Sukan ni ka jaꞌni i Juan tee skuandute ñayii ma
14
Te kivi yukan Herodes tee kúu tetrarca ma,
ni jinisoꞌo de ja sukan saꞌa Jesús ma.
2 Te jiñaꞌa de nuu tee ka jinukuechi nuu de ma:
―Tee yaꞌa kúu Juan tee skuandute ñayii ma,
te ni ndateku de neꞌun ñayii ni ka jiꞌi ma,
te chukan kúu ja iyo tnuꞌu ndee tnuꞌu ndatnu nuu de a ―kúu de jiñaꞌa de.
3 Vaa Herodes ma kúu tee ni tnii Juan ma,
te ni juꞌni de Juan ma jiꞌin yoꞌo kaa,
te ni chinee de tee ma vekaa ma,
ja kuechi ñaꞌa kúu Herodías ma,
ñasiꞌi ñani de tee kúu Felipe ma.
4 Vaa Juan ma,
ni yo jiñaꞌa de:
―Masu vaꞌa‑ni ja koo ni jiꞌin ñaꞌa jiña,
vaa téku‑ka yii ña ma ―ni yo kuu de ni yo jiñaꞌa de.
5 Te Herodes ma,
ni yo kuni de ja kaꞌni de tee ma,
kovaa ni yo yuꞌu de ñayii ñuu ma,
vaa ka kaꞌan i ja Juan ma,
in tee ni yo ndakaxtnuꞌu tnuꞌu ni yo waꞌa Suꞌsi ma kúu de.
6 Kovaa kivi yikuu viko kivi ndíꞌi Herodes ma kuiya ma,
te ni kivi sasiꞌi Herodías ma nuu ka iyo ndaka ñayii ma,
te ni jitajaꞌa i,
te ni jatna ini xeen Herodes ma.
7 Te chukan kúu ja ni skuiso de ja kuaꞌa de ndaka nawa kakan maa i.
8 Te suchi siꞌi ma,
jâ ni skaꞌan ñaꞌa siꞌi i ma xinañuꞌu‑ka,
te jiñaꞌa i:
―Taa ni xini Juan tee skuandute ñayii ma in nuu koꞌo ―kúu i jiñaꞌa i.
9 Sani te rey ma,
ni kuxii ini de,
kovaa kuechi ja jâ ni skuiso de ma te ni ka jinisoꞌo ñayii ka nukoo jiꞌin de nuu mesa ma,
chukan kúu ja ni jiñaꞌa de ja jin saꞌa i sukan jiñaꞌa suchi siꞌi ma.
10 Te ni tatnuni de ja jin koo i vekaa ma jin xtandoso i xini Juan ma.
11 Te ni ki koo i ni ki xsiaꞌa i koꞌo ñunee xini Juan ma nuu ndaꞌa suchi siꞌi ma,
te ni jan xsiaꞌa i nuu siꞌi i ma ja na kuni ña.
12 Sani te ni ki koo tee ni ka yo ndikin Juan ma,
te ni ka ndakeꞌen de ñundeꞌyu tee ma,
te ni ka chuꞌu de,
te kuan koo de,
te ni ka ndakaxtnuꞌu de nuu Jesús ma ja sukan ni kuu ma.
Ni saꞌa Jesús ma ja ni ndukuaꞌa xtatila ma jiꞌin tiaka ma, te ni kanda ja ni ka jaa uꞌun mil tee
13 Te Jesús ma,
nuu ni jinisoꞌo ya ja sukan ni jiꞌi Juan ma,
te kuaꞌan ya jiꞌin tee ka ndikin ya ma in nuu barcu in nuu kuu jin koo‑ni maa de jiꞌin ya.
Kovaa kuaꞌa ñayii ni ka jinisoꞌo ja kuan koo de jiꞌin Jesús ma.
Sani te ni ka ke koo i ñuu i ma,
te ni ka ndikin i ya,
te kuan koo i ichi kuaꞌan ya ma.
14 Ja ni nuu Jesús ma nuu barcu ma,
te ni jini ya kuaꞌa xeen ñayii ma,
te ni kundaꞌvi ini ya i,
te ni ndasavaꞌa ya ñayii ka kuꞌu kuan koo jiꞌin i ma.
15 Kovaa nuu ve kukuee‑ka ma,
te tee ka ndikin ya ma,
ni ka jan tuꞌva de ya,
te ka jiñaꞌa de:
―Jâ ve kukuee,
te nuu ka iyo o ya chi in nuu masu nawa iyo kuiti kúu.
Ndakuan‑taꞌvi ni nuu ñayii a,
sukan‑vaꞌa jín koo i ichi yuꞌu ñuu a,
na jin kuaan i ja jin kaa i ―ka kuu de ka jiñaꞌa de.
16 Kovaa Jesús ma,
ni ndakoneꞌe ya:
―Masu jiniñuꞌu ja jin koo i.
Jin kuaꞌa maa ni ja jin kaa i ―kúu ya jiñaꞌa ya.
17 Te ni ka ndakoneꞌe de:
―Yika‑ni ja uꞌun‑ni xtatila jiꞌin uu‑ni tiaka ka nevaꞌa sa ―ka kuu de ka jiñaꞌa de.
18 Te jiñaꞌa ya:
―Neꞌe koo jiꞌin ni nuu iyo sa ya ―kúu ya jiñaꞌa ya.
19 Sani te ni tatnuni ya ja jin kunukoo ñayii ma nuu yiꞌi ma.
Sani te ni keꞌen ya uꞌun xtatila ma jiꞌin uu tiaka ma,
te ni ndonenuu ya ichi andivi ma,
sukan‑vaꞌa ndakuan‑taꞌvi ya nuu Suꞌsi ma ja iyo ja jin kaa de ma,
te ni taꞌvi ya xtatila ma.
Sani te ni waꞌa ya tee ka ndikin ya ma,
te ni ka waꞌa de ja jin kaa ñayii ma.
20 Ndaka ñayii ma,
ni ka jaa i onde ni ka ndutu chii i ma.
Te suꞌva ni ndoo‑ka,
te ni ka ndachitu uxi uu‑ka chika taꞌvi xtatila ma jiꞌin tiaka ma.
21 Te ñayii ni ka jaa ma chi uꞌun mil tee ma ni yo kúu.
Te masu ni ka kaꞌvi i ñaꞌa ma jiꞌin suchi kuechi ma.
Jesús ma, ni jika ya nuu ndute mar ma
22 Ni jinu,
te ni saꞌa Jesús ma ja tee ka ndikin ya ma,
jin koxtnuu de jin nda koo de nuu barcu ma,
sukan‑vaꞌa xiꞌna‑ka de jin yaꞌa in‑ka yuꞌu mar ma,
sana kiꞌin ya nani ndakuan‑taꞌvi ya nuu ñayii ma.
23 Te nuu ni jinu ni ndakuan‑taꞌvi ya nuu ñayii ma,
te kuaꞌan maa in‑ni ya ichi yuku ma,
ja ndatnuꞌu ya jiꞌin Yuva ya Suꞌsi ma.
Te nuu ni kunee ma,
te ni kendoo maa in‑ni ya ichi yuku ma.
24 Te barcu ma chi jâ ni kujika tnu kuan noꞌo tnu nuu ndute ma.
Te jánee jándita tnu saꞌa nuu ndute ma,
vaa kajin yiꞌi ma chi suꞌva vee i ichi nuu kuan nu koo de jiꞌin tnu ma.
25 Nuu ve ndii ma,
te Jesús ma,
jika ya kuaꞌan ya nuu ndute ma ichi nuu ka iyo de ma.
26 Kovaa nuu ni ka jini de ya ja jika ya nuu ndute ma,
te ni ka yuꞌu de,
vaa ka kaꞌán de ja in ñiꞌna kúu,
te ni ka kayuꞌu de ja ni ka yuꞌu de.
27 Kovaa sani te ni kaꞌan ya,
te jiñaꞌa ya:
―Jin konevaꞌa ni tnuꞌu ndee tnuꞌu ndatnu chi maa sa kúu,
te má jin koyuꞌu ni ―kúu ya jiñaꞌa ya.
28 Kovaa Pedro ma chi ni ndakoneꞌe de:
―Señor,
nú maa ni kúu,
tatnuni ni ja na kuu kaka sa nuu ndute a te jan tuꞌva ñaꞌa sa ―kúu de jiñaꞌa de.
29 Te Jesús ma,
jiñaꞌa ya:
―Neꞌe ni.
Sani te Pedro ma chi ni nuu de nuu barcu ma,
te jika de nuu ndute ma kuaꞌan de nuu iyo Jesús ma.
30 Kovaa ni jini de ja yiꞌi xeen kajin ma,
te kuan kêe de nuu ndute ma nkuu,
te ni kayuꞌu de jiñaꞌa de:
―¡Señor!
¡Má kuaꞌa ni tnuꞌu ja kêe sa nuu ndute a!
―kúu de jiñaꞌa de.
31 Te ora yukan Jesús ma,
ni skuili ya ndaꞌa ya ma,
te ni ndatnii ya Pedro ma,
te jiñaꞌa ya:
―¡Ndijin chi vala‑ni kúkanu ini ñaꞌa ni!
¿Navaꞌa ñatuu ûni ni kukanu ini ñaꞌa ni?
―kúu ya jiñaꞌa ya.
32 Sani te ni ka nda koo ya jiꞌin de nuu barcu ma,
te ni ndukuee kajin yiꞌi ma.
33 Te tee ka iyo ini barcu ma,
ni ka ndachiñuꞌu de ya,
te ka jiñaꞌa de:
―Ja ndaa kúu ja Saꞌya Suꞌsi ma kúu ni ―ka kuu de ka jiñaꞌa de.
Jesús ma, ni ndasavaꞌa ya ñayii ka kuꞌu ja ka iyo i ñuu Genesaret ma
34 Ni ka yaꞌa de jiꞌin ya nuu ndute ma,
te ni ka kenda koo de ñuu Genesaret ma.
35 Te tee ñuu yukan,
ni ka ndakuni de Jesús ma,
te ni ka kaxtnuꞌu de nuu ñayii ni‑kaꞌnu ñuu yukan,
te ni ki koo ñayii ma jiꞌin ndaka ñayii ka kuꞌu ma.
36 Te ûni ka jikan‑taꞌvi xeen i nuu ya ja na kuaꞌa ya tnuꞌu ja na jin kakiꞌi ndaꞌa ñayii ka kuꞌu ma visi yika ja yuꞌu saꞌma ndii ya ma te jin nduvaꞌa i.
Te ndaka ñayii ni ka yo kakiꞌi ndaꞌa yuꞌu saꞌma ndii ya ma chi ni ka yo nduvaꞌa i.
Jesús camina sobre el agua (Mateo 14.22-36)