N‑ndadavaʼa Jesús se teʼyu ñɨɨ
8
Nu n‑yaʼa xa n‑jaʼan Jesús ntdaa xaʼa nuu ñayiu,
n‑nuu‑ia xeʼe yuku jan,
te kueʼe ka ñayiu n‑ka xe kuitandijun ñaʼa.
2 Te n‑xe juiin xiti ɨɨn se tnaʼa kueʼe teʼyu ñɨɨ nuu‑ia.
N‑jaʼan‑s:
—Dito,
¿vatuka ndadavaʼa ñaʼa‑n a?
Ndadavaʼa ñaʼa‑n chi n‑kida Ianyuux xa ndadavaʼa‑n ñayiu.
3 N‑dakaa‑ia ndaʼa‑ia te n‑tenee‑ia ndaʼa‑ia‑s te n‑jaʼan‑ia nuu‑s:
—Na ndvaʼa‑n nudaa.
—Maxku ñaʼa jaʼan‑n nuu ñayiu.
Diko ni juan dandeʼa dutu ñɨɨ‑n xa na jini‑s xa n‑ndvaʼa‑n.
Juñaʼa‑n‑sɨ ɨɨn xa na doko‑s nuu altar na io ley n‑chidotnuni Moisés chi n‑ndvaʼa‑n na kuaʼa na jini‑s xa ruʼu n‑ndadavaʼa ñaʼa —kuu Jesús,
xiaʼan‑ia.
Ɨɨn centurión n‑kukanu ini Jesús xa ndadavaʼa‑ia se xinokuechi nuu‑s
5 Juan nuʼu Jesús Capernaum.
Nu n‑ndɨu‑ia ñuu jan,
te n‑xetuʼa ñaʼa ɨɨn centurión.
N‑jaʼan‑s nuu Jesús:
6 —Dito,
yo kuʼu se xinokuechi nuu‑da,
te kaa‑s veʼe‑da.
N‑xiʼí xeʼe‑s te ña kuu xa kaka‑s.
Yo ndeʼe tna uʼu‑s.
Yo ndaʼu yaʼa‑s.
7 Te n‑jaʼan Jesús nuu‑s:
—Juan xee‑r te ndadavaʼa‑r‑sɨ.
8 Te n‑xiaʼan centurión jan:
—Dito,
ñatu natau xa xee‑n veʼe‑da chi ndandɨʼɨ‑n.
Diko ni jaʼan‑n xa na ndvaʼa se xinokuechi nuu‑da,
te ndvaʼa‑s.
9 Ɨnka seyɨɨ taxnuni nuu‑da,
te dɨuni taxnuni‑da tuku.
Taxnuni‑da nuu se ka kuu soldado.
Nux na jaʼan‑da nuu ɨɨn‑s xa na jɨʼɨn‑s ɨɨn nuu na jɨʼɨn‑s,
te xeʼen‑s.
Nux na jaʼan‑da nuu ɨnka‑s xa na xee‑s veʼe‑da,
xee‑s.
Te dɨuni taʼu tniu‑da nuu se xinokuechi nuu‑da xa na kada‑s ɨɨn xa kada‑s te kida‑s —kuu‑s,
xiaʼan‑s nuu Jesús.
10 Nu n‑teku Jesús xa n‑jaʼan se ijan,
n‑yuʼu anu‑ia,
te n‑jaʼan‑ia nuu ñayiu xndijun ñaʼa:
—Jaʼan ndaa‑r xa ña uun xini‑r ɨɨn ñayiu Israel kukanu ini ñaʼa na kukanu ini ñaʼa se yaʼa.
11 Kueʼe ñayiu kee nde nuu kane ngandii xiʼin nde nuu keé ngandii xa nkoo koio‑i yuʼu mexa xiʼin Abraham,
Isaac,
Jacob xa kaxi‑i xiʼin‑s andɨu nuu taxnuni Ianyuux.
12 Ñayiu Israel ka xani ini xa yɨtnaʼa‑i nuu ñayiu kutuu nuu taxnuni Ianyuux,
ñayiu ijan kandeka ñaʼa Ianyuux jɨʼɨn nuu nee.
Ndeʼe ndaʼi‑i te ndeʼe kiti ini‑i nuu Ianyuux —kuu‑ia,
xiaʼan‑ia.
13 Te xiaʼan Jesús nuu centurión jan:
—Juan nuʼu,
te na yaʼa na kukanu ini‑n xa yaʼa.
Te ndvaʼa se xinokuechi nuu‑s hora ijan.
Yo kueʼe ñayiu n‑ndadavaʼa Jesús
14 Ijan dada juan nuʼu Jesús Capernaum.
N‑kɨu‑ia veʼe Spedru,
te n‑xini‑ia xa kaa didido‑s xa kuʼu‑ña.
Ñuʼu ñaʼa kaʼni.
15 N‑tnɨɨ‑ia ndaʼa‑ña,
te n‑ndiko ñaʼa kaʼni.
N‑ndokoo‑ña te n‑xiaʼan‑ña xa n‑xaxi‑ia.
16 Nɨni tuu Jesús veʼe ijan juan keé ngandii,
te xndeka ñayiu ñayiu xñuʼu ñaʼa xaloko n‑ka xee.
Diko ni n‑jaʼan Jesús xa kee xaloko jan,
te danaa n‑ka kee‑i anu‑i.
Dɨuni n‑ndadavaʼa‑ia dava ka ñayiu ka kuʼu.
17 Duʼa n‑yaʼa xa n‑xetnaʼa tnuʼu Ianyuux n‑chidotnuni Isaías,
se n‑jaʼan nuu ñayiu xa n‑jaʼan Ianyuux.
N‑jaʼan‑s:
N‑ndadavaʼa‑ia ñayiu ka kuita.
N‑dita‑ia ntdaa kueʼe ka tnaʼa ñayiu.
Kuenda kɨu ɨɨn xa yoo vee ndido‑i n‑dita‑ia.
Se n‑ka juini xa nkuitandijun‑s Jesús
18 Yo kueʼe ñayiu n‑naduku nduu Jesús ɨnka kɨu.
Nu n‑xini‑ia‑i,
te n‑taʼu tniu‑ia xa dakaka se dakuaʼa‑ia barcu jɨʼɨn ɨnka lado yuʼu mar.
19 Hora ijan n‑xee ɨɨn se tuʼa vaʼa ley n‑chidotnuni Moisés,
te n‑jaʼan‑s:
—Maestru,
nkuitandijun ñaʼa‑da jɨʼɨn juini nde kuu nuu na jɨʼɨn‑n.
20 Te n‑jaʼan Jesús:
—Chikuii,
io yau kava xyɨʼɨ‑tɨ.
Dani chilidaa,
io taka‑tɨ,
ko ruʼu,
Ia kuu ñayiu,
ña tuu na veʼe‑r.
Ñavada nde ndetatu‑r.
21 Te n‑jaʼan ɨnka ntuku se dakuaʼa ñaʼa‑ia:
—Dito,
¿vatuka xa kiʼna ka nuʼu‑da veʼe‑da te na kuú taa‑da,
kuxi‑da‑s,
te ijan dada nkuitandijun ñaʼa‑da u?
22 Te n‑jaʼan Jesús:
—Nkuitandijun ñaʼa naʼi.
Na kuxi tnaʼa koio ñayiu ña ka xini jundu kuu Ianyuux.
N‑nujani Jesús tachi ndeʼe kane nuu mar
23 Ijan dada n‑keé‑ia xiʼin se dakuaʼa‑ia barcu.
Nu n‑kudava‑ia xiʼin‑s nuu mar,
te n‑kidi‑ia.
24 Danaa n‑kane ɨɨn tachi ndeʼe,
te ndeʼe n‑xe kandava ndute.
Kuu‑té xa kuxi‑té barcu jan.
25 Te n‑xe dandoto ñaʼa dava se dakuaʼa‑ia.
Ka xiaʼan‑s:
—Dito,
dakaku ñaʼa‑n chi vax nduxi‑ro nuu ndute.
26 Te n‑jaʼan‑ia nuu‑s:
—¿Nakuenda ka yuʼu‑n?
¿Nakuenda ña ka kukanu ini‑n Ianyuux?
Ijan dada n‑ndokoo‑ia te n‑kudeen‑ia nuu tachi xiʼin nuu ndute xe kandava.
Nanii nga n‑kuu.
27 Te n‑ka yuʼu‑s,
te ka xiaʼan tnaʼa‑s:
—¿Nde se kuu se yaʼa xa taxnuni‑s nuu ntdantuʼu xa io?
Nde tachi xiʼin ndute jandixa ñaʼa.
N‑kineʼe Jesús xaloko xñuʼu anu uu se Gadara
28 Ijan dada n‑xee‑ia xiʼin‑s ɨnka lado yuʼu mar jan nuu nani Gadara.
Te n‑ka xetuʼa ñaʼa uu se xñuʼu xaloko anu‑s.
N‑ka xo kɨu‑s yau kava nuu xyɨnduxi ndɨyɨ.
Yo vichi unu ndeʼe‑s.
Ñayo ñayiu n‑ka xo kuyɨɨ xa yaʼa‑i ijan.
29 Te n‑ka kana‑s:
—Daʼya Yɨɨ Ianyuux,
¿nax juun ñaʼa‑n?
¿Nakuenda xa antecas xá n‑kixee‑n xa yo ndeʼe kada uʼu ñaʼa‑n,
te ta xee ka kɨu n‑xantuu Ianyuux xa kada uʼu ñaʼa‑n?
30 Kueʼe kuchi xñuʼu yatni ijan.
31 Ka xiaʼan xaloko xñuʼu se ijan nuu Jesús xa na juejoon‑ia xa keé koio‑i anu kuchi jan.
Ka xiaʼan‑i:
—Nux kineʼe ñaʼa‑n te tundaʼa ñaʼa‑n,
na keé koio‑da anu kuchi xñuʼu ijan.
32 Xiaʼan Jesús nuu‑i:
—Juaʼan koio.
N‑ka kee xaloko jan anu nduu se ijan te n‑ka keé‑i anu kuchi jan,
te ñama n‑ka kendava‑t ɨɨn nuu ndichi.
N‑ka kekava‑tɨ nuu mar,
te n‑ka xiʼí‑tɨ.
33 Nu n‑ka xini se xñunuu kuchi jan xa duʼa n‑yaʼa,
te n‑ka kendava‑s.
Ka nuʼu‑s ñuu‑s xa najani koio‑s ntdaa xa n‑ka yaʼa se n‑ka ñuʼu ñaʼa xaloko jan.
34 Ntdaa ñayiu ñuu ijan n‑ka xee nuu Jesús.
Nu n‑ka xini‑i‑ia,
te n‑ka xiaʼan‑i nuu‑ia xa na jɨʼɨn‑ia ɨnka lado.