Jesús ma, ni jitotnuni ñaꞌa tachi ma
4
Jesús ma,
ûni iyo ndija ya jiꞌin Xtumani Ndios ma,
te nuu ni ndakokuiñi ya ja ni jaꞌan ya yute Jordán ma,
te Xtumani Ndios ma,
ni jan xsiaꞌa ya ya ichi nuu masu nawa iyo kuiti ma.
2 Te yukan ni iyo ya uu xiko (40) kivi.
Te tachi ma,
ni kenda i ja ni jitotnuni i ya,
te ñatuu nawa ni jaa ya ndaka kivi yukan.
Chukan kúu ja ni kejaꞌa kókon ya.
3 Sani te tachi ma,
jiñaꞌa i:
―Nu ndija ja Saꞌya Suꞌsi kúu ni,
te tatnuni ni ja yuu yaꞌa,
nduu i xtatila ja kaa ni ―kúu i jiñaꞌa i.
4 Jesús ma,
ni ndakoneꞌe ya:
―Tnuꞌu Suꞌsi a káꞌan:
“Masu maa in‑ni ja kaa ja koꞌo o ma saꞌa ja koteku o chi suꞌva ja kandija o ndaka tnuꞌu káꞌan káchi Suꞌsi ma” ―kúu ya jiñaꞌa ya.
5 Sani te tachi ma,
ni jaꞌan i jiꞌin ya in nuu sukun‑ka,
te ni kaxtnuꞌu i ni‑kaꞌnu ñuu ñayivi a,
6 te jiñaꞌa i:
―Saña ni ndaniꞌi ndaka ja iyo ñuu ñayivi a jiꞌin jayiñuꞌu iyo a,
vaa maa sa tátnuni,
te kuaꞌa sa na in kúni sa ja kuaꞌa sa,
te kuu taa sa.
7 Nuna jinkuiñi jiti ni nuu sa ja ndachiñuꞌu ñaꞌa ni,
te ndaka ko kuu kuenda maa ni ―kúu i jiñaꞌa i.
8 Jesús ma,
ni ndonda ya nuu tachi ma,
te saꞌa jiñaꞌa ya:
―Kuán ndiyo kiꞌin ro,
vaa tnuꞌu Suꞌsi a káꞌan:
“Maa in‑ni Suꞌsi Iya Tátnuni ma ndachiñuꞌu ro,
te kunukuechi ro nuu maa in‑ni ya” ―kúu ya jiñaꞌa ya.
9 Sani te tachi ma,
ni jan xsiaꞌa i ya ñuu Jerusalén ma,
te ni skaa i ya in nuu sukun xini veñuꞌu kaꞌnu ma,
te jiñaꞌa i:
―Nu ndija ja Saꞌya Suꞌsi kúu ni,
onde yaꞌa,
te skee ni maa ni onde kunu ma,
10 vaa tnuꞌu Suꞌsi ma káꞌan:
Suꞌsi ma,
tatnuni ya nuu ángel ya ma ja jin ko koto ñaꞌa i,
te jin ndachituu ñaꞌa i
11 jiꞌin ndaꞌa i ma,
sukan‑vaꞌa ma jinu ni nuu in yuu
―kúu i jiñaꞌa i.
12 Jesús ma,
ni ndakoneꞌe ya:
―Suni tnuꞌu Suꞌsi a káꞌan:
“Masu kototnuni ro Suꞌsi ro Iya Tátnuni ma” ―kúu ya jiñaꞌa ya.
13 Nuu ña ni niꞌi‑ka tachi ma naxe kototnuni‑ka i Jesús ma,
te ni kujika i nuu ya,
te ndetu tuku i in‑ka jichi ja xtnaꞌa i ya.
Jesús ma, ni kejaꞌa ya tniñu ya ñuu Galilea ma
14 Jesús ma,
ni ndenda ya ñuu Galilea ma.
Te ûni iyo ndija ya jiꞌin Xtumani Ndios ma jiꞌin ya,
te ni‑kaꞌnu yuꞌu ñuu ma ka kaꞌan vii i ja kuu ya.
15 Te káxtnuꞌu ya ini veñuꞌu lilikin ndaka ñuu ma,
te ndaka i ni ka ndachiñuꞌu ya.
Jesús ma, saꞌa ni saꞌa ya ñuu Nazaret ma
16 Jesús ma,
kuaꞌan ya ñuu Nazaret ma,
ñuu nuu ni jaꞌnu ya ma.
Te in kivi ni tatnuni Suꞌsi ma ja ma jin satniñu ñayii ma,
ni kivi ya veñuꞌu luluu ma,
sukan ni yo jatna ini ya ja ko saꞌa ya ma.
Te ni ndokuiñi ya,
sukan‑vaꞌa kaꞌvi ya tnuꞌu Suꞌsi ma.
17 Te ni ka waꞌa i tutu ja ni tee tee kúu Isaías ma.
Ja ni ndakune ya ma,
te ni ndaniꞌi ya nuu saꞌa káꞌan ma:
18 Maa Xtumani Iya Tátnuni ma iyo siki sa a,
vaa ni saꞌa siin ñaꞌa ya,
sukan‑vaꞌa kiꞌin sa jin kaxtnuꞌu sa tnuꞌu vii tnuꞌu vaꞌa
nuu ñayii ka ndoꞌo ka neni nuu ja uꞌvi ma,
te ni tetniñu ñaꞌa ya ja kaxtnuꞌu sa naxe jin ndayaa ñayii ka ndesi vaꞌa ma,
te saꞌa sa ja jin ndundijin nuu ñayii inukuaa ma,
te ndaxsiaa sa ndaka ñayii ka ndoꞌo ka neni ja saꞌa ñaꞌa in‑ka ñayii ma,
19 jiꞌin ja kaxtnuꞌu sa ja jâ ni kenda kuiya vavaꞌa,
ja saꞌa Iya Tátnuni ma ja jin ndaniꞌi taꞌvi i.
20 Sani te Jesús ma,
ni ndakasi ya tutu ma,
te ni ndakuaꞌa ya nuu tee kúcargu veñuꞌu ma,
te ni nukoo ya.
Ndaka ñayii ka iyo yukan,
ka ndeꞌya i ya.
21 Te ni kejaꞌa ya káꞌan ya,
te jiñaꞌa ya:
―Vitna jâ ni kenda nuu ni a ja ko kuu sukan ndee tnuꞌu Suꞌsi a ―kúu ya jiñaꞌa ya.
22 Ndaka ñayii ma ka kaꞌan ja vaꞌa ja kuu Jesús ma,
te ni ka saꞌvi‑nka ini i ndaka ja vii saꞌa ya ma,
te ka jikan‑tnuꞌu tnaꞌa i:
―¿Masu tee yaꞌa kúu saꞌya José ma?
―ka kuu i ka kaꞌan i.
23 Jesús ma,
ni ndakoneꞌe ya:
―Ja ndaa kúu ja jin kaꞌan ni nuu sa:
“Tee tatna,
satatna ni maa ni.”
Te suni jin kaꞌan ni:
“Tnaꞌa ja ni ka jinisoꞌo sa ja ni saꞌa ni ñuu Capernaum ma,
te suni saꞌa tna ni ñuu ni a” ―kúu ya jiñaꞌa ya.
24 Te ni kaꞌan‑ka ya:
―Ja ndaa kúu ja ni‑in tee ndákaxtnuꞌu tnuꞌu ni waꞌa Suꞌsi a,
te jin ndakuan‑taꞌvi i de ñuu de ma.
25 Ja ndaa kúu ja ka iyo kuaꞌa ñaꞌa ñuu Israel ya ja ni ka jiꞌi yii ña ma,
te kivi ni iyo Elías ma tee ni yo ndakaxtnuꞌu tnuꞌu ni yo waꞌa Suꞌsi ma,
nuu ñatuu ni kuun savi uni kuiya yo sava ma,
te ni ka yo kokon xeen ñayii ni‑kaꞌnu ñuu ñayivi a.
26 Kovaa Elías ma,
ñatuu ni jaꞌan de nuu ni‑in ñaꞌa ñuu Israel ya ja ni ka jiꞌi yii ña ma sukan‑vaꞌa saꞌa Suꞌsi ma ja koo ja jin kaa ña ma,
yika‑ni ja nuu in ñaꞌa ñuu Sarepta ma,
yatni ñuu Sidón ma.
27 Suni ka iyo ñayii ñuu Israel ma ja ka kuꞌu i lepra kivi nuu ni iyo Eliseo ma,
kovaa masu na in ni nduvaꞌa,
yika‑ni ja Naamán ma,
tee ñuu Siria ma ―kúu ya jiñaꞌa ya.
28 Ja ni ka jinisoꞌo i sukan ma,
ndaka ñayii ka iyo ini veñuꞌu luluu ma,
ni ka ndakiti xeen ini i.
29 Ni ka ndokuiñi i,
te ni ka keneꞌe i ya ini ñuu ma,
ni jan koo i jiꞌin ya onde nuu yuku sukun‑ka ma,
yuku ndenee ñuu ma,
sukan‑vaꞌa onde sukun ma te jin skee i ya.
30 Kovaa Jesús ma,
ni ndee ya meꞌñu ñayii ma,
te kuaꞌan ya.
Ni ndasavaꞌa Jesús ma in tee yinee ñaꞌa in tachi
31 Jesús ma,
kuaꞌan ya ñuu Capernaum ma in ñuu maa Galilea ma.
Te in kivi ni tatnuni Suꞌsi ma ja ma jin satniñu ñayii ma kúu,
te káxtnuꞌu ya nuu ñayii ma.
32 Te ñayii ma,
ka saꞌvi‑nka ini i sukan káxtnuꞌu ya ma,
vaa káꞌan ya sukan káꞌan in ñayii tátnuni.
33 Ini veñuꞌu luluu ma iyo in tee yinee ñaꞌa in tachi,
te tachi ma,
káyuꞌu niniꞌi i jiñaꞌa i ya:
34 ―¡Kuáꞌan ni!
¿Navaꞌa kívi nduu ni nuu ka iyo saña,
Jesús iya vee ñuu Nazaret ma?
¿Vee ni ja xnaa ñaꞌa ni?
Saña chi jini ñaꞌa sa,
te jini sa ja iya ii vee nuu Suꞌsi ma kúu ni ―kúu i jiñaꞌa i.
35 Te ni ndonda ya nuu tachi ma,
te jiñaꞌa ya:
―Kasiyuꞌu,
te xndoo tee yaꞌa ―kúu ya jiñaꞌa ya.
Sani te tachi ma,
ni skana i tee yukan nuu ñuꞌú ma nuu ka iyo ndaka ñayii ma,
te ni kee i de,
te ñatuu na ja uꞌvi ni saꞌa i de.
36 Ndaka ñayii ma ni ka yuꞌu,
te ka kaꞌan ndi‑in ndi‑in i:
―¿Na tnuꞌu kúu chaꞌa?
Vaa tee yaꞌa chi ûni tátnuni de nuu tachi ma ja na jin ke koo i,
te ka ke koo i ―ka kuu ñayii ma ka kaꞌan i.
37 Te ni ka yo kaꞌan vaꞌa,
ni ka yo kaꞌan vii ñayii ma ja kuu Jesús ma ni‑kaꞌnu ñuu ma.
Jesús ma, ni ndasavaꞌa ya siꞌi xiso Simón Pedro ma
38 Jesús ma,
ni ndee ya ini veñuꞌu luluu ma,
te ni kivi ya ini veꞌe Simón Pedro ma.
Te siꞌi xiso Simón Pedro ma,
kuꞌu ña.
Yiꞌi xeen ñaꞌa kaꞌni,
te ka jikan‑taꞌvi i nuu Jesús ma ja na ndasavaꞌa ya ña.
39 Jesús ma,
ni jinkoo jiti ya nuu kátuu ña ma,
te ni ndonda ya nuu kaꞌni ma,
te kaꞌni ma,
ni ndee ñaꞌa i.
Sani te ni ndakoo ña,
te ni satuꞌva ñukuun ña nawa kaa ya jiꞌin ñayii ka iyo ma.
Jesús ma, ni ndasavaꞌa ya kuaꞌa ñayii ka kuꞌu
40 Nuu ve ñini ma ndaka ñayii ka nevaꞌa ñayii ka kuꞌu ndi‑in ndi‑in kueꞌe ma,
ni jan koo i nuu Jesús ma,
te ni sonee ya ndaꞌa ya siki ndi‑in ndi‑in ñayii ma,
te ni ndasavaꞌa ya i.
41 Te kuaꞌa ñayii ka kuꞌu ma,
ni ka ke koo tna ñaꞌa tachi ma,
te ka kayuꞌu tachi ma ka kaꞌan i:
―¡Ndijin kúu Saꞌya Suꞌsi ma!
―ka kuu i ka jiñaꞌa i.
Kovaa Jesús ma,
ni ndonda ya nuu tachi ma,
te ñatuu ni waꞌa ya tnuꞌu ja jin kaꞌan i,
vaa ka jini i ja suu ya kúu Cristo iya ni tetniñu Suꞌsi ma.
Jesús ma, ni kaxtnuꞌu ya tnuꞌu vii tnuꞌu vaꞌa Suꞌsi ma ini veñuꞌu lilikin
42 Ja ve ndii ma Jesús ma,
ni kee ya ini ñuu ma,
te kuaꞌan ya in nuu masu nawa iyo kuiti.
Kovaa ñayii ma chi ka ndanduku i ya,
te ni jan koo i nuu iyo ya ma.
Ka kuni i ja jin sunkani i ya,
sukan‑vaꞌa ma kiꞌin‑ka ya.
43 Kovaa Jesús ma,
jiñaꞌa ya:
―Suni kiꞌin sa in‑ka ñuu kaxtnuꞌu sa tnuꞌu vii tnuꞌu vaꞌa Suꞌsi ma siki ja sukan tatnuni ya ma,
vaa chukan kúu ja ni tetniñu ñaꞌa Suꞌsi ma ―kúu ya jiñaꞌa ya.
44 Te chukan kúu ja kuaꞌan Jesús ma káxtnuꞌu ya tnuꞌu vii tnuꞌu vaꞌa ma ini veñuꞌu lilikin ñuu Judea ma.