N‑jaʼan Jesús xa maxku yoo ku jan tnuʼu tnaʼa
7
Ijan dada n‑jaʼan ka‑ia:
—Maxku jan tnuʼu‑n ñayiu na kuaʼa maxku jaʼan‑i xa ña io vaʼa xa kida mee‑n chi
2 nani jan tnuʼu‑n ñayiu,
dani jan tnuʼu ñaʼa‑i.
Nani juñaʼa‑n dani nataxi‑i.
3 Kuenda kɨu yakua luchilii kaa niʼno nduchi nuu ñayiu xnetnaʼa xiʼin‑n kuu kuechi luchi ka kida‑i.
¿Nax kuu xa ka chinuu‑n xijan,
te ña ka chinuu‑n kuechi naʼnu ka kida mee‑n kuenda kɨu tnduʼu kaʼnu kaa niʼno nduchi nuu‑n?
4 ¿Nakuenda xa ka jaʼan‑n nuu ñayiu xnetnaʼa xiʼin‑n:
“Taxtuu nuu‑n na natava‑r yakua luchi kaa niʼno”,
te ña ka chinuu‑n tnduʼu kaa niʼno nduchi nuu mee‑n?
5 Ka kida nga‑n xa vaʼa‑n.
Kiʼna nuu natava koio‑n tnduʼu kaa niʼno nuu mee‑n na kuaʼa kaxi kundeʼa koio‑n xa natava‑n yakua luchi kaa niʼno nuu ɨnka ñayiu.
6 ʼMaxku jɨʼɨn‑n nuu ñayiu ña io daʼu ni xañuʼu nuu Ianyuux xa jaʼan koio‑n tnuʼu‑ia nuu‑i,
chi ka kuu‑i ná kuu ti ina a na kuu kuchi te tnuʼu‑ia kuu ná kuu perla yo yaʼu.
Kuchi,
jueñi niʼno‑tɨ perla jan,
te ti ina,
ngokoo‑tɨ te kada kuechi ñaʼa‑tɨ.
Ñayiu na kajan Ianyuux xa ndoñuʼu‑i, niʼi‑i
7 ʼNdoñuʼu xa ku kajan koio‑n te niʼi‑n.
Nduku koio te niʼi‑n.
Nani kuu xa dakande‑n yeʼe ñayiu xa najaan‑i xa kɨu‑n,
dani kuu xa kajan koio‑n nuu Ianyuux xa ndoñuʼu‑n,
te taxi‑ia
8 chi ñayiu xko xijan,
ka niʼi‑i.
Dani ka niʼi ñayiu xko nduku.
Ñayiu xko dakande yeʼe,
najaan yeʼe xa kɨu‑i.
9 Ndoʼo,
se ka kuu taa,
nux ka xijan daʼya‑n tila ma juñaʼa‑n yuú chi juñaʼa‑n tila.
10 Nux xijan daʼya‑n chaka ma juñaʼa‑n koo chi juñaʼa‑n chaka.
11 Juini ka kuu‑n ñayiu yo kueʼe kuechi ka kida,
xndeʼa‑n xa ka xiaʼan‑n daʼya‑n.
Ndoʼo ka xiaʼan‑n xa ndoñuʼu daʼya‑n,
naka Taa‑ro Ianyuux ma tuu nga ku taxi‑ia xa ka ndoñuʼu‑n nux na kajan koio‑n.
12 Xaxeʼe xa ka juini‑n xa na kada ñaʼa ñayiu xavaʼa,
kada koio‑n‑yɨ xavaʼa chi xijan n‑chidotnuni Moisés xiʼin se n‑ka jaʼan tnuʼu Ianyuux nuu ñayiu.
Yeʼe tnaʼa xiʼin yeʼe ndɨka
13 ʼXa tnɨɨ koio‑n ichi Ianyuux kuu ná kuu xa tnɨɨ‑ro ɨɨn ichi tnaʼa te kɨu‑ro ɨɨn yeʼe tnaʼa.
Xa jɨʼɨn ñayiu nuu naa‑i kuu ná kuu xa tnɨɨ‑i ɨɨn ichi kaʼnu te kɨu‑i yeʼe ndɨka.
Kueʼe ñayiu ka tnɨɨ ichi ijan.
14 Tnaʼa yeʼe te tnaʼa ichi juaʼan nuu kutuu‑ro xiʼin Ianyuux nɨkava nɨkuita.
Xaku ni ñayiu ka tnɨɨ ichi ijan.
Ka xini‑ro nuu na yutnu kuu‑tnu hora ndeʼa‑ro nax juun‑tnu
15 ʼChinuu vaʼa koio na ñaʼa jandixa koio‑n se ka kida nga xa ka jaʼan‑s xa n‑jaʼan Ianyuux.
Kuu‑s ná kuu kɨt ndeʼe kuu lobo.
16 Xaxeʼe xa ka kida‑s kuechi,
kutnuni ini koio‑n xa jaʼan‑s tnuʼu vete.
Ka kuu‑s ná kuu tnutitnu xiʼin tnuyɨkɨ.
Ña tuu na tnutitnu juun uva,
ña tuu na tnuyɨkɨ juun higo.
17 Yutnu juun xavidi,
ñatu juun‑tnu ɨɨn xa ña xiniñuʼu.
Tnundeʼa vax teʼyu,
ñatuka xiniñuʼu ndeʼa juun‑tnu.
18 Yutnu juun xavidi;
ñatu juun‑tnu ɨɨn xa ña xiniñuʼu.
Kuenda kɨu yutnu ijan ka kuu ñayiu vaʼa.
Tnundeʼa vax teʼyu,
ñatuka xiniñuʼu ndeʼa juun‑tnu.
Kuenda kɨu yutnu yaʼa ka kuu ñayiu loko.
19 Yutnu ñatuka juun xavidi,
taʼnde‑tnu,
te keé‑tnu nuu nuʼu.
20 Ka xini‑n nuu na yutnu kuu‑tnu hora xndeʼa‑n xavidi juun‑tnu.
21 ʼÑa ntdaa ñayiu ka jaʼan xa xtoʼo‑i kuu ñaʼa jɨʼɨn andɨu nuu taxnuni Ianyuux,
chi diko ni ñayiu ka kida xa juini Taa‑ro Ianyuux,
Ia tuu andɨu jɨʼɨn ijan.
22 Kɨu na ndadandaa‑r kuechi ñayiu,
te kachi dava ñayiu nuu‑r:
“N‑ka jaʼan‑da xa n‑dakuaʼa ñaʼa‑n nuu ñayiu.
N‑ka kakuneʼe‑da dɨu‑n xa n‑taʼu tniu‑da xa n‑kee xaloko anu ñayiu.
Dɨuni n‑ka kakuneʼe‑da dɨu‑n xa n‑ka kida‑da kueʼe milagru.”
23 Te juñaʼa‑r nuu‑i:
“Ña xini ñaʼa‑r.
Juaʼan naʼi koio chi kueʼe kuechi n‑ka kida‑n.”
Veʼe n‑xe kavatuu nuu toto xiʼin veʼe n‑xe kavatuu nuu ñuʼu kuchi
24 ʼXijan kuu xa ñayiu ka teku tnuʼu‑r te kida‑i xa jaʼan‑r,
kuu‑i ná kuu ɨɨn se kaxi ini.
Se ijan,
n‑kidavaʼa‑s veʼe‑s nuu toto ndɨka yɨʼɨ nuu ñuʼu.
25 N‑juun dau te n‑naneñu ndute xika deʼva.
Ndeʼe n‑tuxindee‑te xeveʼe‑s.
Dɨuni n‑kane tachi ndeʼe,
ko ñatu n‑tnanu veʼe‑s chi vaʼa n‑kuaʼa nuu toto.
26 Ñayiu ka teku tnuʼu‑r te ña jandixa‑i xa taʼu tniu‑r,
ka kuu‑i ná kuu se lilu xa n‑kidavaʼa‑s veʼe‑s nuu ñuʼu kuchi.
27 N‑juun dau,
te n‑naneñu ndute xika deʼva.
Ndeʼe n‑kane tachi.
Ndeʼe n‑tuxindee‑te xeveʼe‑s,
te ndondoo veʼe jan junkoio —kuu Jesús,
xiaʼan‑ia.