Jesús ma, ni tatnuni ya ja ñayii ni ka tnandaꞌa ma máko jin xndoo tnaꞌa i
19
Te nuu ni jinu ni kaxtnuꞌu Jesús ma tnuꞌu yaꞌa,
te ni ndee ya ñuu Galilea ma,
te kuaꞌan ya ichi ñuu Judea ma ja iyo i in‑ka yuꞌu yute Jordán ma.
2 Te ni ka ndikin ñaꞌa kuaꞌa xeen ñayii ka kuꞌu ndevaꞌa‑ni kueꞌe ma,
te yukan ni ndasavaꞌa ya i.
3 Te jaku tee ka kuu fariseo ma,
ni ka jan tuꞌva de ya,
sukan‑vaꞌa jin kototnuni de ya,
te ka jikan‑tnuꞌu de ya nú vaꞌa‑ni ja in tee te xndoo de ñasiꞌi de ma,
nú yika‑ni ja kuni de ja saꞌa de ña sukan.
4 Te Jesús ma,
ni ndakoneꞌe ya:
―¿Ñatuu jin kaꞌvi‑ka ni nuu saꞌa káꞌan tnuꞌu Suꞌsi ma ja kivi ni saꞌa ya ñayii ma,
te “tee jiꞌin ñaꞌa ni saꞌa ya” ma?
5 Te káꞌan tna ya ja:
“Chukan kúu ja tee ma,
xndoo de yuva de ma jiꞌin siꞌi de ma,
te kueka tnaꞌa de jiꞌin ñasiꞌi de ma,
te nduu de ma jin ko kuu in‑nka‑ni ñayii ma.”
6 Chukan kúu ja masu uu ñayii ka kuu‑ka i chi in‑nka‑ni ñayii ka kuu nduu i ma.
Te chukan kúu ja ñayii ma,
másu ko ndasasiin i ja ni xtnatnaꞌa Suꞌsi ma ―kúu ya jiñaꞌa ya.
7 Te ka jiñaꞌa de:
―Nusaa,
te ¿navaꞌa Moisés ma,
ni kachi de ja kuu xndoo tee ma ñasiꞌi de ma,
te kuaꞌa de in tutu nuu káꞌan ja jâ ni xndoo de ña ma?
―ka kuu de ka jiñaꞌa de.
8 Sani te Jesús ma,
jiñaꞌa ya:
―Kuechi ja inusoꞌo ka ndaa ni a,
te Moisés ma,
ni kachi de ja kuu jin xndoo ni ñasiꞌi ni ma.
Kovaa onde xinañuꞌu ma nuu ni saꞌa Suꞌsi ma ñayii ma,
te masu sukan ni jani ini ya ma.
9 Te káꞌan sa nuu ni ja nú ñatuu ni kivi nduu ñasiꞌi in tee ma jiꞌin in‑ka tee ma,
te nú xndoo de ña ma te ndatnandaꞌa de jiꞌin in‑ka ñaꞌa ma,
jâ ni jiso kuechi de,
vaa sukan ka saꞌa tee ka kivi nduu jiꞌin in‑ka ñaꞌa ma,
sukan ni saꞌa tna de ma ―kúu ya jiñaꞌa ya.
10 Te ka jiñaꞌa tee ka ndikin ya ma:
―Nú sukan ko kuu tee ma jiꞌin ñasiꞌi de ma,
saa‑nka nú ma tnandaꞌa o ―ka kuu de ka jiñaꞌa de.
11 Sani te jiñaꞌa ya:
―Masu ndaka ñayii ma,
ka iyo i ja jin kandija i tnuꞌu yaꞌa,
yika‑ni ja ñayii chíndee ñaꞌa Suꞌsi ma ja jin jakuꞌni ini i ma.
12 Vaa ka iyo tee ja onde chii siꞌi de ma,
jâ ve koo de ja masu jin tnandaꞌa de ma,
te ka iyo tee ja kuechi ñayii ma,
te masu kuu jin tnandaꞌa de,
te ka iyo ñayii ja ni ka jani ini i ja masu jin tnandaꞌa i,
ja kuechi ja jin kunukuechi ñukuun i nuu Suꞌsi iya iyo andivi ma.
Te nú na in iyo ja saꞌa i saꞌa,
te kuán‑taꞌvi i,
te kúnukuechi vaꞌa i ―kúu ya jiñaꞌa ya.
Jesús ma, ni kaxtnuꞌu ya naxe ko kuu in ñayii sana kivi i nuu tatnuni Suꞌsi ma
13 Ni jan koo i jiꞌin suchi kuechi ma nuu Jesús ma,
sukan‑vaꞌa sonee ya ndaꞌa ya siki suchi kuechi ma te kakan‑taꞌvi ya nuu Suꞌsi ma ja jin kuu i.
Te tee ka ndikin ya ma,
ka ndonda de nuu ñayii ni jan koo jiꞌin suchi kuechi ma.
14 Kovaa Jesús ma,
jiñaꞌa ya:
―Jin kuaꞌa ni tnuꞌu,
te kí koo maa suchi kuechi a,
te máko jin kaꞌnu ndee ni,
chi vaa sukan ka jani vii ka jani vaꞌa ini suchi kuechi a,
sukan jiniñuꞌu ja jin ko saꞌa jin ko kuu ñayii jin kivi koo nuu tatnuni Suꞌsi ma ―kúu ya jiñaꞌa ya.
15 Te ni sonee ya ndaꞌa ya siki i ma ja na jin kutaꞌvi i ja vii ja vaꞌa.
Sani te kuaꞌan ya.
Sukan yii ja ndaniꞌi taꞌvi ñayii ndí ini xeen‑ka xuꞌun i ma
16 Sani te in tee jaa,
ni jan tuꞌva de Jesús ma,
te jiñaꞌa de:
―Teskuaꞌa,
ndijin ja saꞌa ni ja vaꞌa,
kaxtnuꞌu ni nde a vaꞌa saꞌa sa,
sukan‑vaꞌa ndaniꞌi taꞌvi sa te koteku sa ni‑kani ni‑jika ―kúu de jiñaꞌa de.
17 Te Jesús ma,
jiñaꞌa ya:
―¿Navaꞌa jikan‑tnuꞌu ni nuu sa siki ja vaꞌa ma?
Masu na in‑ka saꞌa ja vaꞌa chi maa in‑ni Suꞌsi ma.
Kovaa nú kúni ni ja ndaniꞌi taꞌvi ni te koteku ni ni‑kani ni‑jika,
te kandija ni ndaka sukan ni tatnuni Suꞌsi ma ―kúu ya jiñaꞌa ya.
18 Te jiñaꞌa de:
―¿Nde tnuꞌu kandija sa?
―kúu de jiñaꞌa de.
Te Jesús ma,
jiñaꞌa ya:
―Másu ko kaꞌni ni ni‑in ñayii.
Másu ko kivi nduu ni jiꞌin in‑ka ñaꞌa ma.
Másu ko sakuiꞌna ni.
Másu ko kaꞌan tnuꞌu ni siki in‑ka ñayii ma.
19 Kava respetu ni nuu yuva ni ma jiꞌin nuu siꞌi ni ma.
Kutoo ni tnaꞌa ni ma,
sukan kutoo ni maa ni ma ―kúu ya jiñaꞌa ya.
20 Te tee yukan,
jiñaꞌa de:
―Teskuaꞌa,
ndaka chaꞌa chi jâ saꞌa ndiꞌi sa.
¿Te kúni‑ka in‑ka ja saꞌa sa?
―kúu de jiñaꞌa de.
21 Te Jesús ma,
jiñaꞌa ya:
―Nú kúni ni ja saꞌa ndiꞌi ni ndaka sukan kúni Suꞌsi ma,
te kuáꞌan ni,
te xiko ni ndaka ja nevaꞌa ni ma,
te kuaꞌa ni ñayii ka kundaꞌvi ma.
Te sukan,
te xiku ko kuu ni andivi ma.
Sani te kii ni,
te kondikin ñaꞌa ni ―kúu ya jiñaꞌa ya.
22 Ja ni jinisoꞌo de sukan jiñaꞌa ya ma,
te xixii‑nka kuan noꞌo de,
vaa xiku xeen kúu de ma.
23 Te Jesús ma,
jiñaꞌa ya tee ka ndikin ya ma:
―Ja ndaa káꞌan sa nuu ni a ja yii xeen kúu ja in tee kuxiku ma,
te kivi de nuu tatnuni Suꞌsi ma.
24 Te ndákaꞌan sa nuu ni in‑ka tuku jichi ja yachi‑ka kuu kivi in kiti kúu camellu ma in yavi xuu yiki tiku ma,
sana ja in ñayii kúu xiku ma,
te kuu kivi i nuu tatnuni Suꞌsi ma ―kúu ya jiñaꞌa ya.
25 Te tee ka ndikin ya ma,
nuu ni ka jinisoꞌo de sukan ma,
te ni ka saꞌvi xeen‑nka ini de,
te ka kaꞌan maa de:
―¿Na in kuu ndaniꞌi taꞌvi ja sukan?
―ka kuu de ka kaꞌan de.
26 Te ndeꞌya Jesús ma de,
te jiñaꞌa ya:
―Yii kúu jani ini ñayii ma.
Kovaa maa Suꞌsi ma chi ñatuu nawa iyo ja yii ja ma kuu saꞌa ya ―kúu ya jiñaꞌa ya.
27 Pedro ma,
ni ndakoneꞌe de:
―Saña chi ndaka ja ka nevaꞌa sa ma ni ka xndoo sa,
te ni ka ndikin ñaꞌa sa.
¿Te iyo ja jin ndaniꞌi‑taꞌvi sa?
―kúu de jiñaꞌa de.
28 Te Jesús ma,
jiñaꞌa ya:
―Ja ndaa ja ndaa káꞌan sa ja kivi ndujaa ñuu ñayivi ya,
kivi ndenda sa ja kúu sa iya vee ñayivi ñuu ñayivi a,
te kunukoo sa nuu iyo jayiñuꞌu sa ma,
te ndijin tna ja ka ndikin ñaꞌa ni a,
suni koo uxi uu nuu jin kunukoo ndi‑in ndi‑in ni ja jin kaꞌnde ni tniñu nuu ndi‑uxi uu jichi ñayii ñuu Israel ya.
29 ’Te ndevaꞌa‑ni na in ni xndoo veꞌe i ma,
ñani i ma,
kuꞌva i ma,
kuꞌu i ma,
jiꞌin yuva i ma,
siꞌi i ma,
ñasiꞌi i ma,
saꞌya i ma,
jiꞌin ñuꞌú i ma,
ja kuechi ja ndikin ñaꞌa i saña ma chi ndaniꞌi i viꞌi‑ka cientu jichi sana ja ni xndoo i ma,
te ndaniꞌi‑taꞌvi i,
te koteku i ni‑kani ni‑jika.
30 Te ñayii ka ndanuu‑ka ma te ka jani ini i ja xinañuꞌu‑ka ka kuu i vitna ma,
chi nuu Suꞌsi ma chi sandiꞌi‑nka jin ko kuu i,
te ñayii ka jani ini ja masu ñayii ka ndanuu ka kuu i,
te sandiꞌi‑nka ka kuu i vitna ma chi suu i jin ko kuu ñayii xinañuꞌu‑ka nuu Suꞌsi ma ―kúu ya jiñaꞌa ya.