Taʼu tniu Jesús nuu ñayiu nuu nax kada‑i kɨu sabado
12
N‑xee ntuku ɨnka kɨu sabado,
te n‑ka yaʼa‑da xiʼin‑ia ɨɨn nuu ñuʼu trɨu.
Nɨni n‑ka yaʼa‑da n‑ka tnundodo‑da trɨu jan xaxeʼe xa ka kojon‑da.
N‑ka kɨɨn‑da te n‑ka xaxi‑da.
2 N‑ka xini se fariseu,
te n‑ka jaʼan‑s nuu Jesús:
—Kundeʼa xa ka kida se dakuaʼa‑n.
¿Nakuenda ka kida‑s ɨɨn xa ña xejoon Ianyuux xa kada‑ro kɨu kuu sabado?
3 Te n‑jaʼan‑ia:
—¿Nax kuu xa ña ka kaʼu‑n nuu yodotnuni xa n‑kida David xiʼin se xndeka tnaʼa xiʼin‑s ɨɨn vuelta na ka kojon‑s?
4 N‑kɨu‑s veñuʼu te n‑ka xaxi‑s tila n‑ka doko dutu nuu Ianyuux.
Ñatu n‑xo xejoon Ianyuux xa kaxi ɨnka ñayiu tila ijan chi diko ni dutu xejoon‑ia xa kaxi‑s,
ko n‑ka xaxi David xiʼin se xnetnaʼa xiʼin‑s.
5 N‑chidotnuni Moisés xa ñadu kuechi kuu xa ka kidatniu dutu xiti veñuʼu kɨu sabado.
¿Ñayo‑n kaʼu nuu yodotnuni xijan u?
6 Ndandɨʼɨ ka ruʼu dada veñuʼu.
7 N‑jaʼan Ianyuux:
“Io xa kundaʼu ini koio‑n ñayiu ndaʼu ka yaʼa,
ñadu io xa doko koio‑n ɨɨn xa ka jandodo‑n nuu altar.”
Nu n‑ka kutnuni ini‑n xaʼa,
ma tekuechi koio‑n ñayiu n‑kuu.
8 Ruʼu,
Ia kuu ñayiu,
taxnuni‑r nuu ñayiu,
te taʼu tniu‑r nuu‑i nax kada‑i kɨu kuu sabado —kuu‑ia,
xiaʼan‑ia.
9 Ijan dada juaʼan koio‑da xiʼin‑ia veñuʼu luchi ñuu‑da xiʼin‑ia.
Ijan tuu ɨɨn se natɨyɨ ndaʼa.
10 N‑ka xitoyuʼu se fariseu Jesús chi n‑ka kuu‑s xa tekuechi neñuu‑s‑ia.
Ka xiaʼan‑s:
—¿Io vaʼa xa ndadavaʼa‑ro ñayiu kuʼu kɨu sabado a?
11 Te xiaʼan Jesús:
—Nux io ɨɨn tkachi‑n te kɨu kuu sabado n‑kekava‑tɨ ɨɨn yaú,
¿ma jɨn nutava‑n‑tɨ juini kɨu ndetatu‑ro kuu a?
12 Yodo ka yaʼu ñayiu dada tkachi.
Xijan kuu xa xejoon Ianyuux xa kida‑r xavaʼa kɨu kuu sabado.
13 Ijan dada n‑jaʼan‑ia nuu se natɨyɨ ndaʼa:
—Dakaa ndaʼa‑n.
Te n‑dakaa‑s ndaʼa‑s te n‑ndvaʼa ná n‑xio.
14 Te n‑ka kee se fariseu.
N‑ka kida ɨnuu‑s janda kada‑s xa kaʼni koio‑s Jesús.
N‑jaʼan Ianyuux xa xinokuechi Jesús nuu‑ia
15 Nu n‑teku Jesús xijan,
n‑kee‑ia ijan.
Ntdaa‑da xiʼin kueʼe ka ñayiu n‑ka nukuitandijun‑ia.
N‑ndadavaʼa‑ia ntdaa ñayiu kuʼu.
16 Te n‑jaʼan‑ia xa maxku datuu koio‑da jundu kuu‑ia.
17 Duʼa n‑xetnaʼa tnuʼu n‑chidotnuni Isaías,
se n‑jaʼan tnuʼu Ianyuux nuu ñayiu.
N‑jaʼan Ianyuux:
18 Na yoo Ia xinokuechi nuu‑r yaʼa.
N‑kaxi dɨɨn‑r‑ia,
te mani juini‑r‑ia.
Yo kudɨ ini‑r xa kida‑ia tniu‑r.
Kada‑r xa juʼun Espíritu‑r anu‑ia.
Jaʼan‑ia nuu ñayiu ñuñayiu xa ndadandaa‑r kuechi‑i.
19 Ma jantnaʼa tnuʼu‑ia xiʼin ñayiu.
Dɨuni ma kana xee‑ia na kana tatnu.
Dɨuni ma dakuaʼa‑ia ñayiu ichi kaʼnu xiti ñuu nde na ndadandaa‑ia kuechi‑i.
20 Tnu ite n‑tnaʼnu kuu ná kuu ñayiu ka kundaʼu ka kukee,
ma kaʼnde‑ia.
Yaa ñuʼu candil viʼi nga koko kuu ná kuu ñayiu ñatu ka kukanu ini ñaʼa vaʼa,
ma ndaʼva‑ia.
Ma daa kada‑ia xijan nde na ndadandaa‑ia kuechi‑i.
Ijan dada nduu‑i ñayiu vaʼa.
21 Ntdaa ñayiu ñuñayiu kukanu ini xa dananitaʼu ñaʼa‑ia.
Duʼa n‑chidotnuni Isaías.
N‑ka jaʼan se fariseu xa Kuiʼna kida xa kineʼe Jesús xaloko
22 Ɨnka kɨu xndeka ñayiu ɨɨn se ñuʼu xaloko anu‑s n‑ka xee nuu Jesús.
Kuaa‑s n‑kaku‑s te ña kuu jaʼan‑s.
N‑ndadavaʼa‑ia‑s.
Danaa n‑kixeʼe‑s jaʼan‑s,
te n‑kukanda nuu‑s.
23 Kueʼe ñayiu xyuku nuu‑ia hora ijan.
N‑ka xini‑i xaʼa te n‑ka yuʼu ntdaa‑i,
chi ñatu n‑ka xani ini‑i xa daa kada‑ia,
te n‑ka xiaʼan tnaʼa‑i:
—¿Ñadu se yaʼa kuu daʼya dana David a?
24 Dɨuni xyuku se fariseu ijan.
N‑ka teku‑s xa n‑ka jaʼan ñayiu xyuku ijan te n‑ka xiaʼan tnaʼa‑s:
—Mee Kuiʼna nani Beelzebú taxnuni nuu dava ka xaloko kida xa kuaʼa se yaʼa xa kineʼe‑s xaloko ñuʼu anu ñayiu.
25 N‑kutnuni ini Jesús xa n‑ka jaʼan‑s te n‑jaʼan‑ia:
—Nux ka jantnaʼa se ka taxnuni ɨɨn ñuu xiʼin ntnaʼa ka taxnuni‑s,
danaa tnaʼa‑s.
Dani ñayiu xtuu kaʼnu ɨɨn veʼe,
nux ka jantnaʼa‑i ma kutuu kaʼnu ka‑i.
26 Nux kineʼe Satanás xaloko xñuʼu anu ñayiu,
te ka jantnaʼa ntnaʼa mee‑i,
ma kuu ka xa taxnuni‑i.
27 Nux Beelzebú kida xa kineʼe‑r xaloko,
dɨuni Beelzebú kida xa kineʼe se dakuaʼa‑n xaloko ñuʼu anu ñayiu nuda.
Se dakuaʼa mee‑n ka datuu ñaʼa.
28 Espíritu Ianyuux kida xa kineʼe‑r xaloko.
Xaxeʼe xa kida‑ia xa kineʼe‑r‑yɨ,
xijan kuu xa ka xini‑n xa n‑kixeʼe xa taxnuni Ianyuux nuu‑n,
te io xa jandixa koio‑n‑ia.
29 Ná kuu ɨɨn se ndaku te ndeʼe‑s kuu Beelzebú.
Nde na duku ñayiu se ijan,
ijan dada ndaku‑i xa kɨu‑i veʼe‑s xa duʼu‑i xaxii‑s.
30 ʼÑayiu ña ka kuu ɨnuu xiʼin‑r ka kida xa ma kunini dava ka ñayiu xa jaʼan‑r.
Ñayiu ña dataka ñayiu xa kunini‑i xa jaʼan‑r,
kuenda kɨu xate niʼno‑i‑yɨ xa maxku teku‑i xa jaʼan‑r.
31 ʼKachi tnuʼu ñaʼa‑r xa taxkanu ini Ianyuux kuechi n‑ka kida ñayiu.
Juini kuiʼa na jaʼan ñaʼa‑i ruʼu,
Ia kuu ñayiu,
a mee Taa‑ro Ianyuux,
taxkanu ini‑ia‑i,
ko ma taxkanu ini‑ia ñayiu kuiʼa jaʼan Espíritu‑ia.
Dɨuni taxkanu ini‑ia ñayiu n‑ka kida ɨnka ɨnka kuechi.
32 Juini kuiʼa na jaʼan ñaʼa ñayiu ruʼu,
Ia kuu ñayiu,
taxkanu ini‑ia‑i,
ko ma taxkanu ini‑ia ñayiu kuiʼa jaʼan Espíritu‑ia.
Ma taxkanu ini‑ia‑i ñuñayiu yaʼa,
ni ɨnka vida.
33 ʼYutnu juun xavidi,
ñatu juun‑tnu ɨɨn xa ña xiniñuʼu.
Tnundeʼa vax teʼyu,
ñatuka xiniñuʼu ndeʼa juun‑tnu.
Ka xini‑n nuu na yutnu kuu‑tnu hora xndeʼa‑n xavidi juun‑tnu.
Daa ka kuu ñayiu vaʼa xiʼin ñayiu loko.
34 Mee ni xaloko xaduʼa ka jaʼan‑n chi daʼya Kuiʼna ka kuu‑n.
Xa xñuʼu anu‑n xijan ka jaʼan‑n.
35 Nux vaʼa‑n,
vaʼa ka jaʼan‑n.
Nux loko‑n,
kuiʼa ka jaʼan‑n.
36 Kɨu na ndadandaa Ianyuux kuechi ñayiu,
kundaa kuechi‑i xaxeʼe xa n‑ka jan nee n‑ka jan yichi‑i.
37 Xaxeʼe tnuʼu ka jaʼan ñayiu kundaa kuechi‑i,
te jaʼan Ianyuux nuu io kuechi‑i a ña tuu na kuechi‑i io —kuu Jesús,
n‑jaʼan‑ia.
Ná n‑yaʼa Jonás yaʼa Jesús
38 N‑ka teku se fariseu xiʼin se ka tuʼa vaʼa ley n‑chidotnuni Moisés xa n‑jaʼan Jesús,
te ka xiaʼan‑s nuu‑ia:
—Maestru,
kada ɨɨn milagru xa na kundeʼa‑r ntdaa‑r te jandixa ñaʼa‑r.
39 Te xiaʼan Jesús:
—Ndoʼo,
ñayiu io vitna unu loko‑n.
Ka najuen tnuʼu‑n ɨɨn xa ka xani ini‑n xa kuu‑i Ianyuux.
Ka jaʼan‑n xa kada‑r ɨɨn milagru.
Ma kuu xa jini‑n xijan.
Diko ni jini koio‑n xa yaʼa‑r ná n‑yaʼa Jonás,
se n‑jaʼan nuu ñayiu xa n‑jaʼan Ianyuux.
40 Uni nduu uni niu,
n‑kaa niʼno Jonás xiti chaka kaʼnu te dɨuni uni nduu uni niu kava ruʼu,
Ia kuu ñayiu xiti ñuʼu.
41 Te ñayiu Nínive datuu koio‑i kuechi n‑ka kida‑n.
Nandoto koio ndoʼo,
ñayiu io vitna xiʼin ñayiu Nínive,
te kuyuku‑n xiʼin‑i kɨu na ndadandaa Ianyuux kuechi ñayiu,
te datuu koio‑i kuechi n‑ka kida‑n,
chi ña n‑ka natu ini‑n xa n‑ka kida‑n kuechi,
ko mee‑i n‑ka natu ini xa n‑ka kida‑i kuechi ná n‑jaʼan Jonás tnuʼu Ianyuux nuu‑i.
Vitna n‑kixee ruʼu,
te ndandɨʼɨ ka‑r dada Jonás,
te ñatu ka jandixa ñaʼa‑n.
42 Dani ɨɨn ñadɨʼɨ n‑kunxaʼnu n‑xio do sur,
nandoto‑ña xiʼin ñayiu io vitna,
te taka koio‑ña xiʼin‑i,
te datuu‑ña kuechi‑i,
chi ña xnini‑i xa jaʼan‑r.
Xika n‑kixi ñá ijan xa kunini‑ña tnuʼu ndichi n‑jaʼan Salomón.
Kunaʼa koio xa n‑kixee ruʼu te ndandɨʼɨ ka‑r dada Salomón,
te ñatu ka jandixa ñaʼa‑n —kuu Jesús,
xiaʼan‑ia nuu‑s.
43 Ijan dada n‑kɨu‑da xiʼin Jesús ɨɨn veʼe,
te n‑jaʼan‑ia:
—Hora kane ɨɨn xaloko anu ɨɨn ñayiu,
te xikonuu‑i nuu ñayo io.
Nduku‑i ɨɨn nuu ndetatu‑i te ma niʼi‑i nuu ndetatu‑i.
44 Ijan dada kani ini‑i:
“Vaʼa ka nuu na ndeé‑ro anu ñayiu n‑kane‑ro.”
Naxee‑i te jini‑i xa n‑natɨʼu nuu n‑nane‑i te vaʼa n‑xe kotnaʼa ndatniu.
45 Ijan dada nkueka‑i uxa tnaʼa ka xaloko ka dada mee‑i,
te ndeé‑i xiʼin xaloko ijan te juʼun koio‑i anu ñayiu ijan.
Te ndaʼu ka yaʼa ñayiu ijan hora ijan dada xakiʼna.
Daa yaʼa ñayiu io vitna —kuu Jesús.
N‑xee dɨʼɨ Jesús xiʼin ñani‑ia nuu tuu‑ia
46 Nɨni jaʼan Jesús xijan,
n‑xee dɨʼɨ‑ia xiʼin ñani‑ia yata veʼe nuu tuu‑ia.
N‑ka xo ndetu ñaʼa‑ña,
chi n‑ka juini‑ña xa ndatnuʼu koio‑ña xiʼin‑ia.
47 Te n‑xian tnuʼu ɨɨn se n‑xian tnuʼu Jesús:
—Ndetu ñaʼa dɨʼɨ‑n xiʼin ñani‑n yata veʼe xa ndatnuʼu‑n xiʼin‑ña.
48 Xiaʼan Jesús nuu‑s:
—Na kachi tnuʼu ñaʼa‑r jundu ka kuu ñani‑r xiʼin dɨʼɨ‑r.
49 Te n‑daneʼe ndaʼa ñaʼa‑ia ntdaa daña se dakuaʼa ñaʼa‑ia te n‑jaʼan‑ia: