.
73 Te ni kukuee‑ka ma,
te ñayii ka iyo yukan ma,
ka jiñaꞌa tuku i Pedro ma:
―Ja ndaa ndija ja ndijin kúu in tnaꞌa tee ni ka yo ndikin Jesús ma,
vaa sukan ka kaꞌan de ma,
sukan káꞌan tna ni ―ka kuu i ka jiñaꞌa i.
74 Sani te Pedro ma,
ni kejaꞌa de jiñaꞌa de:
―Chunaa maa sa,
nú masu ndija ja káꞌan sa ja masu jini sa tee yukan ―kúu de jiñaꞌa de.
Te ora yukan‑ni,
te ni kana in liꞌli ma.
75 Te ni ndakaꞌán Pedro ma ja saꞌa ni jiñaꞌa Jesús ma:
“Ni ñatuu kana‑ka liꞌli ma,
te jâ ni kuu uni jichi ja kaꞌan ni ja ñatuu jini ñaꞌa ni.”
Te ni ndee de yukan,
te ni ndaꞌyu ndaꞌvi,
ni ndaꞌyu kee de,
ja ni ndakani ini de.