N‑ka kixee se ka xinitnuni xa kotoniʼni koio‑s Jesús
2
N‑kaku Jesús ñuu nani Belén,
distrito Judea,
daa n‑taxnuni se kuu Herodes.
Nu n‑kaku‑ia,
n‑ka kixi se ka xinitnuni xa ndeʼa‑s chudini Jerusalén.
Xika n‑ka kixi‑s.
N‑ka kee‑s do nuu kane ngandii.
2 N‑ka xijan tnuʼu‑s nuu ñayiu Jerusalén:
—¿Ndexu n‑kaku seluchi taxnuni nuu ñayiu Israel?
N‑ka xini‑da ɨɨn chudini n‑kee do nuu kane ngandii,
te ndeka ñaʼa‑tɨ vaxi.
Xaxeʼe xijan n‑ka kixee‑da xa ndadakaʼnu koio‑da‑s —ka kuu‑s,
ka xiaʼan‑s.
3 Nu n‑teku se kunxaʼnu nani Herodes xiʼin ñayiu Jerusalén xa n‑ka jaʼan se ijan,
te n‑ka chi ini‑s.
4 Xijan kuu xa n‑nadataka Herodes ntdaa dutu ka taxnuni xiʼin se ka tuʼa vaʼa ley n‑chidotnuni Moisés,
te n‑xijan tnuʼu‑s nuu ndexu kaku Cristu.
5 Te ka xiaʼan‑s:
—Kaku‑ia Belén,
distrito Judea chi duʼa n‑jaʼan Ianyuux,
te duʼa n‑chidotnuni se n‑jaʼan nuu ñayiu xa n‑jaʼan Ianyuux:
6 Ndoʼo xa ka kuu‑n ñayiu io ñuu Belén distrito Judea,
nduu‑n ñayiu ndandɨʼɨ ka dada dava ka ñayiu ñuu io distrito Judea,
chi ñuu mee‑n kee ɨɨn se taxnuni.
Kuenda kɨu se ñunuu tkachi‑s ku kuu‑ia chi junuu‑ia ñayiu Israel.
7 Ijan dada naʼi ni n‑kana Herodes se ka xinitnuni xa xndeʼa‑s chudini,
te n‑xijan tnuʼu‑s nuu na kɨu na hora n‑ka xo ndeʼa‑s chudini jan.
8 Te n‑taʼu tniu‑s xa na jɨʼɨn koio‑s Belén.
Xiaʼan‑s:
—Juaʼan koio‑n,
te juen tnuʼu vaʼa koio‑n nuu jundu kuu seluchi jan,
te nde io‑s.
Na naniʼi‑n‑sɨ,
te nuniʼno ni kachitnuʼu ñaʼa‑n chi juini‑da xa jɨn ndadakaʼnu‑da‑s tuku.
9-10 Nu n‑yaʼa xa n‑ka xo nini‑s xa n‑jaʼan se kunxaʼnu jan,
n‑ka kee‑s;
ka xeʼen‑s.
N‑ndodo nuu chudini n‑ka xini‑s do nuu kane ngandii juaʼan nuu‑s.
Xaxeʼe xa n‑ka xo ndeʼa‑s chudini ndeka ñaʼa ichi juaʼan‑s,
yo vichi n‑ka kudɨ ini‑s.
Nde nuu kaa niu n‑nujuiin‑tɨ.
11 N‑ka kɨu‑s veʼe nuu n‑nujuiin‑tɨ,
te n‑ka xini‑s niu jan xiʼin María,
ñá kuu dɨʼɨ‑ia.
N‑ka xe juiin xiti‑s nuu‑ia,
te n‑ka ndadakaʼnu‑s‑ia,
te n‑ka najaan‑s xatnu kuechi ñuʼu xa yo yaʼu xa juñaʼa nga‑s‑ia.
N‑ka xiaʼan nga‑s oro xiʼin duxa estoraqui xiʼin ɨnka nuu duxa yo yaʼu.
12 Ijan dada n‑ka kachi xene se ka xinitnuni xa xndeʼa‑s chudini xa n‑xian tnuʼu ñaʼa Ianyuux xa maxku nangondita‑s xa nuʼu koio‑s nuu Herodes.
Te n‑ka xino‑s.
Ɨnka ichi juan nuʼu koio‑s xa juan nuʼu‑s ñuu‑s.
13 Nu juan nuʼu koio se ijan,
te n‑kachi xene José xa ɨɨn ángel,
ia xinokuechi nuu Ianyuux jaʼan nuu‑s.
N‑jaʼan‑ia:
—Ndokoo.
Kandeka niu xiʼin dɨʼɨ‑ia juaʼan Egipto.
Ijan kutuu koio‑n nde na kachi tnuʼu ñaʼa‑r nde kɨu na ndixi‑n yaʼa chi nduku Herodes niu xa kaʼni ñaʼa‑s.
14 N‑ndokoo‑s.
Ndeka‑s niu xiʼin dɨʼɨ‑ia juaʼan Egipto xa n‑ka xino‑s xakuaa ijan.
15 N‑ka xo tuu‑s ijan nde n‑xiʼí Herodes xa na jɨn tnaʼa xa n‑jaʼan Ianyuux nuu se n‑jaʼan nuu ñayiu xa n‑jaʼan Ianyuux.
Duʼa n‑chidotnuni‑s:
“N‑jaʼan‑r nuu Daʼya Yɨɨ‑r xa ndee‑ia Egipto.”
16 N‑tu ini Herodes xa n‑ka dandaʼu ñaʼa se ka xinitnuni jan,
te yo n‑kiti ini‑s te n‑tundaʼa‑s soldado‑s juaʼan Belén xiʼin ntaka ñuu xndatuu nɨkaduku Belén xa kaʼni koio‑s seyɨjɨn xiʼin nde sekuechi io uu kuia.
N‑kida‑s cuenta naxa daa yoo n‑yaʼa xa n‑kixeʼe xa ndii chudini ndeka se ka xinitnuni jan vaxi,
según n‑ka jaʼan mee se ijan.
17 Duʼa n‑xetnaʼa xa n‑chidotnuni Jeremías,
se n‑jaʼan tnuʼu Ianyuux nuu ñayiu:
18 Teku ñayiu xa yo ndeʼe ndaʼi koio ñadɨʼɨ ñuu Rama.
Daʼya dana Raquel ku kuu koio‑ña.
Yo ndeʼe ndaʼi koio‑ña xaxeʼe daʼya‑ña.
Yo ndeʼe ku tnau ini‑ña xaxeʼe‑s.
Ma ndiko anu‑ña xaxeʼe xa n‑ka xiʼí daʼya‑ña.
N‑ka nangondita Jesús xiʼin tadɨʼɨ‑ia Nazaret
19 N‑xiʼí Herodes,
te dani tuu José Egipto.
Ijan n‑kachi xene‑s xa n‑jaʼan ɨɨn ángel,
ia xinokuechi nuu Ianyuux nuu‑s.
Xiaʼan‑ia:
20 —Ndokoo.
Kandeka ia luchi xiʼin dɨʼɨ‑ia juan nuʼu Israel chi n‑ka xiʼí se n‑ka xo nduku ñaʼa xa kaʼni ñaʼa‑s —kuu‑ia,
xiaʼan‑ia.
21 N‑ndokoo José.
Ndeka‑s ia luchi jan xiʼin dɨʼɨ‑ia juan nuʼu Israel.
22 Nu n‑teku José xa Arquelao n‑nujuiin naa nuu taa‑s Herodes xa taxnuni‑s nuu ñayiu distrito Judea,
te n‑yuʼu‑s xa nuʼu‑s ijan.
N‑kachi xene‑s xa n‑jaʼan Ianyuux nuu‑s xa io kuu distrito Judea.
Xijan kuu xa n‑ka xino‑s.
Juan nuʼu‑s distrito Galilea.
23 Te n‑nukotuu‑s Nazaret.
Duʼa n‑xetnaʼa xa n‑chidotnuni se n‑jaʼan nuu ñayiu xa n‑jaʼan Ianyuux xa ku kuu‑ia se Nazaret.