Sukan ndakan ndandaa Suꞌsi ma kuenda nuu in in o
2
Vaa masu kuu yanduu ja saꞌa ja kúu ni a,
ndevaꞌa‑ni na in kúu ni.
Ndijin ja xtekuechi ni tnaꞌa ni ma,
te maa ni,
ndáxtekuechi ni maa ni,
te jiso kuechi maa ni,
vaa tnaꞌa ja xtekuechi ni tnaꞌa ni ma,
chukan kuiti kúu ja saꞌa maa ni a.
2 Vaa ka jini o ja maa Suꞌsi ma kaꞌnde tniñu ñayii ka saꞌa ndaka ja uꞌvi ma,
te sukan,
te jin ndachunaa ndiꞌi jin ndachunaa tuꞌu maa i ja ka saꞌa i ma.
3 Te ndijin ja xtekuechi ni tnaꞌa ni ma te saꞌa ni ja ka saꞌa i ma,
¿jani ini ni ja kaku ni nuu Suꞌsi ma kivi ndakan ya kuenda nuu ni ma?
4 ¿Xi saxiko ni ja vii ja vaꞌa sukan kuee ini ya ma vaa kútoo ñaꞌa ya ma?
¿Te ñatuu ndásaꞌa ni kuenda ja vaꞌa ini ya kúu,
chukan kúu ja káxtnuꞌu ya ichi ndaa ko kaka ni ma,
sukan‑vaꞌa ndakani ndakaꞌvi ini ni te kondikin ni Suꞌsi ma?
5 Kovaa ja sukan ndee ini ni a te ñatuu ndákani ndákaꞌvi ini ni a,
saꞌa ni ja ndákiti xeen ini Suꞌsi ma nuu ni,
kivi kenda ja ndakan ndiꞌi ndakan tuꞌu ya kuenda nawa ni yo saꞌa,
ni yo kuu ni ma.
6 Te ndi‑in ndi‑in o jin ndaniꞌi jin ndatnaꞌa nde a kúu ja ni ka saꞌa,
ni ka kuu o nuu ya ma.
7 Nde o ka ndi ini ja jin ndaniꞌi taꞌvi o te jin koteku o ni‑kani ni‑jika ma,
te jin niꞌi o jayiñuꞌu nuu Suꞌsi ma te kaꞌan ya ja ja vavaꞌa kúu ja ni ka saꞌa,
ni ka kuu o ma,
nuna jin kuꞌun ini o ja jin ko saꞌa o ja vaꞌa ja ndaa ndija nuu ya ma,
te jin niꞌi o ndaka chaꞌa te jin koteku o ni‑kani ni‑jika ma.
8 Kovaa ndákiti xeen ini ya nuu ñayii inusoꞌo ka ndaa i ma,
ja ñatuu ka kandija i ja ndaa káꞌan nuu tnuꞌu maa ya ma,
suꞌva ka saꞌa‑ka i tnaꞌa ja ñatuu játna ini Suꞌsi ma.
9 Te tnundoꞌo tnuneni jiꞌin tnuꞌu xii ini kuaꞌa ya nuu ñayii ka saꞌa ja uꞌvi ma.
Chaꞌa chi xinañuꞌu ñayii judío ma jin ndoꞌo.
Sani te ñayii masu judío ka kuu i ma,
jin ndoꞌo tna i.
10 ¡Kovaa naka jayiñuꞌu jiꞌin tnuꞌu sii ini koo nuu ndaka ñayii ka saꞌa ja vaꞌa ma!
Chaꞌa chi xinañuꞌu ñayii judío ma,
jin niꞌi.
Sani te ñayii masu judío ka kuu i ma,
jin niꞌi tna i.
11 Vaa nuu Suꞌsi ma chi inuu‑ni ka kuu ndaka o,
visi ndevaꞌa‑ni ñuu o.
12 Vaa ndaka ni ja ñatuu ka jini ni tnuꞌu ni waꞌa Suꞌsi ma ja ni ndakaxtnuꞌu Moisés ma te ni ka yo saꞌa ni ja uꞌvi ma,
te suni jin skenaa ni maa ni nkuu,
visi ñatuu ka jini ni sukan ni ndakaxtnuꞌu Moisés ma.
Te ndaka ndijin ja ka jini ni tnuꞌu ni waꞌa Suꞌsi ma ja ni ndakaxtnuꞌu Moisés ma te ni ka yo saꞌa ni ja uꞌvi ma,
te sukan káꞌan tnuꞌu ni ndakaxtnuꞌu Moisés ma,
sukan ndakan ndaa Suꞌsi ma kuenda nuu ni.
13 Vaa masu ñayii yika‑ni ja ninisoꞌo‑ni i tnuꞌu ni kaxtnuꞌu Suꞌsi ma nuu Moisés ma ka kuu ñayii ka saꞌa ja vaꞌa ja ndaa nuu Suꞌsi ma.
Chi ñaꞌa.
Suꞌva káꞌan Suꞌsi ma ja ñayii ka saꞌa ka kuu sukan ndee tnuꞌu ni tatnuni Suꞌsi ma nuu Moisés ma ka kuu ñayii ka saꞌa ja vaꞌa ja ndaa nuu Suꞌsi ma.
14 Vaa ñayii masu judío ka kuu i ma te ñatuu na tnuꞌu ni yo ndakaxtnuꞌu Moisés ma ka jini i,
kovaa ka jini i nde a kúu ja vaꞌa ma jiꞌin ja uꞌvi ma,
te maa i ka ndasaꞌa kuenda nawa jin saꞌa i ma.
15 Te saꞌa,
te ka kaxtnuꞌu i ja iyo in tnuꞌu tátnuni ini anua i ma,
te ka kaxtnuꞌu i sukan ka jani ka kaꞌvi ini i ma,
te ka ndakunitnuni i naxe ka saꞌa ka kuu i ma nú ja vaꞌa xi ja uꞌvi kúu.
16 Saꞌa ko kuu kivi sunkoo Yuva o Suꞌsi ma Saꞌya ya Jesucristo ma,
ja ndakan ndaa ya kuenda nuu in in o ja ka kuu o ñayii a nawa ni ka yo saꞌa yuꞌu o ma,
sukan káꞌan tnuꞌu vii tnuꞌu vaꞌa káxtnuꞌu sa a.
Ñayii judío ma chi masu ka saꞌa kuiti i sukan káꞌan tnuꞌu ni kaxtnuꞌu Moisés ma
17 Ndijin ja káꞌan ni ja kúu ni judío,
te kúkanu ini ni tnuꞌu ni ndakaxtnuꞌu Moisés ma,
te káꞌan ni ja saꞌya Suꞌsi ma kúu ni,
18 te káꞌan ni ja jini ni sukan kúni Suꞌsi ma ja jin saꞌa o ma,
te jâ ni kutuꞌva ni tnuꞌu ni ndakaxtnuꞌu Moisés ma,
te jini ni ndakaji ni ja vaꞌa ma.
19 Te jani ini ni ja kúu ni ñayii káxtnuꞌu tnuꞌu Suꞌsi ma nuu ñayii ñatuu ka jini ma te kuan koo neé kuan koo uun maa i ma,
te ñuꞌu ndúꞌva kúu ni nuu ñayii ka iyo nuu nee ma saꞌa ni tnuꞌu.
20 Te jani ini ni ja teskuaꞌa kúu ni nuu ñayii ñatuu ka jini ma,
jiꞌin nuu ñayii yika ni ka kejaꞌa i ka ndanduku i Suꞌsi ma,
vaa maa ni chi jâ jini ni tnuꞌu ndaa tnuꞌu ndichi ni ndakaxtnuꞌu Moisés ma.
21 Ndijin ja káxtnuꞌu ni nuu in‑ka ñayii a,
¿naku ñatuu ndákaxtnuꞌu ni nuu maa ni a naxe kúni Suꞌsi ma ja ko saꞌa ko kuu ni?
Ndijin ja káxtnuꞌu ni nuu in‑ka ñayii ja máko jin sakuiꞌna i ma,
¿te sakuiꞌna maa ni?
22 Ndijin ja káꞌan ni ja ma kuu ndatuu tee ma jiꞌin in‑ka ñaꞌa ma,
¿te maa ni ndátuu jiꞌin in‑ka ñaꞌa ma?
Ndijin ja saxiko ni ja masu Suꞌsi ka kuu ma,
¿te kivi ni nuu ka ñuꞌu i ma,
te sakuiꞌna ni?
23 Ndijin ja kúvixi maa ni ja jini ni tnuꞌu ndaa ni ndakaxtnuꞌu Moisés ma,
kovaa saꞌa ni ja ka saxiko ñayii a Suꞌsi o ma,
vaa ñatuu saꞌa ni sukan káꞌan ya ma.
24 Sukan káꞌan tutu ndee tnuꞌu Suꞌsi o a:
“Ja kuechi ndijin a,
te ñayii masu judío ka kuu i ma,
ka kaꞌan ndevaꞌa i ja kuu Suꞌsi o a.”
Saꞌa káꞌan tnuꞌu ya a.
25 Ja ndaa kúu ja nuna kitnuni o chi chindee ñaꞌa i,
nuna saꞌa o sukan káꞌan tnuꞌu ni tatnuni Moisés ma.
Kovaa nú ma saꞌa o,
te ko kuu o sukan‑ni ka kuu ñayii ñatuu ka yitnuni i ma.
26 Chukan kúu ja in ñayii ñatuu yitnuni ma te saꞌa i sukan káꞌan tnuꞌu ni ndakaxtnuꞌu Moisés ma,
kuenda tnuꞌu ja yitnuni i kúu,
káꞌan Suꞌsi ma.
27 Vaa ñayii ñatuu yitnuni yikikuñu i ma kovaa kándija i ndaka tnuꞌu Suꞌsi ma ja ni ndakaxtnuꞌu Moisés ma,
kuu ndakaꞌan i kuechi ni a,
vaa visi nevaꞌa ni tutu ndee tnuꞌu ni tatnuni Suꞌsi o a,
te visi yitnuni ni a,
kovaa ñatuu saꞌa ni sukan káꞌan tnuꞌu Suꞌsi ma ja ni kaꞌan Moisés ma.
28 Vaa ja ko kuu o ñayii judío ma chi masu yika‑ni ja saꞌa o sukan ka saꞌa ñayii judío ma ja ka chitnuni i yikikuñu i ma kúu.
Chi ñaꞌa.
29 Suꞌva ja jin ko kuu o ñayii judío ndija ma kúu ja nú ni nduvii ni ndundoo ini anua o a,
te sukan,
te ini anua o a ni nukitnuni ndija i nuu Suꞌsi ma.
Vaa masu yika‑ni ja kúu káꞌvi o sukan ndee tnuꞌu ni kaꞌan Moisés ma kúu ja ko kuu o ñayii judío ma chi suꞌva nú maa Xtumani Ndios ma ni ndaxsama ñaꞌa.
Te ja ñuꞌu ini o kúu ja Suꞌsi ma ndakaꞌan vaꞌa ndakaꞌan vii ja saꞌa o ma,
te masu ñuꞌu ini o ja ñayii ma,
jin kaꞌan vii ja saꞌa ja kuu o ma.