Carta ni saꞌa Pablo ma ja ni tetniñu de nuu ñayii ka iyo ñuu Roma ma
Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Roma ma
1
Saña chi Pablo kúu sa,
te jinukuechi sa nuu Jesucristo ma,
te maa ya,
ni kana ñaꞌa ya ja ko kuu sa apóstol,
te ni tetniñu ñaꞌa ya ja kaxtnuꞌu sa tnuꞌu maa ya ma,
te ni saꞌa siin ñaꞌa ya ja na kaxtnuꞌu sa tnuꞌu vii tnuꞌu vaꞌa káꞌan ya ma.
2 Te tnuꞌu yaꞌa kúu tnuꞌu ni skuiso Suꞌsi ma onde xiꞌna‑ka ma,
te sukan ni ka tee tee ni ka yo ndakaxtnuꞌu tnuꞌu ni yo waꞌa maa ya ma nuu tutu ndee tnuꞌu Suꞌsi ma.
3 Te tnuꞌu yaꞌa káꞌan siki Saꞌya Suꞌsi ma,
te maa ya chi ni kenda ñayivi ya,
te neꞌun saꞌya tata David ma ni kâku ya ñuu ñayivi ya,
te Jesucristo iya tátnuni nuu o ma kúu ya.
4 Te ni kaxtnuꞌu Xtumani Ndios ma ja Saꞌya Suꞌsi ma kúu ya,
te iyo tnuꞌu ndee tnuꞌu ndatnu ya ma,
vaa ni jiꞌi ya te ni ndateku ya neꞌun ñayii ni ka jiꞌi ma.
5 Te Jesucristo ma chi ni skutaꞌvi ñaꞌa ya tnuꞌu vii tnuꞌu mani ja ko kuu sa apóstol tee tetniñu maa ya ma,
sukan‑vaꞌa ja maa ya ma,
te kaxtnuꞌu sa nuu ndaka ñayii masu ñayii judío ka kuu i ma ja na jin kandija i Suꞌsi ma te jin ko saꞌa i sukan káꞌan ya ma.
6 Te neꞌun ñayii yaꞌa ka iyo maa ni,
ja ni ndakana ñaꞌa Jesucristo ma ja jin kondikin ni ya.
7 Te tée sa tutu yaꞌa,
te tétniñu sa nuu ni ja ka iyo ni ñuu Roma a,
ja ka kuu ni ñayii kútoo ñaꞌa Suꞌsi ma,
te ni ndakana ñaꞌa ya ja jin xndoo ni ndaka ja uꞌvi ma.
Te kúni sa ja Yuva o Suꞌsi ma jiꞌin Jesucristo Iya Tátnuni ma,
na skutaꞌvi ñaꞌa ya ja vii ja vaꞌa te na saꞌa tna ya ja jin koo mani ni.
Kúni Pablo ma ja kiꞌin de jin koto de ñayii ka iyo ñuu Roma ma
8 Xinañuꞌu kuiti,
te ja maa Jesucristo ma,
te ndakuan‑taꞌvi sa nuu Suꞌsi o a ja jin kuu ndaka ni,
vaa ni‑kaꞌnu ni‑tuꞌu ñuu ñayivi a ka jini i sukan vivii ka kuu ni ja ni ka kandija ni Suꞌsi o a.
9 Te maa Suꞌsi iya xi‑nuu jinukuechi sa ja ni‑yuꞌu ni‑ini sa káxtnuꞌu sa tnuꞌu vii tnuꞌu vaꞌa Saꞌya ya Jesús ma naꞌa ja ñatuu ndúnaa ñaꞌa sa vaa ndimaa ndákuneꞌe ñaꞌa sa ora jikan‑taꞌvi sa nuu maa ya ma.
10 Te ndimaa jikan‑taꞌvi xeen sa nuu Suꞌsi ma ja na taa ya tnuꞌu,
te na chindee chituu ñaꞌa ya ja na kuu jaan sa jan koto ñaꞌa sa nuu ka iyo ni a.
11 Vaa kúu ini xeen sa ja kuni ñaꞌa sa te kaꞌan sa sukan kúni Xtumani Ndios ma ja jin ko saꞌa jin ko kuu ni,
te jin niꞌi‑ka ni tnuꞌu ndee tnuꞌu ndatnu.
12 Vaa na kaꞌan o ja saꞌa jiniñuꞌu ja jin ndakaꞌan‑soꞌo nuu tnaꞌa ndaka o sukan‑vaꞌa jin kukanu ini‑ka o Suꞌsi ma.
13 Jin konaꞌa ndaka ni ja jâ ni kuu kuaꞌa jichi kúni sa ja jan koto ñaꞌa sa,
kovaa onde vitna chi ndimaa iyo in ja jaꞌnu ndee nuu sa,
te ñatuu nde kúu jaan sa.
Chi vaa ja kúni sa kúu ja chindee ñaꞌa sa,
sukan‑vaꞌa kuu jin saꞌa ni sukan játna ini Suꞌsi ma,
te koo jayiñuꞌu ya,
sukan chíndee sa ndaka ñayii masu judío ka kuu i ma te ka saꞌa i sukan játna ini Suꞌsi ma.
14 Vaa nee yika sa nuu ñayii ka kaꞌan saꞌan griego ma jiꞌin nuu ñayii ñatuu ka kaꞌan i saꞌan griego ma,
jiꞌin nuu ñayii ndichi ma jiꞌin nuu ñayii ñatuu na tnuꞌu ndichi ka nevaꞌa i ma,
ja ka iyo i ni‑kaꞌnu ñuu ñayivi a.
15 Te chukan kúu ja ñuꞌu xeen ini sa ja jaan sa ñuu Roma a nuu ka iyo ni a,
te kuu kaꞌan kachi sa tnuꞌu vii tnuꞌu vaꞌa Suꞌsi ma nuu ndaka ni.
Tnuꞌu vii tnuꞌu vaꞌa Suꞌsi ma chi iyo tnuꞌu ndee tnuꞌu ndatnu i ja chindee ñaꞌa i ja jin nduu o ñayii ka saꞌa ja vaꞌa ja ndaa
16 Vaa masu kúkan‑nuu sa ja káxtnuꞌu sa tnuꞌu vii tnuꞌu vaꞌa Suꞌsi ma,
vaa tnuꞌu vii tnuꞌu vaꞌa ya ma chi iyo i jiꞌin tnuꞌu ndee tnuꞌu ndatnu maa ya ma,
te ndaka ñayii ka kandija tnuꞌu vii tnuꞌu vaꞌa ya ma chi jin ndaniꞌi taꞌvi i.
Te kúni Suꞌsi ma ja xinañuꞌu jin koninisoꞌo ñayii judío ma,
sani te jin koninisoꞌo ñayii masu judío ka kuu i ma.
17 Vaa tnuꞌu vii tnuꞌu vaꞌa Suꞌsi ma saꞌa ja jin nduu o ñayii ka saꞌa ja vaꞌa ja ndaa ma,
te káxtnuꞌu i sukan jin kandija o Suꞌsi ma te jin kukanu ini o ya ni‑kani ni‑jika.
Te suni saꞌa káꞌan tutu ndee tnuꞌu Suꞌsi ma:
“Ñayii saꞌa ja vaꞌa ja ndaa ma chi suu i koteku ni‑kani ni‑jika,
vaa kúkanu ini i Suꞌsi ma.”
Saꞌa káꞌan.
Sukan ka ndiso kuechi ndaka ñayii ñuu ñayivi a
18 Vaa maa Suꞌsi ma,
onde andivi ma iyo ya,
te káxtnuꞌu ya sukan ndákiti ini ya ja ñatuu játna ini ya sukan ka saꞌa ñayii ma ja uꞌvi ma jiꞌin ja ka saꞌa uꞌvi tnaꞌa i ma,
vaa ñayii yukan chi ka jaꞌnu ndee i ja jin kandija jaku‑ka ñayii ma tnuꞌu ndaa tnuꞌu ndija ya ma.
19 Vaa sukan ka jini yoꞌo ja iyo in Suꞌsi ma,
te ka jini o sukan saꞌa sukan kúu ya ma,
te suni ka jini tna ndaka ñayii ka saꞌa ja uꞌvi ma ndaka ja vaꞌa saꞌa Suꞌsi ma,
vaa maa ya káxtnuꞌu ja iyo ya.
20 Vaa yoꞌo chi ñatuu ka kundee maa o jin kuni o sukan kaa sukan iyo ya ma.
Kovaa nuna jin ndasaꞌa o kuenda ndaka ja ni saꞌa ya jiꞌin tnuꞌu ndee tnuꞌu ndatnu ya ma onde nuu ni kuvaꞌa ñuu ñayivi a,
te jin kuni o ja iyo ya ja kúu ya Suꞌsi o ma ni‑kani ni‑jika.
Te chukan kúu ja ñayii ka saꞌa ja uꞌvi ma,
masu kuu jin kaꞌan i ja ñatuu na Suꞌsi iyo.
21 Te visi jâ ka jini ñayii ma ja iyo Suꞌsi o a,
kovaa ñatuu ka ndachiñuꞌu i maa ya ja kúu ya Suꞌsi ma,
te ñatuu ni ka ndakuan‑taꞌvi i nuu ya,
suꞌva ni ka saꞌa ndee i ini anua i ma,
te ni ka ndandesi ini anua i ma.
22 Vaa ka kaꞌan i ja ka jini xeen i,
kovaa masu ka jini kuiti i,
suꞌva ka kuneé ka ku‑uun i,
te suꞌva viꞌi‑ka ni ka saꞌa ndee i ini anua i ma nuu Suꞌsi ma.
23 Te ni ka xndoo i jayiñuꞌu Suꞌsi iya téku ni‑kani ni‑jika ma,
te ni ka ndasaꞌa i in yunuu ñayii,
te vitna ja ñayii a chi ñayii naa‑ni kúu i,
te ni ka saꞌa i yunuu lasaa ma,
jiꞌin yunuu koo ma,
jiꞌin yunuu ndevaꞌa‑ni kiti ma,
te ka chiñuꞌu i.
24 Chukan kúu ja Suꞌsi ma chi ni xndoo ya i,
te ka saꞌa maa i ndaka ja uꞌvi ma,
sukan ka jani ini anua maa i ma.
Te ka xtivi i maa i ma.
25 Te sukan ni ka ndaxsama i tnuꞌu ndaa tnuꞌu ndija Suꞌsi ma,
te ni ka jan‑taꞌvi i tnuꞌu xndaꞌvi tnaꞌa ma,
vaa ka chiñuꞌu i ndaka ja iyo ñuu ñayivi a ja ni saꞌa Suꞌsi ma,
kovaa ka ndunaa i ja jin ndachiñuꞌu i maa iya ni saꞌa ndaka ja iyo ñuu ñayivi a.
Kovaa yoꞌo chi ka jini o ja Suꞌsi ma,
iyo jayiñuꞌu ya ni‑kani ni‑jika ma.
Te sukan kó kuu.
26 Chukan kúu ja Suꞌsi ma,
ni xndoo ya i ja jin saꞌa maa i ja uꞌvi ma te jin tnaꞌa maa i ja kan‑nuu.
Vaa ka iyo ñaꞌa chi ka jatna ini tnaꞌa ña ja ndi‑tnaꞌa ñaꞌa ña,
te jin ko kusu ña,
te ka saꞌa ña ja kayuꞌu ja kan‑nuu,
te masu sukan ni jani,
ni kaꞌvi ini Suꞌsi ma.
27 Suni tna tee ma,
ni ka xndoo de ja jin ko kusu de jiꞌin ñasiꞌi de ma,
te ni ka jatna ini‑ka de ja ndi‑tnaꞌa tee de ma jin ko kusu,
te ka saꞌa de ja kayuꞌu ja kan‑nuu.
Te ja sukan ka saꞌa ka kuu de ma,
te saꞌa Suꞌsi ma ja jin ndoꞌo jin neni de.
28 Te kuechi ja ñatuu ka kandija i Suꞌsi ma,
te ni saꞌa ya ja janitnuni i ma ni ka nduneé,
ni ka ndu‑uun‑nka,
te ñatuu nde ka ndasaꞌa i kuenda ja masu nde jiniñuꞌu ndaka ja ka saꞌa i ma.
29 Te ndimaa ja uꞌvi kúu ndaka ja ka saꞌa i ma,
vaa ka kivi nduu i jiꞌin ñayii ni masu ni ka tnandaꞌa jiꞌin i ma,
te ka iyo i ja ka skiti ini i in‑ka ñayii ma,
inundiyo ini i ma,
ka saꞌa i ja uꞌvi ma,
ka kukueñu ini i ma,
ka jaꞌni tnaꞌa i ma,
ka kanaa i ma,
ka xndaꞌvi tnaꞌa i ma,
ka kaꞌan neé ka kaꞌan ñuu i ma,
30 ka skanduu yuꞌu i ma,
ka kaꞌan i tnuꞌu tnaꞌa i ma,
ñatuu ka kuni sii i nuu Suꞌsi ma,
ñatuu na respetu i ma,
inuvixi xeen ka ndaa i ma,
ndimaa ja uꞌvi ka jani ini i ja jin saꞌa i ma,
masu ka kandija i nuu yuva nuu siꞌi i ma,
31 inundee ini i ma,
masu inundija i ja inuvaꞌa ini i ma,
ka saꞌa ndevaꞌa i ñayii ndaꞌvi ma,
masu kuu jin koo mani i ma,
ni a jin kundaꞌvi ini i ñayii ma.
32 Visi jâ ka jini i sukan jani ini Suꞌsi ma ja ñayii ka saꞌa sukan ma ka kuu ñayii jin kûu ma,
kovaa sukan‑ka ka saꞌa i.
Te masu ka iyo sii ini i ja maa‑ni i ka saꞌa sukan ma,
chi suꞌva ka kuni i ja ndaka‑ka ñayii ma na jin ko saꞌa sukan ka saꞌa i ma.