19
Pilato ma,
ni tnii de Jesús ma,
te ni tatnuni de ja jin kani i ya.
2 Te tee ka kuu soldado ma,
ni ka saꞌa de in corona iñu,
te ni ka sonee de xini Jesús ma,
te ni ka skondii de ya in saꞌma kuaꞌa tnuu.
Jesús condenado a muerte (Juan 19.1-16)
3 Sani te ni ka jan tuꞌva de ya,
te ka jiñaꞌa de:
―¡Ja vaꞌa kúu rey tátnuni nuu ñayii judío ma!
―ka kuu de ka jiñaꞌa de.
Te ka waꞌa de tikatu yikinuu ya ma.
4 Pilato ma,
ni kee de in‑ka jichi,
te jiñaꞌa de:
―¡Jin kondeꞌya ni!
Ni keneꞌe sa de,
sukan‑vaꞌa jin kuni ni ja masu ni ndaniꞌi sa ni‑in kuechi de ―kúu de jiñaꞌa de.
5 Ni kee Jesús ma.
Yoxtnee in corona iñu xini ya,
te ndii ya in saꞌma kuaꞌa tnuu.
Pilato ma,
jiñaꞌa de nuu ñayii ma:
―¡Yaꞌa iyo tee yaꞌa!
―kúu de jiñaꞌa de.
6 Nuu ni ka jini tee ka tatnuni nuu sutu ma,
jiꞌin tee ka jito veñuꞌu ma,
ni ka kejaꞌa de ka kayuꞌu de ka jiñaꞌa de:
―¡Kata kaa ni de nuu krusi ma!
―ka kuu de ka jiñaꞌa de.
Pilato ma,
jiñaꞌa de:
―Kuán koo ni jiꞌin de,
te jin kata kaa maa ni de nuu krusi ma,
vaa saña,
masu ni ndaniꞌi sa ni‑in kuechi de ―kúu de jiñaꞌa de.
7 Te tee judío ma,
ni ka ndakoneꞌe de:
―Saña,
ka nevaꞌa sa in ley,
te ja sukan káꞌan ley sa ma,
tee yaꞌa chi iyo de ja kûu de,
vaa saꞌa de tnuꞌu ja Saꞌya Suꞌsi ma kúu de ―ka kuu de ka jiñaꞌa de.
8 Ja ni jinisoꞌo Pilato ma sukan,
ni yuꞌu xeen‑ka de.
9 Ni ndivi tuku de in‑ka jichi palaciu de ma,
te ni ndakan‑tnuꞌu tuku de Jesús ma:
―¿Ndenu kúu ñuu ni?
―kúu de jiñaꞌa de.
Kovaa Jesús ma,
ñatuu ni ndakoneꞌe kuiti ya.
10 Pilato ma,
jiñaꞌa de:
―¿Te ma ndakoneꞌe ni?
¿Ñatuu jini ni ja iyo sa ja tatnuni sa te jin kata kaa ñaꞌa i nuu krusi ma,
te iyo sa ja kuu ndaxsiaa ñaꞌa sa?
―kúu de jiñaꞌa de.
11 Sani te Jesús ma,
ni ndakoneꞌe ya:
―Masu kuu tatnuni ni siki saña,
nú ma taa Suꞌsi ma tnuꞌu.
Chukan kúu ja tee ni ki ndi xsiaꞌa ñaꞌa nuu ndaꞌa ni a,
ndiso kuechi xeen‑ka de sana ndijin ―kúu ya jiñaꞌa ya.
12 Onde ora yukan,
Pilato ma,
ndúku de naxe ndaxsiaa de Jesús ma.
Kovaa ñayii judío ma,
ka kayuꞌu i ka jiñaꞌa i:
―Nuna ndaxsiaa ni de,
masu tee ka ketnaꞌa ini jiꞌin tee kúu César tee tátnuni ñuu Roma ma kúu ni.
Vaa jini maa ni ja ndevaꞌa‑ni na in saꞌa tnuꞌu ja rey kúu i,
masu kétnaꞌa ini i jiꞌin César tee tátnuni ma ―ka kayuꞌu i ka jiñaꞌa i.
13 Pilato ma,
ja ni jinisoꞌo de sukan,
ni tatnuni de ja jin keneꞌe i Jesús ma,
te ni jinkoo de nuu jaꞌnde de tniñu ma,
nuu ka xnani i saꞌan hebreo ma Gabata,
ja kúni kaꞌan “nuu vivii ni ka sama de ichi ma jiꞌin yuu”.
14 Te kivi yukan chi in kivi xiꞌna‑ka sana ko kuu Viko Pascua ma kúu,
te visi sava nduu ma kúu,
te jiñaꞌa Pilato ma nuu ñayii judío ma:
―¡Yaꞌa iyo rey ni a!
―kúu de jiñaꞌa de.
15 Kovaa maa ñayii ma,
ka kayuꞌu i:
―¡Kúu de!
¡Kúu de!
¡Kata kaa ni de nuu krusi ma!
―ka kuu i ka kayuꞌu i.
Pilato ma,
ni jikan‑tnuꞌu de:
―¿Te kata kaa sa rey ni a nuu krusi ma ka kuni ni?
―kúu de jiñaꞌa de.
Te tee ka tatnuni nuu sutu ma,
ni ka ndakoneꞌe de:
―¡Saña,
masu na in‑ka rey ka nevaꞌa sa,
nú masu ja César tee tátnuni ñuu Roma ma!
―ka kuu de ka jiñaꞌa de.
16 Sani te Pilato ma,
ni xndoo de Jesús ma nuu ndaꞌa maa ñayii judío ma,
sukan‑vaꞌa jin kata kaa maa i ya nuu krusi ma,
te kuan koo maa i jiꞌin ya.
La crucifixión (Juan 19.17-37)
Ni ka skuita kaa de Jesús ma nuu krusi ma
17 Ni kee Jesús ma ndiso ya in krusi,
te kuaꞌan ya ichi nuu nani Gólgota saꞌan hebreo ma,
ja kúni kaꞌan “Tinduu Yiki Xini Ndiyi”.
18 Te yukan ni ka skuita kaa de ya nuu krusi ma jiꞌin uu‑ka tee,
in de ma xiñi kuaꞌa ya ma te in‑ka de ma xiñi satni ya ma.
19 Pilato ma,
ni tatnuni de ja jin tenee i xini krusi nuu ndakaa Jesús ma in ja kondee tnuꞌu káꞌan:
“Jesús tee ñuu Nazaret ma,
rey ñayii judío a”.
20 Te kuaꞌa ñayii judío ma,
ni ka kaꞌvi i tnuꞌu ndenee xini krusi ma,
vaa nuu ni ka skuita kaa i Jesús ma nuu krusi ma chi iyo yatni ñuu ma,
te tnuꞌu ndenee xini krusi ma ndee saꞌan hebreo,
jiꞌin saꞌan latín,
jiꞌin saꞌan griego.
21 Te tee ka tatnuni nuu sutu ma,
ka jiñaꞌa de nuu Pilato ma:
―Máko tee ni:
“Rey ñayii judío a”,
suꞌva tee ni:
“Tee saꞌa tnuꞌu ja rey ñayii judío a kúu de” ―ka kuu de ka jiñaꞌa de.
22 Kovaa Pilato ma,
ni ndakoneꞌe de:
―Ja ni tee sa a,
ñatuu na in ko ndaxsama ―kúu de jiñaꞌa de.
23 Sani te tee ka kuu soldado ma,
nuu ni jinu ni ka skuita kaa de Jesús ma nuu krusi ma,
te ni ka ndaxtutu de saꞌma ya ma,
te ndi‑kuun soldado ma ni ka ndakeꞌen jaku jaku.
Te ni ka jito de saꞌma ndii ya ma,
ja masu nde ni kiku chi in‑ni ni kenii saꞌma ma.
24 Te soldado ma,
ka kaꞌan ndi‑in ndi‑in de:
―Má jin kachi o,
suꞌva jín chuꞌun o suerte,
te jín koto o nde o ndaniꞌi i ―ka kuu de ka kaꞌan de.
Sukan,
te ni kuu sukan ndee tnuꞌu Suꞌsi ma:
“Ni ka ndakaꞌnde i saꞌma sa a,
te ni ka chuꞌun i suerte siki saꞌma ndii sa a,
kóto na nde i ndakeꞌen.”
Te sukan ndija ni ka saꞌa tee ka kuu soldado ma.
25 Yatni nuu iyo krusi nuu ndakaa Jesús ma iyo siꞌi ya ma,
jiꞌin kuꞌu ña ma,
jiꞌin María ñasiꞌi Cleofas ma,
jiꞌin María Magdalena ma.
26 Nuu ni jini Jesús ma siꞌi ya ma te yatni nuu iyo ña ma iyo tee ni yo ndikin ya ma tee ni yo kutoo ya ma,
te jiñaꞌa ya siꞌi ya ma:
―Ndijin,
jiña iyo saꞌya ni a ―kúu ya jiñaꞌa ya.
27 Sani te jiñaꞌa ya tee ni yo ndikin ya ma:
―Ndijin,
jiña iyo siꞌi ni a ―kúu ya jiñaꞌa ya.
Sani te tee ni yo ndikin ya ma,
ni nducargu de ña onde kivi yukan ja ko koto de ña.
Sukan ni jiꞌi Jesús ma
28 Ja ni jinu sukan ma,
vaa Jesús ma chi jâ jini ya ja ni ndiꞌi ndaka ja iyo ja ndoꞌo neni ya ma,
te jiñaꞌa ya:
―Yíchi sa.
Sukan jiñaꞌa ya,
sukan‑vaꞌa na ko kuu sukan káꞌan tnuꞌu ndee nuu tutu Suꞌsi ma.
29 Te núkuiñi in tindoꞌo nuu ñuꞌu chitu ndute uva ni jiya.
Te ni ka chunee de in saꞌma vita nuu ndute uva ni jiya ma,
te ni ka juꞌni de in yutnu tnu hisopo,
te ni ka xtuꞌva de yuꞌu ya ma.
30 Te Jesús ma,
nuu ni jitotnuni ya ndute uva ni jiya ma,
te ni kaꞌan ya:
―Ndaka jâ ni kuu kuiti ―kúu ya káꞌan ya.
Sani te ni nuneꞌe ya xini ya ma,
sani te kuan noꞌo anua ya ma nuu Suꞌsi ma.
In soldado ma, ni tuu niꞌni de in lanza yika Jesús ma
31 Vaa in kivi xiꞌna‑ka sana ko kuu Viko Pascua ma kúu ma,
te ñayii judío ma,
ñatuu ka kuni i ja jin kuita kaa ñundeꞌyu ma nuu krusi ma,
vaa kivi yutnee ma kúu kivi ni tatnuni Suꞌsi ma ja ma jin satniñu ñayii ma,
te kivi yukan chi in kivi ii kúu.
Chukan kúu ja ni ka jikan i nuu Pilato ma ja tatnuni de nuu soldado ma,
ja na jin kaꞌnu de yiki jaꞌa tee ka ndakaa nuu krusi ma,
te jin xtandiyo de ñundeꞌyu tee ma.
32 Te tee ka kuu soldado ma,
ni jan koo de.
Sani te ni ka jaꞌnu de yiki jaꞌa tee ndakaa nuu krusi xinañuꞌu ma,
jiꞌin tee ndakaa nuu krusi in‑ka xiñi Jesús ma.
33 Kovaa nuu ni ka jan tuꞌva de Jesús ma,
te ni ka jini de ja jâ ni jiꞌi ya.
Chukan kúu ja ñatuu ni ka jaꞌnu de yiki jaꞌa ya ma.
34 Kovaa in soldado ma,
ni jan tuu niꞌni de in kaa nani lanza yika ya ma.
Sani te ora yukan ni kee niñi jiꞌin ndute.
35 Tee ndákani saꞌa kúu in tee ni jini,
te ndákaꞌan ndaa de,
te jini maa de ja ja ndaa káꞌan de,
sukan‑vaꞌa jin kandija tna ni.
36 Vaa sukan ni yo kuu,
sukan‑vaꞌa ko kuu sukan káꞌan tnuꞌu ndee nuu tutu Suꞌsi ma:
“Masu jin kaꞌnu i ni‑in yiki ya ma.”
37 Te in‑ka nuu ndee tnuꞌu Suꞌsi ma káꞌan:
“Jin kondeꞌya i iya ni ka kaan i yika ya ma.”
Sukan ni ka chuꞌu i Jesús ma
38 Ja ni jinu sukan ma,
José tee ñuu Arimatea ma,
ni jiñaꞌa de ja na kuaꞌa Pilato ma tnuꞌu,
sukan‑vaꞌa noꞌo de jiꞌin ñundeꞌyu Jesús ma.
José ma kúu in tee ni yo ndikin Jesús ma,
kovaa ni yo ndikin yuꞌu de ya,
vaa ni yo yuꞌu de tee judío ma.
Pilato ma,
ni waꞌa de tnuꞌu,
te José ma,
ni jan nuneꞌe de ñundeꞌyu ya ma.
La resurrección (Juan 19.38-20.18)
39 Suni Nicodemo ma,
tee ni jaꞌan in jakuaa ni ndatnuꞌu de jiꞌin Jesús ma,
yindaꞌa de kuaꞌa xeen ja jáxiko asi sakanuu jiꞌin mirra jiꞌin áloe.
40 Te José ma jiꞌin Nicodemo ma,
ni ka ndakeꞌen de ñundeꞌyu Jesús ma,
te ni ka chutuu de ya saꞌma ni ka chiꞌi de ja jáxiko asi ma,
vaa sukan ka saꞌa ñayii judío ma nú jin chuꞌu i in ndiyi ma.
41 Te nuu ni ndakaa Jesús ma iyo in huerta,
te yukan iyo in yavi jaa nuu ñatuu na in kinee‑ka.
42 Yukan ni ka chinee de ñundeꞌyu Jesús ma,
vaa yavi ma,
iyo yatni i,
te vaa sani te kejaꞌa kivi ni tatnuni Suꞌsi ma ja ma jin satniñu ñayii judío ma.