3
Chukan kúu ja,
¿nawa ka niꞌi o ja ka kuu o judío ma?
¿Xi nawa chíndee ñaꞌa ja jákitnuni o ma?
2 Kuaꞌa xeen ja jin niꞌi o ja ka kuu o ñayii judío a,
nuna jin jakuꞌni ndaa ini o tnuꞌu Suꞌsi o a.
In kúu ja ni kukanu ini ñaꞌa Suꞌsi ma ja nuu ndaꞌa yoꞌo ni xndoo ya tnuꞌu ni tatnuni ya ja jin ko saꞌa o ma.
3 Chukan kúu ja,
¿naxe kaꞌan o?
Nú in nde ni ñatuu kándija,
te ¿ja ñatuu kándija ni ma,
saꞌa i ja ma saꞌa‑ka Suꞌsi ma ja ni skuiso ya ma?
4 Ñaꞌa,
vaa Suꞌsi ma chi in ja ni kaꞌan ya ja saꞌa ya ma,
chi ûni saꞌa ya,
visi sukan‑ni kúu maa ñayii a ja ñatuu saꞌa i ja ndaa ma.
Vaa saꞌa káꞌan tutu ndee tnuꞌu Suꞌsi o ma:
Sukan‑vaꞌa jin ndakunitnuni ñayii ma ja tnuꞌu ndaa tnuꞌu ndija kúu tnuꞌu káꞌan ni a,
vi Suꞌsi,
te ñatuu na in káꞌan ja masu jaꞌnde ndaa ni tniñu ñayii ma.
Saꞌa ni jiñaꞌa David ma Suꞌsi ma.
5 Kovaa ka iyo jaku ñayii ma ja ka kaꞌan i ja kuechi ja uꞌvi ka saꞌa i ma,
te iyo‑ka jayiñuꞌu Suꞌsi ma.
Te ka jani ini i ja chukan kúu ja masu vaꞌa ini Suꞌsi ma ja xndoꞌo xneni ya i ma.
Saꞌa ndákaꞌan sa sukan ka káꞌan jaku ñayii ma.
Te yoꞌo,
¿naxe jin kaꞌan tna o?
6 ¡Masu kuu ja jin kaꞌan o sukan!
Vaa nú ma xndoꞌo xneni ya ñayii ka ndiso kuechi ma,
¿naxe kaꞌnde ya tniñu ñayii ka iyo ñuu ñayivi a?
7 Te in‑ka tnuꞌu ja ka kaꞌan ñayii yukan kúu ja ndaka tnuꞌu ka kaꞌan i ja masu ja ndaa kúu ma,
kovaa saꞌa tnuꞌu ka kaꞌan i ma ja ka ndasaꞌa jaku‑ka ñayii ma kuenda ja maa in‑ni Suꞌsi ma káꞌan tnuꞌu ndaa tnuꞌu ndija ma,
te ka ndachiñuꞌu xeen‑ka ñayii ma Suꞌsi ma.
Te ka kaꞌan ñayii tnuꞌu ma:
“¿Te naku ka kaꞌan i ja ka ndiso kuechi o?”,
ka kuu i ka kaꞌan i.
8 Kovaa nuna jin kandija o ja ka kaꞌan ñayii tnuꞌu ma,
te ¿xi jin kaꞌan tna o ja jin saꞌa o ja uꞌvi ma,
sukan‑vaꞌa nduu i ja vaꞌa ma?
¡Masu kuu ja jin kaꞌan o sukan!
Kovaa maa ñayii yukan,
ka kaꞌan i tnuꞌu sa ja saꞌa káxtnuꞌu sa.
Kovaa maa Suꞌsi ma chi jini ya ja sukan ka kaꞌan i tnuꞌu sa ma,
te kenda kivi ja ndakan ya kuenda nuu i ja sukan ka kaꞌan i ma,
te jin ndachunaa maa i.
Ni‑in ñayii ñatuu saꞌa ja vaꞌa nuu Suꞌsi ma
9 ¿Te naxe jin kaꞌan o?
¿Yoꞌo ja ka kuu o judío a,
ñayii vaꞌa‑ka ka kuu o sana ñayii masu judío ka kuu i ma?
Ñaꞌa,
vaa ndaka o jiꞌin ñayii masu judío ka kuu i ma,
jâ ka ndiso kuechi o nkuu.
10 Sukan káꞌan tutu ndee tnuꞌu Suꞌsi ma:
Ni a in ñayii saꞌa ja vaꞌa.
11 Ni a in ñayii jákuꞌni ini.
Ñatuu na in ndánduku Suꞌsi ma.
12 Ndaka i ni ka skiꞌin maa i.
Ndaka i,
masu ñayii jin kuu‑ka ka kuu i.
Ñatuu na in saꞌa‑ka ja vaꞌa,
ni a in‑nka i.
13 Sukan kini kaa nuu ka yinee ndiyi ma nuna ndanune i ma,
sukan ka kuu tnuꞌu ka kana koo sukun ñayii ma.
Te ja ka kaꞌan i jiꞌin yaa i ma,
ja ka xndaꞌvi i ñayii ma kúu.
Te sukan kúu venenu koo ma,
sukan kúu ja ka kaꞌan i jiꞌin ñii yuꞌu i ma.
14 Te ka ñuꞌu chitu yuꞌu i ma ja uꞌvi ja kini ja ka kaꞌan i ma.
15 Te jaꞌa i ma ka jika ñama‑ka kuan koo i ja jin kaꞌni i ñayii ma.
16 Ka xndoo ndaꞌvi ka xndoo kee i ichi ka jika i ma,
17 vaa ñatuu ka jini i naxe jin koo mani i jiꞌin ñayii ma.
18 Te ñatuu ka yuꞌu i ja Suꞌsi ma chi ndeꞌya ñaꞌa ya.
19 Kovaa ka jini o ja ndaka sukan ndee tnuꞌu Suꞌsi ma,
káꞌan i ja jin kuu maa ñayii ka jani ini i ja nuna jin saꞌa i ndaka sukan káꞌan tnuꞌu ni tatnuni Moisés ma,
te jin ndaniꞌi taꞌvi i.
Kovaa ñaꞌa.
Vaa maa Suꞌsi ma ndakan kuenda nuu ndaka ñayii ka iyo ñuu ñayivi a,
te jin ndachunaa i ndaka nawa ni ka yo saꞌa,
ni ka yo kuu i ma.
Te kivi yukan masu na in kuu kaꞌan‑ka.
20 Vaa visi tnuñu maa ñayii ma ja saꞌa i ndaka sukan ndee tnuꞌu ja ni waꞌa Suꞌsi ma nuu Moisés ma,
kovaa ni a in ñayii ma,
masu kundee i saꞌa i ja vaꞌa nuu ya ma te ndaniꞌi taꞌvi i.
Vaa tnuꞌu ni waꞌa Suꞌsi ma nuu Moisés ma,
yika‑ni ja saꞌa i kúu ja ndákunitnuni ñayii ma ja ja uꞌvi ni saꞌa i ma te ni jiso kuechi i nuu Suꞌsi ma.
Ja ni ka kukanu ini o Jesucristo ma ja suu ya ni chunaa nuu tniñu o ma te ni ka kaku o nuu ja uꞌvi ma
21 Kovaa vitna,
te Suꞌsi ma,
ni kaxtnuꞌu ya in‑ka tnuꞌu jaa sukan jin ndayaa o nuu ja uꞌvi ma te jin ko kuu o ñayii jin ko saꞌa ja vaꞌa ja ndija nuu ya ma.
Vaa onde Moisés ma jiꞌin tee ni ka yo ndakaxtnuꞌu tnuꞌu ni yo waꞌa Suꞌsi ma,
ni ka yo kaxtnuꞌu de ja sukan ko kuu ma.
22 Chukan kúu ja ndevaꞌa‑ni na in kukanu ini Jesucristo ma ja maa ya ni chunaa nuu tniñu i ma nuu ni jiꞌi ya nuu krusi ma chi sakanu ini Suꞌsi ma kuechi i ma.
Vaa ndaka ñayii ka kukanu ini i Jesucristo ma,
kuu jin saꞌa i ja vii ja vaꞌa ma.
Vaa Suꞌsi ma chi masu nde saꞌa siin ya ni‑in jichi ñayii ma,
23 vaa ndaka ñayii ma,
ni ka saꞌa i ja uꞌvi ma te ni ka jiso kuechi i nuu Suꞌsi ma,
chukan kúu ja ni ka kujika i nuu iyo jayiñuꞌu ya ma.
24 Kovaa Suꞌsi ma chi ni kundaꞌvi ini ñaꞌa ya,
te ni skutaꞌvi ñaꞌa ya tnuꞌu vii tnuꞌu mani ya ma,
te ni saꞌa ya ja maa Jesucristo ma ni ndachunaa nuu tniñu o ma,
te sukan,
te ni ka kaku o nuu ja uꞌvi ma.
25 Vaa ni tetniñu Suꞌsi ma Jesucristo ma ja kûu ya,
te ni jati niñi ya ma ja jin kuu o ma.
Te nuna jin kukanu ini o ja sukan ni ndoꞌo Jesucristo ma nuu tniñu o ma,
chi ndasavii ndasandoo ñaꞌa Suꞌsi ma nuu ndaka ja uꞌvi ni ka yo saꞌa o ma.
Te Suꞌsi ma,
ni kaa kuee ini ya,
vaa ñatuu ni xndoꞌo xneni ya ñayii ma ja kuechi ndaka ja uꞌvi ni ka yo saꞌa i ma.
26 Kovaa onde vitna,
te jâ ni kaxtnuꞌu ya ja iya saꞌa ndimaa ja vaꞌa ja ndaa kûu ya,
vaa ni ndachunaa maa ya ndaka kuechi ni ka yo saꞌa o onde xiꞌna‑ka ma.
Te suni sukan káxtnuꞌu ya ja maa ya saꞌa ja ndaka o ja ka kukanu ini o Jesús ma te ni ka jan‑taꞌvi o ya ma,
te ñatuu‑ka na kuechi ka ndiso o nuu Suꞌsi ma,
te jin nduu o ñayii ka saꞌa ja vaꞌa ja ndaa nuu Suꞌsi ma.
27 Chukan kúu ja,
¿ndenu iyo ja káꞌan ñayii ma ja maa i kúu saꞌa ndaka ma?
Masu na in kuu saꞌa kuiti ja vaꞌa,
ja maa in‑ni i ma.
Nú masu ja onde kukanu ini i Jesucristo ma,
sana kuu saꞌa i ndaka ja vaꞌa ma.
28 Te chukan kúu ja ka ndasaꞌa o kuenda ja masu kuechi ja ni ka yo saꞌa o ndaka ja ni kaxtnuꞌu Moisés ma,
te ni ka nduu o ñayii ka saꞌa ja vaꞌa,
chi ñaꞌa.
Vaa onde ni ka kukanu ini o Jesucristo ma,
saa ni chindee ñaꞌa ya ja ni ka nduu o ñayii ka saꞌa ja vaꞌa ja ndaa.
29 ¿Te Suꞌsi ma,
Suꞌsi maa in‑ni ñayii judío ma kúu ya?
Te ñayii masu judío ka kuu i ma,
te ¿masu Suꞌsi tna i kúu ya?
Ñatuu na in ko kani ini sukan,
vaa Suꞌsi ma chi suni Suꞌsi tna i kúu ya.
30 Vaa Suꞌsi ma chi maa in‑ni ya kúu Suꞌsi ndaka o a.
Te nú ñayii judío ma,
jin kukanu ini i ya,
te saꞌa ya ja jin nduu i ñayii jin ko saꞌa ja vaꞌa ja ndaa ma.
Te suni sukan saꞌa tna ya ja jin kuu ñayii masu ñayii judío ka kuu i ma,
nuna jin kukanu ini i ya.
31 Chukan kúu ja,
yoꞌo ja ka kukanu ini o Jesucristo ma,
te masu kuu jin kaꞌan o ja masu jiniñuꞌu tnuꞌu ni waꞌa Suꞌsi ma nuu Moisés ma.
Suꞌva yoꞌo ja ka kukanu ini o Jesucristo ma,
ka kaꞌan o ja kanuu xeen‑ka tna kúu tnuꞌu ni kaxtnuꞌu Suꞌsi ma nuu Moisés ma.