N‑tundaʼa Sua Bautista se dakuaʼa‑s nuu Jesús
11
Nu n‑jaʼan Jesús ntdaa xijan nuu nɨn uxi uu daña,
se n‑dakuaʼa ñaʼa‑ia,
te n‑ka kee‑da xiʼin‑ia Capernaum.
Juaʼan koio‑da tɨtnɨ ñuu xa dakuaʼa‑ia ñayiu.
2 Tiempu ijan yɨndiʼu Sua vekaa.
Nu n‑teku‑s xa kida Cristu kueʼe milagru,
n‑tundaʼa‑s se dakuaʼa‑s nuu‑ia
3 xa kajan tnuʼu koio‑s‑ia:
—¿Dɨu ndixi kuu se n‑taxi Ianyuux tnuʼu‑ia xa kixi‑n a kundetu koio‑da ɨnka‑s a?
—kuu‑s,
ka xiaʼan‑s.
4 Te n‑jaʼan‑ia:
—Juan nuʼu koio te najani‑n nuu Sua nax n‑ka teku‑n,
nax n‑ka xini‑n.
5 Juñaʼa‑n‑sɨ xa ka nukondeʼa ñayiu kuaa.
Ka nakaka ndaa ñayiu xika yakua.
Ka ndvaʼa ñayiu n‑teʼyu ñɨɨ.
Ka teku ñayiu n‑ka kudoʼo.
N‑ka nandoto dava ñayiu n‑xiʼí.
Dakuaʼa‑r ñayiu ta teku ka tnuʼu Ianyuux,
te ɨɨn xavaʼa kuu tnuʼu‑ia.
6 Naka taʼu kuu koio‑n nux ña ka dangondita ñaʼa‑n juini ñatu kida‑r xa xñu ini‑n xa kada‑r,
te xndijun ñaʼa naʼi‑n —kuu Jesús,
xiaʼan‑ia nuu‑s.
7 Nu n‑ka ndee se n‑tundaʼa ñaʼa Sua,
te n‑kixeʼe Jesús xa kakuneʼe‑ia Sua.
N‑jaʼan‑ia nuu‑da xiʼin nuu ñayiu xyuku ijan:
—¿Nax n‑ka xe ndeʼa‑n nuu ñayo io te ñatu nga juun dau?
Ñatu n‑ka xe ndeʼa‑n ɨɨn se kuu ná kuu tnu ite xa juaʼan vaxi‑tnu hora kane tachi xa kava uu kava uni anu‑s.
8 Ñadu se niʼno daʼma vaʼa te vita n‑ka xe ndeʼa‑n,
chi se ndix ndaʼu ndix kee n‑ka xe ndeʼa‑n.
Se xniʼno daʼma vaʼa te vita,
xndaxio‑s veʼe se kunxaʼnu.
9 Se n‑xo jaʼan tnuʼu Ianyuux nuu‑n n‑ka xe ndeʼa‑n.
Ndandɨʼɨ ka Sua dada dava ka se n‑ka xo jaʼan tnuʼu Ianyuux nuu ñayiu.
Xandaa xakuiti ndandɨʼɨ ka‑s.
10 Sua kuu se kakuneʼe ñaʼa tnuʼu Ianyuux yodotnuni.
Dɨuni yodotnuni xa n‑jaʼan Ianyuux nuu‑r:
Kiʼna nuu tundaʼa‑r ɨɨn se tundaʼa‑r jɨʼɨn.
Ijan dada tundaʼa ñaʼa‑r.
Kada‑s xa koo tuʼa ntdaa ñayiu xa xe ini ñaʼa‑i na jɨʼɨn‑n ñuñayiu.
11 Ñayiu kutuu nuu taxnuni Ianyuux andɨu,
ndandɨʼɨ ka‑i dada Sua vitna,
ko xandaa xakuiti ndandɨʼɨ ka Sua Bautista dada dava ka ñayiu.
12 Nde kɨu n‑kixee Sua Bautista xiʼin nde vitna ka kɨu tnaʼa ñayiu nuu ñayiu ka jandixa xa taxnuni Ianyuux nuu‑i,
te ka jantnaʼa‑i xiʼin ñayiu ka kɨu tnaʼa nuu‑i.
Dava se ndeʼe,
juexa taxnuni‑s nuu ñayiu ka jandixa xa taxnuni Ianyuux nuu‑i.
13 Xa daa nga n‑chidotnuni Moisés xiʼin se n‑ka jaʼan tnuʼu Ianyuux nuu ñayiu xa kixi Sua.
14 Nux io anu‑n xa jandixa koio‑n xa jaʼan‑r,
jandixa koio xa Sua kuu na n‑xo kuu Elías,
se n‑jaʼan nuu ñayiu xa n‑jaʼan Ianyuux.
15 Xaxeʼe xa xnini‑n xa jaʼan‑r kunini vaʼa koio xa na kutnuni ini‑n.
16 Ndoʼo xa ka kuu‑n ñayiu io vitna,
¿Jundu ka kuu‑n na kachi‑r?
Ka kuu‑n na ka kuu dichi kuechi xiʼin sekuechi xtuu nuu yaʼu te
17 n‑ka jaʼan dava‑s nuu dava ka‑s:
“N‑ka tɨu‑r tnuyoo,
ko ñayo‑n n‑ka xataxeʼe.
N‑ka xita‑r yaa koʼyo ini ko ñayo‑n n‑ka ndaʼi.”
18 Duʼa jaʼan‑r chi Sua,
ña n‑xo xaxi‑s xa ka xaxi‑ro.
Dɨuni ña n‑xiʼi‑s vinu te n‑ka jaʼan ñayiu:
“Xaloko ñuʼu anu‑s.”
19 Ndoʼo,
Ia kuu ñayiu,
davaʼa nga xa xaxi‑r,
te ka jaʼan‑n xa kuu‑r se ndeʼe xaxi.
Dɨuni xiʼi‑r vinu,
te ka jaʼan‑n xa kuu‑r se ndeʼe xiʼi.
Ka jaʼan‑n xa kumani‑r xiʼin se ka xijan tvini nandajan gobierno xiʼin dava ka ñayiu ka kida kueʼe kuechi.
Ka xini‑ro nuu ɨɨn xavaʼa a ɨɨn xa uʼu dakuaʼa ɨɨn maestru ñayiu hora xndeʼa‑ro xa ka kida ñayiu dakuaʼa‑s —kuu Jesús,
n‑jaʼan‑ia.
Ñuu nuu ñatu n‑ka natu ini ñayiu xa n‑ka kida‑i kuechi
20 Ijan dada n‑kixeʼe‑ia xa kanandee‑ia ñayiu io ñuu nuu n‑kida‑ia kueʼe milagru chi ña n‑ka natu ini‑i xa n‑ka kida‑i kuechi.
Xiaʼan‑ia:
21 —Ndaʼu yaʼa mee‑n,
ñayiu Corazín.
Ndaʼu yaʼa mee‑n,
ñayiu Betsaida.
Nu n‑kida‑r kueʼe milagru ñuu Tiro xiʼin Sidón ná n‑kida‑r ñuu mee‑n,
xá n‑kunaʼa n‑ka natu ini ñayiu ñuu ijan xa n‑ka kida‑i kuechi,
te kuiʼno‑i daʼma ndayu te kunukoo koio‑i nuu yaa n‑kuu.
22 Ndaʼu ka yaʼa mee‑n,
ñayiu Corazín xiʼin ndoʼo,
ñayiu Betsaida dada ñayiu Tiro xiʼin Sidón kɨu na ndadandaa Ianyuux kuechi ñayiu ñuñayiu.
23 Te mee‑n,
ñayiu Capernaum,
ma jɨʼɨn koio‑n andɨu chi keé koio‑n andea chi nuu n‑kida‑r kueʼe milagru ñuu Sodoma na n‑kida‑r ñuu mee‑n,
katuu naʼi Sodoma nde vitna n‑kuu.
24 Ndaʼu ka yaʼa koio mee‑n,
ñayiu Capernaum,
kɨu na ndadandaa Ianyuux kuechi ñayiu ñuñayiu dada ñayiu n‑xio Sodoma —kuu Jesús,
n‑jaʼan‑ia.
Ñatu ndaʼu yaʼa ñayiu jandixa ley Jesús
25 Ijan dada n‑kixeʼe‑ia xa jaʼan‑ia nuu Taa‑ro Ianyuux:
—Taa‑ro Ianyuux,
Ia taxnuni andɨu xiʼin ñuñayiu,
ndadakaʼnu ñaʼa‑da,
chi ñatu n‑datuu‑n xaʼa nuu ñayiu ka tuʼa vaʼa tutu,
ñayiu io xaxtnuni xa kutnuni ini‑i,
ko n‑datuu‑n ntdaa xaʼa nuu ñayiu ña ka tuʼa.
Ná kuu sekuechi ka kuu‑i.
26 Duʼa n‑kida‑n,
Taa‑ro,
chi duʼa n‑kuu anu‑n —kuu Jesús,
xiaʼan‑ia nuu Taa‑ro Ianyuux.
27 Ijan dada n‑jaʼan‑ia nuu‑da ntdaa‑da xiʼin nuu ñayiu xyuku ijan:
—N‑taxi Ianyuux xaxtnuni xa ntdaa xa kuu xa xino xini‑r.
Ñayo ñayiu xini xa kuu‑r Daʼya Yɨɨ Ianyuux.
Ñayo kutnuni ini jundu kuu‑r,
nani Taa‑ro Ianyuux.
Mee ni Taa‑ro Ianyuux xini jundu kuu‑r,
te mee ni‑r xini jundu kuu Taa‑ro Ianyuux.
Dɨuni jini dava ka ñayiu ñu ini‑r xa juña tnuʼu‑r jundu kuu‑ia.
Ña yoo ka ñayiu xini jundu kuu‑ia,
idii mee‑r.
28 Ka jandixa‑n kueʼe ley ñayiu xanaʼa;
xijan kuu ná kuu tniu ndee ka kida‑n xiʼin ɨɨn xa vee xndido‑n.
Ta ki tuʼa koio xa kunini‑n tnuʼu‑r te kada‑r xa ndetatu‑n.
29 Junukuechi koio nuu‑r,
te dakuaʼa ñaʼa‑r te vivii taʼu tniu‑r nuu‑n.
Nux xijan na kada koio‑n ma kɨ ini ka‑n xa yaʼa‑n te kutuu vii kutuu vaʼa‑n.
30 Ma ndaʼu yaʼa‑n xa junukuechi koio‑n nuu‑r.