Tnuʼu Ianyuux n‑chidotnuni Smarku
N‑xian tnuʼu Sua Bautista tnuʼu vaʼa nuu ñayiu
1
Duʼa kixeʼe tnuʼu vaʼa Jesucristu.
Daʼya Yɨɨ Ianyuux kuu‑ia.
San Marcos 1:1-13
2 Xá n‑kuu kueʼe kuia n‑xo tuu ɨɨn se nani Isaías.
N‑xian tnuʼu‑s tnuʼu Ianyuux nuu ñayiu.
N‑chidotnuni‑s nax n‑jaʼan Ianyuux nuu Daʼya‑ia:
Tundaʼa‑r ɨɨn seyɨɨ na juindodo nuu ka‑s nuu‑n jɨʼɨn.
Kada‑s xa koo tuʼa koio ñayiu hora na jɨʼɨn mee‑n.
3 Kutuu‑s ɨɨn yuku te kana xee‑s ñayiu:
“Koo tuʼa koio‑n,
chi vaxi Ia kuu Xtoʼo‑n.
Kada koio ichi ndaa nuu‑ia.”
Duʼa n‑chidotnuni Isaías xá n‑kuu kueʼe kuia.
4 Te duʼa n‑kuu.
Yuku n‑xee se nani Sua Bautista.
N‑dajuendute‑s ñayiu.
N‑ka natu ini ñayiu kuechi‑i te n‑dajuendute‑s‑yɨ.
N‑jaʼan‑s xa dajuendute‑s ñayiu natu ini kuechi‑i te taxkanu ini Ianyuux kuechi‑i.
5 N‑ka xee ntdaa ñayiu lado Judea,
ntdaa ñayiu ñuu nani Jerusalén.
N‑ka naʼma‑i kuechi‑i nuu Ianyuux,
te n‑dajuendute ñaʼa Sua nuu ndute deʼva nani Jordán.
6 N‑xiʼna Sua daʼma n‑kuaʼa idi kɨtɨ nani camello,
te n‑xo duku xiti‑s cinturón ñɨɨ.
Xa n‑xaxi‑s kuu tɨka langosta xiʼin ndudi ñuñu yuku.
7 N‑jaʼan‑s nuu ñayiu:
—Xaku nga kɨu te kixee ɨɨn se taxnuni ka dada mee‑r.
Nde xa kuu‑r muxu‑s ma kuaʼa‑r.
Ni xa nandaxi‑r correa ndixa‑s ma kuaʼa‑r.
8 Nuu ndute n‑dajuendute ñaʼa mee‑r mee‑n,
ko xiʼin Espíritu Ii dajuendute ñaʼa mee‑s mee‑n.
N‑dajuendute Sua Jesús
9 Kɨu ijan n‑kee Jesús ñuu nani Nazaret lado Galilea,
te n‑xee‑ia deʼva Jordán.
Ijan n‑dajuendute Sua Jesús.
10 Na nane Jesús nuu ndute,
n‑xini‑ia xa nune andɨu,
te vax juun Espíritu Ii.
Ná kaa data vax juun,
da n‑kaa Espíritu Ii vax juun nuu Jesús.
11 Nde andɨu n‑jaʼan ɨɨn tnuʼu:
—Ndoʼo kuu Daʼya Mani‑r.
Yo kuvete‑r xaxeʼe‑n.
N‑juini Satanás xa kadajuexa‑i Jesús xa kada‑ia xa juini mee‑i
12 Te nuniʼno ni n‑tundaʼa Espíritu Ii Jesús juaʼan‑ia nde nuu ñayo ñayiu io.
13 Nuu ñayo ñayiu io n‑xo tuu‑ia uu diko kɨu.
Te n‑kixee Satanás ijan.
Kuiʼna kuu‑i.
N‑juini‑i xa kadajuexa‑i Jesús xa kada‑ia xa juini mee‑i,
ko ña n‑kida Jesús ni ɨɨn.
Ijan n‑xo tuu Jesús xiʼin kɨtlavichi io yuku.
Te n‑ka xee ángel,
ia xinokuechi nuu Ianyuux,
xa chindee ñaʼa‑ia.
N‑xian tnuʼu Jesús tnuʼu vaʼa Ianyuux nuu ñayiu Galilea
14 Kɨu ijan n‑ka chindiʼu‑s Sua Bautista vekaa.
Te n‑xee Jesús Galilea.
Ijan n‑xian tnuʼu‑ia tnuʼu vaʼa Ianyuux nuu ñayiu.
San Marcos 1:14-45
—Vitna vaʼa tiempo xá n‑kuyatni ñaʼa Ianyuux mee‑n.
Kundeʼa koio‑n xa taxnuni‑ia ñuñayiu.
Natu ini koio kuechi‑n te jandixa koio tnuʼu vaʼa.
N‑jaʼan Jesús koon se ka tava chaka, xa kunduu‑s xiʼin mee‑ia
16 Ɨɨn kɨu n‑xika Jesús yundute kaʼnu.
Ndute jan nani Mar Galilea.
N‑xini‑ia Simón xiʼin ñani‑s Ndrixi.
Ka dakeé‑s ñunu nuu ndute,
chi se ka tava chaka ka kuu‑s.
17 N‑jaʼan Jesús:
—Kunduu koio xiʼin mee‑r.
Nani n‑ka dataka‑n chaka,
dani dataka‑n ñayiu,
xa kunduu koio‑i xiʼin mee‑r.
18 Nuniʼno ni n‑ka dandoo‑s ñunu‑s,
te juaʼan koio‑s xiʼin‑ia.
19 Ijan n‑xini‑ia Jacobo.
Daʼya Zebedeo kuu‑s.
N‑xini‑ia Jacobo xiʼin ñani‑s Sua.
Xiti barcu‑s nukoo‑s,
ka ndadavaʼa‑s ñunu‑s.
20 N‑jaʼan‑ia‑s,
te juaʼan koio‑s xiʼin‑ia.
Xiti barcu n‑ka dandoo‑s taa‑s Zebedeo xiʼin se ka xinokuechi nuu‑s.
N‑kudeen Jesús nuu tachi uʼu
21 N‑ka xee‑s xiʼin‑ia ñuu nani Capernaum.
Kɨu ndetatu ñayiu Israel,
kɨu ijan,
n‑kɨu Jesús veñuʼu luchi.
Ijan n‑dakuaʼa‑ia ñayiu.
22 N‑ka teku‑i nax jaʼan‑ia,
te n‑ka yuʼu‑i,
chi xiʼin xa taxnuni‑ia dakuaʼa‑ia‑i.
Ñatu dakuaʼa‑ia‑i ná dakuaʼa ñaʼa se tuʼa vaʼa tnuʼu n‑chidotnuni Moisés.
23 Veñuʼu luchi ijan n‑xee ɨɨn seyɨɨ ñuʼu tachi uʼu anu‑s.
N‑kana xee‑s:
24 —Jesús,
se ñuu Nazaret,
¿nax juini‑n yaʼa?
¿Vaxi‑n,
vax ki danaa ñaʼa‑n a?
Xini ñaʼa mee‑r jundu kuu‑n.
Ia Ii Ianyuux kuu‑n.
25 N‑kudeen Jesús nuu tachi uʼu jan:
—¡Kadɨ yuʼu‑n!
¡Ta kee anu‑s!
26 N‑kida‑i xa n‑xiyɨʼɨ ka‑s.
Ndeʼe n‑kana xee‑i,
te n‑kee‑i anu‑s.
27 Te n‑ka yuʼu ntdaa ñayiu xyuku ijan.
N‑jaʼan ɨɨn‑i nuu ɨnka‑i:
—¿Nax kuu xaʼa?
Ɨɨn xa xee dakuaʼa ñaʼa‑s.
¡Taʼu tniu‑s nuu tachi uʼu,
te jandixa ñaʼa‑i!
28 Te yachi n‑ka datekutnuʼu tnaʼa ñayiu nituʼu lado Galilea ntdaa xa n‑kida Jesús.
N‑ndadavaʼa Jesús didido Simón Spedru
29 Na n‑kee Jesús veñuʼu luchi,
juaʼan‑ia veʼe Simón xiʼin Ndrixi.
N‑ka kɨu‑s,
ntdaa‑s xiʼin‑ia.
Simón xiʼin Ndrixi xiʼin Jacobo xiʼin Sua.
30 Te kuʼu didido Simón.
Kaa‑ña.
Kaʼni tnaʼa‑ña.
N‑ka jaʼan ñayiu nuu Jesús xa kuʼu‑ña.
31 N‑kɨu‑ia nuu kaa‑ña.
N‑tnɨɨ‑ia ndaʼa‑ña te n‑ndoneʼe ñaʼa‑ia.
Hora ijan ni n‑ndiko ñaʼa kaʼni,
te mee‑ña n‑xiaʼan xa kax koio‑s.
N‑ndadavaʼa Jesús kueʼe ñayiu kuʼu
32 Xañini ijan ni,
na juan keé ngandii,
te xndeka ñayiu ñayiu kuʼu juaʼan nuu tuu Jesús.
Ntdaa ñayiu kuʼu xiʼin ntdaa ñayiu ñuʼu tachi uʼu anu‑i,
xndeka‑i‑yɨ juaʼan nuu tuu Jesús.
33 Ntdaa ñayiu Capernaum n‑ka taka veʼe ijan.
34 N‑ndadavaʼa‑ia kueʼe ñayiu kuʼu.
Kueʼe nuu kueʼe ka kuʼu ñayiu.
N‑kineʼe‑ia kueʼe tachi uʼu anu‑i.
Ña n‑xejoon‑ia xa jaʼan tachi uʼu,
chi kutnuni ini‑i jundu kuu‑ia.
N‑dakuaʼa Jesús ñayiu Galilea
35 Neʼe datne,
na ta kukanda vaʼa ka,
te n‑ndokoo Jesús.
N‑kee‑ia ñuu jan,
te juaʼan‑ia nuu ñayo ñayiu io.
Ijan n‑xeʼen‑ia n‑xijan taʼu‑ia.
36 Simón xiʼin ɨnka se kunduu xiʼin‑s n‑ka xe nunduku‑s Jesús.
37 Na n‑ka naniʼi‑s‑ia,
n‑jaʼan‑s:
—Ka nanduku ñaʼa ntdaa ñayiu mee‑n.
38 N‑xiaʼan‑ia:
—Na jɨʼɨn‑ro.
Jɨʼɨn‑ro ntdaa ñuu do yaʼa,
na dakuaʼa‑r ñayiu ijan tuku.
Chi xaxeʼe xijan vaa‑r.
39 Duʼa n‑kuu.
N‑dakuaʼa‑ia ntdaa ñayiu veñuʼu kuechi nituʼu lado Galilea.
Te n‑kineʼe‑ia tachi uʼu anu ñayiu.
N‑ndadavaʼa Jesús ɨɨn se teʼyu ñɨɨ‑s
40 Ɨɨn kɨu n‑xee ɨɨn se teʼyu ñɨɨ‑s nuu tuu Jesús.
N‑xijan‑s xamani nuu‑ia.
N‑xe juiin xiti‑s nuu‑ia,
te n‑jaʼan‑s:
—Xini‑da xa kuaʼa‑n xa ndadavaʼa ñaʼa‑n.
Nux juini‑n,
te duʼa koo.
41 N‑kundau ini Jesús mee‑s.
N‑dakaa‑ia ndaʼa‑ia,
te n‑tnɨɨ‑ia‑s itaʼu.
N‑xiaʼan‑ia:
—Joon,
juini‑r xa ndadavaʼa ñaʼa‑r.
42 Na n‑jaʼan Jesús tnuʼu yaʼa,
te hora ijan ni n‑ndundoo ñɨɨ‑s te n‑ndvaʼa‑s.
43 N‑tundaʼa‑ia‑s juaʼan‑s.
N‑taʼu tniu‑ia nuu‑s:
44 —Maxku najani‑n nuu ni ɨɨn ñayiu naxa n‑kuu xiʼin mee‑n.
Juaʼan nuu dutu.
Dandeʼa‑n‑sɨ ñɨɨ‑n.
Juñaʼa xa doko‑n nuu dutu,
ná n‑taʼu tniu Moisés,
xaxeʼe xa n‑ndundoo ñɨɨ‑n vitna.
Duʼa kutnuni ini koio ñayiu xa n‑ndvaʼa‑n.
45 Ko mee‑s juaʼan ntdaa lado ijan,
juan nujani‑s naxa n‑kuu.
Xaxeʼe xijan,
n‑kuu xa ña n‑kuaʼa Jesús xa kɨu‑ia ñuu ijan.
N‑ndoo‑ia yuku nuu ñayo ñayiu io.
Te ntdaa ñuu xiʼin ñuu ijan n‑ka xee ñayiu nuu tuu‑ia.