N‑dakuaʼa Sua Bautista ñayiu nuu ñayo io
3
Tiempu ijan n‑xikonuu Sua Bautista distrito Judea nuu ñayo io,
te ñatu nga juun dau.
2 N‑jaʼan‑s nuu ñayiu n‑ka xo taka ijan:
—Natu ini koio xa n‑ka kida‑n kuechi chi vax kuyatni kɨu xa nde andɨu taxnuni Ianyuux nuu ñayiu ñuñayiu.
3 Nani n‑chidotnuni Isaías,
se n‑jaʼan nuu ñayiu xa n‑jaʼan Ianyuux daa n‑jaʼan Sua:
Xee kana ɨɨn se kutuu nuu ñayo io te ñatu nga juun dau:
“Kada tuʼa‑n mee‑n ɨɨn ɨɨn‑n xa na kuaʼa kueka koio‑n Ianyuux,
Ia kuu Xtoʼo‑ro.
Kuenda kɨu ichi ka kuu‑n.
Ndadandaa‑n ichi jan”,
kuu Sua,
n‑xo jaʼan‑s.
4 Ñɨɨ camello n‑kuu daʼma‑s,
te n‑xo duku cinturón ñɨɨ dujun kaʼa‑s.
N‑xo xaxi‑s tɨka langosta xiʼin ndudi ñuñu io yuku.
5 N‑ka xo taka ñayiu io Jerusalén nuu n‑xo dakuaʼa‑s‑yɨ xa kunini koio‑i tnuʼu‑s.
Dɨuni n‑ka xo taka ñayiu io nituʼu distrito Judea nuu‑s xiʼin ntdaa ñayiu io yatni yuʼu deʼva Jordán nuu xika ndute.
6 Ñayiu n‑ka natu ini xa n‑ka kida‑i kuechi,
n‑dajuendute‑s‑yɨ nuu ndute xika deʼva Jordán.
7 Kueʼe se fariseu xiʼin se saduceu n‑ka xo xeʼen nuu‑s xa dajuendute ñaʼa‑s,
te n‑xo jaʼan‑s nuu‑s:
—Daʼya Kuiʼna ka kuu‑n.
¿Jundu n‑kachi tnuʼu ñaʼa xa kaku koio‑n nuu Ianyuux?
¿Ka kachi ini‑n xa hora na kixi‑ia ma kiti ini‑ia nuu‑n a?
¿Jundu n‑kachi tnuʼu ñaʼa xa ma ndadandaa‑ia kuechi‑n?
8 Nux xandaa xakuiti n‑ka natu ini‑n xa n‑ka kida‑n kuechi,
kada koio xavaʼa.
9 Maxku ku juñaʼa tnaʼa‑n:
“Ndandɨʼɨ‑ro chi daʼya dana Abraham ka kuu‑ro”,
chi ruʼu jaʼan xa kuaʼa Ianyuux xa kada‑ia xa yuú yaʼa nduu daʼya dana Abraham.
10 Ka kuu‑n kuenda kɨu yutnu taʼnde xa katuu kaa xeʼe‑tnu.
Ntdaa yutnu ñatu juun xavidi vaʼa,
taʼnde‑tnu,
te jɨʼɨn‑tnu nuu nuʼu koko.
11 Ruʼu dajuendute ñaʼa nuu ndute,
ko na xinokava tniu‑r,
te kixi Ia kixi.
Tuku kada‑ia.
Taxnuni ka‑ia dada ruʼu.
Ni ñatu natau xa junukuechi‑r nuu‑ia,
ni xa kaneʼe‑r ndixa‑ia chi se dakuu nga kuu‑r.
Mee‑ia kada xa juʼun ñaʼa Espíritu Ianyuux,
te ndadandaa‑ia kuechi‑n.
12 Kuenda kɨu ɨɨn se neʼe pala‑s xa dandechi‑s trɨu‑s kuu‑ia.
Kuenda kɨu trɨu jan xiʼin paja kuu ñayiu.
Se ijan,
nataxtnaʼa‑s trɨu‑s,
te chiʼi‑s ɨɨn veʼe,
te teñuʼu‑s paja nuu nuʼu ku koko nɨkava nɨkuita —n‑xo kuu Sua,
n‑xo xiaʼan‑s.
N‑xendute Jesús
13 Ijan dada n‑kee Jesús distrito Galilea.
N‑xee‑ia yuʼu ndute xika Deʼva Jordán xa dajuendute ñaʼa Sua.
14 Ñatu n‑juini Sua xa dajuendute‑s‑ia.
N‑jaʼan‑s nuu‑ia:
—¿Nakuenda xa daña ku dajuendute ñaʼa,
te mee‑n io xa dajuendute ñaʼa‑n?
15 Te n‑jaʼan Jesús nuu‑s:
—Kada naʼi chi daa ñu ini Ianyuux xa kada‑ro ntdaa xa n‑taʼu tniu‑ia.
Ijan dada n‑xejoon Sua
16 xa n‑dajuendute‑s Jesús.
N‑nane‑ia nuu ndute,
te n‑najaan andɨu.
N‑xini Jesús xa vax juun Espíritu Ianyuux nde andɨu.
N‑xe juindodo‑ia dɨkɨ‑ia.
Data n‑nduu‑ia.
17 N‑jaʼan Ianyuux nde andɨu:
—Ia yaʼa kuu Daʼya Yɨɨ Mani‑r.
Vichi tna ini‑r xa kida‑ia —kuu‑ia.