N‑ndadavaʼa Jesús se n‑xiʼí ndaʼa n‑xiʼí xeʼe
9
N‑ndeé‑ia barcu te n‑nangondita‑ia,
te n‑nxee‑ia Capernaum.
2 Te xndeka tɨtnɨ seyɨɨ ɨɨn se kaa nuu xito n‑xiʼí xeʼe n‑xee nuu‑ia.
N‑xini‑ia xa ka kukanu ini‑s Ianyuux,
te n‑jaʼan‑ia nuu se n‑xiʼí xeʼe jan:
—Maxku kukoʼyo ini‑n chi n‑taxkanu ini Ianyuux kuechi n‑kida‑n.
3 Xaxeʼe xa duʼa n‑jaʼan‑ia,
n‑ka ndatnuʼu se ka tuʼa vaʼa ley n‑chidotnuni Moisés.
N‑ka xani ini‑s,
“Dadavatnaʼa se yaʼa xiʼin Ianyuux.”
4 N‑kutnuni ini‑ia xa ka xani ini se ijan,
te n‑jaʼan‑ia nuu‑s:
—¿Nakuenda xa ka xani ini‑n xaloko?
5 Ka xini‑n xa ndvaʼa se yaʼa nux na jaʼan‑r:
“Ndokoo.
Kaka”,
ko ñatu jandixa‑n xa kuaʼa‑r xa taxkanu ini‑r kuechi n‑kida‑s.
6 Kunaʼa koio xa ruʼu xa kuu‑r Ia kuu ñayiu,
taxkanu ini‑r ñayiu n‑ka kida kuechi —kuu Jesús,
xiaʼan‑ia.
Ijan dada n‑jaʼan‑ia nuu se n‑xiʼí xeʼe:
—Ndokoo.
Ndoneʼe xito‑n,
doo‑n,
te juan nuʼu veʼe‑n.
7 Hora ijan ni n‑ndokoo‑s,
te juan nuʼu‑s veʼe‑s.
8 Kueʼe ñayiu xyuku ijan n‑ka xini xijan,
te n‑ka yuʼu‑i,
te n‑ka ndadakaʼnu‑i Ianyuux xaxeʼe xa n‑kida‑ia xa duʼa kuaʼa Jesús xa kada‑ia.
N‑jaʼan Jesús xa na nkuitandijun daña, Steu‑ia
9 Ijan dada n‑xee Jesús nuu nukoo daña Steu,
se xijan tvini nandajan gobierno.
N‑jaʼan‑ia:
—Neʼe,
te nkuitandijun ñaʼa.
N‑ndojuiin‑da te n‑xe kuitandijun‑da‑ia.
10 Juaʼan‑da xiʼin‑ia veʼe‑da xiʼin dava ka se dakuaʼa‑ia.
Dɨuni n‑ka xee kueʼe se ka xijan tvini nandajan gobierno xiʼin dava ka ñayiu yo kueʼe kuechi ka kida xa kaxdini koio‑s ijan.
Dani n‑ka xee se fariseu.
11 Nu n‑ka xini se fariseu se xtuu ijan,
te ka xiaʼan‑s nuu se ka dakuaʼa ñaʼa Jesús:
—¿Nakuenda xaxi maestru‑n xiʼin se ka xijan tvini nandajan gobierno xiʼin dava ka ñayiu ka kida kueʼe kuechi?
12 Nu n‑teku Jesús xa n‑ka jaʼan‑s,
n‑jaʼan‑ia:
—Ñayiu io vaʼa,
ña ndoñuʼu‑i setatna,
ko ñayiu ka kuʼu ndoñuʼu‑i‑sɨ.
13 Io xa kutnuni ini koio‑n nax kuu xaʼa:
“Juini‑r xa kundaʼu ini‑n ñayiu,
ñadu juini‑r xa doko‑n ɨɨn xa jandodo‑n nuu altar.”
Ñadu n‑kixee‑r xa jaʼan‑r nuu ñayiu vaʼa xa nkuitandijun ñaʼa‑i,
chi n‑kixee‑r xa jaʼan‑r nuu ñayiu ka xini xa kueʼe kuechi ka kida‑i xa nkuitandijun ñaʼa‑i —kuu Jesús,
xiaʼan‑ia nuu‑s.
N‑kakuneʼe Jesús ñayiu xndaxio ndite
14 Nu n‑xika kɨu,
te n‑ka xee se dakuaʼa ñaʼa Sua Bautista.
N‑ka jaʼan‑s nuu Jesús:
—¿Nakuenda xa daña xiʼin se fariseu,
xndaxio ndite‑da xa xneʼe ii‑da,
te se dakuaʼa‑n?,
¿nakuenda ñayo‑s xndaxio ndite hora xneʼe ii‑s?
15 Te n‑jaʼan Jesús tnuʼu kandee nuu‑s:
—Se dakuaʼa‑r ka kuu ná kuu se xtuu viko tnundaʼa,
te xnetnaʼa‑s xiʼin noviu.
Ñayo‑s io ndite hora xtuu‑s xiʼin noviu,
ko xee kɨu tnɨɨ ñayiu noviu jan.
Daa koo ndite koio‑s xaxeʼe xa kukoʼyo ini‑s.
16 Ñayo ñayiu dandee daʼma xee daʼma n‑kutuʼu,
chi nu nakate‑ro nandɨyɨ daʼma xee jan,
te nadataka‑i daʼma n‑kutuʼu jan,
te ndata.
Kuenda kɨu tnuʼu jaʼan‑r kuu daʼma xee jan.
17 Dɨuni ñayo ñayiu dakeé vinu xee bolsa ñɨɨ n‑kutuʼu chi ndata vinu xee bolsa ñɨɨ jan,
te katu ntdantuʼu vinu,
te ma jiniñuʼu ka bolsa ñɨɨ jan.
Ñayo daa kida,
chi dakeé‑ro vinu xee bolsa xee,
te ma datɨu‑ro,
ni vinu,
ni bolsa —kuu Jesús,
xiaʼan‑ia.
N‑ndadavaʼa Jesús daʼya dɨʼɨ Jairo xiʼin ñá n‑xe kajuʼun daʼma‑ia
18 Nɨni jaʼan Jesús xijan,
n‑xee ɨɨn se kida veñuʼu nuu‑ia.
N‑xe juiin xiti‑s.
N‑jaʼan‑s:
—Kuʼu daʼya dɨʼɨ‑da.
Viʼi nga ndetnɨɨ anu‑i,
ko nux kajan ndodo‑n ndaʼa‑n‑yɨ,
ndvaʼa‑i.
19 N‑ndojuiin Jesús,
te n‑xe kuitandijun‑da xiʼin‑ia se ijan.
20 Nu ñayiu xndijun ñaʼa yɨtnaʼa ɨɨn ñadɨʼɨ kuʼu.
N‑kuu uxi uu kuia ndita ñaʼa nɨñɨ.
N‑xe ndeʼe‑ña yata‑ia,
te n‑xe juʼun‑ña ndɨkɨ xeʼe daʼma‑ia.
21 N‑jaʼan mee n‑jaʼan ɨɨn‑ña,
“Diko ni na tnɨɨ‑ro xeʼe daʼma‑ia te ndvaʼa‑ro.”
22 Te n‑ngokoo Jesús xa kundeʼa‑ia ñá ijan.
Te xiaʼan‑ia:
—Maxku tnau ini ka‑n,
chi xaxeʼe xa kukanu ini ñaʼa‑n,
xijan kuu xa n‑ndvaʼa‑n.
Hora ijan ni n‑ndvaʼa ñá ijan.
23 Ijan dada n‑xee Jesús veʼe se kida veñuʼu,
te n‑kɨu‑ia.
N‑teku‑ia xa ka tɨu‑s tnuyoo.
N‑teku‑ia xa yo ka kuvaa ñayiu.
24 Te n‑jaʼan‑ia:
—Ta kee koio chi ña n‑xiʼí dichi yaʼa chi diko ni junee‑i.
Te n‑ka xakundee ñaʼa ñayiu xyuku ijan chi n‑ka xini‑i xa n‑xiʼí‑i.
25 Nu n‑kee ñayiu yata veʼe,
te n‑tnɨɨ Jesús ndaʼa‑i te n‑nadandoto‑ia‑i.
26 N‑ndee Jesús ijan te ntdaa ñuu ijan n‑daxandodo xa n‑nadandoto‑ia‑i.
N‑ndadavaʼa Jesús uu se n‑kuaa xiʼin se ñatu kuu jaʼan
27 N‑ndee Jesús ijan,
te n‑ka xe kuitandijun ñaʼa uu se kuaa.
Ka kana‑s.
Ka xiaʼan‑s:
—Kundaʼu ini ñaʼa‑n,
Daʼya dana David.
28 Nu n‑naxee Jesús veʼe‑ia,
te n‑ka xetuʼa ñaʼa nduu se kuaa jan,
te n‑jaʼan‑ia:
—¿Ka jandixa‑n xa kuaʼa‑r xa ndadavaʼa ñaʼa‑r a?
Te n‑ka jaʼan‑s:
—Joon,
ka jandixa‑da.
29 N‑tenee‑ia ndaʼa‑ia nduchi nuu‑s,
te xiaʼan‑ia nuu‑s:
—Na kuu ná ka jandixa‑n xa yaʼa.
30 N‑ka nukondeʼa‑s,
te xiaʼan‑ia nuu‑s:
—Maxku nde ku jaʼan koio‑n.
31 Juini daa n‑jaʼan‑ia,
ko kueʼe ka ñayiu ntaka ñuu xndaxio yatni xiʼin ñuu ijan n‑ka teku xa n‑kida Jesús xa n‑ka nukondeʼa‑s xaxeʼe xa n‑ka daxa niʼni tnuʼu‑s.
32 Nɨni n‑ka ndee‑s,
n‑ka xee ka ñayiu nuu Jesús.
Xndeka‑i ɨɨn se ña kuu jaʼan ñuʼu xaloko anu‑s.
33 N‑kineʼe Jesús xaloko jan anu‑s.
Nu n‑yaʼa xa kineʼe‑ia xaloko,
te n‑kixeʼe‑s xa jaʼan‑s.
Te n‑ka yuʼu ñayiu xyuku ijan.
Ka xiaʼan tnaʼa‑i:
—Ña uun ka xini‑ro xa n‑xini‑ro vitna.
34 Nu n‑ka teku se fariseu te n‑ka jaʼan‑s:
—Mee Kuiʼna taxnuni nuu dava ka xaloko kida xa kuaʼa se yaʼa xa kineʼe‑s xaloko ñuʼu anu ñayiu —ka kuu‑s,
n‑ka jaʼan‑s.
Xaku ni se ka xinokuechi nuu Ianyuux io
35 N‑ka xikonuu‑da xiʼin Jesús ntaka ñuu naʼnu xiʼin ñuu kuechi io ijan.
N‑dakuaʼa‑ia ñayiu ntaka veñuʼu kuechi Israel.
N‑jaʼan‑ia nax kada‑i xa kɨu tnaʼa‑i nuu ñayiu taxnuni Ianyuux nuu‑i.
N‑xo ndadavaʼa‑ia ñayiu ka tnaʼa davaʼa nga kueʼe.