Ni ka ndaxsiaꞌa i Jesús ma nuu ndaꞌa Pilato ma
23
Ndaka i ni jan koo ni ka jan xsiaꞌa i Jesús ma
2 nuu núkoo tee kúu Pilato ma,
te ni ka kejaꞌa i ni ka xtekuechi i ya,
te ka jiñaꞌa i:
―Ni ka ndaniꞌi sa tee yaꞌa ja skaꞌan de ni‑kaꞌnu ñuu o a.
Káꞌan de ja masu jin ndachuyaꞌvi sa nuu tee tátnuni ñuu Roma ma,
te suni káꞌan de ja suu de kúu Cristo ma te suu de kúu rey ―ka kuu i ka jiñaꞌa i.
3 Te Pilato ma,
jikan‑tnuꞌu de ya:
―¿Ndijin kúu rey nuu ñayii judío a?
―kúu de jiñaꞌa de.
―Maa ni káꞌan ―kúu ya jiñaꞌa ya.
4 Sani te Pilato ma,
jiñaꞌa de nuu tee ka tatnuni nuu sutu ma jiꞌin nuu ñayii ma:
―Masu na ja uꞌvi ndániꞌi sa ja saꞌa tee yaꞌa ―kúu de jiñaꞌa de.
5 Kovaa ñayii ma,
ndendee i ka jiñaꞌa i:
―Ja káxtnuꞌu de ma,
yikuu de skaꞌan de ndaka ñayii a.
Ni kejaꞌa de ñuu Galilea ma,
te vitna yikuu de ñuu Judea a ―ka kuu i ka jiñaꞌa i.
Ni jan koo i ni ka jan xsiaꞌa i Jesús ma nuu Herodes ma
6 Ja ni jinisoꞌo Pilato ma sukan,
te jikan‑tnuꞌu de nú tee yaꞌa,
tee ñuu Galilea ma kúu de.
7 Te nuu ni ka jiñaꞌa de ja suu ya ma,
ni tetniñu de ya nuu Herodes ma,
vaa suu de kúu tee tátnuni ñuu Galilea ma.
Te suni iyo tna de kivi yukan ñuu Jerusalén ma.
8 Ja ni jini Herodes ma Jesús ma,
ni kutachi xeen de,
vaa ni kuu ini xeen de ja kuni de ya,
vaa ni jinisoꞌo de ja ka kaꞌan i ja kuu ya ma,
te ndetu de ja kuni de ja saꞌa ya in milagru.
9 Te kuaꞌa ja ni jikan‑tnuꞌu de ya,
kovaa Jesús ma,
masu ni ndakoneꞌe ya.
10 Suni ka iyo tna tee ka tatnuni nuu sutu ma,
jiꞌin tee ka skuaꞌa tnuꞌu ni kaxtnuꞌu Moisés ma,
te ka xtekuechi ka xtekuechi de ya.
11 Sani te Herodes ma jiꞌin soldado de ma,
ni ka kaꞌan ndevaꞌa de nuu ya,
te ni ka skondii de ya saꞌma vaꞌa xeen sukan ndii rey ma ja ni ka kasiki ndee de ya.
Sani te Herodes ma,
ni ndatetniñu tuku de ya nuu Pilato ma.
12 Kivi yukan ni ka ndumani Pilato ma jiꞌin Herodes ma,
vaa xiꞌna‑ka ma chi ñatuu ni ka iyo mani de.
Ni ka kundee maa ñayii ma, te ni tatnuni Pilato ma ja jin kaꞌni i Jesús ma
13 Pilato ma,
ni ndaxtutu de tee ka tatnuni nuu sutu ma,
jiꞌin tee ka netniñu ma,
jiꞌin ñayii ñuu ma,
14 te jiñaꞌa de:
―Ndijin,
ni ki koo ni ni ki xsiaꞌa ni tee yaꞌa,
te ka kaꞌan ni ja skaꞌan de ñayii ñuu yaꞌa.
Kovaa saña,
jâ ni xndichi sa de nuu ndaka ni a,
te ñatuu ni ndaniꞌi sa ni‑in kuechi de ja ka xtekuechi ni de a.
15 Ni a Herodes ma,
ñatuu nawa ni ndaniꞌi de.
Chukan kúu ja ni ndatetniñu tuku de tee a nuu sa a,
te ni ka jini maa ni ja masu ni ndaniꞌi sa ni‑in kuechi de ja saꞌa ja kûu de.
16 Xndoꞌo sa de,
te sana xsiaa sa de ―kúu de jiñaꞌa de.
17 Vaa iyo ja xsiaa de in ñayii yinee vekaa ma kivi Viko Pascua ma.
18 Kovaa ndaka ñayii ma,
ka kayuꞌu i ka jiñaꞌa i:
―¡Xnaa ni tee jiña!
¡Te xsiaa ni Barrabás ma!
―ka kuu i ka jiñaꞌa i.
19 Tee kúu Barrabás ma,
ni ka chinee de tee ma vekaa ma,
kuechi ja ni ka kanaa de jiꞌin gobiernu ñuu yukan jiꞌin kuechi ja ni jaꞌni de ñayii ma.
20 Pilato ma,
kúni de ja xsiaa de Jesús ma,
te jiñaꞌa de in‑ka jichi.
21 Kovaa ndaka ñayii ma,
ka kayuꞌu xeen‑ka i ka jiñaꞌa i:
―¡Skuita kaa ni de nuu krusi ma!
¡Skuita kaa ni de nuu krusi ma!
―ka kuu i ka jiñaꞌa i.
22 Ja ku‑uni jichi ni jiñaꞌa Pilato ma:
―¿Na in ja uꞌvi ni saꞌa de?
Saña,
masu ni ndaniꞌi sa ni‑in kuechi ja saꞌa ja kûu de.
Xndoꞌo sa de,
te jinu,
te xsiaa sa de ―kúu de jiñaꞌa de.
23 Kovaa viꞌi‑ka ka kayuꞌu i,
ka jikan i ja na skuita kaa de ya nuu krusi ma.
Te ja ka kayuꞌu xeen i ma,
ni ka kundee i ja ka kúni i ma.
24 Sani te Pilato ma,
ni waꞌa de tnuꞌu ja ko kuu sukan ka jikan maa i ma.
25 Chukan kúu ja ni xsiaa de tee ni ka kaji i ma,
tee yinee vekaa ma kuechi ja ni kanaa de jiꞌin gobiernu ma jiꞌin kuechi ja ni jaꞌni de ñayii ma,
te ni ndaxsiaꞌa Pilato ma Jesús ma nuu ndaꞌa soldado ma,
te jin xndoꞌo de ya sukan ka kuni maa ñayii ma.
Ni ka skuita kaa de Jesús ma nuu krusi ma
26 Nuu kuan koo de jiꞌin Jesús ma ja jin skuita kaa de ya nuu krusi ma,
ni ka tnii de in tee ñuu Cirene ma nani de Simón ja ve ndii de ja ni jaꞌan de yuku,
te ni ka skuiso de tee ma krusi ndiso Jesús ma,
te kondikin de yata Jesús ma.
27 Te ka ndikin kuaꞌa ñayii ñuu ma,
jiꞌin kuaꞌa ñaꞌa ja ka ndaꞌyu te ka kayuꞌu ña ja ka kuxii ini ña ja kuu ya ma.
28 Kovaa Jesús ma,
ndeꞌya ya,
te jiñaꞌa ya:
―Ñaꞌa ñuu Jerusalén,
má jin kondaꞌyu ni ja kuu sa,
suꞌva jin kondaꞌyu ni ja jin kuu maa ni jiꞌin saꞌya ni ma.
29 Vaa kenda kivi ja jin kaꞌan ni ja vaꞌa‑ka ka kuu ñaꞌa masu ni kuu jin koo saꞌya ña ma te ni masu na suchi ni ka skaxi ña ma.
30 Sani te jin kejaꞌa ñayii ma jin kuñaꞌa i yuku ma:
“Jin kun‑kava siki ri a,
sukan‑vaꞌa jín kûu ri.”
Te jin kuñaꞌa i tinduu ma:
“Jin chisaꞌvi ñaꞌa,
sukan‑vaꞌa jín kaku ri.”
31 Vaa nú sukan ka saꞌa ñaꞌa i saña ja kúu sa kuenda tnuꞌu ja in yutnu kuiꞌi iyo kuii a,
¿nde‑ka tu jin saꞌa ñaꞌa i ndijin ja ka kuu ni sukan ka kuu yutnu ni ka yichi ma?
―kúu ya jiñaꞌa ya.
32 Suni kuan koo i jiꞌin uu tee ni ka saꞌa ja uꞌvi,
sukan‑vaꞌa jin skuita kaa i de jiꞌin Jesús ma nuu krusi ma.
33 Nuu ni ka kenda koo i nuu nani Yiki Xini Ndiyi ma,
ni ka skuita kaa i Jesús ma jiꞌin tee ni ka saꞌa ja uꞌvi ma nuu krusi ma,
in de xiñi kuaꞌa ya ma,
te in‑ka de xiñi satni ya ma.
34 Jesús ma,
saꞌa ni kaꞌan ya nuu Yuva ya ma:
―Yuva sa,
sakanu ini ni ñayii a,
vaa ñatuu ka jini i nawa ka saꞌa i a ―kúu ya jiñaꞌa ya.
Te soldado ma,
ka chuꞌun de suerte,
sukan‑vaꞌa jin ndakaꞌnde de saꞌma Jesús ma.
35 Te ñayii ka iyo ma,
ka ndeꞌya i,
te onde tee ka netniñu ma,
ka jakundee de ya,
te ka kaꞌan de:
―Ni saꞌa de ja ni ka kaku in‑ka ñayii,
te na saꞌa de ja kaku maa de vitna,
nú ndija de ja Cristo iya ni kaji Suꞌsi ma kúu de ―ka kuu de ka kaꞌan de.
36 Te tee ka kuu soldado ma,
ka jakundee tna de Jesús ma.
Ni ka jan tuꞌva de ya,
te ni ka waꞌa de ja koꞌo ya ndute uva ni jiya,
37 te ni ka jiñaꞌa de:
―¡Nú ndijin kúu rey nuu ñayii judío a,
saꞌa ni ja kaku maa ni!
―ka kuu de ka jiñaꞌa de.
38 Te iyo in tabla xini krusi ya ma,
te káꞌan i:
“Tee yaꞌa kúu rey tátnuni nuu ñayii judío a.”
39 In tee ni yo saꞌa ja uꞌvi ndenee nuu krusi ma xiñi ya ma,
jiñaꞌa de ya:
―¡Nú ndijin kúu Cristo ma,
saꞌa ni ja kaku maa ni,
te saꞌa tna ni ja jin kaku tna sa a!
―kúu de jiñaꞌa de.
40 Kovaa in‑ka de ma,
ndonda de nuu tnaꞌa de ma,
te jiñaꞌa de:
―Ndijin,
¿masu yuꞌu ni Suꞌsi ma?
Te vitna ja ka iyo o ja jin kûu o a.
41 Yoꞌo chi ka ndoꞌo ka neni o,
kovaa vaꞌa‑ni,
vaa yoꞌo chi ka ndachunaa o ja uꞌvi ni ka saꞌa maa o ma,
kovaa tee yaꞌa chi masu na ja uꞌvi saꞌa de ―kúu de jiñaꞌa de.
42 Sani te jiñaꞌa tuku de nuu Jesús ma:
―Ndakaꞌán ñaꞌa ni kivi kejaꞌa ni tatnuni ni ma ―kúu de jiñaꞌa de.
43 Jesús ma,
ni ndakoneꞌe ya:
―Ja ndaa káꞌan sa ja vitna koo ni jiꞌin sa nuu vavaꞌa nani paraíso ma ―kúu ya jiñaꞌa ya.
Sukan ni jiꞌi Jesús ma
44 Onde sava nduu ma te onde ka uni nuu ve kukuee ma,
te ni‑kaꞌnu ñuu ñayivi ma ni kunee,
45 te ñatuu ndíi‑ka kandii ma.
Te saꞌma ndakaa ini veñuꞌu kaꞌnu ma chi ni teꞌnde sasava i.
46 Sani te ni kayuꞌu niniꞌi Jesús ma,
te káꞌan ya:
―Yuva sa,
nuu ndaꞌa maa ni xndoo sa anua sa ya ―kúu ya jiñaꞌa ya.
Te nuu ni jinu ni kaꞌan ya sukan ma,
sani te ni jiꞌi ya.
47 Nuu ni jini tee tátnuni nuu soldado Roma ma sukan ni kuu ma,
ni ndachiñuꞌu de Suꞌsi ma,
te káꞌan de:
―Ja ndaa kúu ja tee yaꞌa chi masu na kuechi de ―kúu de káꞌan de.
48 Te ndaka ñayii ka iyo ma,
ja ni ka jini i ja ni kuu ma,
ni ka ndakokuiñi i,
te ka kani ka kani i pechu i ma kuan nu koo i,
vaa ka ndakunitnuni i ja masu vaꞌa‑ni ni ka saꞌa i ma.
49 Kovaa ñaꞌa ñuu Galilea ma ja ni ka yo ndikin ña ya ma,
jiꞌin ndaka‑ka ñayii ka jini Jesús ma,
ni ka kendoo ndaka i yukan,
ka ndeꞌya jika i ja sukan ni kuu ma.
Sukan ni ka chuꞌu i Jesús ma
50-51 Iyo in tee vaꞌa tee vii ini,
nani de José,
te in tee ñuu Arimatea ma ja iyo i ñuu Judea ma kúu de.
Te in tna tee ka jaꞌnde tniñu ñayii ñuu judío ma kúu de.
Tee kúu José ma,
ndetu de kivi tatnuni Suꞌsi ma ñuu ñayivi ya,
te ñatuu ni jatna ini de ja ni ka ndatnuꞌu tnaꞌa tee ka jaꞌnde tniñu ñayii ñuu judío ma ja jin saꞌa de Jesús ma.
52 Tee yaꞌa,
ni jaꞌan de nuu Pilato ma,
ni jan nu ndakan de ñundeꞌyu Jesús ma.
53 Te ni nuneꞌe de ya nuu krusi ma,
te ni chutuu de ya in saꞌma kuijin vavaꞌa,
te ni jan chinee de ya in yavi ndenee chii toto ma,
nuu ñatuu na in kinee‑ka ma.
54 Kivi ka satuꞌva i ja ko kuu kivi ni tatnuni Suꞌsi ma ja ma jin satniñu ñayii ma kúu kivi yukan,
te ve kuyatni ja kenda ora kejaꞌa kivi ñatuu ka satniñu ñayii ma.
55 Te ñaꞌa ni ka ndikin ya onde ñuu Galilea ma,
ni jan koo tna ña,
te ni ka jini ña yavi nuu ni ka chinee de ya ma,
te ka ndeꞌya ña sukan ni ka chinee de ñundeꞌyu ya ma.
56 Nuu ni ka ndenda koo ña veꞌe ña ma,
ni ka satuꞌva ña ndute jáxiko asi,
ja jin koo ña jin chiꞌi ña ñundeꞌyu ya ma.
Te ni ka ndatatu ña kivi ni tatnuni Suꞌsi ma ja ma jin satniñu ñayii ma.