N‑ndadavaʼa Jesús ɨɨn se n‑yichi ndaʼa‑s
3
Ɨnka vuelta n‑kɨu Jesús ɨɨn veñuʼu luchi.
Ijan nukoo ɨɨn se kuʼu ndaʼa‑s.
N‑yichi ndaʼa‑s,
ñatuka xiniñuʼu.
San Marcos 3:1-19
2 Se xyuku ijan,
n‑ka xo ndeʼa vaʼa‑s Jesús,
nux na ndadavaʼa‑ia se kuʼu kɨu ndetatu.
N‑ka xo xitoyuʼu‑s xa tekuechi‑s‑ia.
3 N‑jaʼan Jesús nuu se n‑yichi ndaʼa:
—Ndojuiin meʼñu ñayiu yaʼa.
4 N‑xijan tnuʼu‑ia nuu seyɨɨ xyuku ijan:
—¿Nax jaʼan tnuʼu taʼu tniu?
Kɨu ndetatu‑ro,
¿kada‑ro xavaʼa,
a kada‑ro xa uʼu a?
¿Kada‑ro xa kutuu vaʼa ñayiu,
a kaʼni‑ro ñayiu a?
Ko mee‑s,
ña n‑ka jaʼan‑s ni ɨɨn.
5 Xiʼin xa kiti ini‑ia n‑xo ndeʼa‑ia ntdaa se ijan.
Yo n‑tnau ini‑ia xaxeʼe xa ñatu ka juini‑s xa kutnuni ini‑s.
N‑jaʼan‑ia nuu se kuʼu:
—Dakaa ndaʼa‑n.
N‑dakaa‑s ndaʼa‑s,
te hora ijan ni n‑ndvaʼa‑s.
6 Te n‑ka kee se fariseu.
Xiʼin se partido Herodes n‑ka kida ɨɨn nuu‑s xa kaʼni‑s‑ia.
Kueʼe xa kueʼe ñayiu n‑nataka yundute kaʼnu
7 Ɨnka vuelta juaʼan Jesús xiʼin se dakuaʼa‑ia nde yundute kaʼnu.
N‑ka xe kuitandijun ñaʼa kueʼe ñayiu Galilea.
Ñayiu Judea du.
8 N‑ka xe kuitandijun ñaʼa ñayiu Jerusalén xiʼin ñayiu Idumea.
Ñayiu nde ɨnka lado deʼva Jordán xiʼin ñayiu Tiro xiʼin ñayiu Sidón du.
N‑ka xee kueʼe xa kueʼe ñayiu nuu tuu‑ia,
chi n‑ka datekutnuʼu tnaʼa‑i milagru n‑kida‑ia.
9 Xijan kuu xa n‑jaʼan‑ia nuu se dakuaʼa‑ia xa na koo tuʼa barcu na keé‑ia,
xa maxku chitaʼi ñaʼa ñayiu.
10 Chi n‑ndadavaʼa‑ia kueʼe xa kueʼe ñayiu ijan.
Ntdaa ñayiu kuʼu ka tundaʼa tnaʼa‑i xa kuyatni koio‑i xa tnɨɨ‑i‑ia.
11 Te na n‑ka xini tachi uʼu Jesús,
te n‑ka ndua‑i nuu mee‑ia,
te n‑ka kana xee‑i:
—Ndoʼo kuu Daʼya Yɨɨ Ianyuux.
12 Te ndeʼe n‑kudeen‑ia‑i xa maxku jaʼan ka‑i jundu kuu‑ia.
N‑kaxí Jesús uxi uu seyɨɨ xa kunduu‑s xiʼin‑ia
13 Te n‑xe xee Jesús yuku,
te n‑jaʼan‑ia nuu se n‑kaxí‑ia xa kandijun ñaʼa‑s.
Te n‑ka xee‑s nuu tuu‑ia.
14 N‑kaxí‑ia uxi uu tnaʼa‑s xa kunduu‑s xiʼin‑ia.
Tundaʼa‑ia‑s xa jɨʼɨn‑s xa juña tnuʼu‑s tnuʼu vaʼa nuu ñayiu.
15 N‑xiaʼan‑ia xa taxnuni‑ia nuu mee‑s,
xa ndadavaʼa‑s ñayiu kuʼu,
te kuaʼa‑s xa kineʼe‑s tachi uʼu xñuʼu anu ñayiu.
16 N‑kaxí‑ia uxi uu seyɨɨ.
Ɨɨn‑s kuu Simón.
N‑nadanani ñaʼa‑ia Spedru.
17 Jacobo,
daʼya Zebedeo,
xiʼin ñani‑s Sua.
N‑nadanani‑ia‑s Boanerges,
xaxeʼe xa xee ka jaʼan‑s ná kana dau tnuʼu‑s.
18 Ndrixi xiʼin Slipe xiʼin Bartolomé.
Dɨuni Steu xiʼin Tomaxi,
xiʼin Jacobo,
daʼya Alfeo.
Tadeo xiʼin Simón,
se partido cananista.
19 Te Judas Iscariote,
se n‑diko Jesús.
Kuiʼa jaʼan ñayiu Espíritu Ii
20 Ijan dada n‑kɨu Jesús ɨɨn veʼe,
te ɨnka vuelta n‑ka taka ñayiu nuu tuu‑ia.
Xaxeʼe xa kueʼe ñayiu xyuku,
ni xa kaxi‑ia dita ña n‑kuu.
San Marcos 3:20-35
21 Na n‑ka tekutnuʼu ñayiu kutnaʼa xiʼin‑ia xa duʼa n‑kuu,
n‑ka xee‑i xa kandeka ñaʼa‑i nuʼu.
N‑ka jaʼan‑i xa n‑nduloko‑ia.
22 Se Jerusalén,
se tuʼa vaʼa tnuʼu n‑chidotnuni Moisés,
n‑ka xee nuu tuu‑ia,
te n‑jaʼan‑s:
—Kidatniu Beelzebú anu‑s.
Xiʼin xa taxnuni kuiʼna kineʼe‑s tachi uʼu ñuʼu anu ñayiu.
23 N‑kana Jesús se ijan,
te n‑jaʼan‑ia ɨɨn tnuʼu xa dakuaʼa‑ia‑s:
—¿Nax xiniñuʼu nux na kineʼe Satanás mee mee‑i?
24 Ɨɨn se kunxaʼnu ka,
nux na kada‑s xa jantnaʼa ntnaʼa mee‑s se ñuu‑s,
te duʼa danaa‑s ñuu‑s.
25 Ɨɨn veʼe,
nux n‑jantnaʼa ñayiu ntnaʼa mee‑i n‑kuu,
te ma naʼa kuyuku koio‑i veʼe‑i.
26 Te Satanás,
nux n‑jantnaʼa‑i ntnaʼa mee‑i n‑kuu,
te jɨn ndɨʼɨ ntdaa xa taxnuni‑i.
27 ʼNi ɨɨn ñayiu ma kuaʼa kɨu‑i veʼe se ndaku ka.
Ma kuaʼa‑i xa tnɨɨ‑i xaxii‑s.
Ditna ka duku vaʼa‑i se ndaku ka,
te dada kuaʼa‑i tnɨɨ‑i ntdaa xa io veʼe‑s.
28 ʼXandaa kuu xa jaʼan‑r.
Taxkanu ini Ianyuux ntdaa kuechi ñayiu ñuñayiu.
Ntdaa kuechi‑i xiʼin xa kuiʼa jaʼan‑i Ianyuux.
Davaʼa nga xa kuiʼa ka jaʼan‑i‑ia,
te taxkanu ini‑ia‑i.
29 Ko nux kuiʼa ka jaʼan‑i Espíritu Ii,
ma taxkanu ini Ianyuux mee‑i.
Nde kuia ma jɨn ndɨʼɨ nuncas ma taxkanu ini‑ia‑i.
Tekuechi‑ia‑i nde kuia ma jɨn ndɨʼɨ.
30 Duʼa n‑jaʼan‑ia,
xaxeʼe xa n‑ka jaʼan‑s xa kidatniu kuiʼna anu‑ia.
Dɨʼɨ Jesús xiʼin ñani‑ia
31 Ijan n‑xee dɨʼɨ Jesús xiʼin ñani‑ia.
Nujuiin koio‑s xiʼin‑ña yata veʼe,
te n‑tundaʼa‑s tnuʼu xa na kee‑ia xa ndatnuʼu‑ia xiʼin‑s.
32 Xiti veʼe jan nukoo kueʼe ñayiu nduu lado diñi Jesús.
N‑ka jaʼan‑s:
—Dɨʼɨ‑n xiʼin ñani‑n xnii yata veʼe.
Ka nanduku ñaʼa‑s.
33 N‑xiaʼan‑ia:
—¿Jundu kuu dɨʼɨ‑r xiʼin ñani‑r?
34 Ndeʼa‑ia se xtuu ijan,
se naduku nduu ñaʼa,
n‑jaʼan‑ia: