Na juñaʼa nga ñayiu xa ka ndoñuʼu ñayiu ka kundaʼu
6
Chinuu nuu nax kada koio‑n.
Kada koio xa vaʼa,
ko ñadu xa kada‑n xa vaʼa xa na kundeʼa ñaʼa ni ñayiu.
Nux kada koio‑n xa vaʼa diko ni xa na kundeʼa ñayiu,
ma dananitaʼu ñaʼa Taa‑ro Ianyuux,
Ia tuu andɨu.
2 Xijan kuu xa hora na juñaʼa koio nga‑n xa juñaʼa‑n ñayiu ka xijan ndaʼu,
maxku jaʼan‑n xa xijan kada‑n nuu ɨnka ñayiu.
Xijan ka kida se ka kida nga xa ka jandixa‑s xa taʼu tniu Ianyuux.
Duʼa ka kida‑s xiti veñuʼu kuechi xiʼin ichi kuechi ka xikonuu‑s diko ni xa na najuen tnuʼu ñaʼa ñayiu.
Xandaa xakuiti xa xá n‑ka niʼi‑s taʼu‑s,
te ñatu na taʼu‑s koo andɨu.
3 Hora na juñaʼa koio nga‑n ñayiu ka xijan ndaʼu ɨɨn xa juñaʼa‑n,
naʼi ni kada koio‑n,
ni ñayiu kumani xiʼin‑n,
maxku jini.
4 Naʼi juñaʼa koio‑n xa juñaʼa nga‑n.
Xa naʼi kada koio‑n kundeʼa Ianyuux,
juini ña kanda ndeʼa‑n‑ia,
te taxi‑ia taʼu‑n.
N‑dakuaʼa Jesús se dakuaʼa‑ia janda kajan taʼu koio‑s nuu Ianyuux
5 ʼNa kajan taʼu koio‑n nuu Ianyuux,
maxku kada koio‑n ná ka kida se ka kida nga xa vaʼa‑s.
Ka kida nga‑s xa vaʼa‑s chi ka tna ini‑s xa ka xijan taʼu‑s nuu Ianyuux nɨni xnii‑s xiti veñuʼu kuechi.
Dani ka kida‑s nuu nanitnaʼa ichi kaʼnu xa kundeʼa ñaʼa ñayiu.
Xandaa xakuiti xa n‑ka niʼi‑s taʼu‑s,
te ña tuu na taʼu‑s koo andɨu.
6 Na kajan taʼu koio‑n,
ndɨu koio‑n cuartu‑n,
te nakadɨ‑n yeʼe xa naʼi kajan taʼu koio‑n nuu Taa‑ro Ianyuux.
Ndeʼa ñaʼa‑ia juini ña kanda ndeʼa‑n‑ia,
te taxi‑ia taʼu‑n.
7 Na kajan taʼu koio‑n nuu Ianyuux,
maxku ku jaʼan koio‑n ɨɨn ni tnuʼu tɨtnɨ vuelta ná ka jaʼan ñayiu ña ka kuu ñayiu Israel.
Ka xani ini‑i xa xaxeʼe xa naʼa ka jaʼan‑i nini Ianyuux xa jaʼan‑i.
8 Maxku kada koio‑n ná ka kida ñayiu ijan,
chi xá ama naʼa Taa‑ro Ianyuux xa ndoñuʼu‑n.
9 Duʼa kajan taʼu koio‑n nuu‑ia:
Taa‑ro Ianyuux,
Ia tuu andɨu,
na jaʼan koio‑da xa ii‑n,
te na koo koio‑da xañuʼu nuu‑n.
10 Na jaʼan koio‑da xa taxnuni‑n nuu‑da ntdaa‑da xa ka kuu‑da ñayiu ñuñayiu.
Nani ka kida ia xtuu andɨu xa juini‑n,
dani na kada ñayiu ñuñayiu.
11 Taxi‑n xa kax xa koʼo koio‑da vitna nani kida‑n ndɨkɨu ndɨñuu.
12 Xijan taʼu‑da nuu‑n xa nani ka taxkanu ini‑da ñayiu kida ñaʼa ɨɨn xa kida ñaʼa‑i,
dani taxkanu ini ñaʼa‑n hora ka kida‑da kuechi.
13 Kada‑n xa maxku dajaʼan ñaʼa Kuiʼna xa kada koio‑da kuechi;
kada‑n xa maxku kada koio ka‑da xaloko.
Duʼa kajan taʼu koio‑n nuu Ianyuux.
14 ʼNux taxkanu ini koio‑n ñayiu n‑kida ñaʼa ɨɨn xa n‑kida ñaʼa‑i,
taxkanu ini ñaʼa Taa‑ro Ianyuux,
Ia tuu andɨu.
15 Nux ma taxkanu ini‑n xa n‑kida ñaʼa ñayiu jan,
dani Taa‑ro Ianyuux,
ma taxkanu ini‑ia kuechi n‑ka kida‑n.
Janda io xa kada ñayiu hora na koo ndite‑i
16 ʼNux ɨɨn kɨu nyaka ma kaxi koio‑n xaxeʼe xa xndaxio ndite‑n,
maxku kada koio‑n na ka kida se kida nga xa vaʼa‑s chi xndaa nuu‑s xa kukoʼyo ini‑s.
Ka dataka‑s idi dɨkɨ‑s te kuiʼa xndaa nuu‑s xa na kundeʼa ñayiu xa xneʼe ii‑s.
Xandaa xakuiti xa xá n‑ka niʼi‑s taʼu‑s,
te ña tuu na taʼu‑s koo andɨu.
17 Na koo ndite mee‑n xa xneʼe ii‑n ɨɨn kɨu nyaka,
chiʼi koio‑n aciti dɨkɨ‑n,
tniʼu‑n dɨkɨ‑n,
najini‑n nuu‑n
18 xa maxku jini ñayiu xa xneʼe ii‑n.
Kundeʼa ñaʼa Taa‑ro Ianyuux juini ña kanda ndeʼa‑n‑ia,
te dananitaʼu ñaʼa‑ia.
Andɨu kuu nuu na kunevaʼa‑ro ɨɨn xa kunevaʼa‑ro
19 ʼMaxku kaya koio kueʼe ndatniu‑n ñuñayiu,
chi kɨu tkidi xaxii‑ro ñuñayiu,
te nanedɨʼu dava ka xaxii‑ro.
Dɨuni ka xanu ñaduʼu yeʼe te ka kɨu‑s veʼe‑ro juini ndiʼu vaʼa,
te ka duʼu‑s.
20 Kada koio xa juini Ianyuux te kueʼe xaxii‑n koo andɨu nuu ñayo tkidi kɨu ndatniu‑ro.
Dɨuni ña nanedɨʼu dava ka xaxii‑ro.
Dɨuni ña yoo na ñaduʼu xanu yeʼe‑ro xa duʼu ñaʼa‑s.
21 Nuu io xaxii‑n,
ijan jun ini‑n xa kutuu koio‑n.
22 ʼKuenda kɨu ɨɨn xa dakutnuni kuu nduchi nuu‑ro.
Nux io vaʼa nduchi nuu‑n,
kutnuni vaʼa ini‑n xa ndeʼa‑n,
23 Nux ka jandixa‑n ñayiu jaʼan ɨɨn xa ña ndaa,
tunee tuduʼa‑n.
Maxku jandixa‑n ntdaa xa ka jaʼan ñayiu ñuu‑n vaxi,
chi ñadu ntdaa xa ka jaʼan‑i ndaa.
24 ʼÑayo ɨɨn se xinokuechi io uu xtoʼo chi nux uu‑s na koo jini uʼu‑s ɨɨn‑s,
te juemani‑s ɨnka‑s;
a kada‑s ntdaa xa juini ɨɨn‑s,
te jini uʼu‑s ɨnka‑s.
Mayo‑n ndaku xa junukuechi‑n nuu Ianyuux nux mee ni xa kadatniu‑n xa koo xaxii‑n,
te ña tuu nax kada‑n xaxeʼe Ianyuux.
Ndeka Ianyuux ñayiu kuu daʼya‑ia
25 ʼMaxku kunduu ini‑n nuu nax kaxkoʼo‑n,
nax kundix kudaʼu koio‑n,
chi ndandɨʼɨ ka mee‑n dada xa kaxi xa koʼo‑n.
Ndandɨʼɨ ka‑n dada daʼma‑n.
26 Kundeʼa koio janda ka yaʼa kɨt ka ndava.
Ñayo‑tɨ dadaʼu trɨu ni ñayo‑tɨ nataxtnaʼa trɨu.
Ñayo‑tɨ chiʼi trɨu veʼe‑t.
Juini ñayo‑t chiʼi trɨu veʼe‑tɨ,
ko ka niʼi‑tɨ xa ka xaxi‑tɨ,
chi dakaxi Ianyuux‑tɨ.
Vichi ka yodo yaʼu ndoʼo dada kɨt ijan.
27 Maxku yo kunduu ini‑n,
chi ni mayo‑n ndaku xa dakueʼnu ka‑n mee‑n,
ni dava metro ma kueʼnu ka‑n.
28 Maxku kunduu ini koio‑n nuu nax kundix kudaʼu‑n.
Kundeʼa koio xa vaʼa xaʼnu ita liriu.
Ñatu kidatniu‑ta.
Ñatu kava‑ta yuʼa.
29 Juini vili n‑kaa daʼma n‑xo xiʼno Salomón,
ko vili ka kaa ita liriu dada daʼma n‑xo xiʼno‑s.
30 Ite xaʼnu vitna tnee kayu xiti xitnu.
Ite ijan n‑kida Ianyuux xa vili n‑kaa.
Naka mee‑n,
ma ku kada‑ia xa kundix kudaʼu‑n.
Naka itaʼu ni ka kukanu ini‑n‑ia.
31 Maxku kundu ini koio‑n.
Maxku jaʼan koio‑n:
“¿Nax kaxkoʼo‑ro?
¿Nax kundix kudaʼu‑ro?”,
32 chi ñayiu ña ka jandixa Ianyuux,
yo xyɨ ini‑i xa niʼi‑i ntdaa xijan.
Xá naʼa Taa‑ro Ianyuux xa ntdaa xijan ka ndoñuʼu‑n.
33 Naa xa jun ini koio‑n xijan,
ndukundee koio xa kɨu tnaʼa‑n nuu ñayiu ka jandixa xa taxnuni Ianyuux nuu‑i.
Dɨuni ndukundee xa jandixa‑n tnuʼu‑ia,
te taxi‑ia ntdaa xa ka ndoñuʼu‑n xa xtuu‑n ñuñayiu.
34 Maxku kɨ ini koio‑n xa yaʼa tnee ida,
chi tuku xa yaʼa vitna te tuku xa yaʼa tnee.
Ndaʼu ka yaʼa‑n,
chi kueʼe xa kuu ntdantuʼu kɨu,
te nuu ndaʼu ka na yaʼa‑n ɨɨn kɨu ma kundee ka ini‑n —kuu‑ia,
xiaʼan‑ia.