N‑tundaʼa Jesús uxi uu se dakuaʼa‑ia xa nkada koio‑s tniu Ianyuux
10
Nu n‑xika kɨu,
te n‑nadataka ñaʼa Jesús uxi uu daña,
se dakuaʼa ñaʼa‑ia,
te n‑kida‑ia xa n‑kineʼe‑da xaloko ñuʼu anu ñayiu.
Dɨuni n‑kida‑ia xa ndadavaʼa koio‑da ñayiu ka tnaʼa davaʼa nga kueʼe.
2 Duʼa xnani nɨn uxi uu daña,
se n‑tundaʼa ñaʼa Jesús:
Se kiʼna nuu nani Simón.
Dɨuni nani‑sɨ Spedru.
Ɨnka‑s kuu Ndrixi,
ñani Simón.
Ɨnka‑s kuu Jacobo xiʼin ñani‑s Sua,
se ka kuu daʼya yɨɨ Zebedeo.
3 Ɨnka‑s nani Slipe ɨnka‑s nani Stolo,
ɨnka‑s nani Tomaxi.
Daña nani Steu.
Se xijan tvini nandajan gobierno n‑xo kuu‑da.
Ɨnka‑s nani Jacobo,
daʼya yɨɨ Alfeo.
Ɨnka‑s nani Tadeo.
4 Ɨnka‑s nani Simón,
se n‑yɨtnaʼa nuu partido Cananista.
Ɨnka‑s nani Judas Iscariote,
se n‑kida xa tnɨɨ juxtixia Jesús.
5 N‑taʼu tniu‑ia nuu‑da ntdaa‑da nax kada koio‑da,
te n‑tundaʼa ñaʼa‑ia.
N‑jaʼan‑ia:
—Maxku jɨʼɨn koio‑n nuu io ñayiu ña ka kuu ñayiu Israel,
ni maxku ku jɨʼɨn koio‑n ñuu Samaria.
6 Naa xa jɨʼɨn‑n ijan dakuaʼa koio‑n ñayiu Israel ya.
Ñayiu Israel ka kuu ná ka kuu tkachi n‑ka xita.
7 Jaʼan koio‑n nuu ñayiu nuu jɨʼɨn koio‑n xa vax kuyatni kɨu taxnuni Ianyuux nuu ñayiu ñuñayiu.
8 Ndadavaʼa koio‑n ñayiu ka kuʼu.
Nadandoto koio‑n ñayiu n‑ka xiʼí.
Ndadavaʼa‑n ñayiu ka tnaʼa kueʼe teʼyu ñɨɨ.
Kineʼe koio‑n xaloko xñuʼu anu dava ka ñayiu.
Ndadavaʼa duʼa nga‑n ñayiu chi n‑kida duʼa nga Ianyuux xa kuaʼa kada koio‑n xijan.
9 Maxku dakeé koio‑n tvini kuu oro,
ni tvini kuu plata,
ni tvini kuu cobre kanana xndandee dujun kaʼa‑n.
10 Maxku kaneʼe koio‑n jayate‑n.
Maxku kaneʼe koio‑n ɨnka daʼma xiʼin ɨnka tayu ndixa xa nadama‑n.
Maxku kaneʼe‑n karruti‑n.
Maxku kaneʼe‑n ntdaa xijan,
chi taʼu ñayiu kidatniu kuu xa niʼi‑i xa kaxi xa koʼo‑i.
11 Hora na xee‑n ɨɨn ñuu kaʼnu a ɨɨn ñuu luchi,
te nduku koio‑n nuu ndexu io ɨɨn ñayiu vaʼa.
Veʼe ñayiu ijan,
ndoo koio‑n;
maxku dama‑n veʼe ndoo koio‑n.
12 Hora na kɨu‑n veʼe jan,
te jaʼan‑n:
“Vaʼa nga taʼu kuu koio‑n.”
13 Nux taʼu ñayiu kuu xa kutuu vii kutuu vaʼa‑i,
daa kutuu‑i.
Nux ñaʼa,
mee ni‑n kutuu vii kutuu vaʼa xaxeʼe tnuʼu n‑ka jaʼan‑n.
14 Nux io ɨɨn veʼe a ɨɨn ñuu ñayo ñayiu n‑ka xeka ñaʼa,
ni ñayo‑i n‑xo nini tnuʼu‑n,
ndee koio‑n.
Nɨni ndee‑n veʼe a ñuu ijan kɨdɨ koio‑n xeʼe‑n xa na kee ñuyaka xa na kundeʼa ñayiu ijan xa n‑kida‑i kuechi.
15 Na jaʼan ndaa‑r xa ndaʼu ka yaʼa ñayiu ñuu ijan dada ñayiu n‑xio Sodoma xiʼin Gomorra kɨu na ndadandaa Ianyuux kuechi ñayiu ñuñayiu.
16 ʼTundaʼa ñaʼa‑r xa jɨʼɨn‑n ñuu ijan na jɨʼɨn tkachi nuu io lobo,
te cuedado koo koio‑n.
Vivo koo koio‑n ná vivo koo,
te dɨuni ku kuu‑n ná kuu data xa ña tuu nax kida‑tɨ.
17 Jɨn ndeka ñaʼa ñayiu nuu juxtixia ka kidandaa kuechi ñayiu Israel,
te janñaʼa‑s chirrión ñɨɨ xiti veñuʼu kuechi;
xijan kuu xa cuedado koo koio‑n.
18 Jɨn ndeka ñaʼa‑s nuu se kuu gobernador romano xiʼin nuu se ka taxnuni ka.
Ntdaa xijan kada ñaʼa koio‑s xaxeʼe‑r xiʼin xaxeʼe xa kakuneʼe ñaʼa‑n nuu‑s xiʼin nuu ñayiu ña ka kuu ñayiu Israel.
19 Na kandeka ñaʼa‑s jɨʼɨn nuu juxtixia,
maxku kundu ini‑n,
chi hora ijan kachitnuʼu ñaʼa Ianyuux xa jaʼan koio‑n nuu‑s.
20 Ñadu ndoʼo kani ini tnuʼu jaʼan‑n chi Espíritu Ianyuux kachitnuʼu ñaʼa hora ijan tnuʼu jaʼan koio‑n nuu se ijan.
21 Se io ñani,
datuu‑s ñani‑s te kaʼni ñaʼa koio juxtixia.
Se ka kuu taa,
datuu‑s daʼya‑s.
Ñayiu ka kuu daʼya,
ndandita‑i nuu tadɨʼɨ‑i,
te kaʼni ñaʼa koio‑i.
22 Jini uʼu ñaʼa ntdaa ñayiu xaxeʼe xa ka kukanu ini ñaʼa‑n.
Nux dani na ku jandixa ñaʼa koio‑n te ma kande ini ñaʼa‑n,
kɨu na ndixi‑r dananitaʼu ñaʼa‑r.
23 Hora na kada uʼu ñaʼa ñayiu ɨɨn ñuu,
kunu koio‑n.
Jɨʼɨn‑n ɨnka ntuku ñuu.
Na jaʼan ndaa‑r xa ma ndexio‑n ntdaa ñuu Israel,
te ndixi‑r.
24 ʼÑayo ñayiu yɨʼɨ xkuela tuʼa ka dada maestru‑i.
Dɨuni ñayo ñayiu xinokuechi kunuu ka dada xtoʼo‑i.
25 Se dakuaʼa ñaʼa maestru‑s,
io‑s xinotuʼa na n‑xinotuʼa maestru‑s,
te n‑kuu;
ma kutuʼa ka‑s dada maestru‑s.
Dani se xinokuechi,
io‑s xee ku kuu‑s ná kuu xtoʼo‑s,
te n‑kuu;
ma yaʼa nduu ñaʼa‑s.
Kuu‑r ná kuu se kuu taa nukee nuveʼe‑s.
Nux ka jaʼan ñayiu xa taa jan kuu Kuiʼna nani Beelzebú,
naka familia‑s ma ku jan tnuʼu ñayiu ijan.
26 ʼMaxku yuʼu koio‑n xa kada ñaʼa ñayiu,
chi xa naʼi ka kida‑i tuu na xee kɨu.
Xee kɨu jini koio ɨnka ñayiu nax n‑ka kida‑i.
27 Xa naʼi jaʼan‑r xakuaa xiti ɨɨn cuartu,
na xee kɨu jaʼan koio ndoʼo nuu kanda,
te teku koio ñayiu.
Xa n‑jaʼan niʼni‑r doʼo‑n,
xee kana koio‑n dɨkɨ veʼe.
28 Maxku yuʼu koio‑n nuu se kaʼni ñaʼa,
chi ña tuu nax kada‑s anu‑n.
Yuʼu koio nuu Ia danaa anu‑n xiʼin ñɨɨ‑n andea.
29 Xaku ni tvini yaʼu kɨt ka kuu gorrión.
Juini ñatu yaʼu‑t,
ko ñayo‑t jungava nux ña juini Ianyuux.
30 Daa ka kuu mee‑n,
chinuu ñaʼa Ianyuux ntdaa‑n.
Nde idi dɨkɨ‑n,
n‑kaʼu‑ia.
31 Xijan kuu xa maxku yuʼu koio‑n.
Yodo ka yaʼu‑n ɨɨn ɨɨn‑n dada kueʼe gorrión.
32 ʼÑayiu ka jaʼan jundu kuu‑r nuu dava ka ñayiu,
dani ruʼu,
jaʼan‑r xa xini‑r‑yɨ nuu Taa‑ro Ianyuux,
Ia tuu andɨu.
33 Ñayiu na jaʼan xa ña ka xini ñaʼa‑i nuu dava ka ñayiu,
dɨuni jaʼan‑r xa ña xini‑r‑yɨ nuu Taa‑ro Ianyuux,
Ia tuu andɨu.
34 ʼMaxku kani ini koio‑n xa n‑kixee‑r xa kutuu vii kutuu vaʼa koio‑n xiʼin dava ka ñayiu chi nukuita‑i kaʼni ñaʼa‑i xiʼin espada
35 xaxeʼe xa tuku jandixa koio‑n.
Xaxeʼe xijan kada uʼu ñaʼa ñayiu ñuu‑n.
Se kuu daʼya,
kada uʼu‑s taa‑s xaxeʼe xa tuku jandixa taa‑s.
Ñá kuu daʼya,
kada uʼu‑ña dɨʼɨ‑ña xaxeʼe xa tuku jandixa dɨʼɨ‑ña.
Ñá kuu xanu,
kada uʼu‑ña didido‑ña xaxeʼe xa tuku jandixa‑ña.
36 Jini uʼu tnaʼa ñayiu ɨɨn ni kee ɨɨn ni veʼe.
37 Nux kukajan ini ka ñayiu taa‑i a dɨʼɨ‑i dada ruʼu,
ñatu natau xa kandeka tnaʼa‑r xiʼin‑i.
Dani nux kukajan ini ka‑i daʼya yɨɨ‑i a daʼya dɨʼɨ‑i dada ruʼu ñatu natau xa kandeka tnaʼa‑r xiʼin‑i.
38 Nux ña io tuʼa‑n xa kuú koio‑n kuenda kɨu se doko curuxi‑s xa nkuitakaa dika‑s ná io tuʼa ruʼu,
ma kuu xa kandeka tnaʼa‑ro.
39 Ñayiu ña ka juini xa kuú‑i xaxeʼe‑r,
jɨʼɨn anu‑i andea,
ko ñayiu na kuú xaxeʼe‑r,
kutuu‑i xiʼin Ianyuux nɨkava nɨkuita andɨu.
40 ʼNux na xe ini ñaʼa ñayiu ndoʼo,
dani xe ini ñaʼa‑i ruʼu.
Ñayiu xe ini ñaʼa ruʼu,
dɨuni xe ini‑i Ia n‑tundaʼa ñaʼa xa vaa‑r.
41 Ñayiu xe ini se jaʼan tnuʼu Ianyuux nuu ñayiu xaxeʼe xa kuu‑s se jaʼan tnuʼu‑ia nuu‑i,
niʼi‑i taʼu‑i ná niʼi se ijan taʼu‑s.
Dani ñayiu xe ini se kida xavaʼa xaxeʼe xa kuu‑s sevaʼa,
niʼi‑i taʼu‑i ná niʼi se ijan taʼu‑s.
42 Ñayiu na juñaʼa nga xa juñaʼa nga‑i ñayiu kundaʼu kukee xndijun ñaʼa ruʼu xaxeʼe xa kuu‑i ñayiu xndijun ñaʼa,
xandaa xakuiti niʼi ñayiu ijan taʼu‑i juini idii yaxi ndute najuñaʼa‑i‑yɨ —kuu Jesús,
n‑jaʼan‑ia.