N‑dakuaʼa Jesús ñayiu
5
N‑xini Jesús xa kueʼe ñayiu xyuku nuu‑ia,
te n‑xe xee‑ia ɨɨn yuku,
te n‑nukoo‑ia ijan.
N‑ka xetuʼa ñaʼa se dakuaʼa‑ia.
2 N‑kixeʼe‑ia xa dakuaʼa‑ia‑s xiʼin ñayiu xyuku ijan.
Xiaʼan‑ia:
3 —Na jaʼan‑r xa ñayiu ka xani ini xa ma dananitaʼu ñaʼa Ianyuux xaxeʼe xa yo n‑ka kida‑i kuechi,
te n‑ka natu ini‑i xa n‑ka kida‑i kuechi,
naka taʼu‑i chi kɨu tnaʼa‑i nuu ñayiu ka jandixa xa taxnuni Ianyuux nuu‑i.
4 ʼÑayiu ka ndaʼi xaxeʼe xa yo ka kukoʼyo ini‑i xa n‑ka kida‑i kuechi,
naka taʼu‑i chi kundaʼu ini ñaʼa Ianyuux,
te ma kukoʼyo ini ka‑i.
5 ʼÑayiu ka xani ini xa ka kuu‑i ñayiu dakuu nga,
te dɨuni ka xani ini‑i xa ñatu ndandɨʼɨ‑i,
naka taʼu‑i chi kendoo‑i xiʼin ñuʼu n‑xiaʼan Ianyuux xa juñaʼa‑ia.
6 ʼÑayiu io anu xa kada koio‑i xa juini Ianyuux,
naka taʼu‑i chi kada‑i ntdaa xijan,
te kudɨ ini‑i.
7 ʼÑayiu kundaʼu ini ɨnka ñayiu,
naka taʼu‑i chi kundaʼu ini ñaʼa Ianyuux.
8 ʼÑayiu n‑kida Ianyuux xa n‑ndunini‑i,
naka taʼu‑i chi jini‑i‑ia.
9 ʼÑayiu kida xa ka ndumani nuu tnaʼa ɨnka ñayiu,
naka taʼu‑i chi jaʼan Ianyuux xa kuu‑i daʼya‑ia.
10 ʼÑayiu kida xa juini Ianyuux te ndaʼu yaʼa‑i xaxeʼe‑ia,
naka taʼu‑i chi jɨʼɨn‑i nuu taxnuni‑ia.
11 ʼNaka taʼu kuu koio‑n hora kuiʼa na jaʼan ñaʼa ñayiu te kada uʼu ñaʼa‑i te tekuechi neñuu ñaʼa‑i.
Ntdaa xijan kada ñaʼa‑i xaxeʼe ruʼu.
12 Io xa kuvete‑n.
Io xa kudɨ ini koio‑n chi yo kueʼe xa io andɨu taxi Ianyuux xaxeʼe xa daa yaʼa‑n.
Duʼa n‑ka kida uʼu ñayiu xanaʼa se n‑ka jaʼan tnuʼu Ianyuux nuu ñayiu na ta koo koio ka‑n.
N‑kakuneʼe Jesús ñɨɨ́ xiʼin ngandii
13 ʼKa kuu‑n ná kuu ñɨɨ́.
Nux ñatuka ede ñɨɨ́,
ma kuu xa nduu ede.
Ña xiniñuʼu ka.
Kate‑ro te jueñi niʼno nga‑ro.
14 Dɨuni ka kuu‑n ná kuu ngandii xa datnuni‑ia ñuñayiu.
Ná kuu ɨɨn ñuu katuu nuu yuku dujun ka kuu‑n xa ñatu yɨvaʼa.
15 Ñayo ñayiu natnuu candil te chindeyu‑i maquila.
Ñatu daa kida‑i chi jandodo‑i candil jan ɨɨn nuu dujun na kuaʼa na kuu kanda nituʼu xiti veʼe‑i.
16 Dani ndoʼo ɨɨn ɨɨn‑n,
kada‑n xa vaʼa xa na kundeʼa ñayiu ñuñayiu xa ka kida‑n xavaʼa na kuaʼa na ndadakaʼnu‑i Taa‑ro Ianyuux,
Ia tuu andɨu.
N‑kakuneʼe Jesús ley n‑chidotnuni Moisés
17 ʼMaxku kani ini koio‑n xa tniu‑r kuu xa dita‑r ley n‑chidotnuni Moisés xiʼin xa n‑ka chidotnuni se n‑ka jaʼan tnuʼu Ianyuux nuu ñayiu.
Ma daa kada‑r,
chi kada‑r xa jɨn tnaʼa xa xyodotnuni.
18 Xandaa xakuiti na jaʼan‑r xa nɨni na kavatuu ka ñuñayiu xiʼin andɨu ma dita Ianyuux ni ɨɨn tnuʼu n‑chidotnuni Moisés.
Ma dita‑ia ni ɨɨn letra,
ni ɨɨn parti tnuʼu‑ia nde na jɨn tnaʼa ntdaa xa n‑chidotnuni‑s.
19 Nux ma jandixa‑n idii ni xa jaʼan ley Ianyuux,
juini ɨɨn tnuʼu luchi kuu‑i,
ma jiniñuʼu vaʼa‑n nuu taxnuni Ianyuux.
Dɨuni ma jiniñuʼu vaʼa‑n nuu taxnuni Ianyuux nux jaʼan‑n nuu ɨnka ñayiu xa maxku jandixa‑i xijan.
Nux jandixa koio‑n tnuʼu n‑chidotnuni‑s te jaʼan‑n nuu ñayiu xa na jandixa‑i xaʼa,
nduu‑n ñayiu ndandɨʼɨ andɨu nuu taxnuni Ianyuux.
20 Nux ka kuxee ini‑n nuu Ianyuux ná ka kuxee ini se dakuaʼa ñayiu ley n‑chidotnuni Moisés xiʼin se fariseu nuu‑ia,
ma yoo‑n jɨʼɨn andɨu nuu taxnuni‑ia.
N‑jaʼan Jesús xa maxku kaʼni‑ro ndɨyɨ
21 ʼKa xini‑n nax n‑ka jaʼan se xanaʼa nuu xixitna‑n.
N‑ka xiaʼan‑s:
“Maxku kaʼni‑n ndɨyɨ.”
Ndeda ɨɨn‑n na kaʼni ndɨyɨ,
ndadandaa Ianyuux kuechi‑n.
22 Ko mee‑r jaʼan xa nux diko ni na kiti ini‑n nuu ñanitnaʼa‑n,
ndadandaa Ianyuux kuechi‑n.
Nux kuiʼa na jaʼan‑n ñayiu netnaʼa xiʼin‑n,
ndadandaa juxtixia Israel kuechi‑n.
Nux jaʼan‑n nuu‑s:
“Ku kuʼu‑n”,
jɨʼɨn‑n nuu nuʼu koko.
23 Nux jɨʼɨn‑n veñuʼu te jɨn tuʼa‑n nuu altar xa doko‑n ɨɨn xa doko‑n nuu IanyuUx te ijan najaʼan‑n xa n‑tuyɨka ɨɨn ñayiu n‑ndatnuʼu xiʼin‑n xaxeʼe tnuʼu loko n‑jaʼan‑n nuu‑i,
24 dandoo‑n xa doko‑n jan yatni altar te jɨn ndatnuʼu mani‑n xiʼin ñayiu ijan.
Nde na ndvaʼa anu‑i,
ijan dada jɨʼɨn‑n te doko‑n xa neʼe‑n juaʼan nuu altar Ianyuux.
25 Nux kuu ɨɨn ñayiu jantnaʼa xiʼin‑n xa kandeka ñaʼa‑i jɨʼɨn nuu juxtixia,
hora ijan ndumani‑n xiʼin‑i na ñaʼa kandeka ñaʼa‑i jɨʼɨn nuu‑s,
te jɨn ndeka ñaʼa‑s nuu se xndee ñayiu xyɨndiʼu vekaa te chindiʼu ñaʼa‑s.
26 Xandaa xakuiti ma kee‑n nde na chiyaʼu‑n ntdandituʼu tvini kajan juxtixia jan.
N‑kakuneʼe Jesús xa maxku kava ñayiu xiʼin ñayiu ñatu n‑tnundaʼa xiʼin‑i
27 ʼKa xini‑n xa n‑jaʼan xixitna‑n:
“Nux io ñadɨʼɨ‑n maxku kava‑n xiʼin ɨnka ñadɨʼɨ.
Nux io yɨɨ‑n,
maxku kava‑n xiʼin ɨnka seyɨɨ.”
28 Mee‑r jaʼan xa nux diko ni na kundeʼa‑n ɨɨn ñadɨʼɨ te kukajan ini‑n‑ña,
xá n‑kida‑n kuechi.
29 Nux ɨɨn nduchi nuu‑n kida xa xko kida‑n kuechi,
tava‑n te dajane‑n chi vaʼa ka nux na kuita ɨɨn nduchi nuu‑n dada xa jɨʼɨn ntdantuʼu‑n xiʼin anu‑n andea.
30 Nux ɨɨn ndaʼa‑n kida xa ka kida‑n kuechi,
kaʼnde‑n te dajane‑n chi vaʼa ka nux na kuita ɨɨn ndaʼa‑n dada xa jɨʼɨn ntdantuʼu‑n xiʼin anu‑n andea.
31 ʼDɨuni n‑jaʼan xixitna‑n:
“Se juini xa dandoo‑s ñadɨʼɨ‑s,
na kadakutu‑s tutu yodotnuni xa n‑dandoo‑s‑ña.”
32 Mee‑r jaʼan xa nux ña n‑kida ɨɨn ñadɨʼɨ io yɨɨ kuechi xiʼin ɨnka seyɨɨ,
te dandoo ñaʼa yɨɨ‑ña,
kuechi mee‑s kuu xa kada‑ña kuechi xiʼin ɨnka seyɨɨ.
Dani se n‑natnundaʼa xiʼin ñadɨʼɨ n‑dandoo ñaʼa yɨɨ‑ña,
kada‑s kuechi xiʼin‑ña.
N‑jaʼan Jesús xa maxku kada‑ro uxi dɨkɨ ndaʼa‑ro
33 ʼDɨuni ka xini‑n xa se xanaʼa n‑jaʼan nuu xixitna‑n:
“Nux kada‑n uxi dɨkɨ ndaʼa‑n xa chinaa‑n xa juñaʼa‑n ɨɨn xa juñaʼa‑n Ianyuux,
juñaʼa‑n xijan xa na jɨn tnaʼa xa n‑jaʼan‑n.”
34 Mee‑r jaʼan xa maxku chinaa koio‑n.
Maxku chinaa‑n andɨu,
chi andɨu nukoo Ianyuux xa taxnuni‑ia.
35 Maxku chinaa‑n nuu ñuʼu chi neñi niʼno xeʼe Ianyuux nuu ñuʼu.
Maxku chinaa‑n Jerusalén,
chi Ia ndadakaʼnu‑ro taxnuni ñuu ijan.
36 Maxku kada koio‑n uxi dɨkɨ ndaʼa‑n xa chinaa‑n,
ni maxku chinaa‑n dɨkɨ‑n,
chi ni idii idi dɨkɨ‑n,
ma ndaku‑n xa ndada kuixi‑n a ndada tnuu‑n.
37 Jaʼan ndaa‑n.
Jaʼan‑n na io na juaʼan.
Nux na kadavaʼa vete‑n tnuʼu,
Kuiʼna dajaʼan ñaʼa.
Maxku dandenaa ɨɨn ñayiu xa n‑kida ñaʼa ɨnka ñayiu
38 ʼDɨuni ka xini‑n tnuʼu n‑jaʼan xixitna‑n:
“Nux na tava ñayiu ɨɨn nduchi nuu‑n,
io xa natava naa juxtixia nduchi nuu‑i.
Nux na kineʼe ñayiu nuʼu‑n,
io xa kineʼe juxtixia nuʼu‑i.”
39 Ko ruʼu jaʼan xa maxku kani‑n ñayiu janñaʼa.
Maxku daa kada‑n.
Nux na kani ñayiu kuñu nuu‑n lado kuaʼa,
ngoneʼe‑n xa na kani‑i ɨnka lado.
40 Nux tekuechi ñaʼa ñayiu nuu juxtixia ɨɨn xa tekuechi ñaʼa‑i,
te juini‑i xa tnɨɨ‑i duʼnu‑n,
juñaʼa‑n te juñaʼa‑n kotona‑n tuku.
41 Nux ka kidajuexa se taxnuni xa kaneʼe‑n ɨɨn xa vee jɨʼɨn ɨɨn yodo kilómetro,
uni kilómetro kaneʼe xijan jɨʼɨn.
42 Nux na kajan nuu ñayiu xaxii‑n juñaʼa nuu‑n,
te maxku dangondita duʼa nga‑n‑yɨ.
43 ʼDɨuni ka xini‑n xa xixitna‑n n‑jaʼan:
“Juemani koio ñayiu io yatni xiʼin‑n te jini uʼu koio se xini uʼu ñaʼa.”
44 Mee‑r jaʼan juemani koio ñayiu ka xini uʼu ñaʼa,
te kajan taʼu koio xa na kutuu vii kutuu vaʼa ñayiu ka kida uʼu ñaʼa xiʼin ñayiu kuiʼa ka jaʼan ñaʼa.
45 Daa kada koio,
chi daa kida Taa‑ro Ianyuux,
Ia tuu andɨu.
Kida‑ia xa ndii ngandii nuu io ñayiu loko,
nuu io ñayiu vaʼa.
Dɨuni dajuun‑ia dau nuu io ñayiu loko,
nuu io ñayiu vaʼa.
46 Nux mee ni ñayiu ka xemani ñaʼa ka xemani‑n,
ma niʼi koio‑n taʼu‑n.
Ntdaa ñayiu duʼa ka kida,
nde se ka xijan tvini nandajan gobierno duʼa ka kida.
47 Nux mee ni nuu ñani tnaʼa‑n xndaxio‑n xañuʼu,
ñatu io vaʼa xa duʼa ka kida‑n.
Davaʼa nga ñayiu daa ka kida,
nde ñayiu ña ka najaʼan Ianyuux duʼa ka kida.
48 Jandixa koio ntdaa tnuʼu dijan n‑jaʼan‑r,
te kada‑n xa ndaa na kida Taa‑ro Ianyuux,
Ia tuu andɨu.