N‑ndadavaʼa Jesús ɨɨn seyɨɨ kuʼu ndaʼa kuʼu xeʼe
2
Uni koon ka kɨu,
daa n‑xiko Jesús n‑naxee‑ia Capernaum,
te n‑ka datekutnuʼu tnaʼa ñayiu xa tuu‑ia ɨɨn veʼe ijan.
San Marcos 2:1-12
2 Nunuvii ni n‑ka taka kueʼe ñayiu veʼe ijan.
N‑chitu‑i yeʼe.
Ña n‑kuaʼa ka yaʼa‑i xa kɨu‑i veʼe.
Te n‑jaʼan‑ia tnuʼu vaʼa Ianyuux nuu‑i.
3 Ijan n‑ka xee seyɨɨ xndeka se kuʼu nuu tuu Jesús.
Koon tnaʼa‑s xndido se kuʼu ndaʼa kuʼu xeʼe.
4 Ña n‑kuaʼa kandeka koio‑s se kuʼu kɨu yeʼe,
chi xaxeʼe xa chitu ñayiu yeʼe.
Ijan n‑ka dakaa‑s se kuʼu dɨkɨ veʼe.
N‑ka xanu‑s itaʼu dɨkɨ veʼe nuu tuu Jesús.
Nuu nune jan n‑ka juneʼe‑s yuu ñuʼu se kuʼu.
5 Na n‑xini Jesús xa ka jandixa‑s‑ia,
n‑jaʼan‑ia nuu se kuʼu jan:
—Daʼya,
xá n‑taxkanu ini‑r kuechi‑n.
6 Ijan xtuu se ka tuʼa vaʼa tnuʼu n‑chidotnuni Moisés.
N‑ka xani ini‑s:
7 “¿Nakuenda duʼa jaʼan‑s?
Kuiʼa jaʼan‑s Ianyuux.
Idini Ianyuux kuaʼa xa taxkanu ini‑ia kuechi‑ro.”
8 Ko naʼa Jesús nax ka xani ini‑s,
te n‑xiaʼan‑ia:
—¿Nakuenda duʼa ka xani ini‑n?
9 Ñatu uʼu xa jaʼan‑r nuu se kuʼu ya xa taxkanu ini‑r kuechi‑s.
Te ñatu uʼu xa jaʼan‑r xa ndokoo‑s te ndoneʼe‑s yuu‑s te kaka‑s.
10 Ko juini‑r xa jini koio‑n xa taxnuni Se kuu ñani tnaʼa ñayiu nuu ñayiu ñuñayiu.
Xijan kuu xa dandeʼa ñaʼa‑r xa kuaʼa‑r xa taxkanu ini‑r kuechi ñayiu.
Te n‑jaʼan‑ia nuu se kuʼu:
11 —Jaʼan‑r nuu mee‑n.
Ndokoo.
Ndoneʼe yuu‑n.
Te juan nuʼu veʼe‑n.
12 Hora ijan ni n‑ndokoo‑s.
Nuu ntdaa ñayiu jan n‑ndoneʼe‑s yuu‑s,
te n‑kee‑s veʼe,
te juan nuʼu‑s veʼe‑s.
Te n‑ka yuʼu‑i ntdaa‑i,
te n‑ka xiaʼan‑i xa n‑kutaʼu‑i nuu Ianyuux.
N‑ka jaʼan‑i:
—¡Nuncas ña n‑xini‑ro xa n‑kuu vitna!
N‑jaʼan Jesús se nani Leví xa kunduu‑s xiʼin‑ia
13 Ɨnka vuelta n‑xikonuu Jesús yundute kaʼnu.
Ijan n‑ka taka kueʼe ñayiu nuu tuu‑ia,
te n‑dakuaʼa‑ia‑i.
San Marcos 2:13-28
14 Na n‑yaʼa‑ia ijan,
n‑xini‑ia Leví,
daʼya Alfeo.
Nukoo‑s veʼe nuu keyaʼu tvini impuestu.
N‑jaʼan Jesús nuu Leví:
—Na kunduu‑ro.
N‑ndojuiin Leví,
te juaʼan‑s xiʼin‑ia.
15 Te n‑yaʼa xa n‑xaxi Jesús dita veʼe Leví.
N‑xaxi‑ia xiʼin kueʼe seyɨɨ ka tnɨɨ tvini impuestu,
xiʼin kueʼe ɨnka se ka kida xa uʼu.
Se dakuaʼa Jesús xtuu ijan tuku.
Chi kueʼe‑s n‑ka kunduu xiʼin‑ia.
16 Te n‑ka xini se tuʼa vaʼa tnuʼu n‑chidotnuni Moisés xiʼin se fariseu,
xa n‑xaxi Jesús xiʼin se kida xa uʼu xiʼin se tnɨɨ tvini impuestu.
N‑ka jaʼan‑s nuu se dakuaʼa‑ia:
—¿Nakuenda xaxi‑s te xiʼi‑s xiʼin se ka tnɨɨ tvini impuestu xiʼi‑n se ka kida xa uʼu?
17 N‑teku Jesús nax n‑ka jaʼan‑s,
te n‑jaʼan‑ia:
—Se io vaʼa,
ñatu ndoñuʼu‑s doctor.
Se ka kuʼu,
ndoñuʼu‑s doctor.
Ñatu vaxi‑r xa jaʼan‑r se xani ini xa ña tuu na kuechi‑s.
Vaxi‑r xa jaʼan‑r se naʼa xa io kuechi‑s,
xa kutuu koio‑s xiʼin mee‑r.
¿Nakuenda ña ka xaxi‑s?
18 Se ka kunduu xiʼin Sua Bautista,
xiʼin se fariseu,
ɨɨn kɨu ña ka xaxi‑s.
Ña ka xaxi‑s xaxeʼe xa xneʼe ii‑s.
Te n‑ka xee ɨnka seyɨɨ nuu tuu Jesús,
te n‑ka xijan tnuʼu‑s:
—¿Nax kuu xa ña ka xaxi se ka kunduu xiʼin Sua,
te dani se ka kunduu xiʼin se fariseu,
ko se ka kunduu xiʼin mee‑n,
ka xaxi‑s?
19 Te n‑xiaʼan Jesús:
—Hora io viko tnundaʼa,
se n‑jaʼan noviu ka xaxi‑s,
chi tuu noviu xiʼin‑s.
Ka xaxi‑s xiʼin noviu,
hora tuu noviu.
20 Ko vax kuyatni kɨu xa kandeka ñayiu noviu jɨʼɨn.
Kɨu ijan ma kaxi ka se ka kunduu xiʼin noviu.
21 ʼNuu daʼma tuʼu ni ɨɨn mayo dandee daʼma xee.
Nux duʼa kada‑i,
nandɨyɨ daʼma xee,
te ndata ka daʼma tuʼu.
22 Te ni ɨɨn mayo kuaʼa tnaa‑i ndɨdɨ́ xee ñɨɨ tuʼu.
Nux duʼa kada‑i,
dandava ndɨdɨ́ xee ñɨɨ tuʼu,
te tɨu ndɨdɨ́,
te tɨu ñɨɨ.
Io xa tnaa‑ro ndɨdɨ́ xee ñɨɨ xee.
N‑ka tnundodo‑s yoko trɨu kɨu ndetatu
23 Ɨɨn kɨu ndetatu ñayiu Israel,
n‑yaʼa Jesús nuu kaa trɨu.
Se ka kunduu xiʼin‑ia,
n‑ka kixeʼe‑s xa tnundodo‑s yoko trɨu xa kaxi‑s.
24 Te n‑ka jaʼan se fariseu:
—¡Kundeʼa xa ka kida se dakuaʼa‑n!
Tnuʼu taʼu tniu Moisés jaʼan xa ma kadatniu‑ro kɨu ndetatu.
25 Ko n‑jaʼan Jesús:
—¿Nuncas ña n‑kaʼu‑n nax n‑kida David,
na n‑kundaʼu‑s te n‑ka kojon‑s xiʼin se ka kunduu xiʼin‑s a?
26 Kɨu ijan se nani Abitar n‑kuu dutu taxnuni ka nuu ñayiu Israel,
te n‑kɨu David veñuʼu Ianyuux,
te n‑xaxi‑s tila ii kandodo xiti veñuʼu jan.
Jaʼan tnuʼu n‑chidotnuni Moisés xa maxku duʼa kada ñayiu.
Meni dutu ka xaxi tila ii.
Ko n‑xaxi David tila ijan,
te n‑xiaʼan‑s tila xa kax koio se ka kunduu xiʼin‑s tuku.