Jesús ma, ni ndasavaꞌa ya in suchi jinukuechi nuu tee tátnuni nuu cientu soldado ma
7
Nuu ni jinu ni kaxtnuꞌu Jesús ma tnuꞌu ya ma nuu ñayii ma,
te kuaꞌan ya ñuu Capernaum ma.
2 Te yukan iyo in tee tátnuni nuu cientu soldado.
Te iyo in suchi jinukuechi nuu de,
te kútoo xeen de i.
Te kuꞌu kaꞌvi xeen i,
te kuenda kûu i kúni i.
3 Nuu ni jinisoꞌo tee tátnuni nuu cientu soldado ma ja ka kaꞌan i ja saꞌa Jesús ma,
te ni tetniñu de tee ka kuu jaꞌnu ñuu judío ma,
ja na jin koo de jin kakan‑taꞌvi de nuu ya te na kii ya veꞌe de ma,
ndasavaꞌa ya suchi jinukuechi nuu de ma.
4 Te ni jan koo tee yukan nuu Jesús ma,
te ka jiñaꞌa de:
―Tee tátnuni nuu cientu soldado ma,
káꞌan de ja saꞌa ni tnuꞌu mani,
vaa iyo tna de ja chindee ni de,
5 vaa kútoo de ñuu o a,
te maa de ni saꞌa ja ni ka saꞌa i veñuꞌu luluu ya ―ka kuu de ka jiñaꞌa de.
6 Jesús ma,
kuaꞌan ya jiꞌin de.
Kovaa nuu jâ ni kuyatni ya veꞌe tee tátnuni nuu cientu soldado ma,
te maa de chi ni tatnuni de nuu tnaꞌa de ma ja jin koo i jin kuñaꞌa i Jesús ma saꞌa:
―Señor,
má ko ndi ini ni ja kii ni onde veꞌe sa a,
vaa masu kaa masu iyo sa ja kivi ni ini veꞌe sa a.
7 Chukan kúu ja ñatuu ni kusaa ini maa sa ja jan nu nduku ñaꞌa sa.
Yika‑ni ja tatnuni ni nuu kueꞌe a ja jín ndiyo i,
sukan‑vaꞌa nduvaꞌa suchi jinukuechi nuu sa a.
8 Vaa saña tna chi ka iyo tee ka tatnuni nuu sa,
te ka iyo soldado ja tátnuni sa nuu de ma.
Te nuna kuñaꞌa sa in de ma:
“Kuáꞌan ni”,
te kuaꞌan de,
te nuna kuñaꞌa sa in‑ka de ma:
“Neꞌe ni”,
te kíi de.
Te nuna tatnuni sa nuu suchi jinukuechi nuu sa a:
“Saꞌa chaꞌa”,
te saꞌa i,
kúu de káꞌan de ―ka kuu i ka jiñaꞌa i.
9 Te Jesús ma,
ni saꞌvi‑nka ini ya ja ni jinisoꞌo ya sukan ma,
te ndeꞌya ya ñayii ka ndikin ya ma,
te jiñaꞌa ya:
―Ja ndaa kúu ja ni a ñuu Israel ya ñatuu ni ndaniꞌi sa ñayii ka kukanu ini xeen ñaꞌa sukan kúkanu ini ñaꞌa tee yaꞌa ―kúu ya jiñaꞌa ya.
10 Ja ni ka ndakokuiñi i veꞌe ma,
te ni ka ndaniꞌi i suchi jinukuechi ma ja jâ ni nduvaꞌa i.
Jesús ma, ni ndaxteku ya saꞌya in ñaꞌa ni ndoo ja ni jiꞌi yii ña ma
11 Nuu ni jinu sukan ma,
Jesús ma,
kuaꞌan ya ñuu nani Naín ma.
Kuaꞌan ya jiꞌin tee ka ndikin ya ma jiꞌin kuaꞌa‑ka ñayii.
12 Ja ni kenda ya yatni ñuu ma,
ni jini ya ja kuan koo i kuan chuꞌu i in ndiyi.
Te saꞌya in ñaꞌa ni jiꞌi yii kúu i,
te maa in maa tnuꞌu‑ni i iyo nuu siꞌi i ma.
Te kuaꞌa xeen ñayii ñuu ma ka ndikin kuan koo i.
13 Ja ni jini Jesús ma,
ni kundaꞌvi ini ya ñaꞌa ma,
te jiñaꞌa ya:
―Má kondaꞌyu ni ―kúu ya jiñaꞌa ya.
14 Te ni jan tuꞌva ya,
te ni tnii ya nuu ka ndiso i suchi ni jiꞌi ma,
te ni ka jinkuiñi i.
Jesús ma,
jiñaꞌa ya suchi ni jiꞌi ma:
―Roꞌo káꞌan ri:
¡Ndakoo!
―kúu ya jiñaꞌa ya.
15 Sani te suchi ni jiꞌi ma,
ni ndakoo i,
te ni kejaꞌa i káꞌan i.
Te jiñaꞌa Jesús ma nuu siꞌi i ma:
―Yaꞌa ni saꞌya ni a ―kúu ya jiñaꞌa ya.
16 Ja ni ka jini ñayii ma sukan,
ndaka i ni ka yuꞌu,
te ni ka kejaꞌa i ka ndachiñuꞌu i Suꞌsi ma,
te ka kaꞌan i:
―In tee kanuu‑ka ndákaxtnuꞌu tnuꞌu ni waꞌa Suꞌsi ma,
ni kijaa de neꞌun o ya ―ka kuu i ka kaꞌan i.
Te ka kaꞌan tna i:
―Maa Suꞌsi ma ni kenda,
chíndee ya ñayii ñuu maa ya a ―ka kuu i ka kaꞌan i.
17 Te ni‑kaꞌnu ñuu Judea ma jiꞌin yuꞌu ñuu ma,
ni ka jini i sukan ni saꞌa Jesús ma.
Juan tee skuandute ma, ni tetniñu de tee ni ka jikan‑tnuꞌu Jesús ma
18 Juan ma,
ni jinisoꞌo de ndaka sukan ma,
vaa tee ka ndikin tnaꞌa jiꞌin de ma,
ni ka ndakani de sukan.
Ni kana de uu tee ma,
19 te ni tetniñu de ja jin kakan‑tnuꞌu de nuu Jesús ma nú suu ya kúu iya kii ma xi jin kondetu‑ka de.
20 Te tee ni tetniñu Juan ma,
ni ka jan tuꞌva de nuu Jesús ma,
te ka jiñaꞌa de:
―Juan tee skuandute ma,
ni tetniñu ñaꞌa de ja jin kakan‑tnuꞌu ñaꞌa sa,
nú ndijin kúu iya kii ma xi jin kondetu‑ka sa ―ka kuu de ka jiñaꞌa de.
21 Te maa ora yukan‑ni,
Jesús ma,
ni ndasavaꞌa ya kuaꞌa ñayii ka ndoꞌo ka neni ja ka kuꞌu i ma,
jiꞌin ñayii xndoꞌo xneni ñaꞌa tachi ma,
te ni ndasavaꞌa ya nuu ñayii inukuaa ma.
22 Sani te ni ndakoneꞌe ya:
―Kuán koo ni,
te jin kuñaꞌa ni Juan ma ja ni ka jini ni a jiꞌin ja ni ka jinisoꞌo ni a.
Jin ndakani ni ja ñayii kuaa ma,
jâ ni ka ndundijin nuu i ma,
te ñayii ñatuu kúu jin kaka i ma,
jâ ni ka ndakaka i,
te ñayii ka ndoꞌo lepra ma,
jâ ni ka nduvii i,
te ñayii inusoꞌo ma,
jâ ni ka ndakunisoꞌo i,
te ñayii ni ka jiꞌi ma,
ni ka ndateku i,
te nuu ñayii ndaꞌvi ma káxtnuꞌu sa tnuꞌu vii tnuꞌu vaꞌa naxe jin ndaniꞌi taꞌvi i ma.
23 ¡Ja vavaꞌa ka kuu ñayii ka kukanu ini ñaꞌa i maa sa a!
―kúu ya jiñaꞌa ya.
24 Nuu kuan nu koo tee ni tetniñu Juan ma,
Jesús ma,
ni kejaꞌa ya káꞌan ya siki Juan ma nuu ñayii ma,
te jiñaꞌa ya:
―¿Naxe kaa tee ni ka ke koo ni,
ka ndeꞌya ni nuu masu nawa iyo kuiti ma?
¿Sukan kúu in tnuyoo ja skanda kajin yiꞌi ma?
25 ¿Xi in tee neꞌnu saꞌma vaꞌa xeen?
¿Naxe kaa tee ni ka ke koo ni,
ka ndeꞌya ni ma?
Ndijin chi ka jini ni ja ñayii ka neꞌnu saꞌma vaꞌa xeen ma te ka saꞌa i sukan ka jatna ini maa i ma,
te ka iyo i veꞌe tee ka kuu rey ma.
26 ¿Kovaa naxe kaa tee ni ka ke koo ni ka ndeꞌya ni ma?
¿Xi ka jani ini ni ja in tee ndákaxtnuꞌu tnuꞌu ni waꞌa Suꞌsi ma kúu de?
Ja ndaa kúu ja suu de,
te in tee kanuu‑ka sana in tee ndákaxtnuꞌu tnuꞌu ni yo waꞌa Suꞌsi ma kúu Juan ma.
27 Te ja kuu Juan ma kúu ja káꞌan tnuꞌu Suꞌsi ma saꞌa:
Tetniñu ri in tee koxtnuu nuu ro,
sukan‑vaꞌa satuꞌva de ichi kiꞌin ro ma.
28 ’Te káꞌan sa ja neꞌun ndaka ñayii a,
ñatuu ni‑in ñayii kanuu‑ka sana Juan ma,
kovaa nuu tatnuni Suꞌsi ma,
te ñayii jani ini ja masu ñayii kanuu‑ka kúu i neꞌun ndaka i ma ko kuu ñayii kanuu‑ka sana Juan ma ―kúu ya jiñaꞌa ya.
29 Ndaka ñayii ka jinisoꞌo ja káꞌan Juan ma,
onde tee ka ndakeꞌen yaꞌvi xuꞌun noꞌo ñuu Roma ma,
ni ka saꞌa de ja ni skuandute ñaꞌa Juan ma,
te sukan saa ni ka ndakunitnuni de ja Suꞌsi ma kúu iya saꞌa ja ndaa ma.
30 Kovaa tee ka kuu fariseo ma,
jiꞌin tee ka skuaꞌa tnuꞌu ni kaxtnuꞌu Moisés ma,
ñatuu ni ka waꞌa de tnuꞌu ja skuandute ñaꞌa Juan ma.
Sukan ni ka saxiko de ja kúni Suꞌsi ma ja jin ko kuu de ma.
31 Te jiñaꞌa ya:
―¿Naxe ka kuu ñayii yaꞌa,
ka jani ini ni?
32 Sukan ka kuu suchi jaa ka jinkoo i nuyaꞌvi ma,
te ka kayuꞌu i ka jiñaꞌa nuu tnaꞌa i saꞌa:
“Ka tivi ri flauta,
kovaa ñatuu ka jitajaꞌa ro.
Ka jita ri yaa xii ini,
kovaa ñatuu ka ndaꞌyu ro”,
ka kuu i ka kaꞌan i,
33 te sukan kuiti ka kuu tna ni.
Vaa ni kenda Juan tee skuandute ñayii ma,
te ñatuu jaa de xtatila ni ñatuu jiꞌi de ndute uva,
te ndijin,
ka kaꞌan ni ja yinee ñaꞌa tachi ma.
34 Sani te ni kenda sa ja kúu sa iya vee ñayivi ñuu ñayivi a,
te jaa sa xtatila te jiꞌi sa ndute uva ma,
te ka kaꞌan ni ja tee jaa te jiꞌi xeen kúu sa te kétnaꞌa ini sa jiꞌin ñayii ka saꞌa ja uꞌvi ma jiꞌin kuiꞌna ka ndakeꞌen yaꞌvi xuꞌun noꞌo ñuu Roma ma,
ka kaꞌan ni.
35 Kovaa ñayii ka kandija tnuꞌu ndichi Suꞌsi ma chi ni ka nduu i ñayii ka saꞌa ja vaꞌa ja ndaa.
Te sukan,
te ka jini o ja vavaꞌa kúu tnuꞌu ya ma ―kúu ya jiñaꞌa ya.
Sukan ni kaꞌan Jesús ma veꞌe tee kúu Simón tee kúu fariseo ma
36 In tee kúu fariseo ma,
ni kana de Jesús ma ja jin kaa de xita jiꞌin ya.
Te Jesús ma,
ni jaꞌan ya veꞌe de ma,
te núkoo ya nuu mesa ma.
37 Te ni kenda in ñaꞌa ni yo kuneé ni yo ku‑uun ña,
iyo ña ñuu yukan,
vaa ni jini ña ja Jesús ma,
jaa ya xita jiꞌin tee kúu fariseo ma.
Te ni kenda ña jiꞌin in nuu ñuꞌu ndute jáxiko asi ma,
te nanimaa vidriu alabastru kúu i.
38 Te ni jinkoo ña nuu jaꞌa ya ma,
te ndaꞌyu ña,
te ni kejaꞌa ña ndákate ña jaꞌa ya ma jiꞌin ndute nuu ña ma.
Sani te ni ndaxsichi ña jiꞌin ixi ña ma,
te chítu chítu‑nka ña nuu jaꞌa ya ma,
te chíso ña ndute jáxiko asi ma.
39 Te tee kúu fariseo ma tee ni kana Jesús ma veꞌe de ma,
ja ni jini de sukan ma,
ni jani ini de:
“Nute tee yaꞌa,
in tee ndákaxtnuꞌu tnuꞌu ni waꞌa Suꞌsi ndija ma kúu de chi kunitnuni de na in kúu ñaꞌa keꞌe ñaꞌa a,
vaa in ñaꞌa ndiso kuechi kúu ña”,
jani ini de.
40 Sani te Jesús ma,
jiñaꞌa ya fariseo ma:
―Simón,
iyo in ja káꞌan sa nuu ni ―kúu ya jiñaꞌa ya.
Te tee kúu fariseo ma,
ni ndakoneꞌe de:
―Kaꞌan ni,
teskuaꞌa ―kúu de jiñaꞌa de.
41 Sani te Jesús ma,
ni kejaꞌa ya ndákani ya saꞌa:
―Uu tee,
ka tavi de xuꞌun nuu in tee ni wanuu.
In de tavi uꞌun cientu (500) denario,
te in‑ka de ma uu xiko uxi (50).
42 Kovaa ñatuu kúu jin ndakuaꞌa de ma,
te chukan kúu ja tee ni wanuu ma,
ni sakanu ini de ja ka tavi nduu de ma.
Vitna kaꞌan ni,
¿ja nduu de ma,
na nde de kunimani‑ka nuu tee ni wanuu xuꞌun ma te kutoo‑ka de tee ma?
―kúu ya jiñaꞌa ya.
43 Simón ma,
ni ndakoneꞌe de:
―Jani ini sa ja tee tavi kuaꞌa‑ka ma ―kúu de jiñaꞌa de.
Jesús ma,
jiñaꞌa ya:
―Vaꞌa‑ni jani ini ni ―kúu ya jiñaꞌa ya.
44 Sani te ndeꞌya Jesús ma ñaꞌa ma,
te jiñaꞌa ya nuu Simón ma:
―¿Ndeꞌya ni ñaꞌa yaꞌa?
Ni kivi sa veꞌe ni a,
te ñatuu ni taa ni ndute ndondoo jaꞌa sa a.
Kovaa ñaꞌa yaꞌa,
ni ndakate ña jaꞌa sa a jiꞌin ndute nuu ña a,
te ni ndaxsichi ña jiꞌin ixi ña a.
45 Ñatuu ni chitu ni yikinuu sa a,
kovaa ñaꞌa yaꞌa chi onde nuu ni kijaa sa ma,
ñatuu sunkani ña ja chitu ña jaꞌa sa a.
46 Ñatuu ni chiso ni aceite xini sa a,
kovaa ñaꞌa yaꞌa chi ni chiso ña ndute jáxiko asi a siki jaꞌa sa a.
47 Te chukan kúu ja káꞌan sa ja visi kuaꞌa xeen kuechi ni yo ndiso ñaꞌa yaꞌa,
kovaa saꞌa,
te ka jini o ja jâ ni ka naa ndaka kuechi ña ma,
vaa ja ni saꞌa ñaꞌa ña sukan a,
chi ja káxtnuꞌu ña kúu ja kútoo xeen‑ka ñaꞌa ña.
Kovaa ñayii vala‑ni kuechi i náa ma,
vala‑ni kútoo ñaꞌa i ―kúu ya jiñaꞌa ya.
48 Sani te jiñaꞌa ya ñaꞌa ma:
―Ndaka kuechi ni a jâ ni ka naa ―kúu ya jiñaꞌa ya.
49 Te ñayii ka iyo tna yukan,
ni ka kejaꞌa i ka jikan‑tnuꞌu tnaꞌa i:
―¿Na in kúu tee yaꞌa,
ja onde kuechi ñayii ma xnaa de?
―ka kuu i ka kaꞌan i.
50 Kovaa Jesús ma,
saꞌa ni jiñaꞌa ya nuu ñaꞌa ma:
―Ja ni kukanu ini ñaꞌa ni a,
te ni ndaniꞌi taꞌvi ni.
Kuán noꞌo sii ini ni ―kúu ya jiñaꞌa ya ña.