Ni kaxtnuꞌu Jesús ma nde a kúu ja saꞌa ja ñatuu iyo vii iyo ndoo ini anua ñayii ma nuu Suꞌsi ma
7
Te ni ka kenda koo tee ñuu Jerusalén ma,
tee ka skuaꞌa tnuꞌu ni kaxtnuꞌu Moisés ma.
Te ni ka jan tuꞌva de jiꞌin tee ka kuu fariseo ma nuu iyo Jesús ma.
Marcos 7:1-23
2 Tee yaꞌa chi ja ni ka jini de ja sava tee ka ndikin Jesús ma,
ñatuu ni ka ndandaꞌa de sukan ka saꞌa ñayii judío ma,
te ni ka jaa de xita ma.
Chukan kúu ja ni ka kaꞌan de tnuꞌu tee ma,
ja naku ñatuu ka saꞌa de sukan ka saꞌa maa de ma.
3 (Chi vaa tee ka kuu fariseo ma,
jiꞌin ndaka tee ka kuu judío ma,
ka ndikin de ja ni ka yo saꞌa tnaꞌa o tee janaꞌa‑ka ma,
ja ma kuu jin kaa de xita,
nú masu ja xiꞌna‑ka jin ndandaꞌa de sukan ni ka yo kaxtnuꞌu tnaꞌa o tee janaꞌa‑ka ma.
4 Te nú ka ndenda koo de ja jan koo de nuyaꞌvi ma,
te ma kuu jin kaa de xita,
nú masu ja xinañuꞌu‑ka jin ndandaꞌa de,
vaa ka jani ini de ja kuechi ja ni ka ndatnaꞌa de jiꞌin ñayii ma,
te ni ka ndutneꞌe de nuu Suꞌsi ma.
Chukan kúu in ja ka saꞌa de ma,
kovaa sukan ka iyo kuaꞌa xeen‑ka ja ka saꞌa de ma,
te suni sukan ka saꞌa de jiꞌin ja ka jatniñu de ma,
ja ka ndakate de vasu de ma,
jiꞌin tindoꞌo de ma,
jiꞌin kisi kaa de ma,
jiꞌin jito nuu ka kixi de ma,
te ka jani ini de ja sukan,
te jin koo vii de nuu Suꞌsi ma.)
5 Chukan kúu ja tee ka kuu fariseo ma,
jiꞌin tee ka skuaꞌa tnuꞌu ni kaxtnuꞌu Moisés ma,
ka jikan‑tnuꞌu de Jesús ma:
―¿Navaꞌa tee ka ndikin ñaꞌa ndijin a,
ñatuu ka ndikin de sukan ni ka yo saꞌa tnaꞌa o tee janaꞌa‑ka ma,
vaa ñatuu ni ka ndandaꞌa de,
te ni ka jaa de xita ma?
―ka kuu de ka jiñaꞌa de.
6 Jesús ma,
ni ndakoneꞌe ya:
―Tee kúu Isaías ma tee ni yo ndakaxtnuꞌu tnuꞌu ni yo waꞌa Suꞌsi ma chi ja ndandaa‑ni ni yo ndakaꞌan de ja masu ka saꞌa ni sukan ka kaꞌan ni a,
vaa saꞌa ni tee de ma:
Ñayii yaꞌa chi ñií yuꞌu‑ni i a ka chiñuꞌu ñaꞌa i,
kovaa ini anua i a chi jika‑ni ka iyo i nuu sa a.
7 Masu nde jiniñuꞌu ja ka chiñuꞌu ñaꞌa i ma,
vaa ja ka kaxtnuꞌu i ma,
ndimaa ja ka tatnuni ñayii ma‑ni kúu.
8 Sukan ni kaꞌan de ja jin kuu ni,
chi vaa ka xndoo ni ja ni tatnuni Suꞌsi ma,
te ka jatanuu ni ka ndikin ni sukan ka saꞌa ñayii ma‑ni,
ja jin ndondoo tindoꞌo ni ma jiꞌin vasu ja jin kuꞌun ja jin koꞌo ni ma,
te kuaꞌa‑ka tnaꞌa chaꞌa ka saꞌa ni ―kúu ya jiñaꞌa ya.
9 Te jiñaꞌa tna ya:
―¿Ka jani ini ni ja vaꞌa‑ni ja ka jatanuu ni sukan ka saꞌa maa ni a,
te ka xtandiyo ni ja ni tatnuni Suꞌsi ma?
10 Te tee kúu Moisés ma,
ni kaꞌan de:
“Jin kava respetu ni nuu yuva ni ma jiꞌin nuu siꞌi ni ma”,
te “Ñayii káꞌan uꞌvi ja kuu yuva i ma,
xi káꞌan uꞌvi i ja kuu siꞌi i ma,
ñayii yukan chi uni kûu i.”
11 Kovaa maa ni chi ka kaꞌan ni ja in ñayii chi kuu kuñaꞌa i nuu yuva i ma,
xi nuu siꞌi i ma:
“Ma kuu chindee‑ka ñaꞌa sa,
chi vaa ndaka ja nevaꞌa sa ya chi corbán kúu i.”
Te tnuꞌu corbán ma chi kúni kaꞌan “ja jâ ni ndakuaꞌa ndiꞌi sa nuu Suꞌsi ma”.
12 Te suni ka kaꞌan ni ja nú in ñayii káꞌan sukan ma chi masu nawa kúu‑ka ja chindee‑ka i yuva i ma,
xi siꞌi i ma.
Te sukan,
te ka ndaxsama ni ja ni tatnuni Suꞌsi ma ja ko koto o yuva o ma jiꞌin siꞌi o ma.
13 Te ndaka tnuꞌu yaꞌa ni ka ndakaxtnuꞌu ni nuu ñayii ma.
Te iyo kuaꞌa xeen‑ka tnuꞌu tnaꞌa chaꞌa ja ka saꞌa ni a.
Te sukan,
te ka xnaa ni ja ni tatnuni Suꞌsi ma te ka jatanuu ni ja ka kaꞌan ñayii ma‑ni ―kúu ya jiñaꞌa ya.
14 Sani te Jesús ma,
ni kana ya ñayii ma,
te jiñaꞌa ya:
―Jin koninisoꞌo ndaka ni,
te jin jakuꞌni ini ni.
15 Ñatuu nawa kívi yuꞌu o a ja satneꞌe i ini anua o a,
suꞌva ndaka ja uꞌvi ñuꞌu ini ñayii ma ja saꞌa i ma kúu ja saꞌa ja ñatuu iyo vii iyo ndoo ini anua ñayii ma nuu Suꞌsi ma.
16 Nde ni iyo soꞌo ja koninisoꞌo ni,
te koninisoꞌo vaꞌa ni ―kúu ya jiñaꞌa ya.
17 Te nuu ni xndoo Jesús ma ñayii ma te ni kivi ya ini veꞌe ma,
te ka jikan‑tnuꞌu tee ka ndikin ya ma:
―¿Nawa kúu ja ni kaxtnuꞌu ni ma?
―ka kuu de ka jiñaꞌa de.
18 Te jiñaꞌa ya:
―¿Te ni ndijin ñatuu ni ka jakuꞌni ini ni?
¿Te ñatuu ka jakuꞌni ini ni ja masu ja jaa o ma kúu ja saꞌa siin ñaꞌa i nuu Suꞌsi ma?
19 Chi vaa masu kívi i ini anua o a chi chii o a kée i,
te jínu,
te ndée i ―kúu ya jiñaꞌa ya.
Chukan kúu ja Jesús ma chi káꞌan ya ja ndaka ja jaa o ma chi ka ndaa vii i.
20 Te ni jinu,
te ni kaꞌan ya:
―Ndaka ja uꞌvi ñuꞌu ini anua ñayii ma,
chukan kúu ja satneꞌe ñaꞌa i nuu Suꞌsi ma.
21 Vaa onde ini anua ñayii ma ka ñuꞌu ndaka ja uꞌvi ma,
te chukan kúu ja kénda ja ka jani ini i ma,
ja jin kivi nduu i jiꞌin ndi‑in ndi‑in ñayii ñatuu ni ka tnandaꞌa jiꞌin i ma,
jiꞌin ja jin sakuiꞌna i ma,
jiꞌin ja jin kaꞌni tnaꞌa i ma,
22 jiꞌin ja ñayii ni tnandaꞌa ma,
te ka kivi nduu i jiꞌin in‑ka ñayii ma,
jiꞌin ja ka ndiyo ini i ja jin konevaꞌa i ndaka ndatniñu ma,
jiꞌin ja ka saꞌa i ndaka ja uꞌvi ma,
jiꞌin ja ka xndaꞌvi tnaꞌa i ma,
jiꞌin ja ka kaꞌan kini i ma,
jiꞌin ja ka kukueñu ini i ma,
jiꞌin ja ka kaꞌan i tnuꞌu ñayii ma,
jiꞌin ja ka jani ini i ja maa in‑ni i ka kuu ja ka ndanuu‑ka ma,
jiꞌin ja ñatuu ka ndasaꞌa i kuenda ja uꞌvi ka saꞌa i ma.
23 Ndaka tnuꞌu yaꞌa ka kuu ja ka ñuꞌu ini anua ñayii ma,
te ndaka ja uꞌvi yukan kúu ja ka saꞌa ja kútneꞌe ini anua ñayii ma nuu Suꞌsi ma ―kúu ya jiñaꞌa ya.
In ñaꞌa masu judía ma, ni kukanu ini ña ja Jesús ma chi kuu chindee ñaꞌa ya
24 Sani te kuaꞌan Jesús ma ichi ñuu nani Tiro ma.
Te ni kivi ya in veꞌe,
vaa kúni ya ja ñatuu na in kuni ñaꞌa,
kovaa ñatuu ni kuu chuꞌu ya.
Marcos 7:24-37
25 Vaa ni jini yachi‑ni siꞌi in suchi yinee ñaꞌa in tachi,
te ni jaꞌan ña,
te ni jinkuiñi jiti ña nuu jaꞌa Jesús ma.
26 Te ñaꞌa yaꞌa chi masu ñaꞌa judía ma kúu ña chi ñaꞌa ñuu Sirofenicia ma kúu ña.
Te ni jikan‑taꞌvi ña nuu Jesús ma ja na keneꞌe ya tachi yinee sasiꞌi ña ma.
27 Kovaa Jesús ma,
jiñaꞌa ya:
―Kuaꞌa ni tnuꞌu ja xiꞌna‑ka suchi kuechi ma jín kaa,
chi vaa masu vaꞌa ja xtandee o ja ka jaa suchi kuechi ma te kuaꞌa o ja jin kaa la‑ina ma ―kúu ya jiñaꞌa ya.
28 Te ni ndakoneꞌe ña:
―Kovaa,
Señor,
onde la‑ina ma ka jaa ja ka ndaxtutu ti ja ka sunkava suchi kuechi ma ―kúu ña jiñaꞌa ña.
29 Jesús ma,
jiñaꞌa ya:
―Vaꞌa‑ni ni kaꞌan ni.
Kuán noꞌo ni chi tachi ni yinee sasiꞌi ni ma,
jâ ni kee i ―kúu ya jiñaꞌa ya.
30 Te nuu ni ndenda ñaꞌa yukan veꞌe ña ma,
ni ndaniꞌi ña sasiꞌi ña ma,
kátuu i nuu jito ma,
kovaa tachi ma chi jâ ni kee ñaꞌa i,
te ni nduvaꞌa i.
Ni ndasavaꞌa Jesús ma in tee soꞌo te káꞌan titete de
31 Ni ndee Jesús ma ñuu Tiro ma,
te ni ndayaꞌa ya ichi ñuu Sidón ma jiꞌin ichi ñuu Decápolis ma,
kuan noꞌo ya yuꞌu mar Galilea ma.
32 Te yukan ni ka jan xsiaꞌa i in tee soꞌo te kaꞌan titete de,
te ka jikan‑taꞌvi i ja na sonee ya ndaꞌa ya siki de ma.
33 Te Jesús ma,
ni jaꞌan ya jiꞌin de in lado nuu ñatuu na ñayii ka iyo.
Te ni skivi ya xnindaꞌa ya ma soꞌo de ma,
te ni chiꞌi ya ndute sii ya ma xnindaꞌa ya ma,
te ni tenee ya yaa de ma.
34 Te ndeꞌya ya ichi andivi ma,
te ni jaka ini ya,
te jiñaꞌa ya tee yukan:
―Efata ―kúu ya jiñaꞌa ya.
Te tnuꞌu Efata ma kúni kaꞌan “Ndanune”.
35 Te ora yukan,
te ni ka ndanune soꞌo de ma,
te ni ndatnana yaa de ma,
te ni kuu ni ndakaꞌan vaꞌa de.
36 Jesús ma,
ni tatnuni ya ja máko jin kuñaꞌa de ni‑in ñayii ma.
Kovaa visi ni jiñaꞌa,
ni jiñaꞌa ya ja máko jin ndakani de ma,
kovaa suꞌva ni ka yo ndakani,
ni ka yo ndakani de nuu ñayii ma.
37 Ûni ni ka saꞌvi‑nka ini ndaka ñayii ma,
te ka kaꞌan i:
―Ndaka‑ni kúu saꞌa de.
Onde ñayii inusoꞌo ma,
saꞌa de ja kúu ka ndakunisoꞌo i,
te ñayii ñatuu kúu jin kaꞌan ma,
saꞌa de ja kúu ka ndakaꞌan i ―ka kuu i ka kaꞌan i,
vaa ñatuu ka ndakunitnuni i ja Suꞌsi ma kúu ya.