Ni ka ndaxsiaꞌa i Jesús ma nuu ndaꞌa Pilato ma
27
Nuu jâ ve ndii in‑ka kii ma,
te ni ka ndututu tee ka tatnuni nuu sutu ma,
jiꞌin tee ka kuu jaꞌnu ma,
te ni ka ndatnuꞌu tnaꞌa de naxe jin xtekuechi de Jesús ma te jin kaꞌni de ya.
2 Te ni ka juꞌni de Jesús ma,
te kuan koo de jiꞌin ya,
te ni ka ndaxsiaꞌa de ya nuu ndaꞌa tee kúu Pilato ma,
ja kúu de gobiernu ñuu yukan ma.
Sukan ni jiꞌi tee kúu Judas ma
3 Sani te nuu ni jini Judas tee ni keꞌen‑suꞌva Jesús ma ja jin kaꞌni de Jesús ma,
te ni ndakani ini de,
te kuan nu ndakoneꞌe de oko uxi xuꞌun plata ma nuu tee ka tatnuni nuu sutu ma,
jiꞌin nuu tee ka kuu jaꞌnu ma.
4 Te jiñaꞌa de:
―Ni jiso kuechi sa ja ni keꞌen‑suꞌva sa in tee ñatuu na kuechi de ―kúu de jiñaꞌa de.
Kovaa tee yukan,
ka jiñaꞌa de:
―¿Na jin ko ndi ini saña?
¿Naxe saꞌa maa ni?
―ka kuu de ka jiñaꞌa de.
5 Te Judas ma,
ni ndaskana ndee de xuꞌun ma ini veñuꞌu kaꞌnu ma,
te ni kee de,
te kuaꞌan de,
te ni jan skueꞌne de maa de,
te yukan‑ni ni jiꞌi de.
6 Te tee ka tatnuni nuu sutu ma,
ni ka ndakeꞌen de xuꞌun ma,
te ka kaꞌan de:
―Xuꞌun yaꞌa chi masu vaꞌa‑ni ja jin ndachunee o i nuu ñuꞌu xuꞌun ka ndakuaꞌa ñayii ma nuu Suꞌsi ma,
vaa chaꞌa kúu ja ni ka chuyaꞌvi o ja kûu in ñayii ma ―ka kuu de ka kaꞌan de.
7 Te ni jinu ni ka ndatnuꞌu tnaꞌa de ma,
te ni ka jani ini de ja jin ndakuaan de ñuꞌú tee saꞌa kisi tee saꞌa koꞌo ma,
sukan‑vaꞌa yukan koo jin chuꞌu i ñayii masu ñayii ñuu yukan ka kuu i ma.
8 Chukan kúu ja ñuꞌú yukan chi onde vitna ka xnani i ñuꞌú ma Ñuꞌú Niñi.
9 Te sukan,
te ni kuu sukan ni kaꞌan Jeremías tee ni yo ndakaxtnuꞌu tnuꞌu ni yo waꞌa Suꞌsi ma,
kivi ni kaꞌan de ma:
“Ni ka ndakeꞌen de oko uxi xuꞌun plata ni ka jani ini ñayii ñuu Israel ma ja kondee yaꞌvi ja kûu ya ma.
10 Te jiꞌin xuꞌun yukan ni ka ndakuaan de ñuꞌú tee saꞌa kisi ma.
Saꞌa jin saꞌa ñayii ñuu Israel ma,
ni kaꞌan Iya Tátnuni ma nuu sa a”,
saꞌa ni kaꞌan tee kúu Jeremías ma.
Pilato ma, ni xndichi de Jesús ma
11 Te Jesús ma,
ni ka sunkani de ya nuu tee kúu gobiernu ma,
te ni jikan‑tnuꞌu de ya:
―¿Ndijin kúu rey tátnuni nuu ñayii judío a?
―kúu de jiñaꞌa de.
Te Jesús ma,
ni ndakoneꞌe ya:
―Maa ni káꞌan ―kúu ya jiñaꞌa ya.
12 Ndaka tee ka tatnuni nuu sutu ma,
jiꞌin tee ka kuu jaꞌnu ma,
kuaꞌa xeen ja ka xtekuechi de ya,
kovaa masu nawa ni ndakoneꞌe ya.
13 Sani te Pilato ma,
ni jikan‑tnuꞌu de ya in‑ka jichi:
―¿Ñatuu jinisoꞌo ni ja kuaꞌa xeen ja ka xtekuechi ñaꞌa i a?
―kúu de jiñaꞌa de.
14 Kovaa ni‑in tnuꞌu ñatuu ni ndakoneꞌe ya.
Chukan kúu ja tee kúu gobiernu ma,
ni saꞌvi xeen‑nka ini de.
Ni ka kundee maa ñayii ma, te ni tatnuni Pilato ma ja jin kaꞌni i Jesús ma
15 Neꞌun Viko Pascua ma,
te ndi‑kuiya ndi‑kuiya ma Pilato ma chi ni yo kachi de ja keneꞌe de in ñayii vekaa ma,
ndevaꞌa‑ni na in ka kaꞌan maa ñayii judío ma.
16 Te in tee nani Barrabás ma,
yinee de vekaa ma,
te ni ka yo jini ndaka ñayii ma ndaka ja uꞌvi ni yo saꞌa de ma.
17 Te ni ka ndututu ñayii ma,
te jiñaꞌa Pilato ma:
―¿Na in ka kuni ni ja xsiaa sa a vitna a?
¿Tee kúu Barrabás ma,
xi tee kúu Jesús ma ja ka kaꞌan i ja Cristo iya ni tetniñu Suꞌsi ma kúu de ma?
―kúu de jiñaꞌa de,
18 chi vaa ni jinitnuni Pilato ma ja tee ka tatnuni nuu sutu ma chi ni ka ndaxsiaꞌa de Jesús ma nuu de ma kuechi ja ka kukueñu ini de sukan vivii káxtnuꞌu ya ma.
19 Te nani núkoo de nuu jaꞌnde de tniñu ma,
te ñasiꞌi de ma,
ni tetniñu ña in ñayii ni jan kuñaꞌa i de:
“Masu nawa ko saꞌa ro tee jiña,
vaa masu na kuechi ndiso de,
vaa ja ni kuu jakuaa a chi ni skoto ñaꞌa Suꞌsi ma ja kuu tee jiña”,
kúu ña jiñaꞌa ña.
20 Kovaa tee ka tatnuni nuu sutu ma,
jiꞌin tee ka kuu jaꞌnu ma chi ni ka jiñaꞌa de ñayii ma ja jín kayuꞌu i jín kakan i ja xsiaa Pilato ma Barrabás ma te kaꞌni de Jesús ma.
21 Te jiñaꞌa Pilato ma nuu ñayii ka kayuꞌu ma:
―¿Ja nduu de a,
na nde de ka kuni ni ja xsiaa sa?
―kúu de jiñaꞌa de.
Te ka jiñaꞌa ñayii ma:
―Tee kúu Barrabás ma ―ka kuu i ka jiñaꞌa i.
22 Te jiñaꞌa tee kúu Pilato ma:
―¿Kovaa nawa ka kuni ni ja saꞌa sa jiꞌin tee kúu Jesús ma,
ja ka kaꞌan i ja Cristo iya ni tetniñu Suꞌsi ma kúu de ma?
―kúu de jiñaꞌa de.
Te ka jiñaꞌa ndaka ñayii ma:
―¡Kata kaa ni de nuu krusi ma!
―ka kuu i ka kayuꞌu i nuu Pilato ma.
23 Te jiñaꞌa Pilato ma:
―¿Navaꞌa?
¿Na kuechi de?
¿Na nde a uꞌvi ni saꞌa de?
―kúu de jiñaꞌa de.
Kovaa ñayii yukan chi ndaka i ni ka kayuꞌu niniꞌi‑ka,
ka jiñaꞌa i de:
―¡Kata kaa ni de nuu krusi ma!
―ka kuu i ka jiñaꞌa i.
24 Jâ ni jini Pilato ma ja ma kundee de ma,
vaa ñayii ma,
suꞌva ni ka ndakiti‑ka ini i.
Te chukan kúu ja ni jikan de ndute ma,
te ni ndandaꞌa de nuu ndaka ñayii ñuu ma,
te jiñaꞌa de:
―Ñatuu na kuechi kuiti kondiso saña ja jin kaꞌni ni tee ndaꞌvi yaꞌa.
Kuechi maa ni jin ko kuu ―kúu de jiñaꞌa de.
25 Te ni ka ndakoneꞌe ndaka ñayii ñuu ma,
te ka jiñaꞌa i:
―Má ko ndi ini ni,
niñi tee jiña jín kuiso ndaka maa sa jiꞌin saꞌya tata sa a ―ka kuu de ka jiñaꞌa de.
26 Te Pilato ma chi ni xsiaa de Barrabás ma kuaꞌan maa de.
Te ni jinu,
te Jesús ma,
ni ndaxsiaꞌa de ya nuu ndaꞌa soldado ma,
sukan‑vaꞌa jín kani de ya te jín kata kaa de ya nuu krusi ma,
sukan ka jiñaꞌa maa ñayii ma.
27 Sani te tee ka kuu soldado ma,
ni jan koo de jiꞌin Jesús ma nukeꞌe palaciu ma,
te ni ka ndututu ndaka‑ka soldado ma.
28 Te ni ka xtandiyo de saꞌma neꞌnu ya ma,
te ni ka skondii de ya in saꞌma kuaꞌa tnuu.
29 Te ni ka saꞌa de in corona iñu,
te ni ka sonee de xini ya ma,
te ni ka chiꞌi de ndaꞌa ya in tnu yoo.
Te ka jinkuiñi jiti de nuu ya kuenda tnuꞌu ja ka iyo xeen respetu de nuu ya,
te ni ka kasiki ndee de ya,
te ka kaꞌan de:
―¡Suchi yaꞌa kúu rey tátnuni nuu ñayii judío ma,
vee!
―ka kuu de ka jiñaꞌa de.
30 Te ka tusii de ya,
te ni ka ndakeꞌen de tnu yoo ni ka chiꞌi de ndaꞌa ya ma,
te ni ka kuun de tnu xini ya ma.
31 Te nuu ni jinu ni ka kasiki ndee de ya ma,
te ni ka xtandiyo de saꞌma kuaꞌa tnuu ni ka skondii de ya ma,
te ni ka ndaskoneꞌnu de ya saꞌma maa ya ma,
te ni ka keneꞌe de ya,
ja jin koo de jin kata kaa de ya nuu krusi ma.
Ni ka skuita kaa de Jesús ma nuu krusi ma
32 Te ichi kuan koo de jiꞌin ya ma,
ni ka ndaniꞌi de in tee ñuu Cirene ma te Simón nani de.
Te ni ka xtetuu de tee ma ja na kuiso de krusi Jesús ma.
33 Ni jan koo de jiꞌin Jesús ma in nuu nani i Gólgota ja kúni kaꞌan “Yiki Xini Ndiyi”.
34 Te ni ka waꞌa de ya vala ndute uva ja ni jiya,
te ni ka sakanuu de jiꞌin ndute kava kiti,
sukan‑vaꞌa ndajijin yikikuñu ya ma.
Te Jesús ma,
yika ja ni jitotnuni ya‑ni,
te ñatuu ni kuni ya ja koꞌo ya.
35 Sani te tee ka kuu soldado ma,
ni ka jata kaa de ya nuu krusi ma.
Te ni ka kejaꞌa de ka chuꞌun de suerte saꞌma Jesús ma,
sukan‑vaꞌa nde saꞌma ya ma jin ndaniꞌi ndi‑in ndi‑in de ma.
36 Te ni ka jinkoo de,
sukan‑vaꞌa jin ko koto de ya.
37 Te ichi xini ya ma ni ka tenee de in tabla ja káꞌan:
“Tee yaꞌa kúu Jesús tee kúu rey tátnuni nuu ñayii judío a”,
vaa kuechi ja chukan kúu ja ni ka jata kaa de ya ma.
38 Sani te ni ka jata kaa de uu kuiꞌna in in nuu krusi ma,
in de xiñi kuaꞌa ya ma te in de xiñi satni ya ma.
39 Te ñayii ka yaꞌa ma,
ka kaꞌan ndevaꞌa i nuu ya,
ka skuiko xini i,
40 te ka jiñaꞌa i:
―Ndijin ja káꞌan ni ja ndakana ni veñuꞌu kaꞌnu ma te nuu uni kii ma te ndajinu ndasaꞌa ni ma,
nú ndija ni ja Saꞌya Suꞌsi ma kúu ni,
te saꞌa maa ni ja kaku ni,
te ki nuu ni nuu krusi a ―ka kuu i ka jiñaꞌa i.
41 Te tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
jiꞌin tee ka kuu jaꞌnu ma,
ka kasiki ndee de ya,
te ka kaꞌan de:
42 ―Siin‑ka ñayii,
ni saꞌa de ja ni ka kaku i nuu tnundoꞌo ma,
te maa de a,
ñatuu kúu naxe saꞌa de ja kaku de nuu tnundoꞌo tnuneni a.
Te nú tee kúu rey tátnuni nuu ñayii ñuu Israel ya kúu de,
te kí nuu de nuu krusi a,
sukan‑vaꞌa jín kandija o ja káꞌan de a.
43 Nú kúkanu ini de Suꞌsi ma,
te jín ko koto o nuna kii ya ki koto ya de.
Vaa ni kaꞌan de ja Saꞌya Suꞌsi ma kúu de ―ka kuu de ka kaꞌan de.
44 Te onde kuiꞌna ka ndakaa nuu krusi ma xiñi ya ma,
suni ka kaꞌan ndevaꞌa de nuu ya.
Sukan ni jiꞌi Jesús ma
45 Te nuu ve kusava nduu ma,
te ni‑kaꞌnu ñuu ñayivi ma ni kunee,
onde nuu ni kuu ka uni jañini ma.
46 Te maa ora yukan kúu ora ni kayuꞌu niniꞌi Jesús ma ni kaꞌan ya:
―Eloi,
Eloi,
¿lama sabactani?
Te tnuꞌu yaꞌa kúni kaꞌan,
“Suꞌsi maa sa,
Suꞌsi maa sa,
¿navaꞌa ni xndoo ñaꞌa ni?”
47 Te sava ñayii ka iyo yukan,
ni ka jinisoꞌo i ja ni kaꞌan Jesús ma,
te ka kaꞌan i ja Elías ma kána ya.
48 Sani te in tee yukan,
jinu de ni jan nduku de vala kachi,
te ni chunee de nuu vinagre ma.
Te ni chitnii de in nuu tnu yoo,
te ni tenee de yuꞌu Jesús ma,
xi ma koꞌo ya.
49 Kovaa ndaka‑ka ñayii ma,
ka kaꞌan i:
―Ni kuu na.
Máko jin xtnaꞌa‑ka o de,
te jín ko koto o nú kii Elías ma te saꞌa de ja kaku tee yaꞌa ―ka kuu i ka kaꞌan i.
50 Kovaa Jesús ma chi in‑ka jichi ni kayuꞌu niniꞌi ya.
Sani te ni jiꞌi ya.
51 Sani te saꞌma ndakaa nuu ii ini veñuꞌu kaꞌnu ma chi ni ndata sasava i,
ni kejaꞌa onde sukun ma,
te ni kenda i onde jaꞌa saꞌma ma.
Te ni jakondee tnaa,
te ni ka taꞌvi toto ma.
52 Te ni ka ndanune ndaka yavi ndiyi ma,
te kuaꞌa ñayii ni ka yo saꞌa ja vaꞌa ma te jâ ni ka jiꞌi i ma,
ni ka ndateku i ora yukan.
53 Te ni ka nde koo ñayii ni ka ndateku ma nuu yavi ni ka yinee i ma,
kovaa ni ka yo ndetu i onde nuu ni ndateku maa Jesús ma,
te saa ni kuu ni ka ndivi koo i ini ñuu ii ma,
te ni ka ndakuni tnaꞌa ñayii ka teku ma jiꞌin ñayii ni ka ndateku ma.
54 Te tee tátnuni nuu ciento soldado ma,
jiꞌin ndaka‑ka tee ka iyo jiꞌin de ja ka jito de Jesús ma ndákaa ya nuu krusi ma,
ni ka jini de ja ni tnaa xeen ma,
jiꞌin ndaka‑ka ja ni kuu ma,
te ni ka yuꞌu xen‑xeen de,
te ni ka kejaꞌa de ka kaꞌan de:
―Ja ndaa ndija kúu ja iya yaꞌa chi Saꞌya Suꞌsi ma kúu ya ―ka kuu de ka kaꞌan de.
55 Suni ka iyo kuaꞌa ñaꞌa ka ndeꞌya jika ma.
Ñaꞌa yaꞌa chi ni ka yo ndikin ña Jesús ma,
te ni ka yo jinukuechi ña nuu ya nuu vee ya onde ñuu Galilea ma.
56 Neꞌun ndaka ñaꞌa ma iyo María Magdalena ma,
jiꞌin María siꞌi Santiago ma jiꞌin José ma,
jiꞌin siꞌi saꞌya tee kúu Zebedeo ma.
Sukan ni ka chuꞌu i Jesús ma
57 Nuu ve kunee ma,
te ni kenda in tee xiku iyo ñuu Arimatea ma,
nani de José,
te suni ni yo ndikin de Jesús ma.
58 Te ni jaꞌan de nuu Pilato ma,
te ni ndakan de ñundeꞌyu Jesús ma.
Sani te Pilato ma chi ni waꞌa de tnuꞌu ja nuneꞌe de ñundeꞌyu Jesús ma.
59 Sani te ni nuneꞌe José ma ñundeꞌyu Jesús ma,
te ni keꞌen de in saꞌma vaꞌa xeen nani i lino,
te ni chutuu de ya saꞌma ma.
60 Te ni jan chinee de ya in yavi jaa ndenee yika toto ma,
ja jâ ni jate maa de ma,
te ni jasi de jiꞌin in yuu kaꞌnu kaꞌnu,
te kuaꞌan de.
61 Te María Magdalena ma,
jiꞌin in‑ka ñaꞌa nani María ma,
ka nukoo ña ichi jiyo nuu iyo yavi yinee ñundeꞌyu ya ma,
te ni ka jini ña.
Sukan ni ka yo jito vaꞌa soldado ma nuu ni ka chuꞌu de Jesús ma
62 Te in‑ka kii ma,
kivi ni tatnuni Suꞌsi ma ja ma jin satniñu ñayii ma kúu,
te ni ka ndututu tee ka tatnuni nuu sutu ma,
jiꞌin tee ka kuu fariseo ma nuu iyo Pilato ma.
63 Te ka jiñaꞌa de:
―Señor,
ni ka ndakaꞌán sa ja tee xndaꞌvi ñayii ma,
ni kaꞌan de kii nuu téku‑ka de ma ja nuu uni kii ma,
te ndateku de ma.
64 Chukan kúu ja ka kuni sa ja tetniñu ni soldado a ja jin ko koto vaꞌa de nuu yinee Jesús ma uni kii.
Chi vaa nasa ki koo tee ni ka yo ndikin de ma ora kunee ma,
te jin ndeneꞌe de ñundeꞌyu tee ma,
te jin kaꞌan de nuu ñayii ka iyo ini ñuu ma ja ni ndateku de te masu ni kendoo de nuu ka iyo ñayii ni ka jiꞌi ma.
Nú ñaꞌa,
te chaꞌa ko kuu in ja jin kandija xeen ñayii ma,
te kaꞌvi‑ka ko kuu sana ja ni kaꞌan de ja Saꞌya Suꞌsi ma kúu de ―ka kuu de ka jiñaꞌa de.
65 Te jiñaꞌa Pilato ma:
―Jiña ka iyo soldado a,
te kuán koo ni jiꞌin de.
Te jin kuñaꞌa maa ni de ja jin ko koto vaꞌa de,
sukan ka kuni ni a ―kúu de jiñaꞌa de.
66 Te tee ka tatnuni nuu sutu ma,
kuan koo de jiꞌin soldado ma,
te ni ka satuꞌva vavaꞌa de sukan jin ko koto soldado ma yavi nuu yinee Jesús ma.
Te ni ka tenee de in sellu yika yuu ma,
te ni ka xndoo de soldado ma ja jin ko koto de ma.