N‑juini Kuiʼna xa dajaʼan‑i Jesús xa kada‑ia kuechi
4
Ijan dada ndeka Espíritu Ianyuux Jesús juaʼan nuu ñayo io te ñatu nga juun dau.
Ijan n‑kuu Kuiʼna xa dajaʼan ñaʼa‑i xa kada‑ia kuechi.
2 Ña tuu nax n‑xaxi‑ia uu diko nduu,
uu diko niu.
Ijan dada n‑kojon‑ia.
3 Te n‑xee Kuiʼna xa dajaʼan ñaʼa ntuku‑i xa kada‑ia kuechi.
N‑jaʼan‑i nuu‑ia:
—Nuxa ndaa xa Daʼya Yɨɨ Ianyuux kuu‑n,
juñaʼa yuú yaʼa na nduu‑i tila.
4 N‑jaʼan Jesús nuu‑i:
—Yodotnuni tnuʼu Ianyuux xa:
“Io xa kaxi koio ñayiu na kuaʼa kundito koio‑i,
ko ñadu diko ni xijan io xa kada‑i,
chi dɨuni io xa kunini‑i ntdandituʼu tnuʼu Ianyuux.”
5 Ijan dada ndeka Kuiʼna Jesús juaʼan Jerusalén xa jandodo ñaʼa‑i nuu dujun ka dɨkɨ veñuʼu ñuu ii jan.
6 Xiaʼan‑i nuu‑ia:
—Nux ndaa xa Daʼya Yɨɨ Ianyuux kuu‑n jungava nde nuu ñuʼu jan,
chi yodotnuni tnuʼu Ianyuux:
“Taʼu tniu Ianyuux nuu ángel,
ia ka xinokuechi nuu‑ia,
xa junuu ñaʼa‑ia.”
Dɨuni yodotnuni tnuʼu‑ia xa:
“Junuu ñaʼa koio‑ia xa na ñaʼa tnukueʼe xeʼe‑n nuu yuu” —kuu Kuiʼna,
xiaʼan‑i.
7 Te xiaʼan Jesús:
—Dɨuni yodotnuni xa:
“Maxku kototnuni‑n Ianyuux,
Ia kuu Xtoʼo‑ro.”
8 Dɨuni ndeka Kuiʼna Jesús juaʼan ɨɨn dɨkɨ yuku yo dujun.
N‑dandeʼa‑i Jesús ntdaa ñuu ñuñayiu nuu taxnuni ntdaa se ka taxnuni ntdaa ñuu ijan.
N‑dandeʼa ñaʼa‑i kueʼe ñuu vili xndaxio ijan.
Yo yaʼu xa io ijan.
Xiaʼan‑i nuu‑ia:
9 —Ntdaa xaʼa taxi‑r nux njuiin xiti‑n nuu‑r te nakuetu‑n nuu‑r.
10 Xiaʼan Jesús:
—Juaʼan Satanás chi duʼa yodotnuni tnuʼu Ianyuux:
“Nuu Ianyuux,
Ia kuu Xtoʼo‑ro,
njuiin xiti koio.
Nakuetu koio te kajan taʼu koio nuu‑ia.
Nuu mee ni‑ia junukuechi koio.”
11 Ijan dada n‑dandoo ñaʼa‑i,
te n‑ka xee ángel,
ia ka xinokuechi nuu Ianyuux nuu Jesús xa junukuechi‑ia nuu‑ia.
N‑kixeʼe Jesús xa dakuaʼa‑ia ñayiu
12 N‑teku Jesús xa yɨndiʼu Sua vekaa.
Xaxeʼe xijan juan nuʼu‑ia Nazaret,
distrito Galilea,
13 ko ña n‑ndoo‑ia Nazaret xa kutuu‑ia ijan.
N‑nangondita‑ia Capernaum.
Capernaum katuu yatni yuʼu mar yatni nuu xndatuu ñuu nani Zabulón xiʼin ñuu nani Neftalí.
14 N‑naxee‑ia ijan xa na jɨn tnaʼa tnuʼu n‑chidotnuni ɨɨn se n‑jaʼan nuu ñayiu xa n‑jaʼan Ianyuux.
Isaías n‑xo nani‑s.
Duʼa n‑chidotnuni‑s:
15 Kakuneʼe‑da ñayiu io Zabulón xiʼin ñayiu io Neftalí.
Galilea kuu distrito‑i.
Ijan xndaxio ñayiu ñatu kuu daʼya dana Israel.
Ichi xiti distrito nuu io‑i juaʼan Mar Galilea.
Galilea katuu yuʼu Deʼva Jordán nuu xika ndute.
16 Jini ñayiu Ia juña tnuʼu ñaʼa jundu kuu Ianyuux.
Kuenda kɨu nuu nee nuu kuú‑i ka xikonuu‑i,
xa ñatu ka kutnuni ini‑i jundu kuu‑ia,
kuu tnuʼu n‑chidotnuni Isaías.
17 Tiempu ijan n‑kixeʼe Jesús xa dakuaʼa‑ia ñayiu.
N‑jaʼan‑ia nuu‑i:
—Natu ini koio xa n‑ka kida‑n kuechi,
chi vax kuyatni kɨu taxnuni Ianyuux nuu ñayiu ñuñayiu.
N‑jaʼan Jesús nuu koon seyɨɨ xa na nkuitandijun ñaʼa‑s
18 Nɨni xika‑ia yuʼu Mar Galilea,
te n‑xini‑ia se ndeka tnaʼa xiʼin ñani‑s.
Ɨɨn‑s nani Simón.
Dɨuni nani‑s Spedru.
Ndrixi nani ɨnka‑s.
Ka dakeé‑s ñunu‑s nuu ndute hora ijan,
chi se ka tava chaka ka kuu‑s.
19 Te n‑jaʼan Jesús nuu‑s:
—Nkuitandijun ñaʼa koio,
te kada‑r xa dataka‑n ñayiu ná dataka‑n chaka xiʼin ñunu‑n.
20 Hora ijan ni n‑ka dandoo‑s ñunu‑s,
te n‑ka xe kuitandijun‑s Jesús.
21 N‑xini ntuku‑ia ɨnka se ndeka tnaʼa xiʼin ñani‑s,
te n‑kana‑ia‑s.
Ɨɨn‑s nani Jacobo.
Ɨnka‑s nani Sua.
Ka kuu‑s daʼya yɨɨ Zebedeo.
Xñutuu‑s xiʼin taa‑s xiti barcu xa ka ndadavaʼa‑s ñunu‑s.
22 Hora ijan ni n‑ka dandoo‑s taa‑s xiʼin barcu‑s,
te n‑ka xe kuitandijun‑s‑ia.
N‑ndadavaʼa Jesús ñayiu ka kuʼu
23 Ijan dada n‑xikonuu Jesús nituʼu distrito Galilea.
N‑dakuaʼa‑ia ñayiu Israel xiti veñuʼu kuechi ñuu xiʼin ñuu.
N‑jaʼan‑ia tnuʼu Ianyuux nuu ñayiu.
N‑kakuneʼe‑ia xa taxnuni Ianyuux nuu ñayiu ñuñayiu.
Tnuʼu vaʼa kuu.
Dɨuni n‑ndadavaʼa‑ia ñayiu ka tnaʼa ntdaa nuu kueʼe.
N‑ndadavaʼa‑ia nuu ka xaxiaʼan du.
24 Nituʼu nación Siria n‑ka teku ñayiu xa n‑kida‑ia.
N‑ka xe ndeka ñayiu ijan ñayiu ka tnaʼa tɨtnɨ nuu kueʼe xiʼin ñayiu ndaʼu ka yaʼa xaxeʼe kueʼe ka tnaʼa‑i.
Xndeka‑i ñayiu xñuʼu ñaʼa xaloko n‑ka xeʼen.
N‑ka xe ndeka‑i ñayiu tnaʼa kueʼe xiyɨʼɨ du.
N‑ka xe ndeka‑i ñayiu n‑xiʼí xeʼe,
te n‑ndadavaʼa ñaʼa Jesús.
25 N‑ka xe kuitandijun ñaʼa ñayiu tɨtnɨ ñuu.
Ka kuu‑i ñayiu Galilea,
ñayiu Decápolis,
ñayiu Judea,
ñayiu io yatni yuʼu Deʼva Jordán xiʼin ñayiu Jerusalén du.