Ɨɨn se xajan trɨu
4
Ɨnka vuelta n‑kixeʼe Jesús xa dakuaʼa‑ia ñayiu yuʼu ndute kaʼnu.
Yo kueʼe ñayiu n‑ka taka nuu tuu‑ia.
Xijan kuu xa n‑keé‑ia ɨɨn barcu nuu ndute.
Ijan nukoo mee‑ia,
te xyuku ntdaa ñayiu nuu ñuʼu yundute.
San Marcos 4:1-20
3 —Kunini koio‑n.
Ɨɨn se xajan trɨu,
n‑kee‑s juan kate‑s trɨu.
4 Na xate‑s tata,
te xaku tata n‑xino ichi,
te n‑xee chilidaa,
te n‑nachii‑tɨ tata.
5 Xaku ka tata n‑xino nuu ñuʼu yadi nuu kaa kueʼe yuú.
Yachi n‑xite tata,
chi ñuʼu yadi kuu.
6 Ko hora n‑ndii ngandii,
te n‑kayu ditu trɨu kuechi.
Xaxeʼe xa ña n‑xika yoʼo‑i,
te n‑yichi‑i.
7 Xaku ka tata n‑xino nuu kaa iñu.
Na n‑xite trɨu,
te n‑xaʼnu ka iñu dada trɨu.
N‑chidaʼu iñu trɨu,
te ña n‑kee nuni yoko trɨu.
8 Ko dava ka tata n‑xino nuu ñuʼu kojon,
te vaʼa n‑xite te n‑xaʼnu,
te vaʼa n‑kee nuni yoko trɨu.
Dava yoko trɨu n‑kee oko uxi nuni,
dava yoko trɨu n‑kee uni diko nuni,
dava yoko trɨu n‑kee ɨɨn cientu nuni.
9 ʼXandaa kuu xa xndaxio doʼo‑n.
Io xa kunini koio‑n.
Se dakuaʼa Jesús, n‑ka xijan tnuʼu‑s‑ia nax juini kachi tnuʼu‑ia
10 Ndɨʼɨ ñayiu juan nuʼu.
Menga Jesús,
xiʼin uxi uu se dakuaʼa‑ia,
xiʼin ɨnka se ka kunduu xiʼin‑ia,
n‑ka ndoo.
N‑ka xijan tnuʼu‑s‑ia nax juini kachi tnuʼu n‑xiaʼan‑ia.
11 N‑xiaʼan‑ia:
—Kaxi jaʼan Ianyuux nuu mee‑n.
Kida‑ia xa kutnuni ini koio mee‑n nanda taxnuni mee‑ia ñuñayiu.
Ko nuu ɨnka ñayiu meni tnuʼu dakuaʼa jaʼan‑ia.
12 ʼJuini xndeʼa‑i xa xndeʼa‑i,
ko ma kutnuni ini‑i.
Juini xnini‑i xa xnini‑i,
ko ma taxkanu ini Ianyuux kuechi‑i.
N‑jaʼan Jesús nax juini kachi “Ɨɨn se xajan trɨu”
13 ʼNux ñatu kutnuni ini‑n tnuʼu yaʼa,
¿nanda kutnuni ini‑n dava ka tnuʼu dakuaʼa?
14 Ná kuu se xajan trɨu,
da kuu se xian tnuʼu tnuʼu vaʼa Ianyuux nuu ñayiu.
15 Ná kuu tata n‑xino ichi,
da kuu dava ñayiu.
Hora teku‑i tnuʼu Ianyuux,
te xee Satanás,
te dita‑i tnuʼu Ianyuux anu ñayiu jan.
16 Ná kuu tata n‑xite nuu ñuʼu yuú,
da kuu ɨnka ñayiu.
Teku‑i tnuʼu Ianyuux,
te xeka vaʼa‑i tnuʼu,
te kuvete‑i.
17 Ko kuu‑i ná kuu trɨu chachi ña n‑xika yoʼo.
Nux kueʼe vida yaʼa‑i,
o nux jini uʼu ñaʼa ñayiu xaxeʼe xa jandixa‑i tnuʼu Ianyuux,
te ma kundee ini‑i xa jandixa ka‑i Ianyuux.
18 Ná kuu tata n‑xite nuu kaa iñu kuu ɨnka ñayiu.
Teku‑i tnuʼu Ianyuux.
19 Ko juini‑i xa kutuu vaʼa‑i ñuñayiu.
Juini‑i xa niʼi‑i tvini,
te kukajan ini‑i ntdaa xa io ñuñayiu.
Duʼa dandaʼu‑i mee‑i,
te ma kane tnuʼu Ianyuux anu‑i.
20 Te ná kuu tata n‑xite nuu ñuʼu kojon,
da kuu dava ñayiu.
Teku‑i tnuʼu vaʼa Ianyuux,
te xeka vaʼa‑i.
Juini‑i xa kada‑i ntdaa xa juini Ianyuux.
Ná kuu yoko trɨu neʼe oko uxi nuni,
a uni diko nuni,
a ɨɨn cientu nuni ka kuu mee‑i.
Ɨɨn candil koko
21 ʼKani ini koio candil koko.
Ma chivaʼa‑ro candil koko xiti maquila.
Ni kaʼa xito‑ro.
Jandodo‑ro candil nuu dujun,
na kuaʼa xa kukanda vaʼa.
San Marcos 4:21-41
22 Ni ɨɨn xa yɨvaʼa ma kɨvaʼa,
chi koo kanda.
Ni ɨɨn xa naʼi ma koo naʼi,
chi ketuu.
23 Xandaa kuu xa xndaxio doʼo‑n.
Io xa kunini koio‑n.
24 ʼChinuu nax kunini‑n.
Nani chikuʼa mee‑n,
dani nachikuʼa ñaʼa Ianyuux.
Te tax ka‑ia.
25 Ɨɨn ñayiu,
nux nevaʼa kueʼe‑i,
te xiaʼan ka Ianyuux.
Ɨɨn ñayiu ña tuu nax io,
dita Ianyuux nde itaʼu xa nevaʼa‑i.
Xite tata te xaʼnu
26 ʼXa taxnuni Ianyuux kuu ná kuu xa xate ɨɨn seyɨɨ trɨu nuu ñuʼu.
27 Kidi‑s.
Ndokoo‑s.
Nduu,
xakuaa xite tata te xaʼnu.
Te ña xini‑s nanda xite,
nanda xaʼnu.
28 Mee nuu ñuʼu kee xa kaxi‑ro.
Ditna ka xite trɨu kuii.
Ijan dada xino yoko trɨu.
Ijan dada kee nuni.
29 Na n‑yichi trɨu,
xaʼnde‑s trɨu xa nakueka‑s,
chi xá n‑xee kɨu taʼnde.
Ɨɨn ndɨjɨn maxtaxa
30 ʼ¿Ndeda ɨɨn xa io dadavatnaʼa‑r xiʼin xa taxnuni Ianyuux?
31 Ná kuu ndɨjɨn maxtaxa,
da kuu xa taxnuni Ianyuux.
Yava ka ndɨjɨn maxtaxa dada dava ka xa xate‑ro nuu ñuʼu.
32 Na n‑xite,
ndeʼe ka xaʼnu dada dava ka kuʼu.
Ndeʼe kee ndaʼa maxtaxa,
te xee chilidaa andɨu xa ndetatu‑tɨ kaʼa maxtaxa.
Nakuenda jaʼan Jesús tnuʼu dakuaʼa
33 Kueʼe tnuʼu dakuaʼa n‑jaʼan Jesús nuu ñayiu,
nde nuu n‑xee xa kutnuni ini‑i.
34 Tnuʼu yaʼa n‑jaʼan‑ia nuu ñayiu,
ko hora n‑ndoo menga‑ia xiʼin se dakuaʼa‑ia,
n‑dakuaʼa‑ia mee‑s nax juini jaʼan tnuʼu jan.
N‑kudeen Jesús nuu tachi ndeʼe
35 Na vax kunee kɨu ijan,
n‑xiaʼan Jesús nuu se dakuaʼa‑ia:
—Na yaʼa‑ro nde ɨnka lado yundute kaʼnu.
36 N‑ka dandoo‑s kueʼe ñayiu jan,
te xndeka‑s Jesús juaʼan barcu.
Dɨuni juaʼan tɨtnɨ ka barcu tuku.
37 Yo n‑kane tachi ndeʼe.
N‑tuxndee ndute barcu,
te vax chitu‑té xiti barcu.
38 Xiti barcu,
lado do nino,
ijan kaa Jesús,
kidi‑ia yɨʼɨ almohada dɨkɨ‑ia.
N‑ka dandoto ñaʼa‑s ka xiaʼan‑s:
—¡Maestru!
¿Ña tuu nax viʼi‑n xa vax nduxi‑ro nuu ndute a?
39 N‑ndokoo‑ia,
te n‑kudeen‑ia nuu tachi.
Te n‑jaʼan‑ia nuu ndute:
—Kadɨ yuʼu‑n.
Na nini.
—¿Nax kuu xa yo ka yuʼu‑n?
¿Ta jandixa ka‑n xa ñunuu ñaʼa‑r a?
41 Yo ndeʼe n‑ka yuʼu‑s.
N‑ka jaʼan‑s ɨɨn‑s nuu ɨnka‑s:
—¿Na seyɨɨ kuu se yaʼa,
xa jandixa ñaʼa tachi xiʼin ndute?